1-2. (a) Votembo yipi etu tu ivaluka vali enene umue ngandietu wa fa? (b) Nye Yesu a linga vuteke wa sulako osimbu ka file?

NDAÑO okuti pa pita ale otembo yalua tunde eci vana tu sole va fa, handi tu pondola oku va ivaluka. Tu va ivaluka vali enene keteke lina ovo va fa.

² Unyamo lunyamo, voluali luosi ohuluwa viomanu va siata oku liongolola oco tu ivaluke okufa kua umue tu sole calua okuti, Yesu Kristu. (1 Pet. 1:8) Etu tua siata oku liongolola oco tu ivaluke una wa eca omuenyo waye ndocisembi coku tu yovola kekandu kuenda kolofa. (Mat. 20:28) Kuenje Yesu wa yonguile okuti olondonge viaye vi ivaluka olofa viaye. Kuteke wa sulako osimbu ka file, eye wa linga ondalelo yimue yilikasi kuenda wa handeleka hati: “Ci lingaili onjivaluko yange.” *—Luka 22:19.

3. Nye tu konomuisa vocipama cilo?

³ Etendelo limue litito lia vana va siata oku kala Kocipito Conjivaluko colofa via Kristu, va kuete elavoko lioku enda kilu. Pole, olohuluwa via vana va kuete elavoko lioku kala palo posi, lavovo va siata oku kala Kocipito caco. Vocipama cilo, tu konomuisa esunga lieci ovimunga viaco vivali vi kalela Kocipito Conjivaluko unyamo lunyamo. Tu konomuisavo ndomo tu kuatisiwa poku kalapo. Tu fetika loku konomuisa esunga lieci olombuavekua vi kalela kocipito caco.

4. Momo lie olombuavekua vilila kombolo kuenda oku nyua kovinyu Kocipito Conjivaluko?

⁴ Unyamo lunyamo, olombuavekua vina vi kala Kocipito Conjivaluko, valia kombolo loku nyua kovinyu. Momo lie ovo valila kombolo loku nyua kovinyu? Oco ku tambuluiwe epulilo eli, kũlĩhĩsa eci ca pita kuteke wa sulako womuenyo wa Yesu palo posi. Noke liondalelo yo Paskoa, Yesu wa tumbika ocipito ca kũlĩhĩwa okuti Ondalelo ya Ñala. Eye wa pitisa ombolo lovinyu kueci ci soka 11 kovapostolo vaye va kuekolelo kuenda wa va sapuila oco valie lokunyua. Yesu wa va sapuila eci catiamẽla kovisila vivali okuti ocisila cokaliye kuenda ocisila Cusoma. * (Luka 22:19, 20, 28-30) Ovisila viaco, via eca epuluvi kovapostolo vaco kuenda ketendelo litito liomanu vakuavo, va laikele oku linga olosoma lovitunda kilu. (Esit. 5:10; 14:1) Olombuavekua via supapo, * vana va kongeliwa kovisila evi vivali, ovo lika vilia kombolo kuenda oku nyua kovinyu Kocipito Conjivaluko.

5. Nye olombuavekua via limbuka catiamẽla kelavoko va tambula?

⁵ Esunga likuavo lieci olombuavekua vi kalila Kocipito Conjivaluko lieli okuti: Ocipito caco, ceca kokuavo epuluvi lioku sokolola kelavoko liavo. Yehova wa eca kokuavo elavoko limue li komõhisa okuti va kuata etimba ka li fi halio ka li futi kilu, oco va kale kumue la Yesu Kristu la vakuavo va panga onepa ketendelo 144.000 kuenda ca velapo vali, oku ka kala kovaso a Yehova Suku! (1 Va Kor. 15:51-53; 1 Yoa. 3:2) Olombuavekua via kũlĩha okuti ovo va lalekiwa oku kuata esumũlũho liaco lioku kala kilu. Pole, oco ku tambuiwe elavoko liaco lioku enda kilu, ovo va sukila oku amamako lekolelo toke kolofa. (2 Tim. 4:7, 8) Eci ci kokela olombuavekua esanju lialua lioku sokolola kelavoko liavo liokilu. (Tito 2:13) Nye ci popiwa catiamẽla kolomeme vikuavo? (Yoa. 10:16) Esunga lipi va kuete lioku kala Kocipito Conjivaluko?

