MANJI DANIEL KUENDA MANJI MIRIAM vakuela kosãi Yenyenye Linene yunyamo wo 2000 kuenda va kuatele ekalo limue liwa komuenyo volupale luo Barcelona kofeka yo Espanya. Manji Daniel wa lombolola hati: “Upange wetu wa enda oku tu ecelela oku lia volonjo via posoka va landisa okulia kuapia, oku linga ovongende kuenda oku landa uwalo wa kemẽla. Tua endailevo kupange woku kunda olonjanja viosi.” Noke ovina via pongoloka.

Kohongele yimue yofeka ya lingiwa kunyamo wo 2006, manji Daniel wa yeva ohundo yimue ya kuata epulilo liokuti: “Anga hẽ tu kasi oku likolisilako oku kuatisa ‘vana va panda kolofa’ oco va kale vonjila yomuenyo ko pui?” (Olosapo 24:11) Ohundo ya lombolola okuti tu kuete ocikele coku kunda esapulo Liembimbiliya momo omanu va pondola lika oku popeliwa omo liesapulo liaco. (Ovilinga 20:26, 27) Manji Daniel ivaluka poku popia hati: “Nda kala ndu okuti Yehova wa kala oku vangula lame.” Ohundo ya lekisavo okuti tu kuata vali esanju poku likolisilako oku linga upange wa Yehova. Manji Daniel wa kũlĩhĩle okuti olondaka viaco via kala viocili momo eye wa limbuka okuti ukãi waye Miriam, wa kuata esanju lialua omo lioku kala ukundi wotembo yosi.

Ohundo yaco ya vetiya calua manji Daniel kuenda eye wa nõlapo oku linga epongoloko komuenyo waye. Eye wa sandiliya upange umue u wecelela oku litumbika kupange wakundi votembo yosi kuenje wa sokolola kesanju eye kumue lukãi waye Miriam va laikele oku kuata poku kundila kocikanjo cina okuti kuli esukila liakundi Vusoma.

Kosãi ya Kupemba yunyamo wo 2007, manji Daniel kumue lukãi waye Miriam va siapo upange wavo woku sanda eteku kuenje va ilukila ko Panama, kofeka yina va kala ale. Vocikanjo cavo mua kala ovifuka vialua vo arquipélago Bocas del Toro ko kalunga ka tukuiwa hati, Karibe. Omanu valua va kala kovifuka viaco ologuaymi. Manji Daniel kumue lukãi waye Miriam va linga esokiyo lioku kala kofeka yo Panama eci ci soka olosãi ecelãla omo liolombongo va selekele.

Ovo va enda oku tunda vovifuka va kala oco va ende kocifuka cikuavo locimbaluku kuenda o sikaleta. Handi vali, va ivalukavo onjanja yatete va linga ungende weci ci soka 30 kolokilometulu loku pita volomunda ndaño lohuya walua. Omo okuti manji Daniel wa kavele calua, nda wa ambuka. Omanu vana okuti, Ologuaymi va kuete ocituwa coku yekisa akombe capiãla enene eci manji Daniel kumue lukãi waye Miriam va lilongisa olondaka vimue vi vanguiwa vocifuka caco. Ka papitile otembo yalua, ovo veya oku kuata eci ci soka 23 komanu va kala oku lilongisa lavo Embimbiliya.

Nye ca pita eci olombongo viavo via pua? Manji Daniel wa popia hati: “Lasuẽlela alua tua kuata ocisimĩlo coku tiukila kofeka yo Espanya. Tua sumũile calua omo lioku sokolola oku siapo omanu vana tua enda oku longisa Embimbiliya.” Noke liosãi yimosi, tua tambula esapulo limue liwa. Ukãi wange Miriam wa popia hati: “Tua lalekiwa oco tu kale akundi valikasi. Tua kuata esanju lialua omo liocikele tua tambula!”

Omo liapongoloko a kasi oku lingiwa vocisoko, kunyamo wo 2015 va kisikiwa oku siapo upange wakundi valikasi. Nye va kasi oku linga cilo? Ovo va kolela kohuminyo yi sangiwa Kosamo 37:5 yokuti: “Kundika ku Yehova onjila yove. U kolela, kuenje eye o ci linga.” Ovo va sanga upange oco u va kuatise kupange wakundi votembo yosi kuenje cilo va kasi vekongelo limue volupale luo Veraguas kofeka yo Panama.

Manji Daniel wa popia hati: “Osimbu ka tua tundile kofeka yo Espanya ka tua kuatele ocisimĩlo cokuti eteke limue tu ka ambata omuenyo wa leluka. Cilo tu kasi oku ambata omuenyo waco kuenda lalimue eteke tua kambelele cimue.” Nye ca siata oku va nenela esanju? Ovo va popia vati: “Oku kuatisa ambombe oco va kũlĩhe eci catiamẽla ku Yehova, cinena esanju lialua!”