OCIPAMA CELILONGISO 4
“Espiritu Lia Suku Limba Uvangi”
“Espiritu lia Suku limba uvangi lespiritu lietu okuti tumãla va Suku.”—VA ROM. 8:16.
OCISUNGO 25 Ocipiñalo ca Velapo
OVINA TU LILONGISA *
Kopendekoste, Yehova wa eca espirito sandu liaye lonjila yimue yi komõhisa kueci ci soka 120 Kakristão (Tala ovinimbu 1-2)
1-2. Ocina cipi ci komõhisa ca pita keteke Liopendekoste yunyamo 33 K.K.?
CA KALA Calumingo komẽle ko Yerusalãi. Eteke Liopendekoste yunyamo 33 K.K. Ci soka 120 kolondonge via liongoluila vohondo yimue yosapalalo. (Ovil. 1:13-15; 2:1) Eci kua kambele oloneke vimue, Yesu wa va sapuilile oco ka va ka tunde vo Yerusalãi omo okuti, va laikele oku tambula ombanjaile yimue yi likasi. (Ovil. 1:4, 5) Nye ci pita noke?
2 “Vocipikipiki kilu kua tunda onjuela ndokuõla kuofela yalua.” Onjuela yaco ya yevala vohondo yosi. Kuenje kua tukuluka “alimi a setahãla ondalu,” ya molẽha kovitue violondonge kuenje vosi yavo ve “yukisua lespiritu sandu.” (Ovil. 2:2-4) Lonjila eyi yi komõhisa, Yehova wa eca epiritu sandu komanu vaco. (Ovil. 1:8) Ovo tete oku wavekiwa lepiritu sandu * kuenda oku tambula elavoko lioku viala la Yesu kilu.
NYE CI PITA ECI OMUNU UMUE A NÕLIWA OKU KALA OMBUAVEKUA?
3. Momo lie Akristão vana va kala Kopendekoste va kolelele muẽle okuti va wavekiwa lespiritu sandu?
3 Nda wa kaile umue pokati kolondonge via liongoluila vohondo yaco, lalimue eteke nda wa ivala eteke liaco. Ove nda kua kuatele etatãhãi lalimue okuti wa nõliwa lespiritu sandu. Momo ocina cimue ca setahãla elimi liondalu ca molẽha kutue wove kuenje ove wa fetika oku vangula alimi a litepa! (Ovil. 2:5-12) Anga hẽ olombuavekua viosi vi wavekiwa lespiritu lonjila yimue yilikasi kuenda velivala limuamue? Sio. Tua ci kũlĩha ndati?
4. Anga hẽ olombuavekua viosi vio kocita catete via nõliwa vepuluvi limuamue? Ci lombolola.
4 Catete, tu konomuisa epuluvi eci omunu umue a nõliwa oku kala ombuavekua. Ocimunga cina Cakristão ci soka 120, havoko lika va wavekiwile lespiritu sandu Kopendekoste yunyamo 33 K.K. Keteke liaco ci soka 3.000 komanu, va tambulavo espiritu sandu. Ovo va wavekiwa lespiritu vepuluvi liepapatiso. (Ovil. 2:37, 38, 41) Pole, anyamo a kuamamo, havosiko Akristão olombuavekua va wavekiwa lespiritu vepuluvi liepapatiso. Va Samaria va wavekiwa lespiritu noke yoku pita otembo yimue yepapatiso liavo. (Ovil. 8:14-17) Ulandu umue u likasi, wa Kornelio kumue la vakuanjo yaye okuti va wavekiwa lespiritu eci handi ka va papatisiwile.—Ovil. 10:44-48.
5. Ndomo ca tangiwa ku 2 Va Korindo 1:21, 22, nye ci pita eci omunu umue a wavekiwa lespiritu sandu?
5 Kaliye tu konomuisa eci ci pita, eci omunu umue a nõliwa oku kala ombuavekua pocakati cespiritu sandu. Kefetikilo, ku vamue ci tĩla oku tava okuti va nõliwa la Suku. Ovo va lipula ndoco: ‘Momo lie Suku a ndi nõlela?’ Pole, vakuavo hacoko va sima. Upostolo Paulu wa lombolola eci ci pita la vosi olombuavekua hati: “Noke yoku tava, wa tambulivo ondimbukiso * lohuminyo yespiritu sandu mekonda liaye, ohuminyo ya lingiwa osimbu yi lekisa okuti tu tambula ocipiñalo.” (Va Efe. 1:13, 14 ; etosi) Ocili okuti, Yehova pocakati cespiritu sandu liaye o lekisa Kakristão vaco okuti ovo va nõliwa. Lonjila eyi, espiritu sandu, “ohuminyo” yimue yi va kuatisa oku kolela okuti ovo va nõliwa oco va kale otembo ka yi pui kilu, okuti palo posi hapoko.—Tanga 2 Va Korindo 1:21, 22.
