1-2. (a) Nye Yehova a lete eci owiñi walua u liongolola Kocipito Condalelo ya Ñala? (Tala ociluvialuvia koñoño.) (b) Nye tu konomuisa vocipama cilo?

SOKOLOLA eci Yehova a lete eci omanu valua voluali luosi va liongolola Kocipito Condalelo ya Ñala. Eye ka vanji lika ketendelo lialua liomanu; pole, o vanja komunu lomunu o kasi pocito caco. Handi vali, eye o lete vosi vana va siata oku iya anyamo osi. Pokati komanu vaco, pa sangiwa vana okuti va kasi oku liyaka lalambalalo alua. Vakuavo ka va endaenda kolohongele olonjanja viosi, pole, ovo va tenda Ocipito Condalelo ndocina cimue ci kuete esilivilo lialua kokuavo. Yehova o letevo vana va enda onjanja yatete Kocipito caco omo, va yongola oku kũlĩha eci ci ka lingiwa kohongele yaco.

² Ocili okuti, Yehova o sanjuka poku mola omanu valua va enda Kocipito Conjivaluko. (Luka 22:19) Pole, Yehova ka sakalala lika letendelo liomanu. Eye wa kapako esunga lieci omanu vaco veyilila Kocipito caco. Vocipama cilo, tu ka konomuisa epulilo limue li kuete esilivilo lialua ndeci: Momo lie ka tu endela lika kocipito Conjivaluko ci lingaiwa unyamo lunyamo, pole, tu endavo kolohongele vi lingiwa osemana losemana, vina Yehova a sokiyila vana vo sole?

3-4. (a) Momo lie tu endaila kolohongele? (b) Oku endaenda kolohongele ci situlula nye kokuetu? (c) Ndomo ci lekisa elivulu lia 1 Korindo 11:23-26, momo lie ka citavela oku laña kocipito Conjivaluko?

³ Etu tu endaenda kolohongele, momo ovio vi panga onepa kefendelo lietu. Handi vali, tu enda kolohongele momo tu longisiwa la Yehova. Omanu vana okuti vakuepela ka va tava kocimĩlo cokuti va sukila oku lilongisa ovina vikuavo.  (3 Yoa. 9) Pole, etu tu yongola oku longisiwa la Yehova kuenda ocisoko caye.​—Isa. 30:20; Yoa. 6:45.

⁴ Eci tu enda kolohongele tu lekisa okuti tuambombe kuenda tu sanjukila oku longisiwa. Eci tu enda Kocipito Conjivaluko colofa via Yesu, ka tu ci lingila omo lioku kisikiwa, pole, tu ci linga momo tu kasi oku pokola kocihandeleko ca Yesu cokuti: “Ci lingili onjivaluko yange.” (Tanga 1 Va Korindo 11:23-26.) Ocipito caco ci pamisa elavoko lietu lio kovaso kuenda ci tu ivaluisa ocisola calua Yehova a tu kuetele. Pole, Yehova wa kũlĩha okuti tu sukila oku lipamisa loku livetiya pokati okuti ka tu ci lingi lika lumosi vunyamo. Omo liaco, eye wa linga eliangiliyo liolohongele okuti osemana losemana tu liongolola. Kuenje umbombe u tu vetiya oku pokola. Etu tua siata oku sanda otembo yalua olosemana viosi oku pongiya olohongele loku kalapo.

5. Momo lie omanu ambombe va tavela kelaleko lia Yehova?

⁵ Unyamo lunyamo, omanu vana okuti ambombe va tava kelaleko lia Yehova lioku longisiwa laye. (Isa. 50:4) Ovo va yeva esanju lioku kala pocipito Conjivaluko, noke va fetika oku endaenda kolohongele vikuavo. (Sak. 8:20-23) Ci kale vana va fetika ndopo oku lilongisa ocili, letu tu kasi ale osimbu, tu sanjukila oku longisiwa loku songuiwa la Yehova ‘oñuatisi yetu, haiye upopeli wetu.’ (Osa. 40:17) Anga hẽ kuli eci ca velapo vali okuti, elaleko lioku longisiwa la Yehova kuenda Yesu omõlaye una a sole calua, ci sule?—Mat. 17:5; 18:20; 28:20.

6. Umbombe wa kuatisa ndati ulume umue oku enda kocipito Conjivaluko?

⁶ Unyamo lunyamo, tu likolisilako oku laleka omanu valua oco va kale Kocipito colofa via Yesu. Omanu valua okuti ambombe, va siata oku kuatisiwa omo lioku tava kelaleko lietu. Tu konomuisi ulandu umue. Kanyamo apita, ulume umue wa tambula okokanda kelaleko liocipito Conjivaluko, pole, wa sapuila manji wa eca okokanda kaco hati, si endi kocipito caco. Pole, kuteke waco Wonjivaluko manji wa komõha poku mola ulume waco Vonjango Yusoma. Ulume waco wa komõhavo omo vo yolela ciwa kuenje wa fetika oku endaenda kolohongele olosemana viosi. Vokuenda kunyamo, eye wa pumba lika olohongele vitatu. Nye co kuatisa oku nõlapo oku endaenda kolohongele viosi? Eye wa likolisilako oku pongolola ovisimĩlo viaye. Manji wo lalekele wa popia hati, “Eye omunu umue embombe calua.” Ocili okuti Yehova wa vetiya ulume waco oco o fendele kuenda cilo wa papatisiwa.—2 Sam. 22:28; Yoa. 6:44.

