1. Tu yongola okuti epata lietu li linga nye?

MANJI umue o tukuiwa Pauline * wa popia hati, “tunde eci nda fetika oku lilongisa ocili, onjongole yange yeyi okuti epata liange liosi li kala kumue lame Vocumbo Celau. Ca piãla enene, njongola okuti ulume wange Wayne kuenda omõlange ulume, tu vumbila kumosi Yehova.” Anga hẽ ove o kuete vamue vepata okuti handi ka va fendela Yehova loku u sola? Nda oco, citava okuti o liyevavo nda manji Pauline.

2. Apulilo api tu konomuisa vocipama cilo?

² Ka tu kisika vakuepata lietu oco va tave olondaka viwa, pole, tu pondola oku va vetiya oku kuata utima wa sunguluka, oco va lekise onjongole yoku tava esapulo Liembimbiliya. (2 Tim. 3:14, 15) Momo lie tu sukilila oku kundila epata lietu? Momo lie tu sukilila oku lekisa esunguluko kokuavo? Tu kuatisa ndati epata lietu oku solavo Yehova? Vosi vekongelo va pondola oku tu kuatisa ndati?

3. Ndomo ca tangiwa kukanda 2 Petulu 3:9, momo lie tu sukilila oku kundila epata lietu?

³ Ndopo Yehova o ka nena esulilo lioluali. Kuenje “vakuotima wa sungulukila omuenyo ko pui,” ovo lika va ka popeliwa. (Ovil. 13:48) Ocili okuti, tua siata oku pesela otembo yalua oku kundila omanu ka tua kũlĩhĩle vocikanjo cetu, pole, tu sukilavo oku kundila epata lietu, oco va vumbe Yehova kumue letu. Yehova,  Isietu ukuacisola, “ka yongola okuti umue o nyõliwa, puãi o yongola okuti vosi va likekembela.”—Tanga 2 Petulu 3:9.

4. Onjila yipi ka ya sungulukile pamue tua siata oku kuama poku kundila epata lietu?

⁴ Tu sukila oku limbuka okuti kuli onjila ya sunguluka kuenda onjila ka ya sungulukile yoku eca esapulo lieyovo. Ndeci, eci tu kundila omunu umue ka tua kũlĩhĩle tu lekisa esunguluko, pole, eci tu kundila umue ukuepata lietu ka tu lekisa esunguluko.

5. Nye tu sukila oku limbuka osimbu handi ka tua kundilile epata lietu?

⁵ Anga hẽ ivaluka onjanja yatete wa kundilile umue ukuepata liove? Pamue wa livela omo lionjila ndomo wa ci lingile, kaliye o yongola oku ci linga lonjila yikuavo. Upostolo Paulu wa lungula Akristão hati: “Olondaka viene vi kale lumbombe, loku singiwa lomongua, okuti vu kũlĩha ndomo vu tambulula omunu umue.” (Va Kol. 4:5, 6) Ciwa oku kuama elungulo eli eci tu kundila umue ukuepata lietu. Pole, nda ka tua ci lingile, ka tu ka vetiya ovitima viavo.

6-7. Tukula ocindekaise ci lekisa esunga lieci ci sukilila oku lekisa esunguluko ku umue pokati kohueli ka yi vumbi Yehova.

⁶ Lekisa esunguluko. Manji Pauline wa tukuiwa ale kefetikilo, wa popia hati: “Tete ndaenda oku sapela lulume wange catiamẽla lika kovina viespiritu. Ka tua kuataile ombangulo ‘yikuavo’.” Pole, Wayne ulume wa manji Pauline, ka kũlĩhĩle ovina vialua viatiamẽla Kembimbiliya kuenje cosi manji Pauline a enda oku vangula ka ca endaile oku u lomboloka. Kokuaye, ca kala ndu okuti ovina viosi manji Pauline a vangula viatiamẽla lika ketavo liaye. Eye wa kala lesakalalo omo wa simĩle okuti ukãi waye wa tiamẽlele kocisoko cimue ci koka ohele.

