Yesu kumue lolondonge viaye va enda oku popiwa lãvi lovanyãli vavo omo liocitangi caco. Ocihandeleko ca eciwile ku Mose, ca lomboluile eci ci pondola oku vihĩsa omunu. Pokati kovina viaco, mua kongela ovina vimue ndeci: Ombuto yo ku cita yi tunda kocimatamata culume poku pekela, ukãi nda o kasi kocituwa caye, omunu okuete uvei wovilundu kuenda oku lamba omunu ale ocinyama ca fa. Ocihandeleko ca ecelevo olonumbi ndomo omunu a ponduile oku li yelisa vali. Voku liyelisa kuaco mua kongelele oku eca ocilumba, ale oku lisukula.—Ovisila ocipama 11 toke 15; Atendelo ocipama 19.

Asongui va va Yudea va enda oku piñanya ovihandeleko loviholo viavo muẽle. Elivulu limue lia lombolola okuti, ovo va kapa oviholo viavo kovihandeleko vina via eciwile viatiamẽla kueci ci pondola oku vihĩsa omunu kuenda ndomo omunu waco a ponduile oku sambuisa omunu ukuavo kuenda eci a sukila oku linga oco a yelisiwe vali. Handi vali, ovo va tumbika ovihandeleko viavo viatiamẽla kovina vimue okuti via vihĩsiwa. Va tumbikavo oviholo viavo kovina omanu va sukila oku linga oco va yelisiwe vali.

Ovanyãli va Yesu vo pulisa hati: “Momo lie olondonge viove ka vi pokuila koviholo violosekulu, puãi va lia lovoko a vĩhisua?” (Marko 7:5) Ovo ka va kaile oku tiamĩsila ondaka yaco koku liyelisa ale oku lisukula povaka osimbu omunu ka lile. Pole, ovo va kala oku tiamĩsila ondaka yaco kociholo va tumbikile catiamẽla konjila ndomo omunu a ponduile oku pesela ovava povaka osimbu ka lile. Elivulu lia tukuiwa ale vocipama cilo, li lombololavo okuti, asongui va va Yudea va enda oku sapela catiamẽla “kocikuata omunu a sukilile oku upa laco ovava oco a pesele laco povaka omunu. Va endavo oku sapela kovava a sukiliwa, komunu wa ponduile oku pesela ovava aco kuenda onepa yovaka omunu a ponduile oku lisukula.”

Nye Yesu a sima catiamẽla kovihandeleko via tumbikiwa lomanu? Eye wa sapuila a songui vetavo liava Yudea poku popia hati: “A vakuambambe, Isaya wa imba owanji watiamẽla kokuene, ndomo ca sonehiwa citi, ‘Omanu ava va ndi sumbila ño lovimela, pole, ovitima viavo vi kasi ocipãla lame [ndi Yehova]. Ovo va ndi fendela ño olivova, momo va longisa ovisila viomanu.’ Ka wa kapeliko ovihandeleko via Suku, wa kakateli ño kovihilahila viomanu.”—Marko 7:6-8