1, 2. (a) Olondaka vi sangiwa kelivulu lia Isaya 60:22 vi kasi oku tẽlisiwa ndati koloneke vilo via sulako? (b) Esukila lipi li sangiwa vocisoko ca Yehova palo posi?

“U O SULE o linga epata, lu utito o linga ofeka ya pama.” (Isaya 60:22) Olondaka evi vi kasi oku tẽlisiwa koloneke vilo via sulako. Vokuenda kunyamo wo 2015, voluali luosi mua kala eci ci soka 8.220.105 kafendeli va Suku vana va kundila olondaka viwa viusoma voluali luosi! Yehova Suku wa popia eci catiamẽla koku livokiya kuafendeli vaye hati: “Ame ndi Yehova ndi ci yayuisa kotembo yaco.” Osimbu esulilo li kasi ocipepi, vosi yetu tu ka kuata upange walua. Tu kasi hẽ oku likolisilako cilo oku linga ovina tu tẽla oco tu kunde kuenda oku longisa olondaka viwa? Vamanji valua va kasi ale oku talavaya kupange wakundi votembo yosi ale wakundi va sokamo. Vamanji vamue va siata oku ilukila kocitumãlo cikuavo oco va kuatise kupange woku kunda kuenda vamanji vakuavo va kasi oku talavaya calua kupange woku tunga Olonjango Viusoma.

² Unyamo lunyamo kua siata oku tumbikiwa eci ci soka 2.000 kakongelo okaliye. Akongelo aco a sukila akulu vekongelo  kuenda oloñuatisi viekongelo. Unyamo lunyamo oloñuatisi vialua viekongelo via siata oku likolisilako oco vi linge akulu vekongelo kuenda vamaji vakuavo va sukila oku likolisilako oku kala oloñuatisi viekongelo. Ocili okuti kuli ovina vialua tu sukila oku ‘linga kupange wa Ñala’ kuenda ovina viaco ka vi lingiwa lika la vamanji alume, pole, vi lingiwavo la vamanji akãi.—1 Va Korindo 15:58.

3, 4. Oku pamisa ekolelo ci lomboloka nye kokuove?

³ Tanga 1 Timoteo 3:1. Upostolo Paulu wa vetiya vamanji va kala oku “sanda” ocikele coku kala olomitavaso. Omunu o yongola oku sandiliya ocina cimue ci kasi ocipãla, o sukila oku likolisilako kuenda oku olõla eka liaye oco a kuate ocina caco. Kaliye sokolola eci catiamẽla kumanji umue o yongola oku kala oñuatisi yekongelo. Eye o limbuka okuti o sukila oku likolisilako oku mioñolola ovituwa viaye. Eci a fetika oku talavaya ndoñuatisi yekongelo o sukila oku amamako oku talavaya calua oco a linge ukulu wekongelo.

⁴ Vamanji vamue va kasi oku linga apongoloko komuenyo wavo momo va yongola oku amamako oku vokiya otembo yavo kupange wa Yehova. Vamanji vamue citava okuti va yongola oku kala akundi votembo yosi, oku talavaya ko Betele ale oku kuatisa kupange woku tunga Olonjango Viusoma. Tu konomuisi ndomo Embimbiliya li pondola oku tu kuatisa oku pamisa ekolelo Lietu.

5. Amalẽhe va pondola oku talavaya ndati longusu yavo kupange Wusoma?

⁵ Vamanji amalẽhe va pondola oku talavaya calua kupange wa Yehova momo va pama kuenda va kuete uhayele walua. (Tanga Olosapo 20:29.) Vamanji vamue amalẽhe ko Betele va kuatisa koku panga alivulu kuenda Ambimbiliya. Vamanji vakuavo va siata oku tunga Olonjango Viusoma ale oku kuatisa koku vi semulula. Vamanji vamue okuti va lieca olumue, va siata oku kuatisa eci ku pita ocilunga cimue. Akundi valua votembo yosi okuti amalẽhe, va siata oku lilongisa elimi likuavo ale oku ilukila kocitumãlo cikuavo oco va kunde olondaka viwa.

6-8. (a) Manji umue umalẽhe wa pongolola ndati ocisimĩlo caye catiamẽla kupange wa Yehova Suku kuenda onima yipi a kuata? (b) Tu pondola oku ‘seteka ndati oco tu limbuke okuti Yehova uwa’?

⁶ Omo okuti tu sole Yehova, tu yongola oku eca ovina via velapo kokuaye. Citava okuti, tu pondolavo oku kuata ovisimĩlo ndevi via manji umue o tukuiwa hati, Aaron. Eye wa yonguile oku kuata esanju poku vumba Yehova, pole, ka kuatele esanju liaco. Ndaño okuti manji Aaron wa endaenda kolohongele kuenda kupange woku kunda eci a kala umalẽhe, pole, wa popia hati: “Nda enda oku tenda olohongele kuenda upange woku kunda ndocina cimue ci kavisa.” Nye eye a linga?