⁷ Manji Pauline wa limbuka okuti, wa enda  oku pita otembo yalua la vamanji, kolohongele vokati kosemana kuenda kasulilo osemana, kupange woku kunda lokovitalukilo. Manji Pauline wa popia hati, “olonjanja vimue eci ulume waye Wayne a pitĩla konjo o kala lika waye.” Wayne wa endaile oku kuatela ongeva ukãi waye kumue lomõlaye. Ulume wa manji Pauline, ka kũlĩhĩle omanu va enda oku kala lukãi waye kuenda ca kala ndu okuti akamba vamanji Pauline va velelepo vali okuti ulume waye o sule. Wayne wa sapuila ukãi waye Pauline okuti tu liyãla. O pondola hẽ oku sokolola olonjila manji Pauline a sukilile oku lekisa esunguluko?

8. Ndomo ca tangiwa kukanda 1 Petulu 3:1, 2, nye ci pondola oku vetiya vakuepata lietu?

⁸ Ecelela okuti ovilinga viove vi ku imbila uvangi uwa. Olonjanja vialua, ovina tu linga vi limbukiwa vali calua pokati kepata lietu okuti, evi tu popia ci sule. (Tanga 1 Petulu 3:1, 2.) Pauline wa limbuka ovina evi. Eye wa popia hati: “Ame lulume wange Wayne, tua lisolele kuenda ka tua yonguile okuti tu liyãla. Pole, ndomo ulume wange a kala oku ndi tata nda limbuka okuti nda sukilile oku linga apongoloko a likuata lolonumbi via Yehova. Nda limbukavo okuti nda sukilile oku yuvula oku vangula calua, pole, nda sukilile oku lekisa ongangu yiwa kovilinga.” Manji Pauline wa liwekapo oku kisika Wayne oku tava kesapulo Liembimbiliya kuenje manji Pauline wa fetikavo oku sapela laye catiamẽla kovina vieteke leteke. Wayne wa limbuka okuti manji Pauline wa fetika oku lekisa esunguluko kuenda wa limbukavo okuti omõlaye kaliye o kuete esumbilo. (Olosap. 31:18, 27, 28) Eci Wayne a limbuka ndomo esapulo Liembimbiliya lia kuatisa epata liaye, eye wa fetika oku lekisa onjongole kocili Cembimbiliya.—1 Va Kor. 7:12-14, 16.

9. Momo lie tu sukilila oku amamako oku kuatisa epata lietu?

 ⁹ Ku ka liwekepo oku kuatisa epata liove. Yehova eca ongangu yiwa. Olonjanja viosi eye eca komanu epuluvi lioku yeva olondaka viwa, oco va kuate omuenyo. (Yer. 44:4) Upostolo Paulu wa sapuila Timoteo oco ka ka liwekepo oku kuatisa omanu. Momo lie? Momo poku ci linga, o lipopela eye muẽle kuenda vana vo yevelela. (1 Tim. 4:16) Omo okuti tu sole epata lietu, tu yongola okuti ovo va kũlĩha ocili Condaka ya Suku. Olondaka via manji Pauline kuenda ovilinga viaye, via kuatisa epata liaye. Eye cilo o kuete esanju omo lioku vumba Yehova kumue lulume waye. Kavali kavo akundi votembo yosi kuenda Wayne wa linga ukulu wekongelo.

