1. Nye Akristão va sukila oku linga, oco va tẽlise ocimãho cavo coku yolokela komuenyo?

AKRISTÃO va kasi oku yolokela komuenyo. Ndaño tu kasi ale oku yoloka vokuenda kuanyamo alua, tu sukila oku amamako oku ci linga toke kesulilo. Elungulo upostolo Paulu a eca Kakristão vo ko Filipoi li pondola oku tu kuatisa oku ci tẽlisa. Akristão vamue vo ko Filipoi eci va tambula ukanda wa Paulu, va kala ale oku vumba Yehova vokuenda kuanyamo alua. Ovo va nõlelepo oku vumba Yehova lekolelo, pole, wa va ivaluisa okuti va sukilile oku amamako oku yoloka lepandi. Eye wa yonguile okuti ovo vamamako oku kuama ongangu yaye ‘yoku likolisilako oco va tambule onima.’—Va Fil. 3:14.

2. Momo lie tu popela okuti elungulo lia Paulu ku va Filipoi lieya votembo ya sesamẽla?

² Elungulo lia Paulu ku va Filipoi lieya votembo ya sesamela. Momo eci ekongelo lio ko Filipoi lia sokiyiwa, vepuluvi liaco oco vamanji va fetika oku lambalaliwa. Kunyamo wa 50, Paulu la Sila va tava kelaleko lia Suku lioku “yokila ko Makedonia.” Kuenje ovo va enda ko Filipu oku ka kunda olondaka viwa. (Ovil. 16:9) Volupale luaco, va sangamo ukãi umue o tukuiwa Ludia, okuti “wa kala oku yevelela kuenje Yehova wa yulula utima waye” oco a tave kolondaka viwa. (Ovil. 16:14) Noke, eye lepata liaye va papatisiwa. Vepuluvi liaco, Satana wa fetika oku va kokela ovitangi vialua. Alume vo volupale, va tuala Paulu la Sila kolonganji loku va lundila okuti va kala oku koka ombuanja. Noke Paulu la Sila va tipuiwa, va kapiwa vokayike kuenda va va sapuila oco va tunde volupale. (Ovil.  16:16-40) Anga hẽ ovo va liwekapo oku kunda? Sio! Vamanji vekongelo liokaliye nye va linga eci va kala oku lambalaliwa? Ovo va lekisavo epandi lialua! Ocili okuti ovo va pamisiwa longangu yiwa ya Paulu la Sila.

3. Nye Paulu a kũlĩhĩle kuenda apulilo api tu konomuisa?

³ Paulu wa nõlelepo oku tẽlisa ocimãho caye okuti ka konyõha. (2 Va Kor. 4:16) Eye wa kũlĩhĩle okuti oco amameko oku yoloka toke kesulilo, wa sukilile oku tiamisila utima kocimãho caye. Nye tu lilongisa kongangu ya Paulu? Ongangu yakristão vakuekolelo koloneke vilo, yi tu kuatisa ndati oku amamako lekolelo ndaño lovitangi? Elavoko lietu li tu kuatisa ndati oku amamako okuti ka tu konyõha?

4. Paulu wamamako ndati oku litumbika kupange wa Yehova ndaño lovitangi a liyaka lavio?

⁴ Kũlĩhĩsa ovina viosi Paulu a linga eci a sonehela va Filipoi. Omo okuti wa kala vokayike ko Roma, ka ponduile oku tunda oco a kunde. Pole, wamamako oku kundila vana va enda oku u nyula kuenda oku soneha ovikanda loku vi tumisa kakongelo a kala ocipãla. Cimuamue haico okuti koloneke vilo, Akristão vana va kuete ocitangi cuhayele ci va tateka oku enda kupange woku kunda, va kuete apuluvi awa oku kundila olondaka viwa ku vana veya kolonjo viavo oku va nyula. Akristão vaco, va pondolavo oku soneha ovikanda loku vi tumisa komanu vana okuti ca tĩla oku va sanga kolonjo viavo.

