1-2. Nye ungelo a sapuila akãi va kala keyambo lia Yesu kuenda onumbi yipi Yesu a eca kokuavo?

CA KALA komẽle, keteke 16 ya Nisana yunyamo wo 33 K.K. Akãi vamue okuti va sumbila Suku, lesumuo lialua va enda keyambo, omo Ñala Yesu oko a kendiwa, eye o kasi veyambo liaco ci pitahãla 36 kolowola. Eci va pitĩla keyambo liaco locimãho coku seketa etimba lia Yesu lulela welemba liwa, ovo va lisalukako poku limbuka okuti veyambo ka muli cimue! Ungelo umue wa sapuila akãi vaco okuti Yesu wa pinduiwa ale kuava va fa, poku popia hati: ‘Eye o ko livangeli ko Galilea. Oko vu ko muila.’—Mat. 28:1-7; Luka 23:56; 24:10.

² Osimbu akãi va kasi oku tunda keyambo, Yesu amẽla kokuavo kuenje o va sapuila hati: “Kuendi ka sapuili vamanjange oco va ende ko Galilea, oko va ka ndi muila.” (Mat. 28:10) Ocina catete Yesu a linga noke yepinduko liaye, oku liongolola lolondonge viaye. Kohongele yaco Yesu wa eca olonumbi vimue vi kuete esilivilo lialua!

3-4. Momo lie tu popela okuti ocikundi ci sangiwa kelivulu lia Mateo 28:19, 20, ka ca suñamisiwile lika kovapostolo? (Tala ociluvialuvia koñoño.)

³ Tanga Mateo 28:16-20. Yesu kohongele a linga, wa lombolola upange wa velapo olondonge via laikele oku linga, ci kale kocita catete ale koloneke vilo. Yesu wa popia hati: ‘Kuendi, ka longisi omanu vo kolofeka viosi oco va linge olondonge, va longisi oku linga ovina viosi ndo kundiki.’

⁴ Yesu o yongola okuti olondonge viaye viosi vi kunda. Eye ka suñamisile lika ocikundi caco kovapostolo 11 vakuekolelo. Tua ci kũlĩha ndati? Anga hẽ, pa kala lika ovapostolo eci Yesu  a eca ocikundi caco kolondonge komunda yo Galilea? Ivaluka okuti, ungelo wa sapuila akãi hati: “Vu  ko muila [ko Galilea].” Eci ci lekisa okuti akãi vaco vakuekolelo va kalavo kohongele yaco. Pole, kuli vali uvangi ukuavo. Upostolo Paulu wa popia okuti, “Yesu vonjanja yimosi wa molẽha kueci ci pitahãla 500 ya vamanji.” (1 Va Kor. 15:6) Pocitumãlo cipi eye a molẽha?

5. Momo lie tu popela okuti olondaka vi sangiwa ku 1 Va Korindo 15:6 vimuamue levi vi sangiwa ku Mateo ocipama 28?

⁵ Tu kuete asunga awa oku tava okuti, Paulu wa kala oku popia catiamẽla kohongele ya lingiwa ko Galilea, yina ya tukuiwa ku Mateo ocipama 28. Api asunga aco? Esunga liatete lieli okuti, olondonge vialua via Yesu via kala vio ko Galilea. Omo liaco, ca lelukile vali oku liongoluila lowiñi walua komunda yo ko Galilea, okuti vohondo yimue ko Yerusalãi ci sule. Esunga liavali lieli okuti, Yesu wa lisangele ale lovapostolo vaye 11, vohondo yimue ko Yerusalãi noke yepinduko. Nda Yesu wa yonguile oku eca lika kovapostolo ocikundi coku kunda loku linga olondonge, nda wa ci lingila ko Yerusalãi, eye nda ka sukilile vali oku sapuila akãi lomanu vakuavo oco va ka lisange laye ko Galilea.—Luka 24:33, 36.

