1. Nye ca vetiya Kaini oku nõla onjila ka ya sungulukile kuenda ovitangi vipi vieyililako?

KAINI wa sukilele oku nõla onjila yimue yi kuete esilivilo lia velapo. Eye wa sukilile oku nõla oku lava ovisimĩlo viaye vĩvi oco a kuate onima yiwa. Nda Kaini wa ecelele okuti ovisimĩlo viaye vĩvi vi lava ovilinga viaye, nda co kokela ovitangi vialua. Embimbiliya li lekisa okuti, Kaini wa nõla onjila ka ya sungulukile. Onjila eye a nõla ya koka olofa via manjaye Abele kuenda ya nyõla ukamba Kaini a kuatele Lululiki waye.—Efetikilo 4:3-16.

2. Momo lie ci kuetele esilivilo oku nõla onjila yiwa?

² Ndeci ca pita la Kaini, vosi yetu tu sukila oku nõla onjila tu kuama komuenyo. Olonjila vimue ka via lelukile oku vi nõla pole, vikuavo via leluka. Ndanõ lovina viaco, olonjila vialua tu nõla, vi pondola oku tu kuatisa ale oku tu nenela ovitangi komuenyo. Nda tua nõla onjila yiwa, ka tu ka kuata ovitangi vialua kuenda tu kuata esanju komuenyo. Pole, eci tu nõla onjila ka ya sungulukile tu kuata ovitangi vialua kuenda esumuo komuenyo.—Olosapo 14:8.

3. (a) Kulie tu sukila oku kolela oco tu nõle onjila yiwa? (b) Apulilo api tu konomuisa?

 ³ Nye ci ka tu kuatisa oku nõla lolondunge onjila tu kuama? Tu sukila oku kolela okuti Suku, o yongola oku tu kuatisa kuenda oku tu ĩha olondunge tu sukila oco tu nõle onjila yiwa. Handi vali, tu sukilavo oku kolela Kondaka yaye kuenda kalungulo aye. (Tanga Tiago 1:5-8.) Osimbu tu amamako oku pamisa ukamba wetu la Yehova kuenda oku sola Ondaka yaye, ci ka tu kuatisa oku kolela okuti eye wa kũlĩha ovina tu sukila. Osimbu ka tua nõlele onjila tu yongola oku kuama, tu sukila oku konomuisa Ondaka yaye. Tu pondola oku mioñolola ndati uloño wetu woku nõla onjila yiwa? Anga hẽ tu pondola oku pongolola onjila tua nõla?

4. Onjila yipi Adama a nõlapo kuenda ovitangi vipi vieyililako?

⁴ Tunde kefetikilo lioluali, omanu va siata oku nõla onjila va yongola oku kuama. Ulume watete Adama wa sukilile oku nõla nda o yevelela Ululiki waye Yehova, ale o yevelela ukãi waye, Heva. Adama wa nõlapo oku yevelela Heva, una wo vetiya oku nõla onjila yimue ka ya sungulukile. Omo lioku ci linga, Yehova wo tundisa vocumbo Cedene, kuenje noke liotembo yimue wa fa. Koloneke vilo, tu kasivo oku tala ohali omo lionjila ka ya sungulukile Adama a nõla.

5. Tu tenda ndati ocikele coku nõla onjila tu kuama?

⁵ Citava okuti omanu vamue va sima okuti, nda va kuata lika esanju nda ka va kuatele ocikele coku nõla onjila va kuama kovina viosi va yongola oku linga. Pamue ove wa kuatelevo ovisimĩlo viaco. Pole, ca sunguluka oku ivaluka okuti Yehova ka tu lulikile ndomakina okuti ka yi sokolola kuenda ka yi nõla ovina yi yongola. Eye wa tu ĩha Ondaka yaye yi tu longisa oku nõla lolondunge onjila ya sunguluka. Yehova o yongola okuti tu nõla onjila tu kuama, poku ci linga ci pondola oku tu kuatisa. Konomuisa ovolandu akuãimo.

6, 7. Onjila yipi va Isareli va sukilile oku nõla kuenda momo lie ka ca lelukile kokuavo? (Tala ociluvialuvia kefetikilo liocipama cilo.)