7. Ovina tu lilongisa kolohongele kuenda tu tanga Vembimbiliya vi tu kuatisa ndati oku kala ambombe?

⁷ Ovina tu lilongisa kolohongele levi tu tanga Vembimbiliya vi tu kuatisa oku kala ambombe. Apa handi osemana Yonjivaluko ka ya pitĩlile, ulandu wolohongele u ka tiamisiwila kongangu ya Yesu kuenda kumbombe a lekisa poku eca omuenyo waye ndocisembi. Handi vali, kolosemana viaco tu vetiyiwa oku tanga ovolandu Embimbiliya a lombolola oku fa kuenda epinduko lia Yesu. Ovina tu lilongisa kolohongele lovolandu aco tu tanga Vembimbiliya, vi tu vetiya oku eca olopandu ku Yesu omo a lieca ndocilumba kokuetu. Kuenje tu vetiyiwa oku setukula ocituwa caye cumbombe kuenda oku linga ocipango ca Yehova ndaño ceci tu liyaka lovitangi.​—Luka 22:41, 42.

8. Yesu wa lekisa ndati utõi?

⁸ Etu tu setukulavo Yesu poku lekisa utõi. Sokolola utõi eye a lekisa osimbu handi ka file. Eye wa kũlĩhĩle ciwa okuti ndopo ovanyali vaye vo sepula, vo tipula kuenda oku u ponda. (Mat. 20:17-19) Ndaño lovitangi viaco eye wa nõlapo okufa. Eci epuluvi liaco lia pitĩlapo, wa sapuila ovapostolo vaye vakuekolelo, vana va kala kumosi laye vo Gesemane hati: “Pasuki, tuendi. U o makula o kasi ocipepi.” (Mat. 26:36, 46) Eci asualali veya oku u kuata, vepuluvi liaco wa lilekisa kuenda wa pinga kasuali oco va ecelele okuti ovapostolo vaye va enda. (Yoa. 18:3-8) Utõikuowo Yesu a lekisa! Koloneke vilo, Akristão olombuavekua kuenda olomeme vikuavo, va siata oku likolisilako oku setukula ongangu ya Yesu yoku lekisa utõi. Ndamupi?

9. (a) Momo lie tu sukilila utõi oco tu endaende kolohongele olonjanja viosi? (b) Ongangu yetu yi pondola oku kuatisa ndati vamanjetu va kasi vokayike omo lioku kolela Yehova?

⁹ Oco tu endaende kolohongele olonjanja viosi, tu sukila oku lekisa utõi ndaño ceci tu liyaka lovitangi. Valua pokati ka vamanjetu ka va lañi kolohongele, ndaño va kasi oku liyaka lesumuo lialua, upongo ale ekambo liuhayele. Vakuavo lutõi walua va enda kolohongele, ndaño lalambalalo a tunda kapata, ale kolombiali. Sokolola ndomo ongangu yetu yi pamisa vamanjetu va kasi vokayike omo lioku kolela Yehova. (Va Hev. 13:3) Eci va yeva okuti tu kasi oku amamako oku vumba Yehova ndaño lalambalalo, ekolelo liavo li pamisiwa va kuata utõi kuenda va lekisa epandi. Cimuamue haico ca pita lupostolo Paulu. Eci a kala vokayike ko Roma, wa kuata esanju poku yeva okuti, vamanji va kala oku vumba Suku lekolelo lialua. (Va Fil. 1:3-5, 12-14) Apa handi Paulu ka tundile vokayike, wa soneha ukanda ku va Heveru. Vukanda waco wa sapuila Akristão vakuekolelo okuti, “amamiko oku lisola pokati” kuenda ko ka liwekipo oku liongolola.​—Va Hev. 10:24, 25; 13:1.

10-11. (a) Velie tu sukila oku laleka kocipito Conjivaluko? (b) Ndomo ca lomboluiwa kelivulu lia Va Efeso 1:7, esunga lipi tu kuete lioku ci linga?

¹⁰ Tu lekisa utõi poku laleka epata lietu, vana tu talavaya lavo kuenda vana tu lisungue lavo oku enda kocipito Conjivaluko. Momo lie tu va lalekela? Omo okuti tua sanjukila eci Yehova la Yesu va tu lingila, eli olio esunga lieci tu lalekela omanu vakuavo oku enda Kocipito caco. Tu yongola okuti ovo va lilongisavo ndomo va pondola oku kuatisiwa ‘lohenda ya piãla’ ya Yehova vocakati cocisembi.​—Tanga Va Efeso 1:7; Esit. 22:17.