6. Ukristão umue ombuavekua nye a sukila oku linga oco a tambule onima yaye yoku enda kilu?
6 Ukristão umue nda wa wavekiwa lespiritu, anga hẽ ci lomboloka okuti o tambula ale onima yaye kilu? Sio. Eye wa kolela okuti wa nõliwa oco a ende kilu. Pole, eye o sukila oku ivaluka elungulo li popia hati: “A vamanji, likolisiliko oco vu koleli koku kovongiwa loku nõliwa kuene, momo nda wamamiko oku linga ovina evi, lalimue eteke vu kupuka.” (2 Pet. 1:10) Omo liaco, ndaño okuti Ukristão umue wa nõliwa, ale wa kovongiwa oco a ende kilu, eye o tambula lika onima yaye nda wamamako oku pandikisa lekolelo.—Va Fil. 3:12-14; Va Hev. 3:1; Esit. 2:10.
OMUNU O KŨLĨHA NDATI OKUTI OMBUAVEKUA?
7. Vana va wavekiwa lespiritu va kũlĩha ndati okuti va kuete elavoko lioku enda kilu?
7 Omunu o kũlĩha ndati okuti wa nõliwa oku enda kilu? Etambululo liaco, li sangiwa kolondaka Paulu a sonehela vamanji olombuavekua ko Roma, vana va “tukuiwa olosandu.” Eye wa va sapuila hati: “Momo espiritu lia Suku ka lia tu kokele oku linga apika okuti tu kuata vali usumba, puãi omo liespiritu liaco tu tendiwa ndomãla kuenda espiritu li tu vetiya oku vilikiya hati, “Aba, a Tate!” Espiritu lia Suku limba uvangi lespiritu lietu okuti tumãla va Suku.” (Va Rom. 1:7; 8:15, 16) Lonjila eyi, Yehova pocakati cespiritu sandu liaye, o lekisa komunu okuti wa nõliwa oku enda kilu.—1 Va Tes. 2:12.
8. Ukanda 1 Yoano 2: 20, 27, u lekisa ndati okuti Akristão olombuavekua ka va sukila uvangi womanu vakuavo oco va kũlĩhe okuti olombuavekua?
8 Yehova ka kokela atatãhãi vovisimĩlo kuenda vutima wa vana va nõliwa oku enda kilu. (Tanga 1 Yoano 2:20, 27.) Ocili okuti Akristão olombuavekua vi sukila oku longisiwa la Yehova pocakati cekongelo, ndeci ci linga Akristão vakuavo. Pole, ovo ka va sukila uvangi womunu laumue oco va kũlĩhe okuti olombuavekua. Yehova wa talavaya ale lunene waye wa velapo, okuti espiritu sandu, oco a ece uvangi waco kokuavo!
OVO VA “CITIWA EVALI”
9. Eci omunu umue a wavekiwa lespiritu, epongoloko lipi lipita laye, ndomo ca tukuiwa ku Va Efeso 1:18?
9 Afendeli valua va Suku koloneke vilo, citava okuti ka ci leluka kokuavo oku kuata elomboloko lieci ci lipita lomunu wa nõliwa oku kala ombuavekua. Oku sima ndoco hacĩviko, momo ovo halombuavekuako. Suku wa lulika omanu oco va kale palo posi otembo ka yi pui, okuti kilu hakoko. (Efet. 1:28; Osa. 37:29) Pole, Yehova wa nõlapo okuti vamue va enda kilu. Kuenje Yehova poku waveka omunu umue lespiritu, o pongolola elavoko kuenda ovisimĩlo viomunu waco, oco omunu waco a tiamisile elavoko liaye kilu.—Tanga Va Efeso 1:18.
10. Nye ci lomboloka oku “citiwa evali”? (Tala etosi pombuelo yemẽla.)
10 Eci Ukristão umue a wavekiwa lespiritu sandu eye o “citiwa evali,” ale “oku citiwa ku tunda kilu.” * Yesu wa lombololavo okuti ka ca lelukile oku lomboluila una okuti ombuavekuako ndomo umue a liyeva eci a “citiwa evali,” ale “oku citiwa ku tunda kilu.”—Yoa. 3:3-8; etosi.
