1-2. (a) Olondaka vi sangiwa kelivulu lia Isaya 41:10 via kuatisa ndati manji Yoshiko? (b) Velie va pondola oku kuatisiwavo lolondaka via Yehova vi sangiwa ku Isaya 41:⁠10?

MANJI umue ukuekolelo o tukuiwa Yoshiko wa tambula esapulo limue lĩvi ku ndotolo. Ndotolo wo sapuila okuti o kuete lika olosãi vimue vioku kala lomuenyo. Yoshiko wa liyeva ndati? Eye wa ivaluka ocinimbu Cembimbiliya a sole calua, kelivulu lia Isaya 41:10. (Tanga.) Kuenje lutima wa tula wa sapuila ndotolo okuti ka kuete usumba, momo Yehova o kasi laye. * Olondaka viocinimbu eci via pamisa manjetu loku kolela lutima wosi ku Yehova. Ocinimbu eci ci pondolavo oku tu kuatisa poku liyaka lovitangi. Oco tu kũlĩhe ndomo tu pondola oku ci linga, tete tu kũlĩhĩsi esunga lieci Yehova a ecela esapulo liaco ku Isaya.

² Yehova tete wa tuma Isaya oku soneha olondaka evi, oco vi lembeleke va Yudea va laikele oku ambatiwa kumandekua ko Bavulono. Handi vali, Yehova wa teyuila olondaka viaco okuti ka vi kuatisa lika va Yudea, pole, vi kuatisavo afendeli vaye vosi koloneke vilo. (Isa. 40:8; Va Rom. 15:⁠4) Cilo tu kasi ‘koloneke via sulako yohali yalua’ kuenje tu sukilavo elembeleko lisangiwa kelivulu lia Isaya.​—⁠2 Tim. 3:⁠1.

3. (a) Olohuminyo vipi vi sangiwa kelivulu lia Isaya 41:10 okuti oco ocisonehua cunyamo 2019? (b) Momo lie tu sukilila olohuminyo viaco?

³ Vocipama cilo, tu konomuisa olohumiyo vitatu via  Yehova vi sangiwa kelivulu lia Isaya 41:10 okuti vi tu kuatisa oku pamisa ekolelo lietu: (1) Yehova o kala letu (2) eye Suku yetu, (3) o tu kuatisa. Etu tu sukila olohuminyo viaco, * momo tu liyakavo lovitangi ndevi via pita la manji Yoshiko. Tu sukilavo oku pandikisa kovina vĩvi vi pita voluali. Ocili okuti vamue pokati ketu va kasi oku lambalaliwa lolombiali. Omo liaco, tu konomuisi olohuminyo viaco vitatu.

4. (a) Ohuminyo yipi yatete tu konomuisa cilo? (Talavo etosi pombuelo yemẽla.) (b) Olondaka vipi vi lekisa okuti Yehova wa tu kapako? (c) O liyeva ndati poku yeva eci Yehova a popia?

⁴ Yehova tete o tu lembeleka lolondaka viokuti: “Ku ka kuate ohele, momo ñasi love.” * Yehova o lekisa okuti o kasi letu poku tu kapako loku lekisa ocisola kokuetu. Tala ndomo eye a lombolola ocikembe a tu kuetele. “Ove wa soliwa ca piãla lame,” oco ca popia Yehova. “Nda ku sumbila muẽle, kuenje hu sole cocili.” (Isa. 43:⁠4) Ka kuli lacimue ci pondola oku tateka Yehova oku lekisa ocisola caye ku vana vo vumba lekolelo; ocisola cocili a tu kuetele ca koleliwa. (Isa. 54:10) Ocisola caye kuenda ukamba waye u tu pamisa. Yehova koloneke vilo, o tu teyuilavo ndeci a linga lekamba liaye Avirama (Avirahama). Eye wo sapuila hati: “A Avirama, ku ka kuate usumba. Ame ndimbetateli yove.”​—⁠Efet. 15:⁠1.

5-6. (a) Tua kũlĩha ndati okuti Yehova o yongola oku tu kuatisa eci tu pita lovitangi? (b) Nye tua lilongisa kulandu wa manji Yoshiko?