6. Uvangi upi u lekisa okuti olondaka vi sangiwa ku Mateo 28:20 vi kasi oku tẽlisiwa koloneke vilo? Kuenda omanu va kasi oku kapako ndati ocikundi caco?

⁶ Kũlĩhĩsa esunga liatatu li kuete esilivilo. Ocikundi ca Yesu coku longisa omanu oco va linge olondonge, ka ca tiamisiwilile lika Kakristão vo kocita catete. Tua ci kũlĩha ndati? Yesu poku eca ocikundi caco kolondonge viaye, wa malusula lolondaka viokuti: “Ñasi kumue lene oloneke viosi, toke kesulilo liovina vi kasi voluali.” (Mateo 28:20) Ndomo Yesu a ci popele ci kasi oku tẽlisiwa, upange woku linga olondonge u kasi oku amamako. Sokolola handi: Unyamo lunyamo ci panda 300.000 viomanu va papatisiwa, oco va kale Olombangi Via Yehova kuenda olondonge via Yesu Kristu!

7. Nye tu konomuisa vocipama cilo kuenda momo lie?

⁷ Omanu valua va kasi oku lilongisa Embimbiliya, va kasi oku linga apongoloko oco va papatisiwe. Pole, omanu vamue tu longisa Embimbiliya va kasi lusumba woku kala olondonge. Ovo va sanjukila oku lilongisa, pole, ka va lingi apongoloko komuenyo wavo oco va papatisiwe. Nda ove o kasi oku songola elilongiso limue Liembimbiliya, tua kũlĩha okuti o yongola oku kuatisa omunu waco oku kapako ovina a kasi oku lilongisa kuenda oku linga ondonge ya Kristu. Ocipama cilo, ci ka lombolola ndomo tu pondola oku vetiya utima womunu tu longisa Embimbiliya kuenda ndomo tu u kuatisa oku kula kespiritu. Momo lie tu konomuisila ulandu owu? Momo olonjanja vimue, tu sukila oku nõla nda tu amamako oku songola elilongiso liaco, ale sio.

8. Momo lie olonjanja vimue ca tĩlila oku vetiya utima wondonge oku sola Yehova?

⁸ Yehova o yongola okuti omanu vo vumba omo liocisola vo kuetele. Kuenje ocimãho cetu oku kuatisa omanu tu longisa Embimbiliya, oku limbuka okuti Yehova wa va kapako kuenda o va sole calua. Tu sukila oku va kuatisa oku limbuka okuti Yehova, eye “Isia ya vana ka va kuete isia kuenda ociteyuilo covimbumba.” (Osa. 68:5) Eci omanu tu longisa Embimbiliya va limbuka ocisola calua Suku a va kuetele, va ka vetiyiwa oku u solavo calua. Vamue, pamue ci va tĩlila oku tenda Yehova nda Isiavo ukuacisola, omo olonjali viavo ka via lekisile ocisola kuenda ohenda kokuavo. (2 Tim. 3:1, 3) Osimbu  o songola elilongiso Liembimbiliya, situlula ovituwa viwa via Yehova. Kuatisa omanu tu longisa Embimbiliya oku kuata elomboloko liokuti Suku yetu ukuacisola, o yongola okuti ovo va kuata omuenyo ko pui kuenda eye o va kuatisa oku ci tẽlisa. Ocina cipi cikuavo tu sukila oku linga?

9-10. Alivulu api tu pondola oku kuama poku songola elilongiso Liembimbiliya kuenda momo lie?