11. Lombolola epongoloko lipita lovisimĩlo viomunu umue wa nõliwa oku kala ombuavekua?
11 Nye ci pita vutima Wukristão umue eci a nõliwa oku kala ombuavekua? Osimbu Wukristão waco ka nõliwile la Yehova, wa kuatele elavoko lioku kala palo posi otembo ka yi pui. Eye wa kala lonjongole yalua yoku mola eteke Yehova a laikele oku pongolola ongongo oco yi kale ocumbo celau kuenda oku malako ũvi wosi. Citava okuti, eye wa kala oku sokolola ndomo a laikele oku tambula umue ukuepata, ale ekamba kepinduko. Pole, poku kala ombuavekua, Ukristão waco wa fetika oku kuata ovisimĩlo vikuavo. Momo lie? Hamekondako okuti ka sole vali elavoko lioku kala palo posi. Kuenda ka ci lingila omo okuti wa kala lesumuo, ale wa pita lovitangi. Handi vali, hamekondako okuti vocipikipiki wa sima okuti omuenyo palo posi wa tĩla calua. Pole, Yehova wa talavaya lespiritu sandu liaye, oco a pongolole ovisimĩlo Viukristão waco kuenda elavoko lina a solele calua.
12. Ndomo ca tangiwa ku 1 Petulu 1:3, 4, Akristão olombuavekua va liyeva ndati catiamẽla kelavoko liavo?
12 Ukristão umue wa nõliwa oku kala ombuavekua, pamue o sima okuti ka sesamẽla esumũlũho liaco. Pole, eye ka kuete lalimue etatãhãi okuti Yehova wo nõla. Eye o kuete esanju lialua kuenda eca olopandu omo lielavoko liaye lioku enda kilu.—Tanga 1 Petulu 1:3, 4.
13. Akristão olombuavekua va tenda ndati omuenyo wavo osimbu va kasi palo posi?
13 Anga hẽ eci ci lekisa okuti Akristão olombuavekua vi sanjukila oku fa? Upostolo Paulu eca etambululo liaco. Eye wa sokisa etimba liombuavekua lombalaka yimue poku popia hati: “Kuenje etu tu kasi vombalaka yilo, tu leña leña omo tua lemẽlelua, momo ka tu yongola oku lula ombalaka yaco nduwalo pole, tu yongola oku tambula onjo kilu, okuti eci ci fa fa ci taka vomuenyo.” (2 Va Kor. 5:4) Akristão olombuavekua ka va puile onjongole yoku kala lomuenyo palo posi, okuti va sanjukila ale oku fa. Pole, va sanjukila oku kala komuenyo kuenda va yongola oku vumba Yehova eteke leteke lavangandiavo kumue lakamba. Kuenje kovina viosi va linga, olombuavekua vi sokolola kelavoko va kuete liokovaso yoloneke.—1 Va Kor. 15:53; 2 Pet. 1:4; 1 Yoa. 3:2, 3; Esit. 20:6.
ANGA HẼ YEHOVA WA KU NÕLA OKU KALA OMBUAVEKUA?
14. Uvangi upi ka u lekisa okuti omunu umue wa wavekiwa lespiritu sandu?
14 Ove pamue o lipula nda wa nõliwa muẽle lespiritu sandu. Nda ove o sima okuti wa nõliwa, sokolola kapulilo akuãimo a kuete esilivilo, ndeci: Ove o kuete onjongole yalua yoku linga ocipango ca Yehova? O kuete hẽ ombili yalua kupange woku kunda? O sole hẽ oku lilongisa Embimbiliya kuenda o sanjukila oku lilongisa “ovina via longa via Suku”? (1 Va Kor. 2:10) O limbuka hẽ okuti Yehova o kasi oku ku kuatisa oku kuata onima yiwa kupange woku kunda? O litenda hẽ okuti o kuete ocikele cinene coku kuatisa omanu oku kũlĩha Yehova? O lete hẽ ovovangi a lekisa okuti Yehova wa ku kuatisa kovina vimue? Nda etambululo liove kapulilo a-a “oco,” ci lomboloka hẽ okuti o kuete elavoko lioku enda kilu? Sio, hacoko ci lomboloka. Momo lie? Momo afendeli vosi va Yehova va pondola oku liyeva ndoco, ci kale okuti olombuavekua ale sio. Yehova pocakati cespiritu sandu, o pondola oku eca ongusu yimuame kafendeli vosi vaye, ndaño va kuete elavoko lia litepa. Omo liaco, nda o kasi oku lipula nda vumbuavekua ale sio, eci ci lekisa ale okuti kua nõliwile. Vana va nõliwa la Yehova, ka va kuete atatãhãi nda olombuavekua ale sio. Ovo va ci kolela muẽle!
