Ocipama Celilongiso 39
“Nda Mola Owiñi Wakahandangala”
“Nda mola owiñi wakahandangala, okuti lomue wa tẽla oku u tenda, . . . va tãi kovaso yocalo lo kovaso ya Kameme.”—ESIT. 7:9.
OCISUNGO 60 Eci ci Lomboloka Omuenyo Wavo
OVINA TU LILONGISA *
1. Ovitangi vipi upostolo Yoano a liyaka lavio vokuenda kunyamo 95?
VOKUENDA kunyamo 95, upostolo Yoano wa pita lovitangi vialua. Eye wa kukile calua kuenda wa kala kumandekua kocifuka co Patmo, citava okuti eye lika upostolo wa kala komuenyo. (Esit. 1:9) Yoano wa kũlĩhĩle okuti olonanguluke via kala oku sandeka elongiso liesanda kuenda oku koka olonepele vekongelo. Ca molẽhele ndu okuti, etavo liocili lia laikele oku imuha.—Yuda 4; Esit. 2:15, 20; 3:1, 17.
Upostolo Yoano wa mola “owiñi wakahandangala” okuti va wala uwalo u yela kuenda vambata ovianja vieva povaka
(Tala ocinimbu 2)
2. Ndomo ca tangiwa Kesituluilo 7:9-14, ocinjonde cipi ci komohĩsa Yoano a kuata? (Tala ociluvialuvia koñoño.)
2 Ndaño lovitangi viosi Yoano a liyaka lavio, handi lopo wa kuata ocinjonde cimue ci komõhisa catiamẽla kovaso yoloneke. Vocinjonde caco, ovangelo va tambula ocikundi coku tutuiya olofela viohali ya piãla, toke eci ku kapiwa ondimbukiso ya sulako kovipolo viocimunga cimue cakuenje va Suku. (Esit. 7:1-3) Ocimunga caco ci soka 144.000 komanu, vana va ka viala la Yesu kilu. (Luka 12:32; Esit. 7:4) Noke, Yoano wa mola vali ocimunga cikuavo comanu valua kuenje eye wa popia hati: “Nda mola owiñi wakahandangala, okuti lomue wa tẽla oku u tenda, wa tunda kolofeka viosi, kapata osi, komanu vosi kuenda kalimi osi, va tãi kovaso yocalo lo kovaso ya Kameme.” (Tanga Esituluilo 7:9-14.) Sokolola esanju lialua Yoano a yeva oku kũlĩha okuti kovaso yoloneke olohuluwa viomanu vi ka kuama efendelo liocili!
3. (a) Momo lie ocinjonde Yoano a mola ci pamisila ekolelo lietu? (b) Nye tu lilongisa vocipama cilo?
3 Ocili okuti, ocinjonde caco ca pamisa calua ekolelo lia Yoano. Etu tu kasi koloneke via sulako, tu pamisiwa vali enene, omo okuti otembo yilo ocinjonde caco ci kasi oku tẽlisiwa! Tu
lete oku ongoluiwa kuolohuluwa viomanu, va lavoka oku puluka kohali yalua kuenda oku kala otembo ka yi pui palo posi. Vocipama cilo, tu lilongisa ndomo Yehova a kuatisa afendeli vaye oku limbuka owiñi wakahandangala. Pole, tunde eci a ci linga pa pita ale 80 kanyamo. Noke tu ka konomuisa atosi avali atiamẽla kowiñi waco: (1) oku lua kualio kuenda (2) omanu vaco va sangiwa kolonepa viosi violuali. Atosi aco, a ka pamisa ekolelo lia vosi va kuete elavoko eli li komõhisa.OWIÑI WAKAHANDANGALA PI U KA KALA?
4. Ocili cipi ci sangiwa Vembimbiliya okuti ka ci longisiwa latavo? Vakuakulilongisa Embimbiliya va lekisa ndati okuti va litepa latavo aco?
4 Atavo ka a siatele oku longisa ocili ci sangiwa Vembimbiliya cokuti, omanu vana va pokola ku Suku va ka kala otembo ka yi pui palo posi. (2 Va Kor. 4:3, 4) Atavo alua a longisa okuti omanu vawa eci va fa va enda kilu. Pole, Vakuakutanga Embimbiliya, vana va sandeka Utala Wondavululi tunde kunyamo wo 1879, va kuata ovisimĩlo via litepa. Ovo va kuata elomboloko liokuti Suku o ka pongolola ongongo, oco yi kale ocumbo celau kuenda olohuluwa viomanu vana va pokola va ka kala palo posi, okuti kilu hakoko. Pole pa pita otembo yalua, oco va limbuke ava va laikele oku kala omanu vaco.—Mat. 6:10.