⁷ Manji Aaron wa likolisilako oku tanga Embimbiliya olonjanja viosi, oku pongiya olohongele kuenda oku eca atambululo. Eye wa fetikavo oku likutilila olonjanja viosi. Ovina viaco, vio kuatisa oku pamisa ekolelo liaye, kuenje co vetiya oku kũlĩha ciwa Yehova loku lekisa ocisola calua kokuaye. Omo lioku ci linga manji Aaron wa yeva esanju lialua. Eye wa litumbika kupange wakundi votembo yosi, wa kuatisa vamanji vakuavo eci kua pita ocilunga cimue kuenda wa ilukila kofeka yikuavo oco a kunde olondaka viwa. Cilo eye ukulu wekongelo kuenda o kasi oku talavaya ko Betele. Esanju lipi manji Aaron a kuete omo lioku nõla omuenyo waco? Eye wa popia hati: “Nda  siata oku ‘limbuka okuti Yehova uwa.’ Nda siata oku sima okuti ndi kuetele ofuka Yehova omo liasumũlũho nda tambula kokuaye kuenje ci ndi vetiya oku amamako oku linga upange waye, poku ci linga ci nena asumũlũho alua.”

⁸ Ukualosamo wa popia hati: “Seteki oco vu limbuke okuti Yehova [uwa].” Eye wamisako hati: ‘Ava puãi va sanda Yehova lacimue ciwa va suka.’ (Tanga Osamo 34:8-10.) Eci tu eca ovina via velapo ku Yehova, tu kuata esanju liocili momo tua kũlĩha okuti tu kasi oku u sanjuisa. Kuenje eye o ka amamako oku tẽlisa ohuminyo yaye yoku tu tata.

9, 10. Momo lie oku kuata “ocituwa coku talamẽla” ci kuetele esilivilo kokuove?

⁹ Citava okuti tu yongola oku talavaya calua kupange wa Yehova. Pole, nye tu sukila oku linga nda tu kasi oku kevelela vokuenda kuotembo yalua oku tambula ocikele cimue vekongelo ale epongoloko liekalo liomuenyo wetu? Tu sukila oku kuata epandi. (Mika 7:7) Ndaño okuti Yehova ecelela okuti ocitangi tu kasi oku liyaka laco camamako, pole, tu pondola oku kuata ekolelo liokuti eye olonjanja viosi o tu kuatisa. Tu pondolavo oku lilongisila kongangu ya Avirahama. Yehova wa likuminyile kokuaye okuti wa laikele oku cita omõla, pole, osimbu Isake ka citiwile eye wa sukilile oku kevelela vokuenda kuanyamo alua. Vokuenda kuotembo yaco, Avirahama wa kuata epandi kuenda ka liwekelepo oku kolela ku Yehova.—Efetikilo 15:3, 4; 21:5; Va Heveru 6:12-15.

¹⁰ Ocili okuti ka ca lelukile oku kevelela. (Olosapo 13:12) Pole, nda tua amamako oku tiamisila lika utima kovitangi tu liyaka lavio tu sumua calua. Tu pondola oku talavaya ciwa lotembo yetu poku mioñolola ovituwa tu sukila oco tu tẽlise ciwa ovikele vietu vekongelo.

11. Ovituwa vipi tu sukila oku kuata, kuenda momo lie ci kuetele esilivilo?

¹¹ Kuata ovituwa viwa kuenda uloño. Nda o tanga Embimbiliya loku sokolola ovina wa tanga, o pondola oku lilongisa oku kala ukualondunge okuti, ci ku kuatisa oku sokolola ciwa kuenda oku nõla onjila ya sunguluka. Vamanji va sukila oku kuata ovituwa viwa kuenda uloño oco va songuile ekongelo. (Olosapo 1:1-4; Tito 1:7-9) Eci tu lilongisa Embimbiliya tu pondola oku limbuka ovisimĩlo via Yehova viatiamẽla kovina vialua. Omo liaco, olonjanja viosi tu sukila oku sokolola ovina tua lilongisa oco vi tu kuatise oku nõla onjila ya sunguluka yi sanjuisa Yehova. Tu pondolavo oku kũlĩha ndomo tu tata omanu vakuavo, tu talavaya lolombongo, tu nõla olomapalo kuenda ndomo tu nõla uwalo wetu.