⁵ Tua kũlĩha okuti Yehova o tu kuatisa eci tu liyaka lovitangi momo eye wa likuminya kafendeli vaye hati: “Eci o pita vovava ñala kumue love; leci o pita volondui ku vombi. Eci o pita vondalu ku pi, leci o pita vulienge ku kakuiwa.” (Isa. 43:⁠2) Olondaka evi vi lomboloka nye?

⁶ Yehova ka likuminyile okupako ovitangi tua siata  oku liyaka lavio, pole, eye ka ka ecelela okuti “olondui” viovitangi ale “ulienge” vi ka amamako oku tu talisa ohali. Eye wa likuminya okuti o kala letu, o tu kuatisa eci tu “pita” lovitangi. Yehova o ci linga ndati? Eye o tu kuatisa oku tula utima oco tu pandikise loku kakatela kokuaye ndaño ceci omuenyo wetu u kala kohele. (Isa. 41:13) Yoshiko, wa tukuiwa kefetikilo liocipama, wa limbuka okuti olondaka evi viocili. Omõlaye ufeko wa popia hati: “Tua komõha calua ndomo Ina a tula utima. Tua limbuka okuti Yehova wo wĩha ombembua yo vutima. Toke muẽle eci a panda koku fa, inange wa sapela lovifumelo kuenda olombei vikuavo catiamẽla ku Yehova kuenda kolohuminyo viaye.” Nye tu lilongisa kulandu wa manji Yoshiko? Tu lilongisa okuti, nda tua kolela kohuminyo ya Suku yokuti, “ñala kumue love” tu kuata utõi kuenda ongusu yoku pandikisa kovitangi tu liyaka lavio.

7-8. (a) Ohuminyo yipi yavali tua konomuisa kuenda yi lomboloka nye? (b)  Momo lie Yehova a sapuilila va Yudea va kala kumandekua ko Bavulono hati: “Ku ka yokoke”? (c)  Olondaka vi sangiwa kelivulu lia Isaya 46:​3, 4 via kuatisa ndati afendeli va Suku oku yuvula usumba?

⁷ Kũlĩhĩsa ohuminyo yavali yi sangiwa ku Isaya yokuti: “Ku ka yokoke, momo ndi Suku yove.” Nye ci lomboloka ondaka yokuti ku ka yokoke? Kelimi lio Heveru ondaka oku ‘yokoka’ yeca ocisimĩlo “coku salukila ocitangi cimue ka ceyile handi”, ale “oku lungayala ndeci ci linga omunu o kasi vekalo liohele.”

⁸ Momo lie Yehova a sapuilila va Yudea vana vambatiwa kumandekua ko Bavulono oco ka va ka “yokoke”? Momo wa kũlĩhĩle okuti wosi wa laikele oku tunga vofeka yaco wa ponduile oku kala lusumba. Nye ca laikele oku va kokisa usumba? Eci va Yudea va laikele oku tẽlisa 70 kanyamo kumandekua ko Bavulono, Yehova wa ponduile oku vetiya va Media la va Persia, oco va lundule o Bavulono kuenda oku yovola va Yudea. (Isa. 41:​2-4) Eci va Bavulono kuenda omanu vo kolofeka vikuavo va limbuka okuti ovanyali va kasi ocipepi ovo va seteka oku lekisa utõi poku lisapuila pokati hati: “Kolisako.” Va lipangelavo olosuku viesanda vioviñumañuma oco vi va teyuile. (Isa. 41:​5-7) Kuenje Yehova wa lembeleka va Yudea va kala kumandekua ko Bavulono. Oco Yehova a lekise etepiso likasi pokati ka va Isareli lolofeka vikuavo, eye wa popia hati: “A Isareli, ove vukuenje wange . . . Ku ka yokoke, momo ndi Suku yove.” (Isa. 41:​8-10) Limbuka eci Yehova a popia hati: “Ndi Suku yove.” Lolondaka evi, Yehova wa lekisa kafendeli vaye okuti ka va ivalele, handi wa kala Suku yavo kuenda ovo handi va kala afendeli vaye. Wa va sapuila hati: “Ame ngambata . . . mopela.” Ocili okuti olondaka evi via pamisa calua va Yudea va kala kumandekua.​—⁠Tanga Isaya 46:​3, 4.