5. Elomboloko lipi Vakuakulilongisa Embimbiliya va kuatele liatiamẽla Kakristão va soka 144.000?
5 Vakuakulilongisa Embimbiliya va kuatavo elomboloko liokuti, ndomo Embimbiliya li lombolola vamue va laikele oku ‘landiwa kilu lieve,’ oco va ka viale la Yesu kilu. (Esit. 14:3) Etendelo liavo li soka 144.000 Kakristão vakuambili haivo va litumbika lekolelo kupange wa Suku osimbu va kala palo posi. Nye ci lomboloka owiñi wakahandangala?
6. Elomboloko lipi Vakuakulilongisa Embimbiliya va kuatele liatiamẽla kowiñi wakahandangala?
6 Yoano wa mola okuti owiñi wakahandangala “wa talama kovaso yocalo lo kovaso ya Kameme.” (Esit. 7:9) Olondaka evi via vetiya Vakuakulilongisa Embimbiliya oku sima okuti, owiñi wakahandangala u ka kalavo kilu, ndeci 144.000 Kakristão olombuavekua. Nda okuti Akristão olombuavekua kuenda owiñi wakahandangala va vakuatele elavoko lioku enda kilu, etepiso lipi nda lia kala pokati kavo? Vakuakulilongisa Embimbiliya va kala oku sima okuti, owiñi wakahandangala, vana okuti ka va lekisile epokolo lutima wosi osimbu va kasi palo posi. Ndaño okuti Vakuakulilongisa Embimbiliya va kuamẽle olonumbi Viembimbiliya, citava okuti handi va kuatele ovisimĩlo vietavo liesanda. Akristão vaco, va simĩle okuti owiñi wakahandangala wa kuata ombili yitito, omo liaco ka citava okuti va kala olosoma la Yesu. Omo okuti ocisola va kuatela Suku ca kala citito, ovo va ponduile lika oku kala kilu kovaso yocalo, pole, ka va ponduile oku tumãla kovialo viaco.
7. Ndomo Vakuakulilongisa Embimbiliya va simĩle, velie va ponduile oku kala palo posi vokuenda kuohulukãi yanyamo?
7 Oco hẽ, velie va ponduile oku kala palo posi? Vakuakulilongisa Embimbiliya va simĩle okuti, tete, 144.000 Kakristão kuenda owiñi wakahandangala, va enda kilu. Noke olohuluwa vikuavo viomanu va ka kala palo posi kuenda va ka tambula asumũlũho Wuviali wa Kristu Wohulukãi Yanyamo. Vakuakulilongisa Embimbiliya ka va simĩle okuti olohuluwa viaco viomanu via kala ale oku vumba Yehova, osimbu Uviali wa Kristu ka wa fetikile. Ovo va simĩle okuti ocimunga caco comanu, ca laikele oku lilongisa catiamẽla ku Yehova vokuenda Kuviali wa Kristu Wohulukãi Yanyamo. Kuenje kesulilo Liohulukãi Yanyamo, vana va Osa. 45:16.
ponduile oku pokola kolonumbi via Yehova va laikele oku kuata omuenyo ko pui palo posi, pole, vana ka va pokola va laikele oku kunduiwa. Vakuakulilongisa Embimbiliya va simĩlevo okuti vana va ka kala “olombuale” palo posi, va ka enda kilu kesulilo Yohulukãi Yanyamo. Pokati kolombuale viaco, pa sangiwavo “omanu va kuekolelo vo kosimbu” vana va fa apa handi Kristu keyile, okuti va laikele oku pinduiwa oco va tambule onima yomuenyo ko pui kilu, kesulilo Yohulukãi Yanyamo.—8. Ovimunga vipi vitatu Vakuakulilongisa Embimbiliya va simĩle okuti vi panga onepa vocipango ca Suku?