⁹ Kuama alivulu losapi hati, “Embimbiliya li Pondola Oku tu Longisa Nye?” kuenda “Kali Vocisola ca Suku.” Alivulu a-a, a pangiwa locimãho coku tu kuatisa oku vetiya utima wolondonge. Ndeci, ocipama 1 celivulu Embimbiliya li Longisa, ci tambulula apulilo amue ndeci: Anga hẽ Suku wa tu kapako, ale ongangala? Nye Suku a yeva vutima eci omanu va tala ohali? kuenda O Pondola hẽ Oku Kala Ekamba Lia Yehova? Kuenje elivulu Kali Vocisola, li lekisa kondonge ndomo a pondola oku amamako oku pamisa ukamba waye la Yehova kuenda ndomo omuenyo waye u pondola oku mioñoloha nda eye wa kapako olonumbi Viembimbiliya. Citava okuti wa siata ale oku  longisa omanu vakuavo lalivulu aco. Lopo handi o sukila oku pongiya ciwa elilongiso lelilongiso, oco o kapeko eci ondonge londonge yi sukila.

¹⁰ Kũlĩhĩsa ndeci okuti, pamue ondonge yi fetika oku vangula ondaka yimue okuti yi kasi velivulu likuavo, okuti ka yi kasi valivulu oku linga elilongiso. Nye tu sukila oku linga? Citava okuti ove u vetiya oku tanga elivulu liaco lika liaye. Kuenje ove amamako oku u longisa velivulu Embimbiliya li Longisa, ale Kali Vocisola.

11. Vepuluvi lipi tu fetika elilongiso lohutililo loku malusula lohutililo? Kuenda tu lomboluila ndati ondonge oku kũlĩha esilivilo liohutililo?

¹¹ Fetika elilongiso lohutililo. Ciwa oku fetika elilongiso Liembimbiliya lohutililo kuenda oku malusula lohutililo, eci tu limbuka okuti elilongiso li kasi oku amamako noke liolosemana vimue. Tu sukila oku kuatisa ondonge oku limbuka okuti, tu pondola lika oku kuata elomboloko Liondaka ya Suku omo liekuatiso liespiritu sandu Liaye. Akundi vamue, poku songola elilongiso va siata oku lombolola esilivilo lioku linga ohutililo poku tanga Tiago 1:5 ku popia hati: “Nda umue pokati kene wa kamba olondunge, amameko oku pinga ku Suku.” Noke akundi va pulisa ondonge okuti, tu ‘pinga ndati olondunge ku Suku?’ Citava okuti ondonge yi tambulula okuti tu sukila oku likutilila ku Suku.

12. O lombolola ndati Osamo 139:2-4, oco o kuatise ondonge oku mioñolola olohutililo viaye?

¹² Longisa ondonge ndomo a likutilila. U lomboluila okuti Yehova o yongola oku yeva olohutililo viove vi lingiwa lutima wosi. U lomboluilavo okuti volohutililo vietu vio pokolika, tu pondola oku situlula cosi ci kasi vutima wetu ku Yehova kuenda oku u sapuila ovina vina okuti ka tu pondola oku vi sapuila omunu laumue. Ivaluka okuti Yehova wa kũlĩha ale eci ci kasi vutima wetu. (Tanga Osamo 139:2-4.) Nda ondonge yi kasi locitangi coku yula ovisimĩlo vĩvi, ale ocituwa cimue cĩvi, u vetiya oku pinga ekuatiso lia Yehova vohutililo. Ndeci, sokolola okuti omunu umue o lilongisa ale otembo yalua, pole, handi o sole ovipito vimue violuali. Eye wa kũlĩha okuti ovina viaco ka via sungulukile, pole, handi o sanjukila ovina viaco. U vetiya oku sapela la Yehova poku situlula ndomo eye a liyevite loku lipilika ku Yehova oku pinga ekuatiso oco a linge ovina Yehova a sole.—Osamo 97:10.

13. (a) Momo lie tu sukilila oku laleka ondonge oku enda kolohongele? (b) Tu kuatisa ndati ondonge oku lianja la vosi Vonjango Yusoma?

