1. Velie va kuatisa koku sokiya ekongelo ko Filipu?

ECI upostolo Paulu, la Sila, la Luka kuenda Timoteo, va pitĩla Kakristão va Roma va kala ko Filipu, va sanga omanu valua va lekisa onjongole yoku yevelela esapulo Liusoma. Vamanji ava vakuãla va kuatisa koku sokiya ekongelo kuenje olondonge viosi via fetika oku linga olohongele, citava okuti konjo yukristão umue o tukuiwa Ludia.—Ovil. 16:40.

2. Ovitangi vipi ekongelo lia liyaka lavio?

² Ekongelo liaco liokaliye, lia liyaka lovitangi vialua. Satana wa tuma omanu vana va suvuka ocili, oco va tateke upange woku kunda Paulu a kala loku linga kumue Lakristão vakuavo vakuekolelo. Kuenje Paulu la Sila va kuatiwa, va tipuiwa loku kapiwa vokayike. Noke lioku tunda vokayike, va nyula olondonge viokaliye loku va pamisa. Kuenje Paulu la Sila kuenda Timoteo va tunda volupale omo liaco, citava okuti Luka wa sialemo. Nye vamanji vekongelo liokaliye va sukilile oku linga? Lekuatiso liespiritu lia Yehova, ovo vamamako oku u vumba lekolelo. (Va Fil. 2:12) Omo liaco, Paulu wa kuata esunga liwa lioku va sanjukila!

3. Ndomo ca tangiwa ku Va Filipoi 1:9-11, olondaka vipi Paulu a tukula vohutililo?

³ Noke lioku pita anyamo ekũi, Paulu wa sonehela vamanji kekongelo lio ko Filipu. Osimbu o tanga ukanda waco, o pondola oku limbuka ocisola Paulu a kuatela vamanji. Eye wa soneha hati: “Ndu vu kueteli ongeva locisola ndeci Kristu Yesu a kuete.” (Va Fil. 1:8) Paulu wa sonehavo okuti wa siata  oku va tukula volohutililo viaye. Eye wa pingavo ku Yehova oco a va kuatise oku amamako oku lekisa ocisola cavo, oku limbuka ovina via velapo, oku pua etondelo kuenda oku yuvula oku kokela vakuavo ocilondokua loku yuka epako liesunga. Ocili okuti koloneke vilo, tu kuatisiwavo lolondaka evi via Paulu. Tu tangi olondaka Paulu a sonehela va Filipoi. (Tanga Va Filipoi 1:9-11.) Tu kũlĩhĩsa ovina Paulu a tukula kuenda ndomo tu vi kapako.

4. (a) Ndomo ca tangiwa kukanda 1 Yoano 4:9, 10, Yehova wa lekisa ndati ocisola caye kokuetu? (b) Tu sukila oku sola ndati Suku?

⁴ Yehova wa lekisa ocisola caye kokuetu poku tuma Omõlaye palo posi, oco a tu file omo liakandu etu. (Tanga 1 Yoano 4:9, 10.) Ocisola ca piãla ca Suku, ci tu vetiya oku u sola. (Va Rom. 5:8) Tu vokiya ndati ocisola cetu ku Suku? Yesu wa tambulula epulilo eli eci a sapela la Fariseo umue, hati: “Sola Yehova Suku yove lutima wove wosi, lomuenyo wove wosi kuenda lolondunge viove viosi.” (Mat. 22:36, 37) Etu tu yongola oku sola Yehova lutima wetu wosi. Tu yongolavo okuti eteke leteke ocisola tu u kuetele, ci pama. Paulu wa sapuila vamanji va Filipoi hati, “ocisola cene camamako oku livokiya.” Nye tu sukila oku linga oco tu vokiye ocisola cetu ku Suku?