5. Ndomo ca tangiwa ku va Filipoi 3:12-14, nye ca kuatisa Paulu oku tiamisila utima kocimãho caye?

⁵ Paulu ka ecelelele okuti ovitangi viu tateka, oku vumba Yehova. Omo liaco, eye wa popia hati, “njivala ovina vio konyima” kuenda poku ci linga wa ‘yolokela ovina vio kovaso’ oco a tẽlise ocimãho caye coku yolokela komuenyo. (Tanga Va Filipoi 3:12-14) Ovina vipi nda via tateka Paulu? Tete, osimbu Paulu ka kaile Ukristão wa kuatele oluhimo lualua pokati ka va Yudea. Kuenje ovina viaco, wa vi tenda “ndovipelekese.” (Va Fil. 3:3-8) Vali, ndaño okuti wa enda oku lambalala Akristão, pole, ka ecelelele okuti oku sokolola kovina viaco cu tateka oku vumba Yehova. Tatu, eye ka ecelelele okuti ovina viosi viwa a lingila Yehova viu nenela ovisimĩlo viokuti wa tẽlisa ale ocimãho caye, okuti ka sukilile vali oku likolisilako. Ndaño okuti Paulu wa kala vokayike, wa tipuiwa, wa sosuiwa lovawe, wa kala vonaviyu ya vomba, wa kala lekambo liokulia, lombambi kuenda lekambo liuwalo, pole, ka liwekelepo oku kunda. (2 Va Kor. 11:23-27) Paulu ndaño okuti wa liyaka lovitangi vialua, wa amamako oku vumba Yehova. Cimuamue haico tu sukila oku linga.

6. Ovina vipi ‘vio konyima’ tu sukila oku ivala?

⁶ Tu setukula ndati ongangu ya Paulu poku ‘ivala ovina vio konyima’? Vamue pokati ketu va sukila oku yuvula ocituwa coku livetela evelo omo liakandu va linga kosimbu. Nda eci ci kasi oku pita love, kuata ocimãho coku linga elilongiso liopokolika loku sokolola kocisembi ca Kristu. Eci tu lilongisa, loku sokolola kuenda oku likutilila, tu pondola oku yuvula oku livetela evelo. Kuenje ka tu livetela vali evelo omo liakandu ana Yehova a tu ecela ale. Kũlĩhĩsa ocina cikuavo tu lilongisa kongangu ya Paulu. Vamue va siapo upange umue weca olombongo vialua, oco va vokiye upange Wusoma. Anga hẽ nda eci oco tua linga, tu livela omo liovokuasi tua sia konyima? (Ate. 11:4-6; Uku. 7:10) “Ovina vio konyima,” mua kongela ovina tua linga ale kupange wa Yehova, ale ovitangi tua yula kosimbu. Poku sokolola ndomo Yehova  a tu kuatisa kosimbu, ci tu vetiya oku vokiya ukamba wetu Laye. Omo liaco, ka tu ka simi okuti ovina tua lingila Yehova via tẽla ale, okuti ka tu likolisilako vali.—1 Va Kor. 15:58.

7. Ndomo ca tangiwa kukanda 1 Va Korindo 9:24-27, nye tu sukila oku linga oco tu tambule onima yomuenyo? Ci lombolola.

⁷ Paulu wa kuatele elomboloko liwa liolondaka via Yesu viokuti: ‘Likolisiliko.’ (Luka 13:23, 24) Paulu wa kũlĩhĩle okuti, wa sukilile oku likolisilako toke kesulilo, ndeci Kristu a linga. Eye wa sokisa omuenyo Wukristão loku yoloka. (Tanga 1 Va Korindo 9:24-27.) Ukuakuyoloka o luluvalela kocimãho caye kuenje o yuvula ovina viosi viu tateka. Ndeci vakuakuyoloka, osimbu va kasi oku yoloka pamue kohulo yonjila va mola ovina vi kasi volovenda kuenda ovina vikuavo vi pondola oku va tateka. O sima hẽ okuti umue pokati ka vakuakuyoloka o talama oco a luluvalele kovina vi kasi volovenda? Sio, nda eye o yongola oku tambula onima! Cimuamue haico okuti, koku yololekela komuenyo, tu sukilavo oku yuvula ovina viosi vi tu tateka. Nda tua tiamisila utima kocimãho cetu loku likolisilako ndeci Paulu a linga, tu ka tambula onima!

8. Ovina vipi vitatu tu kũlĩhĩsa?

⁸ Tu kũlĩhĩsi ovina vitatu vi pondola oku tu sumuisa. Ocina catete, ceci ovina tu lavoka ka vi tẽlisiwa. Vali, ceci ongusu yetu yi tepuluka osimbu tu kuka. Tatu, ceci tu liyaka lovitangi vina ka vi piti. Tu pondola oku kuatisiwa poku kũlĩha ndomo vakuetu va yula ovitangi viaco.—Va Fil. 3:17.