⁶ Eci va Isareli va kala Vofeka Yohuminyo, va sukilile oku nõla nda va fendela Yehova ale olosuku vikuavo. (Tanga Yehosua 24:15.) Onjila yaco yi molẽha ndu okuti ya leluka. Pole, onjila va ponduile oku kuama nda ya va nenela omuenyo ale olofa. Vokuenda kuotembo Yolonganji, va Isareli va amamako oku nõla olonjila ka via sungulukile. Ovo va liwekapo oku fendela Yehova kuenda va fetika oku fendela olosuku viesanda. (Olonganji 2:3, 11-23) Noke, vokuenda kuotembo yuprofeto Eliya, afendeli va Suku va sukilile oku nõla nda va fendela Yehova ale Baale suku yesanda. (1 Olosoma 18:21) Onjila yaco yi molẽha ndu okuti ya leluka oku yi nõla momo oku fendela Yehova oco ocina ci kuete esilivilo lia velapo. Omunu o kuete olondunge ka fendela osuku yimue ka  yi kuete omuenyo. Pole, omanu ka va tẽlele oku nõla onjila yimue. Embimbiliya li lekisa okuti va Isareli va kala oku “tatayala ño-o pokati kolonjila vivali.” Eliya wa lekisa olondunge poku vetiya omanu oco va nõle oku fendela Suku yocili, Yehova.

⁷ Momo lie ka ca lelukile ku va Isareli oku nõla lolondunge onjila va sukilile oku kuama? Catete, ovo ka va kolelele Yehova kuenda va likala oku u yevelela. Handi vali, ka va kuatele otembo yoku lilongisa ovina viatiamẽla ku Yehova ale kolondunge viaye. Nda va kuatele otembo yoku lilongisa, nda ca va kuatisa oku nõla lolondunge onjila va yonguile oku kuama. (Osamo 25:12) Cavali, va Isareli va vetiyiwa lovituwa viomanu vokolofeka vikuavo. Omanu vaco, va vetiya ovisimĩlo via va Isareli kuenda va enda oku nõla onjila va Isareli va sukilile oku kuama. Omo liaco, va Isareli va fetika oku kuama omanu vaco kuenda oku fendela olosuku viesanda. Yehova wa lunguile ale va Isareli catiamẽla kohele yaco tunde osimbu.—Etundilo 23:2.

8. Nye tu lilongisila kulandu wa va Isareli?

⁸ Ongangu ya va Isareli yi tu longisa okuti, nda tu yongola oku nõla lolondunge onjila tu kuama tu sukila oku tanga Ondaka ya Suku. Ukanda wa Va Galatia 6:5, u tu ivaluisa okuti, omunu lomunu nda ka nõlele ciwa onjila a kuama, eko liaco liu wila. Ka tu ka eceleli okuti omanu vakuavo va tu nõlelako onjila tu kuama. Omo liaco, omunu lomunu pokati ketu o sukila oku lilongisa ovina Suku a tenda okuti via sunguluka loku vi kapako.

9. Momo lie ci kokela ovitangi oku ecelela okuti omanu vakuavo va tu nõlelako onjila tu kuama?

⁹ Tu ecelela ndati okuti omanu vakuavo va tu nõlelako onjila tu kuama? Tu pondola oku ci linga nda tua tava oku nõla onjila yimue ka ya sungulukile eci tu kisikiwa. (Olosapo 1:10, 15) Oku ci linga ci koka ovitangi. Tu kuete ocikele coku kuama utima wetu wa pindisiwa Lembimbiliya. Nda tu ecelela okuti omanu vakuavo va tu nõlelako onjila tu kuama, ci lekisa okuti tua nõlapo oku va kuama. Oku ci linga ci nena ovitangi vialua.

10. Elungulo lipi Paulu a eca ku va Galatia?

¹⁰ Upostolo Paulu wa lungula va Galatia oco ka va ka ecelele okuti omunu ukuavo o va nõlelako onjila va sukila oku kuama. (Tanga Va Galatia 4:17.) Vamanji vamue ko Galatia va kala oku seteka oku nõlelako vamanji onjila va sukilile oku kuama vekongelo. Momo lie va ci lingila? Va ci lingila omo okuti, alume vaco vakuepela va yonguile okuti vamanji vekongelo va kuama ovilinga viavo okuti viovapostolo havioko. Alume vaco ka va lekisile umbombe kuenda ka va lekisilevo esumbilo ku vamanji vekongelo oco vamanji va nõle onjila va yongola.

