OCIPAMA CELILONGISO 4
Yehova o Sumũlũisa Alikolisilo Etu Oku Kala Kocipito Conjivaluko
“Ci lingaili onjivaluko yange.”—LUKA 22:19.
OCISUNGO 19 Ondalelo ya Ñala
OVINA TU LILONGISA a
1-2. Momo lie unyamo lunyamo tu kalila Kocipito Conjivaluko?
CIPITAHÃLA 2.000 kanyamo, Yesu wa eca omuenyo waye oco tu kuate omuenyo ko pui. Vuteke osimbu handi Yesu ka file, eye wa handeleka olondonge viaye oco va ivaluke ocilumba caye, pocakati condalelo yimue yi sulemo muna mua kongela ombolo kuenda ovinyu.—1 Va Kor. 11:23-26.
2 Etu tu pokola kocihandeleko ca Yesu, momo tu u sole calua. (Yoa. 14:15) Vunyamo lunyamo osimbu otembo Yonjivaluko ka ya pitĩlile kuenda noke Lionjivaluko, tu lekisa olopandu vietu kovina eye a linga, poku sokolola loku likutilila catiamẽla kesilivilo liolofa viaye komanu. Handi vali, tu sanjuka calua poku litumbika kupange woku kunda, loku laleka omanu valua oco va likongele letu kepuluvi liaco lilikasi. Omo liaco, ka tu ka eceleli okuti cimue ci tu tateka oku kala Kocipito Conjivaluko.
3. Nye tu konomuisa vocipama cilo?
3 Vocipama cilo, tu ka konomuisa atosi atatu, a lekisa alikolisilo afendeli va Yehova va siata oku linga, oco va kale Kocipito Konjivaluko yolofa via Yesu: (1) onumbi Yesu a sia poku linga Ocipito Conjivaluko, (2) poku laleka vakuetu o ku enda Kocipito caco kuenda (3) oku linga Ocipito caco ndaño lovitangi.
ONUMBI YESU A SIA POKU LINGA OCIPITO CONJIVALUKO
4. Apulilo api a siata oku lingiwa unyamo lunyamo Kocipito Conjivaluko kuenda momo lie oku kũlĩha atambululo aco ci kuete esilivilo kokuetu? (Luka 22:19, 20)
4 Unyamo lunyamo Kocipito Conjivaluko, tua siata oku yevelela ohundo ya kunamela Kembimbiliya, haiyo yi tambulula apulilo alua a siata. Etu tua siata oku lilongisa esunga lieci tua sukilila ocisembi kuenda ndomo olofa viomunu umosi lika vi pondola oku imulako akandu omanu vosi. Tua siata oku ivaluisiwa elomboloko liombolo lovinyu kuenda tua siatavo oku ivaluisiwa helie omunu o pondola okulia ale oku nyua kovindekaise viaco. (Tanga Luka 22:19, 20.) Tua siatavo oku sokolola kasumũlũho a ka eciwa komanu va kuete elavoko lioku kala palo posi otembo ka yi pui. (Isa. 35:5, 6; 65:17, 21-23) Etu ka tu tendi ocili eci ndu okuti tua yovuiwa ale. Olohuluwa vialua viomanu ka vi kuete elomboloko liesilivilo liocilumba ca Yesu. Handi vali, ovo ka va lingi Ocipito Conjivaluko ndomo Yesu a longisa kolondonge viaye. Momo lie ka va kuamela onumbi Yesu a longisa?
5. Noke liovapostolo vamue oku fa ndamupi omanu va fetika oku ivaluka olofa via Yesu?
5 Noke liolofa via vamue ovapostolo va Yesu, Akristão vesanda va fetika oku iñila vekongelo. (Mat. 13:24-27, 37-39) Ovo “va vangula ovina via penga, oco va koke olondonge okuti vi va kuama.” (Ovil. 20:29, 30) Cimue pokati ‘kovina via penga’ Akristão vesanda va vangula, oku longisa okuti Yesu ka ecele etimba liaye onjanja yimosi lika “oco ambate akandu omanu valua” ndomo Embimbiliya lipopoia, pole, ovo va longisa okuti ocilumba caye ci sukila oku pituluiwa olonjanja vialua. (Va Hev. 9:27, 28) Koloneke vilo, omanu valua va tava kelongiso liaco liesanda. Volosemana viosi, ale pamue eteke leteke, ovo va enda konembele oku ka linga onjivaluko yocilumba ca Yesu, okuti vonembele Yokatolika va yi tukula hati, “Ocilumba Comisa.” b Atavo akuavo ka a ivaluka olofa via Yesu olonjanja viosi, pole, ovo ka va kuete elomboloko liwa lieci ci lomboloka ocilumba ca Yesu. Vamue va li pula ndoco, ‘Olofa via Yesu vi lomboloka hẽ okuti akandu etu a eceliwa?’ Momo lie va lipulila ndoco? Momo ovo va tava kueci omanu va popia okuti akandu omanu ka a pondola oku eceliwa locilumba ca Yesu. Olondonge via Yesu vi kuatisa ndati omanu oku kũlĩha elomboloko liocilumba ca Yesu kuenda onjila ya sunguluka yoku ivaluka olofa viaye?