5. Tu pamisa ndati ocisola cetu?

⁵ Oco tu sole Suku, tu sukila oku u kũlĩha. Embimbiliya li popia hati: “Wosi ka sole ka kũlĩhĩle Suku, momo Suku eye ocisola.” (1 Yoa. 4:8) Upostolo Paulu wa lombolola okuti ocisola cetu ku Yehova, ci livokiya eci tu kuata “ukũlĩhĩso wa suapo lolondunge” watiamẽla kokuaye. (Va Fil. 1:9) Eci tua fetika oku lilongisa Embimbiliya, tua nõlapo oku sola Yehova ndaño okuti ka tua kũlĩhĩle ovina vialua viatiamẽla kokuaye. Osimbu tu amamako oku vokiya ukũlĩhĩso wetu watiamẽla ku Yehova, ocisola cetu kokuaye ci livokiya. Kuenje tu limbuka okuti, oku tanga Embimbiliya eteke leteke loku sokolola kovina tua tanga, vi kasi pokati kovina via velapo!—Va Fil. 2:16.

6. Ndomo ca tangiwa kukanda 1 Yoano 4:11, 20, 21, nye tu sukila oku linga oco ocisola cetu ci pame?

⁶ Ocisola calua Yehova a tu kuetele, ci tu vetiyavo oku sola vamanji. (Tanga 1 Yoano 4:11, 20, 21.) Pamue tu sima okuti ca leluka oku sola vamanji. Momo lie? Momo vosi yetu tu fendela Yehova kuenda tu likolisilako oku setukula ovituwa viaye. Tu kuãi ongangu ya Yesu, una wa lekisa ocisola calua poku eca omuenyo waye oco a tu yovole. Pole, pamue ci tĩla oku pokola kocihandeleko coku lisola pokati. Tu kũlĩhĩsi ulandu umue wa pita kekongelo lio ko Filipu.

7. Nye tu lilongisa kelungulo Paulu a eca ku Euodia la Suntuke?

⁷ Euodia la Suntuke va kala vamanji vamue vakuambili okuti va talavaye “kumue” lupostolo Paulu. Citava okuti, ovo va ecelela okuti ovitangi via kala pokati kavo vi tepa ukamba wavo. Vekongelo lio ko Filipu Paulu a sonehela ukanda, omo mua kala vamanji vaco vavali okuti, Euodia la Suntuke kuenje wa va ĩha elungulo “oco va kuate utima umuamue.” (Va Fil. 4:2, 3) Paulu wa vetiyiwavo oku eca elungulo liaco kekongelo liosi, poku popia hati: “Amamiko oku linga ovina viosi okuti halokulisiõsiõlako kuenda olonamãlala.” (Va Fil. 2:14) Ocili okuti elungulo lia Paulu ka lia kuatisile lika Euodia la  Suntuke, pole, lia kuatisavo vamanji vosi oku lisola pokati.

8. Nye tu linga nda tu kuete ocitangi coku sola vamanji kuenda nye ci tu kuatisa?

⁸ Ndeci ca pita la Euodia kuenda Suntuke, citava okuti tu kasivo locitangi coku lisola pokati omo lioku luluvalela kakulueya a vakuetu. Ocili okuti vosi yetu tua siata oku lueya. Nda tua tiamisila utima wetu kakulueya a vakuetu, ci ka tĩla oku lekisa ocisola kokuavo. Ndeci, nda manji umue ka endele oku puenya Onjango Yusoma, pamue ci tu kokela oku tema. Nda tua fetika oku sokolola kakulueya osi a vakuetu, tu ka amamako oku tema kuenje ocisola cetu kokuavo ci tepuluka. Nda o kasi locitangi caco, ivaluka okuti: Yehova o lete akulueya etu kuenda a vamanji vosi. Ndaño lakulueya aco, vosi yetu o tu sole. Omo liaco, tu sukila oku setukula ocisola ca Yehova kuenda oku kuatela vamanji ocituwa ca sunguluka. Eci tu likolisilako oku sola vamanji, tu pamisa omunga yetu.—Va Fil. 2:1, 2.

9. Nye ca kongela ‘vovina via velapo,’ Paulu a tukula vukanda a sonehela va Filipoi?

⁹ Espiritu sandu lia vetiya Paulu oku sonehela Akristão va Filipoi kuenda Akristão vosi oco va ‘kũlĩhe ovina via velapo.’ (Va Fil. 1:10) Vovina via velapo mua kongela oku kemãlisa onduko ya Yehova, oku tẽlisiwa kuocipango caye kuenda oku kuata ombembua lomunga vekongelo. (Mat. 6:9, 10; Yoa. 13:35) Eci tu pitisa kovaso ovina via velapo komuenyo wetu, tu lekisa okuti tu sole Yehova.