10. Momo lie tu sukilila oku lekisa epandi?

¹⁰ Lekisa epandi. Eci tu kapako olonumbi via Suku komuenyo wetu, epata lietu ka li kuata elomboloko lionjila tua nõla kuenda ekalo liokaliye. Olonjanja vialua va limbuka okuti ka tua siatele vali oku kala lavo kovipito viavo kuenda ka tu lingi vali onepa kopulitika. Kuenje vamue vepata lietu pamue va tu suvuka. (Mat. 10:35, 36) Pole, ka tu ka simi okuti, ovo lalimue eteke va ka pongoloka. Nda tua liwekapo oku va kuatisa oku kuata elomboloko liovina tu tava, tu ka lekisa okuti ka va sesamẽla oku kuata omuenyo ko pui. Yehova ka tu ĩhile omoko yoku sombisa, eye wa eca ocikele caco ku Yesu. (Yoa. 5:22) Nda tua lekisa epandi, citava okuti epata lietu li ka lekisa onjongole yoku yevelela esapulo Liembimbiliya.—Tanga okakasia losapi hati: “ Talavaya Lonumbi Yetu yo Internet Poku Longisa.”

11-13. Nye wa lilongisa konjila ndomo manji Alice a tata olonjali viaye?

¹¹ Lekisa ocisola, pole, ku ka ecelele okuti epata li pongolola onjila wa nõla. (Olosap. 15:2) Tu kũlĩhĩsi ulandu wa manji Alice. Eye wa fetika oku lilongisa ocili Cembimbiliya eci a kala ocipãla lolonjali viaye okuti via tiamẽlele kopulitika. Manji Alice wa limbuka okuti wa sukilile oku sapela lavo catiamẽla kovina viwa a kala oku lilongisa. Eye wa popia hati: “Nda ove wa tumala calua oku sapuilako vangandiove ovina o kasi oku lilongisa, eci va ka ci yeva va ka lisalukako.” Manji Alice wa sanda olondaka vina a kũlĩha okuti olonjali viaye vi ka ci sanjukila ndeci, ocisola. Kuenje wa va sonehela ukanda umue poku tukula olondaka viaco Viembimbiliya loku va pulisa ocisimĩlo cavo catiamẽla kovina via tukuiwa. (1 Va Kor. 13:1-13) Eye wa pandula olonjali viaye omo lioku u tata kuenda wa tuma ombanjaile yimue kokuavo. Eci a ka nyulile olonjali viaye, wa kuatisa inaye kovopange osi o vonjo. Kefetikilo, olonjali viaye ka via sanjukilile ovina manji Alice a kala oku lilongisa.

¹² Eci manji Alice a kala konjo yolonjali viaye, eye wamamako lesokiyo liaye lioku tanga Embimbiliya eteke leteke. Manji Alice hati, “eci ca kuatisa inange oku kuata elomboloko ndomo Embimbiliya lia kuata esilivilo kokuange.” Kuenje isiaye wa nõlapo oku lilongisa Embimbiliya oco a kuate elomboloko lieci omõlaye a lingila apongoloko kuenda wa yonguilevo oku sanga ovina vimue Vembimbiliya oco a vi pise. Manji Alice wamisako hati, “nda eca Embimbiliya ku isiange kuenda ndo kapelamo okokanda kamue.” Nye ce yililako? Isiaye ka sangele lacimue Vembimbiliya oco a ci pise, pole, wa komõha calua omo liovina a tanga.

¹³ Ndaño tua siata oku liyaka lalambalalo, tu sukila oku lekisa utõi, pole, tu ci linga lesunguluko. (1 Va Kor. 4:12b) Ndeci, manji Alice wa sukilile oku pandikisa kelambalalo lia inaye. Eye hati, “eci nda papatisiwa ina yange wa ndi sapuila okuti ove u ‘mõla umue wa sina.’” Nye manji Alice a linga? Eye wa popia hati,  “lesumbilo nda lombolola okuti nda nõlapo oku kala Ombangi ya Yehova kuenda si pongolola onjila nda nõla. Nda sapuila ina yange okuti ndu sole calua. Kuenje kavali ketu tua lila, noke tua teleka okulia kumue kupepa calua. Tunde opo, ina yange wa fetika oku limbuka okuti ukũlĩhĩso Wembimbiliya wa ñuatisa oku kala omunu umue uwa.”