6. Kunyamo 1872, elomboloko lipi ocimunga cimue Cavakuakulilongisa Embimbiliya lia kuata?
6 Kocita 19, ocimunga cimue ca vakuakulilongisa Embimbiliya ca kala loku songuiwa la manji Charles Taze Russell, va fetika oku konomuisa ondongosi Ovisonehua. Ovo va yonguile oku kũlĩha ocili catiamẽla kocilumba ca Yesu kuenda ndomo olofa viaye via ponduile oku ivalukiwa. Kunyamo 1872, omo liakonomuiso va linga Vembimbiliya, ovo va kuata elomboloko lieci ocisembi ca Yesu ca lingila omanu vosi. Ovo ka va solekele ovina va lilongisa. Va yonguile okuti omanu va ci kũlĩhĩla pocakati calivulu, covikanda viasapulo kuenda olorevista. Noke poku setukula Akristão vokocita catete, ovo va fetika oku liongolola unyamo lunyamo oco va linge Ocipito Conjivaluko.
7. Tu kuatisiwa ndati lakonomuiso a lingiwa la vakuakulilongisa Embimbiliya?
7 Cilo, tu kasi oku kuatisiwa lakonomuiso a lingiwa la Vakuakulilongisa Embimbiliya vokuenda kuanyamo alua. Ndamupi? Lekuatiso lia Yehova tu kuete elomboloko lieci ocilumba ca Yesu ci lomboloka kuenda eci oco ca lingila komanu vosi. (1 Yoa. 2:1, 2) Tua lilongisavo okuti Embimbiliya lilombolola alavoko avali omanu vana va sanjuisa Suku okuti, vamue va ka muila omuenyo kilu kuenda ku valua omuenyo ka u pui palo posi. Etu tu amẽla ku Yehova osimbu tu konomuisa ocisola eye a tu kuetele kuenda ndomo tua kuatisiwa locilumba ca Yesu. (1 Pet. 3:18; 1 Yoa. 4:9) Ndeci ca linga vamanji vakuekolelo kosimbu, tu laleka omanu oco va likongele kokuetu Kocipito Conjivaluko ndomo Yesu a ci longisa kolondonge viaye.
OKU LALEKA OMANU OKU ENDA KOCIPITO CONJIVALUKO
Nye o pondola oku linga oco o kuate onima yiwa kesokiyo lioku laleka omanu oku enda Konjivaluko? (Tala ovinimbu 8-10) e
8. Nye afendeli va Yehova va siata oku linga oco va laleke omanu oku enda Kocipito Conjivaluko? (Tala ociluvialuvia.)
8 Afendeli va Yehova vokuenda kuanyamo alua, va siata oku laleka omanu oku enda Kocipito Conjivaluko. Kunyamo 1881, vamanji ko Estadus Unidus va lalekiwa oco va lisange konjo yimue ko Allegheny, Pennsylvania, oco ku lingiwe ocipito ci likasi. Noke ekongelo lekongelo lia linga Ocipito cavo muẽle Conjivaluko. Kosãi Yelombo yunyamo 1940, akundi vosi va tambula elaleko liokuti, omunu lomunu o pondola oku laleka umue vocikanjo caye okuti wa lekisa onjongole. Kunyamo 1960, ya kala onjanja yatete o Betele oku eca kakongelo elaleko lia sonehiwa vopapelo. Oku upisa opo, olohuluwa viovicapa vioku laleka omanu oku enda Kocipito Conjivaluko, via siata oku eciwa. Momo lie tua siatela oku likolisilako oku laleka omanu?
9-10. Onima yipi yi tunda kalikolisilo tu linga oku laleka omanu oku enda Kocipito Conjivaluko? (Yoano 3:16)
9 Esunga limue lioku laleka omanu oco va kale Kocipito Conjivaluko kumue letu, lieli okuti vana veya onjanja yatete va lilongisa eci catiamẽla ku Yehova kuenda eci Yesu a tu lingila vosi yetu. (Tanga Yoano 3:16.) Tu lavoka okuti, eci ovo va ka mola loku yeva ohundo Yocipito Conjivaluko, ci pondola oku va vetiya oku lilongisa ovina vikuavo kuenda oku kala afendeli va Yehova. Pole, ku ka kalavo vakuavo va ka kuatisiwa.