11. Tu pondola oku kuatisa ndati omanu vakuavo eci va yongola oku nõla onjila va sukila oku kuama?

¹¹ Vosi yetu tu pondola oku lilongisa  kongangu yiwa yupostolo Paulu. Eye wa kũlĩhĩle okuti vamanji va kuatele elianjo lioku nõla onjila va yongola oku kuama kuenda eye wa sumbilile elianjo liavo. (Tanga 2 Va Korindo 1:24.) Koloneke vilo, akulu vekongelo va pondola oku kuama ongangu yaco poku eca elungulo limue liatiamẽla konjila omunu a yongola oku nõla komuenyo waye. Ovo va sanjukila oku kuatisa vamanji lekuatiso Liembimbiliya. Pole, akulu vekongelo va sukila oku kuata utate poku ecelela okuti omunu o nõla eye muẽle onjila a yongola oku kuama, momo nda omunu waco ka nõlele ciwa onjila a kuama, eko liaco liu wila. Tu sukila oku ivaluka okuti: Tu pondola oku kuatisa vamanji oku kuata elomboloko liolonumbi vi sangiwa Vembimbiliya, oco va vi kapeko poku liyaka lovitangi. Vamanji va kuete ocikele coku nõla onjila va yongola oku kuama. Nda va nõla lolondunge onjila va yongola oku kuama, ci va kuatisa. Ocili okuti, lalimue eteke ka tu ka kuati ovisimĩlo viokuti tu kuete omoko yoku nõla onjila vamanji va sukila oku kuama.

12, 13. Momo lie ka ca lelukile oku nõla onjila tu kuama vepuluvi lina okuti tu kasi lonyeño yalua ale tua sumua?

¹² Koloneke vilo, omanu valua va siata oku kuama ovisimĩlo viavo poku nõla onjila va yongola oku kuama. Poku ci linga ca siata oku va nenẽla ovitangi. Embimbiliya li tu lungula okuti, ka ca sungulukile oku kuama utima wetu kuenda ovisimĩlo vietu momo ka tua li puile. (Olosapo 28:26) Ka tu pondola oku kolelela utima wetu momo, “utima wa piãla kelimbi haiwo wa hongua enene.” (Yeremiya 17:9) Vembimbiliya mu sangiwa ovolandu alua a lekisa ovitangi vi iyilila koku kuama utima wetu ka wa lipuile. (1 Olosoma 11:9; Yeremiya 3:17; 13:10) Oco hẽ, nye ci pondola oku iyililako eci tu kuama utima wetu poku nõla onjila tu kuama?

¹³ Yehova wa tu handeleka oku u sola lutima wetu wosi kuenda oku sola omunu o lisungue letu ndeci tu lisole etu muẽle. (Mateo  22:37-39) Pole, tu sukila oku kuata utate. Ovisonehua via tukuiwa vocinimbu ca pita, via lekisa okuti, ci koka ohele oku ecelela okuti utima wetu u lava ovisimĩlo kuenda ovilinga vietu. Ka ca lelukile komunu o kasi lonyeño yalua oku nõla onjila yiwa. (Olosapo 14:17; 29:22) Ka ca lelukilevo komunu wa sumua oku nõla lolondunge onjila a yongola oku kuama. (Atendelo 32:6-12; Olosapo 24:10) Tu sukila oku ecelela okuti Ovihandelako via Suku vi songuila ovisimĩlo vietu. (Va Roma 7:25) Eci tu nõla onjila yimue yi kuete esilivilo lia velapo, ka tu ka eceleli okuti ovisimĩlo vietu vi lava ovina tu yongola oku linga.

14. Tua kũlĩha ndati okuti ca sunguluka oku linga epongoloko kolonjila vimue tu nõla?

¹⁴ Tu sukila oku nõla lolondunge onjila tu yongola oku kuama. Ocili okuti, ndaño omunu una ukualondunge wa kũlĩha okuti, olonjanja vimue o sukila oku kũlĩhĩsa onjila a nõla kosimbu ale oku yi pongolola. Yehova Suku wa eca kokuetu ongangu yiwa. Kũlĩhĩsa ovina via pita la va Ninivei koloneke via Yona: “Eci Suku yocili a limbuka okuti va pongoloka kuenda va tinduka kevĩho liavo, wa litiukamo oku va nenela eyambulo a sokiyile kuenje ka li nenele vali.” (Yona 3:10) Eci Yehova a limbuka okuti va Ninivei va pongolola ekalo liavo lĩvi, Yehova wa pongololavo ocisimĩlo caye coku va nenela eyambulo. Ulandu waco u lekisa okuti Yehova ukuesunguluko, womboka haeye ukuahenda. Yehova ka sokisiwa ndomanu okuti nda va kasi lonyeño va nõlapo onjila yimue okuti ka va sokolola vali.

15. Momo lie tu sukilila oku linga epongoloko konjila yimue?

¹⁵ Ocili okuti, olonjanja vimue ciwa oku kũlĩhĩsa onjila tua nõla, capiãla enene eci ekalo liomuenyo wetu li pongoloka. Ivaluka okuti Yehova olonjanja vimue wa pongolola onjila a nõlele. (1 Olosoma 21:20, 21, 27-29; 2 Olosoma 20:1-5) Citava okuti, tu pongolola onjila tua nõla eci tu tambula esapulo liokaliye. Kũlĩhĩsa ulandu wa Soma Daviti. Eye wa nõlele onjila yimue ka ya sungulukile yatiamẽla ku Mafivosiete onekulu ya Saulu, omo liesapulo lĩvi lia eciwile kokuaye. Noke, Daviti wa tambula esapulo liwa, kuenje wa pongolola ovisimĩlo viaye. (2 Samuele 19:24-29) Olonjanja vimue ca sunguluka oku setukula ongangu yaye.