10. Nye tu sukila oku linga oco tu tendiwe okuti tua pua etondelo?

¹⁰ Paulu wa popiavo okuti tu sukila oku “pua etondelo.” Eci ka ci lomboloka okuti te tua lipua. Oku pua etondelo ka ci lomboloka okuti tu lisoka la Yehova. Pole, Yehova o tu tenda okuti tua pua etondelo, nda tua likolisilako oku vokiya ocisola cetu kuenda oku linga ovina via velapo. Onjila yimue yoku lekisa ocisola cetu, oku yuvula oku kokela ocilondokua vakuetu.

11. Momo lie tu sukilila oku yuvula oku kokela vakuetu ocilondokua?

¹¹ Onumbi yoku yuvula oku ‘kokela ocilondokua vakuetu’ elungulo limue li kuete esilivilo lialua. Ovina vipi vi pondola oku kokela ocilondokua vakuetu? Ovitalukilo, uwalo kuenda olomapalo tu nõla. Ovina tu linga pamue havĩviko. Pole, nda ovina viaco vi kokela vakuetu ocilondokua, eci ocitangi cimue cinene. Yesu wa popia okuti wosi o kapela ocilondokua umue pokati kolomeme viaye, hĩse nda o kapiwa ewe liombambo posingo yaye lina li ñualisiwa locimbulu, loku imbiwa vokalunga!—Mat. 18:6.

12. Nye tua lilongisa kohueli yimue yakundi votembo yosi?

¹² Limbuka ndomo ohueli yimue yakundi votembo yosi va kapako elungulo lia Yesu. Vekongelo liavo mua kala ohueli yimue ya papatisiwa ndopo okuti, vepata liavo muli ovituwa vimue okuti ka vi tava oku vi kuama. Ohueli yaco ya simĩle okuti Akristão ka ci tava oku tala olofilme ndaño vina ka vi lekisa evi vĩvi. Eci va limbuka okuti ohueli yakundi votembo yosi ya tala ofilme yimue, ca va kokela ocilondokua. Kuenje ohueli yakundi votembo yosi, ya liwekapo oku tala olofilme, toke eci ohueli ya papatisiwa ndopo ya pindisa owanji wavo wovutima, okuti va kuata ocituwa ca sunguluka catiamẽla konjila ndomo va tenda ovina. (Va Hev. 5:14) Lonjila eyi, ohueli yakundi votembo yosi, ya  lekisa okuti ocisola va kuetele vamanji te ci lekisiwa kovilinga, kolondaka lika hakoko.—Va Rom. 14:19-21; 1 Yoa. 3:18.

13. Tu kokela ndati omunu umue oku linga ekandu?

¹³ Onjila yikuavo yoku kokela umue ocilondokua, poku u silĩha oku linga cimue tua kũlĩha okuti ekandu. Ndamupi? Sokolola kocindekaise eci. Ondonge yimue Yembimbiliya noke lioku likolisilako oku yula ocitangi coku nyua calua ovina vi koluisa, o fetika oku likandangiya. Kuenje o limbuka okuti o sukila oku liwekapo oku nyua ovina vi koluisa. Eye o linga apongoloko alua komuenyo, kuenje o papatisiwa. Noke manji umue u laleka oku nyuapo kamue ovina vi koluisa kuenje u sapuila hati: “Ove kaliye Ukristão; o kuete espiritu lia Yehova. Limue pokati kepako liespiritu sandu, oku likandangiya. Nda wa likandangiya, o ka tẽla oku kũlĩha onjongo o sukila oku nyua.” Tu sokololi kovitangi nda vieyilila kumanji wa papatisiwa ndopo nda wa tavele konumbi yoku nyua vali ovina vi koluisa!