10 Tu ka lalekavo vana va liwekapo osimbu oku vumba Yehova. Tu ci linga poku va ivaluisa okuti Suku handi o va sole. Valua va tava kelaleko lietu kuenda tu sanjuka calua oku va mola. Poku kala Kocipito Conjivaluko, ci va ivaluisa ndomo ovo va solaile oku vumba Yehova kosimbu. Kũlĩhĩsa ulandu wa manji Monica. c Eye wa tumbulula upange waye woku kunda vokuenda kuefengi lio COVID-19. Noke lioku kala Kocipito Conjivaluko cunyamo 2021, eye wa popia hati: “Ocipito Conjivaluko ca siata oku kala ocina cimue ci likasi kokuange. Papita ale 20 kanyamo, kuenje yilo onjanja yatete oku eca uvangi komanu loku valaleka oku enda Kocipito Conjivaluko. Ame nda linga cosi ci tava oco ndi laleke omanu momo, nda sanjukila ovina Yehova kuenda Yesu va lingila kokuange.” (Osa. 103:1-4) Nda omanu va tava kelaleko lioku enda Kocipito Conjivaluko ale sio, etu tu sukila oku likolisilako momo tua kũlĩha okuti Yehova o sanjukila alikolisilo etu.
11. Yehova o sumũlũisa ndati alikolisilo etu oku laleka omanu oco va ende Kocipito Conjivaluko? (Hagai 2:7)
11 Yehova wa siata oku sumũlũisa alikolisilo etu, oku laleka omanu valua Kocipito Conjivaluko. Kunyamo 2021, ndaño lefengi lio COVID-19, Konjivaluko tua kala eci ci soka 21.367.603 komanu. Eci ci lekisa okuti, etendelo liaco lia pitahãla calua oku ci sokisa letendelo Liolombangi Via Yehova vi sangiwa voluali! Pole, Yehova ka lisakalaisa lika letendelo lialua liomanu va kala Konjivaluko. Eci eye a velisapo vali, onjongole yomunu lomunu. (Luka 15:7; 1 Tim. 2:3, 4) Tu koleli okuti eci tu linga upange woku laleka omanu, Yehova o tu kuatisa oku sanga omanu vakuotima wa sunguluka.—Tanga Hagai 2:7.
KALA KOCIPITO CONJIVALUKO NDAÑO LEKALO KA LIALELUKILE
Yehova o sumũlũisa alikolisilo etu oku kala Kocipito Conjivaluko (Tala ocinimbu 12) f
12. Ovitangi vipi okuti pamue ka vi leluka oco tu kale Kocipito Conjivaluko? (Tala ociluvialuvia.)
12 Yesu wa popele okuti, koloneke via sulako tua ponduile oku liyaka lovitangi vialua, ndeci, oku lambalaliwa lepata, oku kapiwa vokayike, ovoyaki, afengi kuenda ovina vikuavo. (Mat. 10:36; Mar. 13:9; Luka 21:10, 11) Olonjanja vialua poku liyaka lovitangi viaco, ka ci leluka oku kala Konjivaluko yolofa via Yesu. Nye vamanji va linga oco va yule ovitangi viaco kuenda Yehova wa va kuatisa ndati?
13. Yehova wa sumũlũisa ndati utõi kuenda elikolisilo lia manji Artem lioku linga Ocipito Conjivaluko osimbu a kala vokayike?
13 Oku kapiwa vokayike. Vamanjetu va kasi volokayike va siata oku linga cosi ci tava oco va ivaluke olofa via Yesu. Kũlĩhĩsa ulandu wa manji Artem. Kunyamo 2020 vokuenda kuosemana Yonjivaluko, eye wa kapiwile vohondo yimue yokayike ya kala la 17 kolometulu okuti mua enda oku kala eci ci soka olomandekua vitãlo. Ndaño lekalo liaco, eye wa sanga ovinyu lombolo oco a linge Ocipito Conjivaluko kuenda eye wa linga esokiyo lioku linga ohundo Yonjivaluko oco a li pamise eye muẽle. Pole, olomandekua vikuavo via kala laye via enda oku sipa calua kuenda oku vangula upopi ka wa sungulukile. Nye eye a linga? Wa pinga kokuavo nda okuti vokuenda kuowola yimosi va pondola oku liwekapo oku sipa kuenda oku vangula ovina ka via sungulukile. Ca komõhisa manji Artem ceci okuti, ovo va tava kepingilo liaye lioku liwekapo oku sipa loku vangula upopi ka wa sungulukile vokuenda Kuonjivaluko. Manji Artem wa popia hati: “Nda fetika oku vangula lavo catiamẽla Konjivaluko.” Ndaño ovo va popele okuti ka va yongola oku yevelela lacimue catiamẽla kocipito caco, pole, noke lioku yeva loku mola manji Artem oku linga Ocipito Conjivaluko, kesulilo va linga apulilo alua.
