KUNYAMO wo 1910, olonjali viange via tunda kolupale luo Tbilisi, kofeka yo Georgia oco va ilukile kofeka yo Kanada. Kofeka yaco, onjo yavo ya kala vepia limue ocipepi limbo limue li tukuiwa hati Pelly, volupale luo Saskatchewan, kombuelo yofeka yo Kanada. Nda citiwa kunyamo wo 1928, pokati komãla va soka epandu, ame ndi kuasula. Eci pa kambele olosãi epandu oco ndi citiwe, isia yange wa fa kuenda ina yange wa favo eci nda kala omõla. Noke liotembo yimue huvange ukãi o tukuiwa hati, Lucy wa fa eci a kuata 17 kanyamo. Omo liaco inanu yange o tukuiwa hati Nick eye wa tu tata.

Eteke limue eci nda kala omõla utito, epata liange lia mõla okuti nda kala oku nãla kucĩla wo kavalu ketu. Ovo va kuata usumba momo va simĩle okuti okavalu kaco ka laikele oku ndi tusula kuenje va fetika oku kaluka oco ndi liwekepo oku ci linga. Omo okuti nda imba onyima kokuavo, sia yevele eci va kala oku kaloka. Ngeca olopandu omo okuti, o kavalu ka ka ndi tusuile. Pole, oku upisa keteke liaco epata liange lia limbuka okuti nda kala ocisitatũi.

Ekemba limue liepata lietu lia popia okuti nda sukilile oku iñila kosikola yomãla vana okuti va kalavo ovisitatũi. Noke Inanu yange o tukuiwa hati, Nick wa ndi kapa kosikola yo visitatũi ya kala vimbo lio Saskatoon, volupale luo Saskatchewan. Osikola yaco ya kala ocipãla lepata liange kuenda omo okuti nda kuata lika anyamo atãlo nda kuatele usumba walua. Nda laikele lika oku nyula epata liange vokuenda kuepuyuko ale pondombo. Nda lilongisa  elimi lioku ilaika kuenje ca ndi kuatisa oku papala lomãla vakuavo.

Kunyamo wo 1939 huvange ukãi, o tukuiwa hati Marion wa likuela la manji Bill Danylchuck kuenje ovo va fetika oku tata ame kumue la manjange ukãi Frances. Ovo, va kala omanu vatete vepata liange va fetika oku lilongisa Embimbiliya Lolombangi Via Yehova. Vokuenda kuepuyuko liokosikola kotembo yondombo, va likolisilako oku ndi longisa ovina va kala oku lilongisa Vembimbiliya. Ka ca lelukile kokuetu oku sapela momo ovo ka va tẽlele oku popia elimi lioku ilaika. Pole, nda limbuka okuti ovo va solele ovina va kala oku lilongisa viatiamẽla ku Yehova. Nda limbukavo okuti ovina va kala oku linga via kuata elitokeko leci Embimbiliya lia kala oku longisa kuenje nda endele lavo kupange woku kunda. Noke liotembo yimue nda kuatavo onjongole yoku papatisiwa kuenje keteke 5 kosãi Yenyenye Linene yunyamo wo 1941, manji Bill wa ndi papatisa vetangi limue mua kapiwa ovava opiwa vokasimba. Ovava aco a talalele calua!

Kunyamo wo 1946, eci nda tiukila konjo kotembo yondombo nda endele kohongele yofeka Volupale luo Cleveland, Ohio, kofeka yo Estados Unidos. Eteke liatete manjange ukãi wa kala oku soneha atosi hohongele atiamẽla kolohundo, oco a ndi kuatise oku kuama ovipama. Pole, keteke lia vali nda komõha poku kũlĩha okuti kua kala ocimunga cimue citito covisitatũi lomunu umue wa kala oku pitiya kelimi lioku ilaika kohongele yofeka. Noke nda fetika oku kuata elomboloko liulandu wovipama kuenda nda kuata esanju lioku kuata elomboloko liasuapo lieci Embimbiliya lilongisa!