¹¹ Eci tu lekisa utõi poku liongolola la vakuetu, tu lekisavo ovituwa vikuavo viwa okuti Yehova kuenda Omõlaye ovio va siata oku lekisa.

12. (a) Olohongele vietu vi pamisa ndati ocisola tu kuetele Yehova la Yesu? (b) Elivulu 2 Va Korindo 5:14, 15 li tu vetiya oku linga nye, oco tu setukule Yesu?

¹² Ocisola tu kuetele Yehova la Yesu, oco ci tu vetiya oku endaenda kolohongele. Ovina tu lilongisa kolohongele vi vokiya ocisola tu kuetele Yehova kuenda Omõlaye. Kolohongele viaco, tua siata oku ivaluisiwa eci ovo va tu lingila. (Va Rom. 5:8) Ocipito Conjivaluko, ci tu ivaluisa okuti ocisola cavo ca velapo, ndaño muẽle ku vana ka va kapeleko ocisembi. Tu lekisa olopandu eci tu setukula Yesu konjila ndomo tu ambata omuenyo wetu eteke leteke. (Tanga 2 Va Korindo 5:14, 15.) Kuenje utima wetu u vetiyiwa oku sivaya Yehova, una wa eca ocisembi. Onjila yimue yoku u sivaya oku eca atambululo lutima wosi kolohongele.

13. Tu lekisa ndati ocisola calua ku Yehova kuenda Komõlaye? Ci lombolola.

¹³ Tu pondola oku lekisa ocisola calua ku Yehova kuenda Komõlaye poku lieca olumue oku linga ovina va tu tuma. Olonjanja vimue, tu sukila oku likolisilako calua oco tu ende kolohongele. Akongelo alua a siata oku linga olohongele kesulilo lieteke noke liupange okuti tua kava calua. Olohongele vimue vi lingiwa kesulilo liosemana, osimbu vamue va puyukapo. Anga hẽ Yehova o lete alikolisilo tu kasi oku linga oku endaenda kolohongele ndaño tua kava? Ocili okuti eye o ci lete! Osimbu tu likolisilako ndaño lovitangi, Yehova o sanjuka omo liocisola tu lekisa kokuaye.—Mar. 12:41-44.

14. Yesu wa sia ndati ongangu yiwa yoku pitisa kovaso olonjongole via vakuetu?

¹⁴ Yesu wa tu sila ongangu yiwa yoku lekisa ocisola cocili. Eye ka liecele lika oku fila olondonge viaye, pole, olonjanja viosi wa lekisa okuti wa kapeleko olonjongole viavo, okuti viaye vi sule. Vepuluvi limue, wa lisanga lolondonge viaye ndaño okuti eye wa kavele calua kuenda wa sakalalele. (Luka 22:39-46) Eye wa tiamisilile utima kovina a ponduile oku eca ku vakuavo, okuti kovina a ponduile oku tambula kokuavo hakoko. (Mat. 20:28) Nda ocisola tu kuetele Yehova kuenda vamanji ca pama, tu linga cosi ci tava oco tu ende Kocipito Condalelo ya Ñala kuenda oku endaenda kolohongele viekongelo.

15. Velie tu yongola oku kuatisa?

 ¹⁵ Etu tu panga onepa kongongela Yakristão vocili kuenda tu sole oku laleka omanu va fetika oku lilongisa ndopo ocili, oco va likongele kokuetu. Pole, tu kuete onjongole yoku kuatisa, ‘ca piãla enene vamanjetu vekolelo.’ (Va Gal. 6:10) Tu lekisa ocisola cetu kokuavo poku va pamisa kolohongele, ca piãla enene kocipito Conjivaluko. Ndeci Yehova la Yesu, tu sanjukavo calua oku mola umue oku tiuka ku Yehova, Isietu ukuacisola haiye Ungombo wetu.—Mat. 18:14.

16. (a) Tu lipamisa ndati pokati kuenda olohongele vi tu kuatisa ndati? (b) Momo lie yilo oyo otembo yiwa yunyamo yoku ivaluka olondaka via Yesu vi sangiwa kelivulu lia Yoano 3:16?

¹⁶ Kosemana yi kuamamo nda citava, laleka omanu valua oco va ende kocipito Conjivaluko ci ka lingiwa koñolosi Votãlo yosãi ya Kupupu keteke 19 yunyamo wo 2019. (Tala okakasia hati “ O Pondola hẽ Oku va Laleka?”) Vokuenda kunyamo wiya, tu sukila oku lipamisa pokati poku endaenda kolohongele viosi Yehova a tu pongiyila. Osimbu tu panda kesulilo lioluali lulo, tu sukila oku endaenda kolohongele, oco vi tu kuatise oku amamako oku kala ambombe, vakuotõi kuenda vakuacisola. (1 Va Tes. 5:8-11) Omo liaco, lutima wosi tu lekisi olopandu omo liocisola calua Yehova kuenda Omõlaye va tu kuetele.​—Tanga Yoano 3:16.