1, 2. (a) Komanu vapi olondaka via Yesu vi sangiwa kelivulu lia Mateo 24:12 via tiamisiwila tete? (b) Elivulu Liovilinga li lekisa ndati okuti Akristão vo kocita catete va kuatele ocisola ca pama? (Tala ociluvialuvia kefetikilo liocipama cilo.)

ECI Yesu a kala palo posi, wa lombolola ndomo omanu va laikele oku limbuka ‘esulilo liovina vi kasi voluali.’ Pokati kovina viaco eye wa popia hati: “Ocisola comanu valua ci pola.” (Mateo 24:3, 12) Va Yudea vo kocita catete va enda oku litenda okuti va kala afendeli va Suku pole, va ecelela okuti ocisola va kuetela Suku ci pola.

² Pole, Akristão valua vo koloneke viaco va kuatele ovituwa via litepa. Ovo va kuatele ombili yoku kunda “olondaka viwa viatiamẽla ku Kristu,” va kuatelavo ocisola Suku, lakristão vakuavo kuenda omanu vana handi ka va kũlĩhĩle ocili Covisonehua. Akristão vaco va amamako oku pamisa ocisola va kuatela Suku. (Ovilinga 2:44-47; 5:42) Ci sumuisa calua omo okuti Akristão vamue vo kocita catete va polisa ocisola va kuatele. Tua ci kũlĩha ndati?

3. Nye ca siata oku polisa ocisola Cakristão vamue?

 ³ Yesu wa sapuila Akristão vo kocita catete va kala ko Efeso hati: “Ocisola wa kuatele tete wa ci yanduluka.” (Esituluilo 2:4) Ca kala ndu okuti Akristão vo ko Efeso, va yapuisiwa lomanu vana va lisunguile lavo okuti va yonguile oku lisanjuisa ovo muẽle. (Va Efeso 2:2, 3) O Efeso lua kala olupale lumue okuti omanu va tiamisilile lika utima wavo kekalo liwa, kovokuasi kuenda kovina vikuavo. Omanu valua vo ko Efeso va enda oku linga ovina via vĩha kuenda ka va lekisile esumbilo Kovihandeleko via Suku. Ovo va enda oku lisanjuisa ovo muẽle okuti oku lekisa ocisola cocili ku Suku kuenda komanu vakuavo ci sule.

4. (a) Ocisola ca siata oku pola ndati koloneke vilo? (b) Kovina vipi vitatu tu pondola oku pamisa ocisola cetu?

⁴ Olondaka via Yesu viatiamẽla kocisola ci kasi oku pola, vi tiamisiwilavo koloneke vilo. Omanu vamue koloneke vilo, ka va siatele oku lekisa ocisola ku Suku. Oco va tetulule ovitangi violuali ovo ka va sandiliya ekuatiso lia Suku pole, va siata oku sandiliya ekuatiso kovisoko viomanu. Ocisola cavo ci kasi oku amamako oku pola. Ndaño muẽle ocisola cafendeli va Yehova ci pondola oku pola ndeci ca lipita kosimbu vekongelo lio ko Efeso. Tu konomuisi ovina vitatu vi pondola oku tu kuatisa oku amamako oku pamisa ocisola cetu ndeci: (1) ocisola tu kuetele Yehova, (2) ocisola tu kuete kocili Cembimbiliya, kuenda (3) Ocisola tu kuetele vamanjetu.

5. Momo lie tu sukilila oku sola Suku?

⁵ Helie tu sukila oku sola vali calua? Yesu wa popia hati: “‘Sola Yehova Suku yove lutima wove wosi, lomuenyo wove wosi kuenda lolondunge viove viosi.’ Eci oco ocihandeleko catete haico ca velapo.” (Mateo 22:37, 38) Ocisola tu kuetele Suku ci pondola oku tu kuatisa oku pokola kovihandeleko viaye, oku pandikisa kuenda oku suvuka evĩho. (Tanga Osamo 97:10.) Pole, Satana kumue loluali luaye va siata oku sandiliya oku tepulula kuenda oku nyõla ocisola tu kuetele Suku.