¹³ Vonjanja yatete, laleka ondonge oku endaenda kolohongele. Omunu o longisa Embimbiliya, ovina a mola levi a yeva kolohongle vi pondola oku vetiya utima waye kuenda oku linga apongoloko. Lekisa kokuaye ovideo losapi hati, Nye ci Lingiwa Vonjango Yusoma? kuenda lesanju u laleka oku enda love kohongele. Nda citava u pitula. Ciwa okuti onjanja lonjanja, o laleka ukundi ukuavo oco wendeli kumue komunu o longisa Embimbiliya. Lonjila eyi, eye o ka kũlĩha vamanji vakuavo vekongelo. Kuenje eci a pitĩla vonjango Yusoma, eye o lianja la vosi.

14. Nye ci kuatisa ondonge oku kula kespiritu?

¹⁴ Ocimãho cetu o ku kuatisa ondonge oku kula kespiritu. (Va Efe. 4:13) Kefetikilo, eci umue a tava oku lilongisa Embimbiliya, citava okuti onjongole yaye oku kũlĩhĩsa ndomo elilongiso liaco li pondola oku u kuatisa. Osimbu ocisola caye ku Yehova camamako oku livokiya, eye o linga apongoloko kuenda citava okuti, o sokolola ndomo a pondola oku kuatisa  omanu vakuavo oku kongelamo vana va panga onepa kekongelo. (Mat. 22:37-39) Ku ka kuate ohele yoku sapuila ondonge okuti tu kuete esumũlũho lioku kuatisa kupange Wusoma lolombanjaile.

15. Tu kuatisa ndati ondonge oku litunda ciwa eci a liyaka lovitangi?

¹⁵ Longisa olondonge ovina va sukila oku linga poku liyaka lovitangi. Sokolola ndu okuti ondonge Yembimbiliya, okuti ukundi ka papatisiwile, oku sapuila okuti manji umue vekongelo wo sumuisa. Ku ko sapuile u kuete esunga lu ka kuete esunga, pole, u sapuila eci Embimbiliya li popia catiamẽla kueci eye a sukila oku linga. Citava okuti eye ecela manji, ale locisola o ‘lisunguluisa’ la manji. (Sokisa la Mateo 18:15.) Kuatisa ondonge oku pongiya ovina a ka popia. Lekisa kokuaye ndomo a pondola oku talavaya lo JW Library^®, Elivulu Lioku Konomuisa Liolombangi Via Yehova kuenda jw.org^® oco a kũlĩhe olonjila vialua vioku potolola ovitangi. Nda eye wa tambula epindiso osimbu ka papatisiwile, ci ka leluka kokuaye oku lianja la vosi vekongelo.

16. Momo lie ci kuetele esilivilo oku laleka manji ukuavo oco a kuame elilongiso Liembimbiliya tu kasi oku songola?

¹⁶ Laleka vamanji vakuavo vekongelo kuenda manji ukuakunyula akongelo, oco a kuame elilongiso Liembimbiliya o kasi oku songola. Momo lie? Ndeci ca lomboluiwa ale, akundi vakuavo va pondolavo oku eca ekuatiso kondonge lonjila yimue ka tua kũlĩhĩle. Sokolola ndeci okuti, ondonge yi yongola oku siapo oku sipa, pole, olonjanja vialua ka tẽla oku likandangiya. Laleka manji umue oku enda laye kondonge okuti wa yula ale ocitangi caco ndaño okuti ka ca lelukile kokuaye. Manji yaco citava okuti, eca olonumbi vi sukiliwa kondonge. Nda ove o kasi lohele yoku songola elilongiso kovaso a manji wa loñoloha, pinga kokuaye oco a songole elilongiso liaco. Pole, ku ka ecelele okuti ondonge yi pumba epuluvi lioku longisiwa la vamanji va loñoloha. Ivaluka okuti ocimãho cove oku kuatisa ondonge oku kula kespiritu.

17-18. Nye o sukila oku kũlĩhĩsa osimbu kua nõlelepo oku liwekapo oku songola elilongiso limue Liembimbiliya?