8 Vakuakulilongisa Embimbiliya va kolelele okuti kuli ovimunga vitatu: (1) o 144.000 Kakristão olombuavekua, va ponduile oku viala la Yesu kilu; (2) owiñi wakahandangala Wakristão okuti ombili yavo ya kala yitito, va ponduile oku kala kilu kovaso yocalo ca Yesu; kuenda (3) olohuluwa vikuavo viomanu va laikele oku kala palo posi kuenda oku tambula asumũlũho Wuviali wa Kristu Wohulukãi Yanyamo. * Pole votembo ya sokiyiwa ya Yehova, ocinyi condaka yocili catiamẽla kovisimĩlo viaco, ca situluiwa.—Olosap. 4:18.
OCINYI COCILI CAMAMAKO OKU TUA
Omanu valua va kuete elavoko lioku kala palo posi, va papatisiwa kohongele yofeka kunyamo wo 1935 (Tala ocinimbu 9)
9. (a) Owiñi wakahandangala u pondola oku ‘talama ndati kovaso yocalo lo kovaso ya Kameme,’ nda owo u kasi palo posi? (b) Momo lie elomboloko Liesituluilo 7:9 lia sungulukila?
9 Kunyamo wo 1935, kua situluiwa elomboloko liowiñi wakahandangala wa tukuiwa vocinjonde Yoano a kuata. Olombangi via Yehova via kuata elomboloko liokuti, owiñi wakahandangala ka u sukila oku enda kilu, oco ‘u talame kovaso yocalo lo kovaso ya Kameme.’ Ovo va pondola oku ci linga ndaño va kasi palo posi. Oku kala “kovaso yocalo,” ci lomboloka oku limbuka uviali wa Yehova loku pokola kokuaye. (Isa. 66:1) Oku talama “kovaso ya Kameme,” ci lombolokavo oku kolela kocisembi ca Yesu. Handi vali, kelivulu lia Mateo 25:31, 32 ku popia okuti, “olofeka viosi” oku kongelamo olondingaĩvi “vi liongoluila” ku Yesu kocalo caye kilu. Ocili okuti olofeka viaco ka vi kasi kilu, pole, vi kasi palo posi. Elomboloko eli liokaliye Olombangi Via Yehova vi kuete tunde kunyamo wo 1935, lia sunguluka. Elomboloko liaco, li lekisa esunga lieci Embimbiliya ka li popela okuti owiñi wakahandangala u ka kala kilu. Kuenje ocimunga cimue citito okuti 144.000, oco lika ci ka kala kilu otembo ka yi pui oku “viala ndolosoma koluali luosi” la Yesu.—Esit. 5:10.
10. Momo lie owiñi wakahandangala u sukilila oku lilongisa catiamẽla ku Yehova osimbu Ohulukãi Yanyamo ka ya fetikile?
10 Kuenje tunde kunyamo 1935, Olombangi Via Yehova via kuata elomboloko liokuti owiñi wakahandangala Yoano a mola, ocimunga cimue Cakristão vakuekolelo va kuete elavoko lioku kala palo posi otembo ka yi pui. Oco owiñi waco wakahandangala u puluke kohali ya piãla, omanu vaco va sukila oku lilongisa catiamẽla ku Yehova, apa handi Ohulukãi Yanyamo ka ya fetikile. Ovo va sukila oku kuata ekolelo liapama, oco va ‘puluke kovina evi viosi vi laika oku iya’ osimbu Ohulukai Yanyamo Yuviali wa Kristu ka ya fetikile.—Luka 21:34-36.
11. Momo lie vamue Vakuakulilongisa Embimbiliya va simĩlile okuti omanu vamue va laikele oku ambatiwa kilu noke Yohulukãi Yanyamo?
11 Nye ci popiwa catiamẽla kocisimĩlo cokuti omanu vamue vakuekolelo va kasi palo posi va kambatiwa kilu noke Yohulukai Yanyamo? Kanyamo a pita Utala Wondavululi 15 ya Kayovo wo 1913 kelimi liongelesi wa lomboluile eci catiamẽla kocisimĩlo caco. Vamue Vakuakulilongisa
Embimbiliya va kala oku sima ndoco: ‘Momo lie omanu vakuekolelo kosimbu va ka tambuila lika omunuenyo palo posi osimbu okuti Akristão vamue okuti ka va kuatele ekolelo lialua va ka tambula esumũlũho lioku kala kilu?’ Ocisimĩlo eci ca kunamẽla kovisimĩlo vivali ka via sungulukile viokuti: (1) owiñi wakahandangala Wakristão wa laikele oku kala kilu kuenda (2) owiñi wakahandangala, Akristão vana okuti va kuatele ombili yitito.12-13. Nye Akristão olombuavekua kuenda owiñi wakahandangala va kũlĩha catiamẽla kasumũlũho avo?