6. Nye ci pondola oku pita lomanu vana va liwekapo oku sola Suku?

⁶ Omanu voluali va kuete ovisimĩlo ka via sungulukile viatiamẽla kocisola. Omanu valua ka va siatele oku lekisa ocisola ku Suku pole, “va linga vakuakulisola ovo muẽle.” (2 Timoteo 3:2) Va tiamisila ovitima viavo, ‘koloñeyi vietimba, oloñeyi viovaso, oku litunila ovina viomuenyo.’ (1 Yoano 2:16) Upostolo Paulu wa eca elungulo liatiamẽla kohele iyilila koku li sola etu muẽle. Eye wa popia hati: “Oku tiamisila utima ketimba ci lomboloka oku fa.” Momo lie? Momo omunu wosi o tiamisila utima waye kovina evi, o linga unyãli wa Suku. (Va Roma 8:6, 7) Omanu vana va tiamisila ovitima viavo koku sanda olombongo vialua ale oku tiamisila ovitima kolonjongole viavo vioku linga evĩho liukahonga, va siata oku liyaka lesumuo lialua.—1 Va Korindo 6:18; 1 Timoteo 6:9, 10.

7. Ovituwa vipi ka via sungulukile Akristão va pondola oku yapuisiwa lavio koloneke vilo?

⁷ Omanu vana ka va tava okuti kuli Suku lomanu vana ka va kolela kokuaye kuenda vana va tava okuti ovina via tukuluka ño, va siata oku vetiya omanu vakuavo oku yuvula oku kuatela ocisola Suku loku va vetiya oku tava okuti ka kuli Suku. Ovo va siatavo oku vetiya omanu oku tava okuti, omanu aveke kuenda vana ka va tangele ovo lika va tava  okuti kuli Ululiki. Handi vali, omanu valua va siata oku lekisa esumbilo kolonoño okuti Kululiki ci sule. (Va Roma 1:25) Ndaño muẽle Akristão vocili va pondolavo oku vetiyiwa lovisimĩlo viaco. Nda tua kuata ovisimĩlo viaco, ukamba wetu la Yehova u pondola oku tepuluka kuenda ocisola cetu ci pondolavo oku pola.—Va Heveru 3:12.

8. (a) Ovitangi vipi vi pondola oku sumuisa afendeli va Yehova? (b) Osamo 136 yi pondola oku tu lembeleka ndati?

⁸ Omo okuti tu kasi voluali lũvi lua Satana, olonjanja vimue tu pondola oku yeva esumuo. (1 Yoano 5:19) Pole, nda tua sumua calua ekolelo lietu kuenda ocisola tu kuetele Suku ci pondola oku pola. Citava okuti, tu liyaka lovitangi vimue ndeci: Oku kuka, oku vela kuenda ekambo liolombongo. Tu pondolavo oku kuata esumuo omo okuti ka tu tẽla oku linga ovina vimue tu yongola. Handi vali, tu pondola oku sumua nda ovina tu yongola ka via lingiwile ndomo tua kala oku lavoka. Ndaño lovitangi viaco, lalimue eteke ka tu ka kuati ocisimĩlo cokuti Yehova wa tu yanduluka. Sokolola olondaka vi lembeleka vi sangiwa Kosamo 136:23 viokuti: “Wa tu ivaluka kukukui wetu, momo ohenda yaye ka yi pui.” Tu ivaluki okuti Yehova o yevelela ‘alombelo etu’ loku a tambulula.—Osamo 116:1; 136:24-26.

9. Nye ca kuatisa Paulu oku amamako oku pamisa ocisola caye ku Suku?

⁹ Upostolo Paulu wa kala ufendeli umue wa Suku wa sokolola lutate ndomo Yehova Suku o kuatisa kuenda ndomo o pamisa. Eye wa soneha ndoco: “Yehova oñuatisi yange; si kuata usumba. Omunu hẽ o ndinga nye?” (Va Heveru 13:6) Ekolelo Paulu a kuatela Yehova lio kuatisa oku liyaka lovitangi viomuenyo. Eci Paulu a liyaka lovitangi, ka liwekelepo oku kolela ku Yehova. Ndaño ceci a kala vokayike, eye wa vetiya Akristão vakuavo, poku va sonehela ovikanda kakongelo. (Va Efeso 4:1; Va Filipoi 1:7; Filemone 1) Ndaño lovitangi vialua Paulu a liyaka lavio, eye wa amamako oku pamisa ukamba waye la Yehova. Eye wa kolelele ku “Suku yelembeleko liosi, una o tu lembeleka kohali yetu yosi.” (2 Va Korindo 1:3, 4) Tu pondola oku setukula ndati Paulu?