¹⁷ Nda ondonge ka yi lingi apongoloko, ove u pulisa ndoco, ‘O yongola hẽ okuti ndi liwekapo oku songola elilongiso liove?’ Osimbu kua ñolelepo onjila eyi, o sukila oku sokolola kekalo lekalo liondonge. Komanu vamue, cambata otembo yalua oku linga apongoloko, osimbu okuti vakuavo sio. Lipula ndoco: ‘Anga hẽ omunu ndi longisa Embimbiliya o kasi oku linga apongoloko ndomo ci likuata lekalo liaye?’ ‘Anga hẽ eye wa fetika oku “linga” ovina a kasi oku lilongisa, ale oku vi kapako?’ (Mat. 28:20) Oco ondonge yi linge apongoloko cambata otembo, pole, eye o sukila oku amamako oku linga apongoloko komuenyo waye.

 ¹⁸ Nye tu sukila oku linga nda omunu tu kasi oku longisa ale osimbu ka kapeleko ovina a kasi oku lilongisa? Sokolola ndoco: Ondonge yimue ya mala oku lilongisa elivulu Embimbiliya li tu Longisa kuenje pamue o fetika oku lilongisa velivulu Kali Vocisola Ca Suku, pole handi ka endaenda kolohongele, ale Kocipito Conjivaluko! Handi vali, o li sandela esunga oco ka ka linge elilongiso. Nda una ove o longisa oco a tuwa, lekisa utõi poku u sapuila ocituwa caye. *

19. Nye o sukila oku sapuila ku una okuti ka kapeleko elilongiso Liembimbiliya kuenda nye o sukila oku limbuka?

¹⁹ Ove o pondola oku fetika oku u pulisa ndoco, ‘Nye o sima okuti oco ca ku tĩlila oku kala Ombangi ya Yehova?’ Ondonge pamue yi tambulula ndoco: ‘Ame ndi sanjukila oku lilongisa Embimbiliya. Pole, lalimue eteke ndi kala Ombangi ya Yehova!’ Nda o kuete ondonge ndeyi, anga hẽ o kuete esunga lioku amamako lelingiso liaco? Handi vali, citava okuti ondonge yi ku sapuila esunga lieci ka yi lingila apongoloko. Ndeci, eye pamue o sima okuti lalimue eteke a kunda konjo lanjo. Noke lioku kũlĩha ndomo eye a liyevite, ove o pondola oku eca ekuatiso li sukiliwa kokuaye.

20. Elivulu Liovilinga 13:48 li tu kuatisa ndati oku limbuka nda tu amamako oku songola elilongiso Liembimbiliya lomunu umue ale sio?

²⁰ Ci sumuisa oku kũlĩha okuti, olondonge vimue Viembimbiliya vi sokisiwa la va Isareli kotembo ya Esekiele. Catiamẽla kokuavo, Yehova wa sapuila Esekiele hati: “Tala, ove kokuavo wa linga ndu imbaimba ovisungo via posoka lelaka liwa, haive o sika ciwa ocisikilo, omo va yeva eci o popia puãi ka va tava oku ci linga.” (Esek. 33:32) Pamue ka ci leluka oku sapuila komunu umue okuti cilo tu liwekapo oku u longisa Embimbiliya. Momo “otembo ya kambako yitito.” (1 Va Kor. 7:29) Kuenje tu sukila oku yuvula oku pesela otembo lomanu vana ka va lingi apongoloko, pole, tu sukila oku sandiliya “vakuotima wa sungulukila omuenyo ko pui.”​—Tanga Ovilinga 13:48.

21. Cipi ocisonehua cunyamo wo 2020 kuenda ci ka tu kuatisa oku linga nye?

²¹ Okupisa kunyamo wo 2020, ocisonehua cunyamo ci ka tu kuatisa oku mioñolola uloño wetu woku longisa omanu oco va linge olondonge. Olondaka vi kuãimo Yesu wa vi popia eci a kala kohongele yimue komunda yo Galilea viokuti: ‘Kuendi, ka longisi omanu oco va linge olondonge, va papatisi.’​—Mat. 28:19.