14. Vokuenda kuefengi lio COVID-19 alikolisilo api a lingiwa oco ku lingiwe Ocipito Conjivaluko?
14 Efengi lio COVID-19. Omo liefengi liaco, afendeli va Yehova ka va ponduile vali oku liongoluila pamosi oco va linge Ocipito Conjivaluko. Pole, efengi liaco ka lia tatekele oku linga Ocipito Conjivaluko. d Akongelo a kuatele epondolo lio Internet, a linga Ocipito caco pocakati Covideokoferencia. Pole, nye cipopiwa kolohuluwa via vamanji ka va kuatele epondolo lio Internet? Olofiliale vimue via linga esokiyo liokuti, ohundo yonjivaluko yi pita votelevisãu kuenda voradiu. Handi vali, olofiliale via linga esokiyo liokuti, ohundo yonjivaluko yi pongoluiwa kueci ci soka 500 kalimi okuti, vosi va kasi kovitumãlo viocipãla va pondola oku yevelela Ocipito Conjivaluko. Vamanji vakuekolelo va linga esokiyo liokuti olohundo viaco via ngalavaliwa, vieciwa ku vamanji va kuete esukila.
15. Nye wa lilongisila kulandu wondonge yimue Yembimbiliya yi tukuiwa Sue?
15 Elambalalo vepata. Ku vamanji vamue ocitangi cinene coku kala Kocipito Conjivaluko, elambalalo vepata. Kũlĩhĩsa ulandu wondonge yimue Yembimbiliya yi tukuiwa Sue. Kunyamo 2021, osimbu kua kambele eteke limosi Liocipito Conjivaluko, Sue wa sapuila manji wa siata oku lilongisa laye Embimbiliya hati, si kala Kocipito Conjivaluko omo lielambalalo vepata. Kuenje manji wa siata oku u longisa Embimbiliya wa tanga ocisonehua ca Luka 22:44. Noke manji wo sapuila okuti eci tu li pita lovitangi, tu sukila oku kuama ongangu ya Yesu yoku likutilila ku Yehova kuenda oku kolela Kokuaye lutima wosi. Eteke lia kuamamo Sue wa pongiya ombolo lovinyu kuenda wa yevelela ocipama ci likasi Cefendelo Liomele vo jw.org. Vuteke waco eci a kala lika liaye vohondo, wa yevelela Ocipito Conjivaluko pocakati cotelefone. Noke Sue wa sonehela manji u longisa Embimbiliya hati: “Helã ove wa ndi vetiya calua. Nda linga cosi citava oco ndi kale Kocipito Conjivaluko kuenje Yehova wa ñuatisa. Si tẽla oku lombolola esanju lolopandu ndi kuete!” O sima hẽ okuti Yehova o pondolavo oku ku kuatisa nda o kasi oku liyaka lovitangi vimuamue?
16. Ekolelo lipi tu kuete liokuti Yehova o ka sumũlũisa alikolisilo etu oku kala Kocipito Conjivaluko? (Va Roma 8:31, 32)
16 Yehova o sanjukila calua alikolisilo etu oku kala Kocipito Conjivaluko colofa via Yesu. Tua kolela okuti Yehova o ka tu sumũlũisa eci tu lekisa olopandu kovina viosi eye a siata oku tu lingila. (Tanga Va Roma 8:31, 32.) Omo liaco, tu nõlipo oku kala Kocipito cunyamo ulo kuenda osimbu Ocipito Conjivaluko ka ca pitĩlile, tu likolisiliko vali oku litumbika kovopange a Yehova.
OCISUNGO 18 Tu Eca Olopandu Omo Liocisembi
a Keteke lia 4 vovali yosãi ya Kupupu yunyamo 2023, omanu valua voluali luosi, va ka enda Kocipito coku ivaluka olofa via Kristu. Komanu valua, yi ka kala onjanja yatete oku kala kocipito caco. Vana va liwekapo oku vumba Yehova kuenda ka va la kala vali kocipito caco vokuenda kuanyamo alua, va ka kala kovo. Valua okuti vekalo va ka sangiwa ci ka tĩla oku ka kalapo pole, va ka likolisilako oco ka va kapumbe. Ndaño wa ka sangiwa lovitangi vimue, kolela okuti Yehova o ka sanjuka calua kalikolisilo o ka linga poku kala Kocipito caco.
b Vakuatavo amue poku linga onjivaluko yaco, poku lia ombolo kuenda oku nyua ovinyu, kokuavo ci kala ndu okuti atimba avo apongoloka etimba kuenda osonde ya Kristu. Ovo va sima okuti etimba kuenda osonde ya Yesu, yi lumbiwa olonjanja viosi eci omunu a panga onepa kokulia kombolo loku nyua kovinyu.
c Olonduko vimue via pongoluiwa.
d Talavo ocipama vo jw.org losapi hati, “Memorial de 2021.”