14. Momo lie ka tu tavela okuti epata lietu li pongolola onjila tua nõla yoku vumba Yehova?

¹⁴ Pamue cambata otembo yalua, oco vakuepata lietu va kuate elomboloko liesunga lieci ci kuetele esilivilo kokuetu oku vumba Yehova. Ndeci, eci manji Alice a nõlapo oku talavaya ndukundi wotembo yosi, olonjali viaye via lila momo eye ka tavele oku kuama onjila olonjali viaye via yonguile kokuaye. Manji Alice wamamko lutõi. Eye popia hati, “nda wa ecelela okuti epata liove li pongolola onjila wa nõla, citava okuti va ka amamako oku ku nõlelako onjila o kuama. Pole, nda wa lekisa esunguluko kuenda utõi kepata, citava okuti vamue pokati kavo va ka ecelela okuti o kuama onjila wa nõla.” Eci oco ca pita la manji Alice. Cilo, olonjali viaye akundi votembo yosi kuenda isiaye ukulu wekongelo.

15. Ndomo ca tangiwa ku Mateo 5:14-16 kuenda kukanda 1 Petulu 2:12, “ovilinga viwa” via vakuetu vi kuatisa ndati epata lietu?

¹⁵ Yehova o kokela omanu vocisoko caye omo ‘liovilinga viwa’ via vamanji vekongelo. (Tanga Mateo 5:14-16; 1 Petulu 2:12.) Nda okuti ohueli yove Hambangiko ya Yehova, anga hẽ eye wa kũlĩha vamanji vosi vekongelo? Manji Pauline wa tukuiwa ale, wa laleka vamanji konjo yaye oco ulume waye Wayne a va kũlĩhe.  Eci ca kuatisa Wayne oku limbuka okuti Olombangi Via Yehova omanu vamue vawa. Eye wa popia hati: “Manji umue eteke limue wa laña kupange waye oco eye konjo yange oku talela kumosi omapalo yombunje. Kuenje nda limbuka okuti ‘manji wa sunguluka calua!’”

16. Momo lie tu sukilila oku laleka epata lietu oku enda kolohongele?

¹⁶ Onjila yimue yoku kuatisa epata lietu, yoku va laleka oku enda letu kolohongele. (1 Va Kor. 14:24, 25) Ohongele yatete Wayne a endele Kocipito conjivaluko, momo ya lingiwa velivala lina okuti wa lembuka kupange kuenda ohongele yaco ka ya tumalele. Eye wa popia hati, “cosi va vangula ka ca ndombolokele, pole, omanu vaco va ñomohisa calua. Ovo veya kokuange kuenje va ndi yolela loku ndi lama peka lesanju. Mopia lutima wosi okuti ovo omanu vamue vawa.” Ohueli yimue ya lieca olumue koku kuatisa manji Pauline kumue lomõlaye oku endaenda kolohongele kuenda kupange woku kunda. Kuenje eci Wayne a nõlapo oku kuata vali elomboloko liatiamẽla kovina manji Pauline a kala oku lilongisa, Wayne wa pinga kohueli yaco oco vo longise Embimbiliya.

17. Nye tu sukila oku yuvula kuenda momo lie ka tu ponduila oku liwekapo oku kuatisa epata lietu?

¹⁷ Tu sanjuka calua nda epata lietu li likongela kokuetu oku vumba Yehova. Pole, ndaño okuti tua siata oku likolisilako oku kuatisa epata lietu oco va kale afendeli va Suku, citava okuti ovo ka va ci kapiko. Tu sukila oku yuvula oku li vetela evelo omo lionjila ovo va nõla. Handi vali, ka tu kisika laumue oku tava kovina tu kasi oku lilongisa. Pole, nda epata liove li limbuka okuti o kuete esanju omo lioku vumba Yehova, citava okuti ci ka va vetiya. Va kongela volohutililo viove. Lekisa utate poku vangula lavo. Ku ka liwekepo oku va kuatisa! (Ovil. 20:20) Kolela okuti Yehova o ka sumũlũisa alikolisilo ove. Omo liaco, nda epata liove lia nõlapo oku ku yevelela, ovo va ka popeliwa!