10. Tu pondola oku amamako ndati oku pamisa ocisola tu kuetele Yehova?

 ¹⁰ Paulu wa lombolola onjila yimue yi pondola oku tu kuatisa oku amamako oku pamisa ocisola tu kuetele Yehova poku popia hati: “Likutilili olonjanja viosi.” Noke wa amisako loku popia hati: “Pandikisi lolohutililo.” (1 Va Tesalonike 5:17; Va Roma 12:12) Momo lie olohutililo vi tu kuatisila oku kuata ukamba la Suku? Momo eci tu likutilila tu sapela la Yehova. Poku ci linga, ci tu ĩha epuluvi lioku kuata ukamba laye. (Osamo 86:3) Handi vali, eci tu lombolola ku Isietu wokilu catiamẽla kovisimĩlo vietu, ci pamisa ukamba wetu laye. (Osamo 65:2) Ocisola cetu ku Yehova ci livokiyavo eci tu limbuka okuti eye wa tambulula olohutililo vietu. Tua kolela okuti “Yehova o kasi ocipepi la vosi vo vilikiya.” (Osamo 145:18) Ekolelo tu kuetele ocisola ca Yehova kuenda ekuatiso a siata oku eca kokuetu, vi ka tu kuatisa oku liyaka lovitangi vio koloneke vilo kuenda vio kovaso yoloneke.

11, 12. Tu pondola oku vokiya ndati ocisola cetu kocili Cembimbiliya?

¹¹ Omo okuti Tuakristão vocili, tu kuetele ocisola ocili Cembimbiliya. Tu pondola oku sanga ocili Vondaka ya Suku. Yesu wa popia ku Isiaye hati: “Ondaka yove oyo ocili.” (Yoano 17:17) Oco tu sole ocili, tu sukila oku kũlĩha ovina vi sangiwa Vembimbiliya. (Va Kolosai 1:10) Pole kuli ovina vikuavo tu sukila oku linga. Limbuka ndomo usonehi Wosamo 119 a tu kuatisa oku kuata elomboloko liovina tu sukila oku linga. (Tanga Osamo 119:97-100.) Vokuenda kueteke tu sukila oku sokolola lutate ovina tua tanga Vembimbiliya. Nda tua ci linga, tu ka sokolola ndomo tu kuatisiwa poku kapako ocili Cembimbiliya komuenyo wetu kuenda ocisola cetu kokualio ci ka livokiya.

¹² Ukualosamo wa popia hati: “Olondaka viove vi sõsa cimue kelimi liange, vomela yange owiki u sule!” (Osamo 119:103) A livulu a siata oku pangiwa lekuatiso Liembimbiliya okuti a siata oku pongiyiwa locisoko ca Suku, ci sokisiwa lokulia kumue ku pepa. Nda tu lia okulia kumue tu sole calua, tu sokiya otembo yoku ci linga lesanju. Cimuamue haico okuti, tu sukilavo oku sokiya otembo yoku lilongisa. Noke tu ka sanjukila “olondaka via sunguluka” viocili Cembimbiliya kuenda ci ka leluka oku ivaluka ovina tua tanga loku kuatisa lavio omanu vakuavo.—Ukundi 12:10.

13. Nye ca kuatisa Yeremiya oku sola olondaka via Suku? Oku ci linga co kuatisa ndati?

¹³ Uprofeto Yeremiya wa solele olondaka via Suku. Eye wa popia hati: “Olondaka viove via sangiwa kuenje nda vi lia. Olondaka viove via linga onjolela yange, havio esanju liutima wange. Momo nda tukuiwa londuko yove, a Yehova, a Suku yolohoka.” (Yeremiya 15:16) Yeremiya wa enda oku sokolola lutate kovina viwa viondaka ya Suku kuenda wa solele calua ovina viaco. Eye wa endavo oku sanjukila ocikele caye coku kala onumiwa ya Yehova kuenda oku kunda esapulo Yehova a ecele kokuaye. Nda tu sole ocili Cembimbiliya, tu ka limbuka okuti esumũlũho limue lilikasi oku kala Ombangi ya Yehova oco tu kunde eci catiamẽla Kusoma koloneke vilo via sulako.