9-10. Momo lie ka tu sukilila oku yokoka? Ci lombolola

⁹ Omanu koloneke vilo, va yokoka calua omo liekalo lĩvi lioluali, okuti kosimbu ci sule. Ocili okuti tu kasivo oku tala ohali omo liovitangi viaco. Pole, ka tu sukila oku yokoka. Yehova o tu sapuila hati: “Ndi Suku yove.” Momo lie olondaka evi vi tu lembelekela?

¹⁰ Sokolola ocindekaise eci: Jim kuenda Ben va kasi oku linga ungende lombalãu yimue yi kasi oku vengenga omo liofela yalua. Osimbu ombalãu yi vongokela kondio kuenda kepĩli ukuakuendisa ombalãu eca esapulo ku vosi liokuti: “Yitiki ciwa uvia wolomangu viene. Momo handi tu amamako  lovitangi vokatembo kamue.” Jim o fetika oku kuata usumba walua. Noke ukuakuendisa ombalãu wamisako hati: “Ku ka yokoki. Ame, ñasi oku ci popia.” Kuenje Jim o pukapuka kutue loku popia hati: “Eci tu ci kolela ndati?” Jim o limbuka okuti Ben ka yokokele. Jim u pulisa hati: “Momo lie wa tulila utima?” Ben o yola loku popia hati: “Nda kũlĩha ciwa u o kasi oku endisa ombalãu eyi. Isiange!” Kuenje Ben o popia hati: “Linga u lomboluile eci catiamẽla ku isiange. Eci o kũlĩha ciwa ovina eye a linga ale, o ka tula utima.”

11. Nye tu lilongisa kocindekaise catiamẽla komanu vavali va linga ungende lombalãu?

¹¹ Nye tu lilongisa kocindekaise eci? Ndeci Ben a tulile utima, etu tua tulavo utima momo tua kũlĩha ciwa Isietu wokilu, Yehova. Tua kolela okuti o tu kuatisa oku pandikisa kovitangi tu liyaka lavio koloneke vilo via sulako. (Isa. 35:⁠4) Nda tua kolela ku Yehova tu pondola oku tula utima osimbu omanu va yokoka. (Isa. 30:15) Tu kalavo nda Ben eci tu sapuilako omanu esunga lieci tu kolelela Suku. Ovo va ka tulavo utima ndaño lovitangi, momo Yehova o ka va kuatisavo.

12. (a) Ohuminyo yipi yatatu tua kũlĩhĩsa? (b) Ondaka “okuokuo kuaye ku u vialelako,” ci tu ivaluisa nye?

¹² Kũlĩhĩsa ohuminyo yatatu yi sangiwa ku Isaya yokuti: “Ame hu kolisa, hu kuatisa.” Isaya wa popele ale ndomo Yehova a ponduile oku kolisa, ale oku pamisa afendeli  vaye poku popia hati: “Yehova Suku iya lunene. Okuokuo kuaye ku u vialelako.” (Isa. 40:10) Vembimbiliya ondaka “okuokuo” olonjanja vimue yi lomboloka ongusu, ale unene. Omo liaco, ondaka “okuokuo kuaye ku u vialelako” ci tu ivaluisa okuti Yehova eye Soma ukuonene wosi. Kosimbu Yehova wa talavaya lunene waye oco a kuatise loku teyuila afendeli vaye. Koloneke vilo, Yehova o ci lingavo ku vana va kolela kokuaye.​—⁠Esin. 1:​30, 31; Isa. 43:⁠10.

13. (a) Vapuluvi api Yehova a siata oku tẽlisa ohuminyo yaye yoku tu kolisa? (b) Ohuminyo yipi yi tu ĩha ongusu kuenda ekolelo?

¹³ Eci ovanyali va tu lambalala, Yehova o tẽlisa ohuminyo yaye yokuti: “Hu kolisa.” Kolofeka vimue, ovanyali va kasi oku linga cosi ci tava oco va imule upange woku kunda, ale oku malako ocisoko cetu. Pole, ka tu yokoka omo liovina viaco. Yehova wa linga ohuminyo yimue yi tu ĩha ongusu kuenda ekolelo. Eye hati: “Lacimue ocimãlẽho va ci telela oku yaka love ci ku linga cimue.” (Isa. 54:17) Ohuminyo eyi yi tu ivaluisa ovina vitatu vi kuete esilivilo.