6. Momo lie olomeme vikuavo vi kalila Kocipito Conjivaluko unyamo lunyamo?

⁶ Olomeme vikuavo vi kala Kocipito Conjivaluko, ka vali kombolo loku nyua kovinyu pole, ovo va sanjuka oku kalapo. Kunyamo 1938, vana va kuete elavoko lioku kala palo posi, ya kala onjanja yatete va lalekiwa oku kala Kocipito Conjivaluko. Utala Wondavululi, 1 Yelombo 1938 wa lomboluile hati: “Ca sunguluka okuti [olomeme vikuavo] vi kala kohongele yaco loku tala ovina vi lingiwa. . . . Epuluvi liaco lia ponduile oku kalavo liesanju kokuavo.” Ndeci omunu umue a sanjuka omo lioku lalekiwa oku kala kocipito cuvala umue, olomeme vikuavo vi sanjukavo oku kala Kocipito Conjivaluko.

7. Momo lie olomeme vikuavo vi lavokela lesanju ohundo Yocipito Conjivaluko?

⁷ Olomeme vikuavo vi sanjukilavo elavoko liavo. Ovo va lavoka lesanju ohundo Yocipito Conjivaluko, poku sokolola kueci Kristu kuenda 144.000 eci va ka lingila omanu vakuekolelo vokuenda kuviali Wohulukãi Yanyamo. Vemẽhi wuviali wa Soma Yesu Kristu, olombuavekua viaco, vi ka kuatisa koku pongolola  ongongo oco yi linge ocumbo celau kuenda oku kuatisa omanu oku li pua. Ci sanjuisa calua oku mola omanu valua oku kala Kocipito Conjivaluko loku sokolola kovitumasuku Viembimbiliya vi ka tẽlisiwa kovaso yoloneke, ndeci vina vi sangiwa ku Isaya 35:5, 6; 65:21-23; kuenda Esituluilo 21:3, 4. Poku sokolola vangandiavo vana va fa oku ka kala voluali luokaliye, ci pamisa elavoko liavo liokovaso yoloneke kuenda ci pamisavo onjila va nõla yoku amamako oku vumba Yehova.—Mat. 24:13; Va Gal. 6:9.

8. Esunga lipi likuavo olomeme vikuavo vi kalela Kocipito Conjivaluko?

⁸ Kũlĩhĩsa esunga likuavo olomeme vikuavo vi kalela Kocipito Conjivaluko. Ovo va yongola oku lekisa ocisola cavo loku kuatisa olombuavekua. Ondaka ya Suku ya popele okuti olombuavekua la vana va kuete elavoko lioku kala palo posi, va ponduile oku talavayela kumosi. Ndamupi? Tu kũlĩhĩsi ocindekaise cimue.

9. Ocitumasuku ci sangiwa ku Sakariya 8:23, ndamupi olomeme vikuavo via ponduile oku liyeva catiamẽla kolombuavekua?

⁹ Tanga Sakariya 8:23. Ocitumasuku eci, ci lombolola ndomo olomeme vikuavo vi liyeva catiamẽla ku vamanji olombuavekua. Olondaka viokuti “u Yudea” kuenda “lene amanu,” vi lomboloka ocimunga cimuamue okuti, ocisupe colombuavekua. (Va Rom. 2:28, 29) “Alume ekũi vakualimi olofeka viosi” va lomboloka olomeme vikuavo. Ovo ‘va kuata’ lekolelo kolombuavekua loku li kongela kokuavo kefendelo liocili. Kuenje kuteke Wocipito Condalelo, olomeme vikuavo vi lekisa okuti via kakatela kolombuavekua poku kala kumosi lavo.