Kotembo yaco uyaki wavali wa pita voluali luosi wa sulile ale kuenda omanu va yonguile oku lekisa ekolelo kofeka yavo. Pole, eci nda tunda kohongele yofeka, nda tiukila kosikola nda kala oku tangela kuenje nda nõlapo oku kakatela kekolelo ndi kuetele Yehova. Omo liaco, nda liwekapo oku sivaya epandela, oku imba ocisungo cofeka kuenda oku yuvula oku linga onepa kovipito violuali. Nda liwekapovo oku endaenda konembele lomanu tu kangela kumosi. Omanu tua kala oku tangela kumosi kosikola ka va solele epongoloko nda linga kuenje va fetika oku ndi yola epembe loku popia alundi atiamẽla kapongoloko nda linga oco ndi liwekepo. Omanu nda tangela lavo kosikola va limbuka ovina via kala oku lipita lame omo liaco nda kuata epuluvi lioku va kundila. Vamue pokati komanu vaco Larry Androsoff, Norman Dittrick, kuenda Emil Schneider, okuti va tava kocili Cembimbiliya kuenda toke cilo va kasi oku vumba Yehova.

Eci nda ka nyulile alupale akuavo, olonjanja viosi nda enda oku likolisilako oku kundila omanu ovisitatũi. Eci nda endele volupale luo Montreal nda sangamo omanu ovisitatũi. Volupale luaco nda kundila Eddie Tager, okuti wa kala umalẽhe umue wa tiamẽlele kocimunga cimue colongangala. Umalẽhe waco wa kala vekongelo lielimi lioku ilaika vimbo lio Laval, volupale luo Quebec toke eci a fa kunyamo wa pita. Nda kũlĩhĩlevo umalẽhe umue o tukuiwa hati Juan Ardanez. Eye wa sokisiwa lomanu vo ko berea, momo eye wa enda oku linga akonomuiso oco a limbuke okuti ovina a kala oku lilongisa vi sangiwa Vembimbiliya. (Ovilinga 17:10, 11) Eye wa tavavo kocili Cembimbiliya kuenje wa vumba Yehova ndukulu wekongelo toke kolofa viaye vimbo lio Ottawa, volupale luo Ontario.

Kunyamo wo 1950, nda ilukila kolupale luo Vancouver. Ndaño okuti nda solale calua oku kundila ovisitatũi pole lalimue eteke nda valeleko ulandu ndi kuete eci nda kundila ukãi umue ocisitatũi vokololo o tukuiwa hati Chris Spicer. Eye wa tava oku tambula orevista kuenda wa yonguile okuti ndi li sanga lulume waye  o tukuiwa hati, Gary. Noke, nda ka va nyulile konjo yavo kuenje tua sapela calua lekuataiso lio tuikanda. Tunde kotembo yaco ka tua la limõla vali. Pole, noke lianyamo amue ovo va ndi mõla pokati kowiñi umue wa kala kohongele yofeka vimbo lio Toronto, volupale luo Ontario. Gary wa laikele oku papatisiwa veteke liaco. Ulandu waco u ndi ivaluisa okuti, oku amamako oku kunda ci kuete esilivilo lia velapo momo ka tua kũlĩhĩle nda omunu waco tua kundila o laika oku tava kocili Cembimbiliya.

Noke nda ilukila volupale luo Saskatoon. Volupale luaco nda lisanga lukãi umue wa ndi pinga oco ndi longise Embimbiliya komãla vaye olonjamba ovisitatũi okuti Jean kuenda Joan Rothenberger. Ovo va kala oku tangela kosikola yimuamue kuna ame nda tangela. Ka pa pitile otembo yalua kavali kavo va fetika oku sapela lomanu vakuavo vo kosikola catiamẽla kovina va kala oku lilongisa. Omo liaco, ci soka omanu vatãlo va tangela kumosi va linga Olombangi Via Yehova. Umue pokati komanu vaco Eunice Colin. Eci nda kala oku malusula osikola yovisitatũi oco nda kũlĩha Eunice. Kotembo yaco eye wa eca kokuange o chokolate kuenje wa ndi pulisa nda citava okuti tu kala akamba. Noke weya oku kala ekamba limue lia velapo komuenyo wange. Eye weya oku kala ukãi wange!

Eci ina ya Eunice a limbuka okuti wa kala oku lilongisa Embimbiliya, wa pinga kusongui wo kosikola a kala oku tangela oco o vetiya oku liwekapo oku lilongisa Embimbiliya. Ndaño okuti ina yaye wa tambula alivulu aye pole, Eunice wa nõlapo oku kakatela oku pamisa ukamba waye la Yehova. Eci eye a yonguile oku papatisiwa olonjali viaye vio sapuila hati: “Nda wa linga Ombangi ya Yehova o tundisiwa konjo!” Eci a kuata 17 kanyamo, Eunice wa tundisiwa konjo yolonjali viaye kuenje wa ilukila kepata limue okuti Olombangi Via Yehova. Eye wa amamako oku lilongisa Embimbiliya kuenje wa papatisiwa. Eci tua likuela kunyamo wo 1960, olonjali via Eunice ka vieyile kuvala wetu. Pole, vokuenda kuotembo ovo va fetika oku sumbila ovina tu tava kuenda onjila ndomo tua enda oku tekula omãla vetu.