12. Vamanji vekongelo va pondola oku lekisa ndati okuti va koleliwa?

¹² Likolisilako oku tẽlisa ocikele wa tambula. Eci afendeli va Suku va kala oku tumbulula onembele, Nehemiya wa sukilile alume oco va tẽlise ovikele vialua. Eye wa nõla omanu vana va kuatele ovituwa viwa. Nehemiya wa kũlĩhĩle okuti alume vaco, va sole  Suku kuenda wa kũlĩhĩlevo okuti va laikele oku talavaya calua oco va tẽlise upange va tambula. (Nehemiya 7:2; 13:12, 13) Cimuamue haico ca siata oku lingiwa koloneke vilo okuti, vamanji vana vakuekolelo haivo va talavaya calua, va kuete ovituwa viwa kuenda va sukila oku tambula ovikele vialua. (1 Va Korindo 4:2) Cikale okuti tuamanji alume ale akãi, olonjanja viosi tu sukila oku likolisilako oku tẽlisa ciwa upange tua tambula.—Tanga 1 Timoteo 5:25.

13. O pondola oku kuama ndati ongangu ya Yosefe eci omanu vakuavo va ku tata lãvi?

¹³ Kolela Yehova. Nye o sukila oku linga nda omanu vakuavo va ku tata lãvi? O sukila oku va lomboluila ndomo ovina viaco via ku sumuisa. Pole, nda wamamako oku liteyuila loku lisandela esunga o pondola oku vokiya ovitangi. Tu pondola oku lilongisa ovina vialua kulandu wa Yosefe. Vamanjaye vo tata lãvi. Omanu va popia ovina viuhembi viatiamẽla kokuaye kuenda wa kapiwa vokayike omo liocina cimue ka lingile. Pole, Yosefe wa kolelele Yehova. Eye wa tiamisilile utima kolohuminyo via Yehova kuenje wamamako lekolelo. (Osamo 105:19) Poku liyaka lovitangi viaco, Yosefe wa lilongisa oku kuata ovituwa viwa vio kuatisa eci a tambula ocikele cimue ci kuete esilivilo lia velapo. (Efetikilo 41:37-44; 45:4-8) Nda wa siata oku tatiwa lãvi lomanu vamue, likutilila ku Yehova oco a ku ĩhe olondunge. Eye o ka ku kuatisa oku tula utima kuenda oku tata ciwa omanu vaco eci o sapela lavo.—Tanga 1 Petulu 5:10.

14, 15. (a) Momo lie tu sukilila oku ‘lilava etu muẽle’ konjila ndomo tu kunda? (b) Omo okuti ekalo lia siata oku pongoloka olonjila vipi o pondola oku seteka kupange woku kunda? (Tala elitalatu kefetikilo liocipama cilo kuenda okakasia losapi hati: “O yongola hẽ oku seteka olonjila vikuavo kupange woku kunda?”)

¹⁴ Paulu wa sapuila Timoteo oco amameko oku mioñolola onjila yaye yoku lombolola Ovisonehua. Eye wa popia hati: “Lilava ove muẽle, lavavo oku longisa kuove.” (1 Timoteo 4:13, 16) Timoteo wa litumbikile ale kupange woku kunda vokuenda kuanyamo alua. Oco hẽ momo lie a sukilile oku mioñoloha? Timoteo wa kũlĩhĩle okuti omanu, ale ekalo liomuenyo li pongoloka. Eye wa yonguile okuti omanu vamamako oku u yevelela. Omo liaco, wa sukilile oku amamako oku mioñoloha kuenda oku pongolola ovisimĩlo viaye. Omo okuti koloneke vilo tua siatavo oku kunda, tu sukilavo oku kuama ongangu ya Timoteo.

¹⁵ Kovitumãlo vimue eci tu kunda konjo lanjo, ka tua siatele oku sanga omanu valua. Kovitumãlo vikuavo citava okuti omanu vaco va sangiwa kolonjo viavo, pole, ka ci tava oku totola kapito momo ka tu pondola oku iñila volonjo viavo. Nda ovina viaco via siatavo oku pita vocikanjo cove, anga hẽ o pondola oku seteka onjila yikuavo yoku sanga omanu?

16. Upange woku kunda volokololo u pondola oku kuata onima yipi?

¹⁶ Vamanji valua va siata oku sanjukila oku kundila volokololo. Ovo va siata oku kundila kovitumãlo viomboyo, viakãlu, povitanda kuenda povitumãlo viovitalukilo oco va sange omanu. Manji umue citava okuti o fetika ombangulo lomunu umue poku sapela eci catiamẽla kesapulo liokaliye. Handi vali o pondola oku popia ovina viwa viatiamẽla komãla vomunu waco, ale oku linga epulilo limue liatiamẽla kupange waye. Nda omunu wa sola ombangulo yaco, ukundi o sukila oku lombolola ocinimbu cimue ci sangiwa Vembimbiliya kuenda oku pula eci omunu a sima catiamẽla kondaka yaco. Olonjanja vialua omanu va sole oku kũlĩha ovina vialua viatiamẽla Kembimbiliya.