10. Nye Yehova a linga oco ku tẽlisiwe ocitumasuku ci sangiwa ku Esekiele 37:15-19, 24, 25?

¹⁰ Tanga Esekiele 37:15-19, 24, 25. Yehova wa tẽlisa ocitumasuku eci, poku kongela olombuavekua kuenda olomeme vikuavo oco va talavayele kumosi. Ocitumasuku ci tukula olombueti vivali. Vana va kuete elavoko liokilu va sokisiwa lombueti ya “Yuda” (okuti ocikoti cina olosama vioko Isareli via enda oku nõliwa) kuenda vana va kuete elavoko lioku kala palo posi va sokisiwa lombueti “ya Efarimi.” * Yehova wa laikele oku kongela ovimunga viaco vivali oco ovo va linge lika “ombueti yimosi.” Eci ci lomboloka okuti ovo va ponduile oku kala vemẽhi Liosoma yimosi okuti, Kristu Yesu. Unyamo lunyamo, olombuavekua kuenda olomeme vikuavo vi kala Kocipito Conjivaluko, ka va kala ndovimunga vivali, pole va kala ‘ndocunda cimuamue’ vemẽhi ‘liungombo umuamue.’—Yoa. 10:16.

11. Konepa yipi “olomeme” via tukuiwa ku Mateo 25:31-36, 40, vieca ekuatiso liavo ku vamanji a Kristu?

¹¹ Tanga Mateo 25:31-36, 40. “Olomeme” Yesu a tukula, vi lomboloka vana vakuesunga koloneke viesulilo, vi kuete elavoko lioku kala palo posi, okuti olomeme vikuavo. Ovo lekolelo, va kuatisa ocisupe ca va manji a Kristu, ca piãla enene, va va kuatisa koku tẽlisa ocikele cimue cinene okuti coku kundila koluali luosi kuenda oku longisa amanu oco va linge olondonge.—Mat. 24:14; 28:19, 20.

12-13. Konepa yipi yikuavo olomeme vikuavo vi kuatisa vamanji a Kristu?

¹² Unyamo lunyamo osimbu Ocipito Conjivaluko ka ca pitĩlile, olomeme vikuavo vi kuatisa vamanji a Kristu kupange woku laleka omanu koluali luosi oku enda Kocipito.  (Tala okakasia losapi hati: “ O Kasi hẽ Oku Linga Esokiyo Osimbu Otembo Yonjivaluko ka ya Pitĩlile Kuenda Noke Lionjivaluko?”) Ovo va vakuatisavo kovina viosi via kongela koku pongiya ocipito caco, ndaño vakongelo alua ka muli ombuavekua yimue. Olomeme vikuavo, vi sanjuka oku kuatisa vamanji a Kristu kolonepa evi. Olomeme viaco, via kũlĩha okuti Yesu o tenda ovina ovo va lingila vamanjaye olombuavekua, ndu okuti, va kasi oku vi lingila eye.—Mat. 25:37-40.

¹³ Asunga api vali vosi yetu tu kuete lioku kala Kocipito Conjivaluko ndaño elavoko tu kuete liokilu, ale posi?

14. Yehova la Yesu va siata oku lekisa ndati ocisola kokuetu?

¹⁴ Etu tu sanjukila calua ocisola Yehova la Yesu va siata oku lekisa kokuetu. Yehova wa siata oku lekisa ocisola caye kokuetu volonjila vialua, pole, kuli onjila yimue okuti ya velapo viosi. Suku yetu, wa lekisa ocisola caye ca velapo poku tuma Omõlaye o soliwe, oco a talisiwe ohali kuenda oku tu fila. (Yoa. 3:16) Yesu wa lekisavo ocisola calua, poku lieca olumue oku pesila omuenyo waye kokuetu. (Yoa. 15:13) Lalimue eteke tu ka tẽla oku tiula ocisola Yehova la Yesu va siata oku lekisa kokuetu. Pole, tu sukila oku lekisa olopandu vietu konjila ndomo tu ambata omuenyo wetu eteke leteke. (Va Kol. 3:15) Etu tu kala Kocipito Conjivaluko, momo tu yongola oku ivaluka ocisola Yehova la Yesu va tu kuetele kuenda ndomo tu lekisavo ocisola cetu kokuavo.

15. Momo lie olombuavekua kuenda olomeme vikuavo va velisilapo calua ombanjale yocisembi?

¹⁵ Etu tua velisapo calua ombanjale yocisembi. (Mat. 20:28) Olombuavekua via velisapo calua ocisembi, momo ca ecelela okuti va kuata elavoko limue li komõhisa. Omo liekolelo va kuetele ocilumba ca Kristu, Yehova wa va tenda okuti vakuesunga kuenda ndomãla vaye. (Va Rom. 5:1; 8:15-17, 23) Olomeme vikuavo vi ecavo olopandu kocisembi. Omo liekolelo va kuetele ocilumba ca Kristu, ovo va tendiwa okuti vapua eko kovaso a Suku, vo lingila upange u kola kuenda va kuete elavoko lioku “tunda kohali ya piãla.” (Esit. 7:13-15) Onjila yimue olombuavekua kuenda olomeme vikuavo vi lekisa olopandu viavo kocisembi, poku kala Kocipito Conjivaluko unyamo lunyamo.