9. Elavoko ka lia tẽlisiwile li pondola oku tu kokela nye?

⁹ Ceci ovina tu lavoka ka vi tẽlisiwa. Ocili okuti tunde kosimbu tu kasi oku lavoka ovina viwa Yehova a likuminya. Eci uprofeto wa Yehova, Havakuki a lekisa esakalalo oco Yehova a nyõle olondingaĩvi ko Yuda, Yehova wa sapuila Havakuki ‘oco amameko oku talamẽla.’ (Hav. 2:3) Eci tu limbuka okuti ovina tua lavokaile ka vi kasi oku tẽlisiwa, pamue ombili yetu yi fetika oku tepuluka. Kuenje tu  sumua. (Olosap. 13:12) Eci oco ca pita kunyamo wo 1914. Kunyamo waco, Akristão valua olombuavekua va lavokaile oku tambula onima yavo kilu. Pole, eci Akristão vakuekolelo va limbuka okuti ka ca tẽlisiwile, nye ovo va linga?

10. Nye ohueli yimue ya linga poku limbuka okuti cina va lavokeile ka ca tẽlisiwile?

¹⁰ Tu kũlĩhĩsi ulandu wohueli yimue vakuekolelo va pita locitangi caco. Manji Royal Spatz, wa papatisiwa kunyamo wo 1908 eci a kuata 20 kanyamo. Eye wa kolelele okuti ndopo enda kilu. Eci a likuminya oku kuela la manji Pearl kunyamo wo 1911, eye wo sapuila hati: “Wa kũlĩha ale eci ci ka pita kunyamo wo 1914. Omo liaco, nda tu yongola okuti tu likuela tu ci linge lonjanga!” Omo okuti kunyamo wo 1914 ka va endele kilu, anga hẽ va liwekapo oku yoloka? Sio, momo va tiamisilile utima wavo koku linga ocipango ca Yehova lekolelo, okuti kelavoko liavo hakoko. Ovo va nõlelepo oku yoloka lepandi. Handi vali, manji Royal la Pearl, vamamako lekolelo toke kesulilo liomuenyo wavo palo posi. Ocili okuti, ove o yongola oku mola oku kemalisua kuonduko ya Suku kuenda oku tẽlisiwa kuolohuminyo viaye. Kolela okuti ovina viaco vi ka tẽlisiwa votembo Yehova a sokiya. Omo liaco, tu amamiko oku vumba Suku kuenda lalimue eteke ka tu ka eceleli okuti ovina vimue ka via tẽlisiwile vi tu sumuisa.

11-12. Momo lie tu sukilila oku amamako lekolelo ndaño okuti ongusu yetu ya tepuluka? Tukula ulandu umue.

¹¹ Ceci ongusu yetu yi tepuluka osimbu tu kuka. Ndeci ukuakuyoloka a sukila ongusu yalua oco amemeko oku yoloka, tu sukilavo oku amamako oku pamisa ekolelo lietu ku Yehova loku lekisa ombili kupange waye. Valua okuti ongusu yavo ya tepuluka, pole, va kasi oku amamako oku linga cosi ci tava kupange wa Yehova. (2 Va Kor. 4:16) Ndeci, Manji Arthur Secord, * eci a kuata 88 kanyamo, wa kala ale kupange wo Betele ci soka 55 kanyamo. Eteke limue eci a kala ko Betele, manji cifulumela weya kokuaye oco o tate. Manji yaco wa luluvalela kokuaye kuenje locisola wo sapuila hati: “A Manji Arthur ove wa talavaya ale calua kupange wa Yehova.” Pole, manji Arthur ka tiamisilile utima kovina vialua a linga ale. Eye wa vanja manji cifulumela loku memenako kuenje wo tambulula hati: “Ocili muẽle. Pole, ovina tua linga ale ka vi tendiwa vali. Ca velapo kokuetu oku amamako lekolelo.”

¹² Citava okuti o kasi oku vumba Yehova vokuenda kuanyamo alua, pole, uhayele wove ka u kuecelela vali oku linga ovina wa  lingaile ale. Nda eci ci kasi oku lipita love, ku ka sumue. Kolela okuti Yehova ivaluka upange wo lingila osimbu. (Va Hev. 6:10) Limbuka okuti, ovina vialua tua lingila Yehova havioko lika vi lekisa ocisola tu u kuetele. Pole, eci tu lekisa ocituwa ca sunguluka kuenda oku linga cosi ci likuata lepondolo lietu, tu eca uvangi wokuti tu sole Yehova lutima wosi. (Va Kol. 3:23) Yehova ka lavoka okuti tu linga ovina ka vi kasi vepondolo lietu.—Mar. 12:43, 44.