14. Nye vali ci pondola oku tu kuatisa oco tu vokiye ocisola cetu kocili Cembimbiliya?

¹⁴ Nye vali ci pondola oku tu kuatisa oco tu vokiye ocisola cetu kocili Cembimbiliya?  Tu sukila oku endaenda kolohongele olonjanja viosi, kuna tua siata oku longisiwa la Yehova. Elilongiso Liembimbiliya li lingiwa olosemana viosi lekuatiso Liutala Wondavululi, yimue pokati kolonjila via velapo tua siata oku longisiwa. Nda tu yongola oku upa esilivilo kolohongele viaco, olonjanja viosi tu sukila oku lipongiya ciwa. Tu pondola oku ci linga, poku tanga ovinimbu viosi Viembimbiliya via tukuiwa vocipama caco. Koloneke vilo, omanu valua va pondola oku tanga ale oku tapa Utala Wondavululi vonumbi yetu yo internet. Momo owo wa sandekiwa kalimi alua vonumbi yetu yo internet jw.org kuenda vo aplicativo JW Library. Volomakina vimue ci leluka oku sanga ovinimbu Viembimbiliya lonjanga. Pole, eci tu tanga ovipama viosi, loku tanga lutate ovinimbu Viembimbiliya kuenda oku sokolola kovina viaco, ocisola cetu kocili Cembimbiliya ci ka livokiya.—Tanga Osamo 1:2.

15, 16. (a) Ndomo ca lekisiwa kelivulu lia Yoano 13:34, 35, ocihandeleko cipi Yesu a eca? (b) Ocisola tu kuetele Suku kuenda Embimbiliya ci kuete elitokeko lipi locisola tu kuetele vamanji?

¹⁵ Yesu kuteke wa sulako womuenyo waye palo posi, wa sapuila olondonge viaye hati: “Ndu wĩhi ocihandeleko cokaliye, okuti vu lisola pokati; ndeci ame ndo soli, ene lisolivo pokati. Poku ci linga, vosi va limbuka okuti vulondonge viange nda wa lisoli pokati.”—Yoano 13:34, 35.

¹⁶ Ocisola tu kuetele vamanjetu ci kuete elitokeko locisola tu kuetele Yehova. Nda ka tua solele Yehova Suku ka tu ka solavo vamanjetu. Handi vali, nda ka tua solele vamanjetu ka tu ka solavo Yehova Suku. Upostolo Yoano wa soneha ndoco: “Una ka sole manjaye a lete, ka pondola oku sola Suku una ka lete.” (1 Yoano 4:20) Ocisola tu kuetele Yehova kuenda ocisola tu kuetele vamanjetu ci kuetevo elitokeko locisola tu kuetele Embimbiliya. Momo lie? Momo nda tua  sola ovina tua lilongisa Vembimbiliya tu ka lekisa onjongole yoku pokola kolonumbi tu sangamo oco tu lekise ocisola ku Yehova kuenda ku vamanjetu.—1 Petulu 1:22; 1 Yoano 4:21.

17. Vipi olonjila vimue tu pondola oku lekisa ocisola?

¹⁷ Tanga 1 Va Tesalonike 4:9, 10. Volonjila vipi tu pondola oku lekisa ocisola komanu vana tu kasi lavo vekongelo? Citava okuti, manji umue wa kuka o sukila ekuatiso oco ande kolohongele. Handi vali, manji umue ocimbumba citava okuti o sukila ekuatiso lioku semulula ocina cimue konjo yaye. (Tiago 1:27) Vamanji vana va sumua ale vana va kasi oku liyaka lovitangi vikuavo, tu sukila oku va kapako, oku va vetiya kuenda oku va lembeleka. (Olosapo 12:25; Va Kolosai 4:11) Tu lekisa okuti tu kuetele ocisola “vamanjetu vekolelo” omo liolondaka kuenda ovilinga vietu.—Va Galatia 6:10.

18. Nye ci ka tu kuatisa oku tetulula ovitangi la vamanjetu?

¹⁸ Embimbiliya li lekisa okuti “koloneke via sulako” violuali lulo lua vĩha, omanu valua va laikele oku kala vakuepela kuenda vakuacipululu. (2 Timoteo 3:1, 2) Omo okuti Tuakristão vocili, tu sukila oku amamako oku pamisa ocisola tu kuetele Yehova, Ondaka yaye kuenda oku lisola pokati. Ocili okuti ka tua lipuile, eli olio esunga lieci okuti olonjanja vimue tu ka kuata ovitangi la vamanji vakuavo. Pole, ocisola tu likuetele pokati, ci tu kuatisa oku tetulula ovitangi lonjanga kuenda lonjila yimue ya sunguluka. (Va Efeso 4:32; Va Kolosai 3:14) Ka tu ka eceleli okuti ocisola cetu ci pola. Omo liaco, tu amamiko oku kuatela ocisola Yehova, Ondaka yaye kuenda oku sola vamanjetu.