16. Esunga lipi vali likuavo tu kalela Kocipito Conjivaluko?

¹⁶ Esunga likuavo tu kalela Kocipito Conjivaluko lieli okuti, tu yongola oku pokola ku Yesu. Ci kale okuti elavoko lietu kilu, ale posi, omunu lomunu pokati ketu tu yongola oku pokola kocikundi Yesu a eca kuteke a tumbika Ocipito Conjivaluko cokuti: “Ci lingaili onjivaluko yange.” —1 Va Kor. 11:23, 24.

17. Ocipito Conjivaluko, ci tu kuatisa ndati oku amẽla ku Yehova?

¹⁷ Etu tu amẽla ku Yehova. (Tia. 4:8) Ndomo tua siata oku ci lilongisa, Ocipito Conjivaluko ci tu ĩha epuluvi lioku sokolola catiamẽla kelavoko Yehova a likuminya kokuetu kuenda oku sokolola kocisola calua a lekisa kokuetu. (Yer. 29:11; 1 Yoa. 4:8-10) Eci tu sokolola kelavoko lietu lio kovaso yoloneke kuenda kocisola ka ci pui Yehova a tu kuetele, ocisola cetu kokuaye ci livokiya kuenda ukamba wetu laye u pama.—Va Rom. 8:38, 39.

18. Oku sokolola kongangu ya Yesu ci tu vetiya oku linga nye?

 ¹⁸ Tu vetiyiwa oku setukula ongangu ya Yesu. (1 Pet. 2:21) Koloneke vi panda Ocipito Conjivaluko, tu tiamisila utima kovolandu Embimbiliya a lombolola ovolandu osemana ya sulako womuenyo wa Yesu palo posi, kolofa viaye kuenda kepinduko liaye. Kuenje kuteke Wocipito Conjivaluko, ohundo yi tu ivaluisa ocisola Yesu a tu kuetele. (Va Efe. 5:2; 1 Yoa. 3:16) Osimbu tu tanga catiamẽla kongangu ya Yesu kuenda oku sokolola kokuayo tu vetiyiwa “oku endaenda ndeci Yesu a endaenda.”—1 Yoa. 2:6.

19. Tu amamako ndati oku kala vocisola ca Suku?

¹⁹ Tu nõlipo oku amamako oku kala vocisola ca Suku. (Yuda 20, 21) Tu amamako oku kala vocisola ca Suku poku linga cosi ci tava oco tu pokole kokuaye, oku sumbila onduko yaye kuenda oku sanjuisa utima waye. (Olosap. 27:11; Mat. 6:9; 1 Yoa. 5:3) Oku kala Kocipito Conjivaluko ci tu vetiya oku nõlapo oku ambata omuenyo umue ndu okuti tu kasi oku popia ku Yehova okuti, ‘ndi yongola oku amamako oku kala vocisola cove otembo ka yi pui!’

20. Esunga lipi liwa tu kuete lioku kala Kocipito Conjivaluko?

²⁰ Ci kale okuti elavoko lietu lioku ka kala otembo ka yi pui kilu, ale posi, tu kuete esunga liwa lioku kala Kocipito Conjivaluko. Unyamo lunyamo, eci tu liongolola keteke liaco, tu ivaluka okufa kua umue tu sole calua okuti, Yesu Kristu. Handi vali, tu ivalukavo ocisola calua okuti, ocisola Yehova a lekisa kokuetu poku eca Omõlaye ndocisembi. Unyamo ulo, Ocipito Conjivaluko ci ka kala vuteke lieteke 15 Yatãlo ya Kupupu 2022. Tu sole Yehova kuenda Omõlaye, kuenje poku ivaluka olofa via Yesu, ka ku kala lacimue ca velapo vali okuti oku kala Kocipito Conjivaluko ci sule.