Yehova wa eca espiritu sandu liaye ku Avirahama, ku Sara, ku Daviti kuenda ku Yoano upapatisi, oco va linge ovina vi komõhisa, pole, eye ka va nõlele oco va ende kilu (Tala ovinimbu 15-16) *
15. Tua kũlĩha ndati okuti vana va tambula espiritu lia Suku havosiko va nõliwa oco va ende kilu?
15 Vembimbiliya tu sangamo ovolandu womanu vakuekolelo va tambula espiritu sandu. Ndaño ndoco, ka va kuatele elavoko lioku enda kilu. Daviti wa songuiwile lespiritu sandu. (1 Sam. 16:13) Espiritu sandu lio kuatisa oku kuata elomboloko liovina via longa viatiamẽla ku Yehova kuenda lio songuila oku soneha onepa yimue Yembimbiliya. (Mar. 12:36) Kuenje upostolo Petulu wa popia hati, “Daviti ka londele kilu.” (Ovil. 2:34) Yoano Upapatisi wa kala umue wa “yukisua lespiritu sandu.” (Luka 1:13-16) Kuenje Yesu wa popia hati ka kua la kala umue wa velapo Yoano, pole, wa lombololavo okuti Yoano ka laikele oku panga onepa Vusoma wo kilu. (Mat. 11:10, 11) Yehova wa eca espiritu sandu komanu vaco oco va kuate unene woku linga ovina vi komõhisa, pole, eye ka ecele espiritu sandu oco va nõliwe oku enda kilu. Anga hẽ eci ci lekisa okuti ovo vakuekolelo litito oku ci sokisa lava va nõliwa oku ka viala kilu? Sio. Eci ci lekisa okuti Yehova o ka va pindula oco va kale palo posi, Voluali Luokaliye.—Yoa. 5:28, 29; Ovil. 24:15.
16. Esumũlũho lipi afendeli valua va Suku va lavoka koloneke vilo?
16 Afendeli valua va Suku koloneke vilo, ka va kuete elavoko lioku enda kilu. Ndeci Avirahama, Sara, Daviti, Yoano Upapatisi kuenda omanu vakuavo vakuekolelo kosimbu, ovo va lavoka lonjolela otembo va ka kala palo posi vemehi Liusoma wa Suku.—Va Hev. 11:10.
17. Apulilo api a ka tambuluiwa vocipama cikuãimo?
17 Omo okuti Akristão vamue olombuavekua handi va kasi palo posi pokati kafendeli va Suku, ca sunguluka okuti ku kala atatãhãi amue. (Esit. 12:17) Ndeci, olombuavekua vi sukila oku li tenda ndati? Nda umue vekongelo ove o kasi, o fetika oku lia kombolo loku nyua kovinyu Kocipito Conjivaluko, ove o sukila oku u tenda ndati? Handi vali, nda etendelo liava va litukula hati olombuavekua liamamako oku livokiya? Anga hẽ ove o sukila oku sakalala? Ocipama cikuãimo ci ka tambulula apulilo aco.
^ tini. 5 Tunde Kopendekoste yunyamo 33 K.K., Yehova o kasi oku eca Kakristão vamue elavoko limue li komõhisa calua lioku viala Lomõlaye kilu. Akristão vaco va kũlĩha ndati okuti ovo va nõliwa oco va kuate esumũlũho liaco? Nye ci pondola oku pita eci omunu umue a tambula elaleko lioku ka viala kilu? Ocipama cilo, ca kunamẽla kocipama cimue ca molẽhele Vutala Wondavululi wa Susu wo 2016. Oco, ci ka tambulula apulilo aco.
^ tini. 2 ONDAKA YA LOMBOLUIWA: Oku wavekiwa lespiritu sandu: Yehova pocakati cespiritu liaye, o nõla omanu vamue oco va ka viale la Yesu kilu. Handi vali, pocakati cespiritu liaye, Suku eca komunu elavoko liokovaso ale “ohuminyo ya lingiwa osimbu.” (Va Efe. 1:13, 14) Akristão vaco, va pondola oku popia okuti espiritu sandu “limba uvangi,” ale lieca uvangi wokuti onima yavo kilu.—Va Rom. 8:16.
^ tini. 5 ONDAKA YA LOMBOLUIWA: Ondimbukiso. Ondimbukiso eyi yamamako oku kala toke eci omunu a fa vekolelo, ale toke eci ku kamba okatembo kamue ohali ya piãla oku fetika.—Va Efe. 4:30; Esit. 7:2-4; Tanga ocipama losapi hati: “Perguntas dos Leitores”, Vutala Wondavululi wa Kupupu wo 2016 kelimi lioputu.
^ tini. 10 Oco o kũlĩhe ovina vikuavo viatiamẽla kueci ci lomboloka oku citiwa evali, tanga Utala Wondavululi, 1 Yevambi Linene wo 2009, kamẽla 3-12.
OCISUNGO 27 Oku Situluiwa Kuomãla va Suku
^ tini. 57 ELOMBOLUILO LIELITALATU: Vamue pokati ketu tu kasi vokayike omo liekolelo lietu ale tu kuete eyovo lioku kunda loku longisa ocili. Ci kale okuti tu kuete ovitangi ale sio, vosi yetu tu yongola oku kala lomuenyo palo posi vemẽhi Liusoma wa Suku.