14. Olohongele vietu vi tu kuatisa oku kapako ndati elungulo li sangiwa ku Va Filipoi 1:10?

¹⁴ Olohongele vietu vi tu kuatisa oku kapako elungulo li sangiwa ku Va Filipoi 1:10 kolonepa vialua. Tete, ovina tu lilongisa vekongelo vi lekisa ovina Yehova a tenda okuti via velapo. Vali, tu vetiyiwa oku kapako ovina tua lilongisa oco tu kale omanu va pua etondelo. Tatu, tu vetiyiwa “locisola kuenda ovilinga viwa.” (Va Hev. 10:24, 25) Eci vamanji va tu vetiya, ocisola cetu ku Suku kuenda  ku vamanji camamako oku livokiya. Eci tu lekisa ocisola ku Suku kuenda ku vamanji lutima wosi, tu likolisilako oku yuvula oku kokela vamanji ocilondokua.

15. Nye ci lomboloka oku “yuka epako liesunga”?

¹⁵ Paulu wa likutilila lutima wosi, oco va Filipoi ve ‘yuke epako liesunga.’ (Va Fil. 1:11) Ocili okuti ‘vepako liesunga,’ mua kongela oku sola Yehova kuenda afendeli vaye. Mua kongelavo oku sapuilako vakuetu catiamẽla kekolelo o kuetele Yesu kuenda elavoko liwa o kuete. Ukanda ku Va Filipoi 2:15, u tukula ocindekaise cikuavo cokuti, oku “tua ndocinyi voluali.” Olondaka evi vi tu ivaluisa eci Yesu a sapuila olondonge viaye hati, “vucinyi coluali.” (Mat. 5:14-16) Eye wa handelekele olondonge viaye ‘oku longisa omanu oco va linge olondonge’ kuenda wa va sapuila okuti ovo va laikele oku kala “olombangi . . . toke kasukiyo o kilu lieve.” (Mat. 28:18-20; Ovil. 1:8) Tu yuka “epako liesunga,” eci tu likolisilako oku linga upange wavelapo vali, okuti woku kunda.

16. Ndomo ca tangiwa ku Va Filipoi 1:12-14, tu tuisa ndati ocinyi cetu ndaño lovitangi? (Tala ociluvialuvia koñoño.)

¹⁶ Ndaño okuti tu kasi oku liyaka lovitangi, vosi yetu tu pondola oku tua ndocinyi voluali. Pamue ovina tu sima okuti vi tu tateka oku kunda olondaka viwa olonjanja vimue, vi tu ĩha epuluvi lioku kunda. Ndeci, citava okuti eci upostolo Paulu a sonehela ukanda va Filipoi, wa kala vokayike ko Roma. Ndaño okuti Paulu wa kala vokayike, ka liwekelepo oku kundila olondavululi. Eye wa lekisa ombili poku kunda kuenda wa pamisa vamanji loku va kolisa oco va ‘lekise utõi woku vangula ondaka ya Suku.’—Tanga Va Filipoi 1:12-14; 4:22.

17. Tukula ulandu umue u lekisa ndomo vamanji vamue va kasi oku amamako oku kunda ndaño lovitangi.

 ¹⁷ Vamanji valua va siata oku kuama ongangu yiwa yupostolo Paulu yoku lekisa utõi. Ovo va kasi kolofeka vina okuti, ka va kuete elianjo lioku kundila konjo lanjo, pole, va siata oku sanga olonjila vikuavo vioku kunda olondaka viwa. (Mat. 10:16-20) Kofeka yimue, manji ukuakunyula akongelo wa sapuila akundi okuti, omunu lomunu o kundila vangandiaye, vana va lisungue lavo, vana va tangela kumosi, va talavayela kumosi kuenda vana va livala lavo ukamba. Kuenje vokuenda kuanyamo avali, etendelo liakongelo lia livokiya calua. Citava okuti vofeka tu kasi tu kuete elianjo lioku kunda. Pole, ku vamanji ava tu lilongisilako okuti: Olonjanja viosi tu sukila oku sanda onjila yoku kunda, loku kolela okuti Yehova o ka tu ĩha ongusu tu sukila oco tu yule ovitangi viosi.—Va Fil. 2:13.

18. Nye tua nõlapo oku linga?

¹⁸ Tu nõlipo oku kapako elungulo li sangiwa kukanda Paulu a sonehela va Filipoi. Tu limbuki ovina via velapo, oku pua etondelo kuenda oku yuvula oku kokela vakuetu ocilondokua loku yuka epako liesunga. Nda tua ci linga, tu ka amamako oku vokiya ocisola cetu kuenda oku sivaya Isietu ukuacisola, Yehova.