16. (a) Ovina vipi vi pondola oku tu kuatisa eci tu nõla onjila yimue? (b) Momo lie tu sukilila oku kũlĩhĩsa onjila tua nõla kosimbu kuenda tu ci linga ndati?

¹⁶ Embimbiliya li lekisa okuti, ka tu sukila oku kala vakuanjanga eci tu yongola oku nõla onjila yimue yi kuete esilivilo lia velapo. (Olosapo 21:5) Tu sukila oku sokiya otembo oco tu sokolole lutate ovina viosi via kongeliwa vonjila tu yongola oku kuama, oco tu nõle lolondunge onjila yaco. (1 Va Tesalonike 5:21) Usongui wepata o sukila oku  sokiya otembo oco a konomuise Ovisonehua kuenda alivulu etu, osimbu ka nõlele onjila a yongola oku kuama. Ca sunguluka oku yevelela ovisimĩlo viomanu vosi va sangiwa vepata. Ivaluka okuti Suku wa vetiya Avirahama oku yevelela ukãi waye. (Efetikilo 21:9-12) Akulu vekongelo va sukilavo oku sokiya otembo oco va linge akonomuiso. Eci kuiya onumbi yimue yokaliye yi lekisa okuti va sukila oku pongolola onjila va nõla kosimbu, ka va kuete usumba woku sima okuti ka va ka sumbiwa vali la vamanji. Akulu vekongelo vana okuti va sunguluka haivo vomboka, va sukila oku pongolola ovisimĩlo viavo kuenda onjila va nõla nda ci sukiliwa. Omo liaco, tu sukila oku kuama ongangu yavo. Poku ci linga ci kuatisa ekongelo oku kala lombembua loku li kuata omunga.—Ovilinga 6:1-4.

17. Nye ci pondola oku tu kuatisa oku litunda ciwa konjila tu nõla?

¹⁷ Olonjila vimue vi ka leluka oku vi nõla pole, vikuavo sio. Oku kuela ale oku nõla omunu tu yongola oku kuela laye, onjila yimue ka ya lelukile oku yi nõla. Onjila yikuavo ka ya lelukile oku yi ñola, oku sokiya otembo yoku litumbika kupange wotembo yosi. Osimbu ka tua nõlele olonjila viaco, tu sukila oku sokolola lutate eci catiamẽla konjila yaco loku pinga ekuatiso ku Yehova. Omo okuti, ka ca lelukile oku ci linga, nda tu yongola oku nõla lolondunge onjila tu sukila kuama, tu sukila oku kolela Yehova, oku yevelela alungulo aye kuenda oku kuama olonumbi viaye. (Olosapo 1:5) Yehova wa tu ĩha alungulo a velapo Vondaka yaye. Omo liaco, ci kuete esilivilo lia velapo kokuetu oku linga akonomuiso kuenda oku likutilila oco Yehova a tu songuile. Eye o pondola oku tu ĩha ovituwa tu sukila oco tu nõla onjila yi likuata locipango caye. Osimbu ka tua nõlele onjila yimue yi kuete esilivilo lia velapo, tu sukila oku li pula ndoco: ‘Onjila ndi yongola oku kuama yi lekisa okuti ndi kuetele Yehova ocisola? Anga hẽ onjila yaco yi ka nena esanju lombembua vepata liange? Yi ka lekisa hẽ okuti ndukuepandi kuenda ndukuahenda?’

18. Momo lie Yehova a yonguila okuti tu nõla onjila tu yongola oku kuama?

¹⁸ Yehova ka tu kisika oku u sola ale oku u fendela. Pole, eye wa eca kokuetu elianjo lioku nõla eci tu yongola. Eye wa kapako ocikele cetu kuenda elianjo lietu lioku nõla nda tu u fendela ale sio. (Yehosua 24:15; Ukundi 5:4) Pole, eye o lavoka okuti tu ñola onjila yimue yi likuata Londaka yaye. Eci tu kolela kolonumbi via Yehova loku vi kapako tu pondola oku nõla lolondunge onjila ya sunguluka. Poku ci linga, tu ka lekisa okuti tua kolelela Yehova kovina viosi.—Tiago 1:5-8; 4:8.