12 Ndomo tua ci konomũisa ale, Olombangi Via Yehova tunde kunyamo 1935, via kuata elomboloko liokuti omanu va ka puluka ko Harmagedo vana okuti, owiñi wakahandangala wa muiwa la Yoano vocinjonde a kuata. Ovo “va tunda kohali ya piãla” palo posi kuenje va “vilikiya lolukandi vati: ‘Epopelo li tunda ku Suku yetu, una wa tumãla kocalo kuenda ku Kameme.’” (Esit. 7:10, 14) Handi vali, Embimbiliya li longisa okuti vana va pinduiwa oco va ka kale kilu, va tambula “cimue ca velapo,” okuti alume vakuekolelo vo kosimbu ka va ci muile. (Va Hev. 11:40) Elomboloko liokaliye liatiamẽla kowiñi wakahandangala, lia nena esanju lialua ku vamanjetu. Kuenje va fetika oku laleka omanu, oco va vumbe Yehova loku kala otembo ka yi pui palo posi.
13 Owiñi wakahandangala u sanjuka calua, omo lielavoko va kuete. Ovo va kuete elomboloko liokuti Yehova eye o nõla nda afendeli vaye vakuekolelo va ko vumbila kilu, ale palo posi. Ci kale Akristão olombuvekua, ci kale owiñi wakahandangala, va kũlĩha okuti va ka tambula onima yavo, hamekondako va sesamẽla, pole, momo okuti Yehova ukuacali kuenda wa linga eliangiliyo lioku eca ocisembi ca Yesu Kristu.—Va Rom. 3:24.
OWIÑI UMUE WALUA CALUA
14. Momo lie valua va kuatela atatãi ndomo ocitumasuku catiamẽla kowiñi wakahandangala ca laikele oku tẽlisiwa?
14 Omo lielomboloko liokaliye kunyamo wo 1935, omanu valua va kala oku lipula ndomo owiñi womanu wa laikele oku lua. Ndeci, Manji Ronald Parkin, okuti eci elomboloko liokaliye lia eciwa wa kuata 12 kanyamo, wa popia hati: “Kotembo yaco kua kala eci ci soka 56.000 kakundi, koluali luosi kuenda valua pokati kavo va kala olombuavekua. Kuenje owiñi wakahandangala wa molẽha ndu okuti utito calua.”
15. Yehova o kasi oku ongolola ndati owiñi wakahandangala vokuenda kuanyamo?
15 Anyamo akuamamo, ocisoko ca fetika oku tuma olomisionaliu kolofeka vialua kuenje etendelo Liolombangi via Yehova liamamako oku livokiya. Noke, kunyamo 1968, kua lingiwa Isa. 60:22) Vokuenda kuanyamo a sulako, ocisoko ca Yehova ca panga ovimalẽho vialua viwa oco vi kuatise omanu valua oku lilongisa ocili Cembimbiliya. Cilo, kuli eci ci soka 8 kolohuluwa viakundi. Eci ci lekisa okuti, Yehova o kasi oku ongolola owiñi wakahandangala.
esokiyo lioku fetika elilongiso Liembimbiliya, velivulu A Verdade Que Conduz à Vida Eterna. Elivulu liaco, lia lombolola ocili lonjila yimue ya leluka calua kuenje eci ca vetiya omanu valua oku iya vocili, lonjila yimue ka ya la muiwa. Kuenje vokuenda kuanyamo akuãla, ci panda ohuluwa yomanu va papatisiwa. Handi vali, omo lioku pola kuetavo Liokatolika ko Amerika Latina lo kolofeka vikuavo kuenda elianjo liupange wetu woku kunda kolofeka vio Kombuelo yo Europa kuenda konepa yimue yo Afrika, olohuluwa vikuavo viomanu via papatisiwavo. (OWIÑI WAKAHANDANGALA U TUNDA KAPATA OSI
16. Owiñi wakahandangala u kasi oku tunda pi?
16 Eci Yoano a soneha ocinjonde a kuata, eye wa popia okuti owiñi wakahandangala wa laikele oku “tunda kolofeka viosi, kapata osi, komanu vosi kuenda kalimi osi.” Uprofeto Sakariya wa tukuile ale ocina cimuamue. Eye wa soneha hati: “Voloneke viaco, alume ekũi va tunda kolofeka vialimi osi. Va kuata konanga yu Yuda umosi, vati, tuenda love, momo tua yeva okuti Suku o kasi lene.’”—Sak. 8:23.