14. Momo lie ka tu komõhela eci tu lambalaliwa?

¹⁴ Catete, omo okuti tu londonge via Kristu tu lavoka oku suvukiwa. (Mat. 10:22) Yesu wa popele ale okuti koloneke via sulako olondonge viaye via laikele oku lambalaliwa. (Mat. 24:9; Yoa. 15:20) Cavali, ocitumasuku ca Isaya ci lekisa okuti ovanyali vetu ka va ka tu suvuka lika, pole, va ka panga ovimalẽho vialua locimãho coku yaka letu. Vovimalẽho viaco mu ka kongela alambalalo kuenda alundi atiamẽla kokuetu. (Mat. 5:11) Yehova ka ka tateka ovanyali vetu oku talavaya lovimalẽho viaco poku liyaka letu. (Va Efe. 6:12; Esit. 12:17) Pole, ka tu sukila oku kuata usumba. Momo lie?

15-16. (a) Yipi onepa yatatu tu sukila oku ivaluka kuenda ca lomboluiwa ndati kelivulu lia Isaya 25:​4, 5? (b) Ovina vipi via tukuiwa kelivulu lia Isaya 41:​11, 12 vi ka pita la vana va yaka letu?

¹⁵ Sokolola kocina catatu tu sukila oku ivaluka. Yehova wa popia hati, “lacimue ocimãlẽho” va ci telela oku yaka love “ci ku linga cimue.” Ndeci ocimano ci tu teyuila kehunguhungu limue, Yehova o tu teyuila “vundembo woku  vindikiya owuya.” (Tanga Isaya 25:​4, 5.) Ovanyali vetu lalimue eteke va ka tu yula.​—⁠Isa. 65:⁠17.

¹⁶ Yehova o tu pamisa poku tu sapuila eci ci ka pita la ‘vosi va tu temẽla.’ (Tanga Isaya 41:​11, 12.) Ndaño okuti ovanyali va linga letu eci va yongola oco va tu talise ohali, pole, ovanyali vosi vafendeli va Suku ‘va ka takata, kuenje va nyolẽha.’

17-18. (a) Oku tanga Embimbiliya ci pamisa ndati ekolelo lietu ku Yehova? Tukula ocindekaise cimue ca tukuiwa kelivulu lia Isaya 40:11. (b) Oku sokolola kocisonehua cunyamo 2019 ci tu kuatisa ndati?

¹⁷ Oco tu amameko oku pamisa ekolelo lietu ku Yehova, tu sukila oku u kũlĩha ciwa. Tu pondola lika oku kũlĩha Yehova poku tanga Embimbiliya loku sokolola ovina tua tanga. Vembimbiliya mu sangiwa ovolandu a lekisa ndomo Yehova a teyuila afendeli vaye kosimbu. Oku tanga ovolandu aco ci tu ĩha ekolelo liokuti eye o tu teyuilavo.

¹⁸ Kũlĩhisa eci Isaya vupopi wocidekaise a lombolola ndomo Yehova a tu teyuila. Isaya wa sokisa Yehova ndungombo kuenda afendeli vaye ndolomeme. Isaya wa popia eci catiamẽla ku Yehova hati: “Ongolola otumeme vovoko aye, o tu ambatela ponete.” (Isa. 40:11) Eci tu limbuka okuti okuokuo kua Yehova ku kasi oku tu teyuila, tu liyeva okuti tua kolapo kuenda tu tula utima. Oco tu yuvule oku sakalala omo liovitangi tu liyaka lavio, ukuenje wa kolelua haeye wa lunguka wa nõla ocisonehua ca Isaya 41:10 ndocisonehua cunyamo wo 2019 cokuti: “Ku ka yokoke, momo ndi Suku yove!” Sokolola kohuminyo eyi ya Yehova. Ohuminyo yaco yi tu pamisa oco tu tẽle oku yula ovitangi vi keya kovaso.