13. Ulandu wamanji Anatoly kuenda Lidiya u tu kuatisa ndati ndaño lovitangi?

¹³ Ceci tu liyaka lovitangi vina ka vi piti. Afendeli vamue va Yehova, vokuenda kuanyamo alua va siata oku pandikisa kovitangi kuenda kalambalalo. Ndeci, manji Anatoly Melnik * wa kuatele 12 kanyamo eci isiaye a kuatiwa loku kapiwa vokayike ko Siberia okuti, pa kala ocinãla ci soka 7.000 kolokilometulu loku kua kala epata liaye ko Moldavia. Noke lioku pita unyamo Anatoly, inaye kuenda va sekulu yaye ku ina, va kapiwavo vokayike ko Siberia. Noke liotembo yimue, va tẽla oku enda kohongele vimbo limue, pole, va sukilile oku enda ocinãla ci soka 30 kolokilometulu, ndaño okuti kua kala ombambi yalua. Manji Melnik wa kala vokayike anyamo atatu, ocipãla lukãi waye Lidiya lomõlaye ukãi wa kuatele lika unyamo. Ndaño lovitangi viaco manji Anatoly kumue lepata liaye va amamako oku vumba Yehova lekolelo. Manji Anatoly o kuete eci ci soka 82 kanyamo kuenje cilo o panga onepa Kocisoko Cakulu vo ko Betele ko Asia Central. Ndeci ca linga manji Anatoly la Lidiya, tu likolisiliko oku linga cosi ci tava kupange wa Yehova, loku amamako oku pandikisa.—Va Gal. 6:9.

14. Nye Paulu a sukilile oku linga oco a tambule onima yaye?

¹⁴ Paulu wa kolelele okuti wa laikele oku tẽlisa ocimãho caye loku tambula onima. Omo okuti wa kala Ukristão ombuavekua, wa tiamisila utima kesumũlũho lioku ‘tambula onima ku Suku.’ Paulu wa kũlĩhĩle okuti oco a tambule onima wa sukilile oku “likolisilako.” (Va Fil. 3:14) Eye wa tukula ocindekaise cimue ciwa oco a kuatise va Filipoi oku amamako oku tiamisila utima kocimãho cavo.

15. Paulu poku tukula ondaka onungi ca kuatisa ndati Akristão vo ko Filipoi oku “likolisilako”?

¹⁵ Paulu wa ivaluisa va Filipoi catiamẽla kelavoko liavo lioku kala olonungi vio kilu. (Va  Fil. 3:20) Momo lie va sukililile oku ci limbuka? Koloneke viaco omanu va yonguile oku kala olonungi vio ko Roma momo ca enda oku va kuatisa calua. * Pole, elavoko Liakristão olombuavekua lioku kala olonungi vio kilu, lia velelepo calua omo okuti, lia laikele oku va nenela asumũlũho alua. Oku ci sokisa loku kala onungi yo kilu, oku kala onungi yo ko Roma ka ca kuatele esilivilo lialua! Omo liaco, Paulu wa vetiya va Filipoi ‘oku amamako oku kala olonungi ndomo ci likuata lolondaka viwa viatiamẽla ku Kristu.’ (Va Fil. 1:27) Akristão olombuavekua koloneke vilo, va siata oku eca ongangu yiwa yoku tiamisila utima kocimãho cavo comuenyo ko pui kilu.

16. Ci kaile okuti elavoko lietu oku enda kilu ale oku kala palo posi, nye tu sukila oku amamako oku linga ndomo ca tangiwa ku Va Filipoi 4:6, 7?

¹⁶ Ci kaile okuti elavoko lietu oku enda kilu ale oku kala palo posi, tu sukila oku likolisilako oku tẽlisa ocimãho cetu. Tu sukilavo oku yuvula oku tiamisila utima kovina tua sia konyima kuenda ka tu ka eceleli okuti cimue ci tu tateka oku yoloka. (Va Fil. 3:16) Ndaño okuti ovina o lavoka ka vi kasi oku tẽlisiwa lonjanga, ale o kasi oku liyaka lekambo liuhayele, oku kuka, ale alambalalo vokuenda kuanyamo alua ‘ku ka sakalale locina cimue.’ Pole, alombelo kuenda apingilo ene a kũlĩhĩwe la Suku kuenje eye eca ombembua ya piãla olondunge viosi.—Tanga Va Filipoi 4:6, 7.

17. Nye tu ka lilongisa vocipama cikuavo?

¹⁷ Ndeci ukuakuyoloka a likolisilako toke eci a tẽlisa ocimãho caye, tu sukilavo oku yolokela kocimãho cetu comuenyo. Osimbu tu kuete ongusu kuenda ekalo lietu li tu ecelela, tu sukila oku likolisilako oku yolokela kasumũlũho a komõhisa tu lavoka. Nye tu sukila oku linga oco tu litunde ciwa loku pandikisa? Ocipama cikuavo ci ka tu kuatisa oku pitisa kovaso ovina vi kuete esilivilo kuenda oku “kũlĩha ovina via velapo.”—Va Fil. 1:9, 10..