17, 18. (a) Nye ci pondola oku ku kuatisa oco o kundile volokololo? (b) Eci o kasi kupange woku kunda o limbuka ndati okuti ocituwa ca Daviti coku sivaya Yehova ci kuete esilivilo lia velapo?

¹⁷ Citava okuti ka ci leluka kokuove oku fetika ombangulo eci o kundila volokololo mu sangiwa omanu vana okuti kuava kũlĩhĩle. Ukundi umue wotembo yosi wo ko lupale luo Nova Yorke o tukuiwa hati, Eddie, wa kuatavo ovitangi viaco. Pole, eye wa sanga ocina cimue co kuatisa oku kuata utõi. Eye wa popia hati: “Vokuenda kuefendelo liepata ame kumue lukãi wange, tu linga akonomuiso oco tu sange atambululo kapulilo omanu va siata oku linga kuenda ovisimĩlo ovo va kuete. Etu tua siatavo oku pulisa ku vamanji vakuavo catiamẽla kovisimĩlo viaco.” Cilo manji Eddie wa siata oku sanjukila oku kundila volokololo.

¹⁸ Eci tu sanjukila upange wetu woku kunda loku mioñolola onjila yetu yoku sapela lomanu catiamẽla kolondaka viwa, omanu vakuavo va ka limbuka okuti tua pamisa ekolelo lietu. (Tanga 1 Timoteo 4:15.) Nda tua ci linga tu pondola oku kuatisa omunu umue oco a linge ufendeli wa Yehova. Daviti wa popia hati: “Mandula Yehova oloneke viosi. Ñala ño-o hũ lesivayo liaye vomẽla. Utima wange u litambelela Yehova. Olohukũi vi yevako kuenje vi yolela.”—Osamo 34:1, 2.

19. Momo lie ufendeli wa Yehova a sukilila oku kuata esanju ndaño lovitangi?

¹⁹ Daviti wa popiavo hati: “Oviluvo viove  viosi vi ku pandula, a Yehova. Olosandu viove vi ku pandiya. Va vangula ulamba wuviali wove, loku sapula unene wove, okuti va limbukisa omãla vomanu ovilinga viunene wove, lulamba weposo liuviali wove.” (Osamo 145:10-12) Omanu vosi va sole Yehova okuti vakuacili, va kuete onjongole yoku sapuila komanu vakuavo catiamẽla kokuaye. Pole, nye o sukila oku linga nda omo liuvei ale oku kuka ku pondola oku talavaya calua kupange woku kunda konjo lanjo? Olonjanja viosi eci o sapuila komanu va kasi ocipepi love catiamẽla ku Yehova ndeci, kovifumelu ale kolondotolo, o sukila oku ivaluka okuti o kasi oku lekisa esivayo ku Yehova. Nda o kasi vokayike omo liekolelo liove, citava okuti ci ku ecelela oku sapela lomanu vakuavo catiamẽla kocili Cembimbiliya kuenje poku ci linga ci sanjuisa utima wa Yehova. (Olosapo 27:11) Yehova o sanjuka calua nda o likolisilako oku u vumba ndaño okuti omanu vakuavo vepata liove ka va kasi oku ci linga. (1 Petulu 3:1-4) Ndaño okuti o kasi oku liyaka lovitangi vialua, pole, o pondola oku sivaya Yehova, oku linga ukamba laye kuenda oku amamako oku pamisa ekolelo liove.

20, 21. Nda o kuete ocikele vocisoko ca Yehova, o pondola oku kuatisa ndati vamanji vakuavo?

²⁰ Nda wa amamako oku kala ekamba lia Yehova loku likolisilako oku linga ovina o tẽla oco u fendele, eye o ku sumũlũisa. Citava okuti poku linga apongoloko kekalo liomuenyo wove, o ka kuata epuluvi lioku kuatisa omanu, oco va lilongise olohuminyo vi komõhisa via Yehova Suku. O sukilavo oku kuatisa vamanji olonjanja viosi. Eci vamanji va limbuka upange wove uwa o kasi oku linga vekongelo, ocisola cavo kokuove ci ka livokiya!

²¹ Ndaño okuti tu kasi oku vumba Yehova vokuenda kuotembo yalua, vosi yetu tu sukila oku amamako oku kuata ukamba la Yehova kuenda oku pamisa ekolelo lietu. Vocipama cikuãimo tu ka lilongisa ndomo tu pondola oku kuatisa vamanji vakuavo oku pamisa ekolelo liavo.