Ndaño okuti tua kala ovisitatũi pole, tua tekula omãla vetu epanduvali okuti ka va kalele ovisitatũi. Tua likolisilako oku limbuka nda okuti ovo va enda oku kuata elomboloko lielimi lioku ilaika oco tu sapele lavo ciwa kuenda oku va longisa ocili Cembimbiliya. Pole, vamanji tua kalela vekongelo limuamue va tu kuatisa calua. Isia umue wa tu sonehela o kokanda kamue mua sonehiwa okuti umue pokati komãla vetu wa kala oku popia olondaka ka via sungulukile Vonjango Yusoma. Tua tetulula ocitangi caco vepuluvi liaco. Omãla vange vakuãla okuti James, Jerry, Nicholas kuenda Steven, akulu vekongelo kuenda va kasi oku vumba Yehova lekolelo kumue lakãi vavo kuenda omãla vavo. Handi vali, Nicholas kumue lukãi waye Deborah va kasi oku talavaya kupange woku pongolola kelimi lioku ilaika ko Betele yo kofeka yo Grã-Bretanya, kuenda Steven kumue lukãi waye Shannan, va panga onepa kocimunga coku pongolola alivulu etu kelimi lioku ilaika ko Betele yo Estados Unidos.

Ci sumuisa calua omo okuti eci pa kambele osãi yimosi oco tu tẽlise 40 kanyamo violohuela vietu, Eunice wa fa luvei wo kanser. Ekolelo a kuatela epinduko liokuatisa oku pamisa ekolelo liaye vokuenda kuotembo yaco yovitangi. Ndi lavoka lesanju lialua oku ka lisanga laye eci eye a ka pinduka.

 Kosãi ya Kayovo yunyamo wo 2012 nda kupuka kuenje nda teka ocikalo. Nda limbuka okuti nda sukilile ekuatiso omo liaco, nda ilukila konjo yomõla wange okuti ohueli. Cilo tu kasi Vekongelo Lielimi Lioku Ilaika vimbo lio Kalgary, muna ndi kasi oku amamako oku vumba Yehova ndukulu wekongelo. Eyi oyo onjanja yatete ndi kasi vekongelo lielimi lioku ilaika! Nda pamisa ndati ukamba wange la Yehova vokuenda kuotembo yosi nda kala vekongelo va vangula elimi Liongelesi? Yehova wa ndi kuatisa calua. Eye o kasi oku amamako oku tẽlisa ohuminyo yaye yoku tata olosiwe. (Osamo 10:14) Ngeca olopandu ku vamanji vana va lekisa onjongole yoku ndi kuatisa poku ndi sonehela otuikanda, oku lilongisa elimi lioku ilaika kuenda oku pitiya olondaka kelimi lioku ilaika.

Kua kala otembo yimue okuti sia kuatele elomboloko liovina via enda oku popiwa kolohongele kuenda ka kua kalele omunu laumue wa laikele oku kuatisa omanu vana okuti ovisitatũi. Eci nda enda oku yeva esumuo loku sima okuti ndi liwekapo, nda enda oku sokolola olondaka Petulu a sapuila Yesu poku popia hati: “A Ñala, kulie tu enda? Ove, ove o kasi lolondaka viomuenyo ko pui.” (Yoano 6:66-68) Ndeci ca enda oku linga vamanji vakuavo okuti va kala ovisitatũi nda sukilile oku lilongisa oku lekisa epandi. Nda lilongisa oku kolelela ku Yehova kuenda kocisoko caye poku ci linga ca ndi kuatisa calua. Cilo, ndi kuete alivulu alua a kasi kelimi lioku ilaika kuenda ndi kuetevo esanju omo lioku kala la vamanji kolohongele kuenda kolohongele viofeka Kelimi Lioku Ilaika yo kofeka yo ko Amerika. Omo liaco, ndi kuete esanju lialua kuenda esumũlũho lioku vumba Yehova ululiki wetu wa velapo.