17. Upange upi u kasi oku lingiwa oco omanu vo kolofeka viosi kuenda vakualimi osi vongoluiwe?
17 Olombangi Via Yehova via kũlĩha okuti, oku ongoluiwa kuomanu vakualimi osi, ci tẽliwa lika nda olondaka viwa via kundiwa kalimi alua. Tua pongolola ale ovipama vialua vielilongiso Liembimbiliya vokuenda kueci ci pitahãla 130 kanyamo, pole, cilo tu kasi oku pongoluila kalimi alua, okuti upange waco walua enene kuenje ka wa la muiwa! Ocili okuti oku ongolola owiñi wakahandangala womanu vo kolofeka viosi, ocikomo cimue cinene Yehova a kasi oku linga koloneke vilo. Omo okuti cilo Embimbiliya kuenda alivulu etu a sangiwa kalimi alua, owiñi wakahandangala ndaño u tunda kapata añi añi, pole, va likuete omunga koku fendela Yehova. Kuenda Olombangi via Yehova via kũlĩhiwa omo lioku lekisa ombili koku kunda ocili kuenda ocisola va likuetele pokati. Oku mola ovina viosi evi, ci pamisa ekolelo lietu!—OCINJONDE ECI CI LOMBOLOKA NYE KOKUETU?
18. (a) Ndomo ca lekisiwa ku Isaya 46:10, 11, momo lie ka ci tu kokela onumbi oku mola ndomo Yehova a kasi oku tẽlisa ocitumasuku catiamẽla kowiñi wakahandangala? (b) Momo lie vana va ka kala palo posi ka va sumuila?
18 Ocitumasuku catiamẽla kowiñi wakahandangala ocili okuti ci komohĩsa! Oku mola ndomo Yehova a kasi oku tẽlisa ocitumasuku caco lonjila yimue yi komõhisa, ka ci tu kokela oku kala vonumbi. (Tanga Isaya 46:10, 11.) Vana va panga onepa kowiñi wakahandangala, va pandula Yehova omo lielavoko va kuete. Ovo ka va sumua omo okuti ka va wavekiwile lespiritu sandu oco va viale la Yesu kilu. Eci tu tanga Embimbiliya, tu sanga ovolandu alua alume lakãi vakuekolelo okuti va songuiwa lespiritu sandu. Ndaño ndoco, ovo ka va pangi onepa ketendelo 144.000. Umue pokati kavo, Yoano Upapatisi. (Mat. 11:11) Ukuavo Daviti. (Ovil. 2:34) Ovo kuenda omanu vakuavo, va ka pinduiwa oco va kale vocumbo celau palo posi. Ci kale vana va ka pinduiwa kuenda owiñi wakahandangala va ka kuata epuluvi lioku lekisa okuti vakuacili ku Yehova kuenda kuviali waye.
19. Oku kũlĩha okuti ocinjonde ca Yoano ci kasi oku tẽlisiwa, ci tu vetiya oku linga nye?
19 Eyi oyo onjanja yatete Yehova a kasi oku ongolola olohuluwa viomanu vokolofeka viosi oco vo fendele. Nda elavoko lietu oku enda kilu, ale oku kala palo posi, tu sukila oku kuatisa omanu valua oku panga onepa kowiñi wakahandangala ‘violomeme vikuavo.’ (Yoa. 10:16) Ndopo, Yehova o ka nena ohali ya piãla yina yi ka kundula olombiali kuenda atavo osi ana a siata oku kokela ohali komanu. Vosi va panga onepa kowiñi wakahandangala, va ka kuata esumũlũho linene lioku vumba Yehova palo posi otembo ka yi pui!—Esit. 7:14.
OCISUNGO 139 Sokolola Ndomo o ka Kala Voluali Luokaliye
^ tini. 5 Ocipama cilo, ci ka lombolola ocinjonde upostolo Yoano a kuata catiamẽla kokuongoluiwa ‘kuowiñi wakahandangala.’ Ocili okuti ocipama eci ci ka pamisa ekolelo liomanu vosi va kuete esumũlũho lioku panga onepa kowiñi waco wakahandangala.
^ tini. 8 Tanga elivulu losapi hati, Testemunhas de Jeová—Proclamadores do Reino de Deus, kamẽla 159-163.