1, 2. Momo lie ci kuetele esilivilo oku pindisa vamanji vakuavo?

YESU wa talavaya calua poku kunda olondaka viwa Viusoma. Eye wa likolisilako calua poku pindisa olondonge viaye. Yesu wa lekisa kolondonge viaye ndomo va longisa, kuenda ndomo va pondola oku tata afendeli va Suku. Olondonge via lilongisa oku kala ndangombo va tata olomeme viavo. (Mateo 10:5-7) Ndaño okuti Filipu wa litumbikile kupange woku kunda, pole, wa pindisavo omãla vaye oco va litumbikevo kupange waco. (Ovilinga 21:8, 9) Koloneke vilo tu sukilavo oku pindisa vamanji vakuavo. Momo lie?

² Vakongelo alua voluali luosi mu sangiwa akundi valua okuti handi ka va papatisiwile. Akundi vaco va sukila oku pindisiwa. Tu sukila oku va kuatisa oku kuata elomboloko lieci ci kuetele esilivilo kokuavo, oku tanga kuenda oku lilongisa Embimbiliya. Tu sukilavo oku va pindisa oco va kunde kuenda oku longisa olondaka viwa. Vamanji vana va papatisiwa ndopo va sukila oku pindisiwa okuti kovaso yoloneke va pondola oku talavaya ndoloñuatisi viekongelo ale ndakulu vekongelo. Vamanji vosi vekongelo va pondola oku kuatisa vana va fetika ndopo oku kunda.—Olosapo 4:2.

3, 4. (a) Momo lie oku tanga loku lilongisa Embimbiliya, ca kuatela esilivilo lia velapo ku vamanji vo ko lupale luo Kolosai? (b) Osimbu ka tua vetiyile omanu vana tu longisa Embimbiliya oku limbuka esilivilo lioku linga elilongiso lio pokolika, nye tu sukila oku linga?

³ Afendeli vosi va Yehova va sukila oku tanga kuenda oku lilongisa Embimbiliya oco va kũlĩhe eci ci lomboloka ocipango ca Suku. Upostolo Paulu wa lombolola esunga liaco eci a sonehela vamanji va kala volupale luo Kolosai hati: “Ka tua la liwekapo oku vu likutililiko, loku pinga okuti vu yukisua lukũlĩhĩso wa suapo wocipango caye.” Momo lie ca kuatela esilivilo kokuavo oku tanga, loku lilongisa Embimbiliya? Momo poku ci linga nda ca va kuatisa oku kuata olondunge, kuenda oku kuata elomboloko ndomo va pondola oku ‘endaenda ndeci ca sesamẽla ku Yehova loku u sanjuisa calua.’ Handi vali, nda ca va kuatisa oku linga ‘upange wosi uwa,’ una Yehova a yonguile okuti ovo va u linga ndeci oku kunda olondaka viwa. (Va Kolosai 1:9, 10) Nda tu kasi oku longisa Embimbiliya komunu umue, tu sukila oku u kuatisa oco a kuate elomboloko liokuti oku tanga loku lilongisa Embimbiliya olonjanja viosi ci pondola oku u kuatisa oku fendela Yehova.

⁴ Nda okuti etu ka tu kuete ocituwa coku lilongisa Embimbiliya, ka tu pondola oku kuatisa omanu vana tu longisa oku limbuka esilivilo lioku linga elilongiso lio pokolika. Nda olonjanja viosi tua tanga Embimbiliya loku sokolola ovina viaco, ci tu kuatisa komuenyo wetu kuenda kupange woku kunda. Nda tu kasi kupange woku kunda kuenje omunu umue o tu linga epulilo limue okuti ka lia lelukile oku li tambulula, tu pondola oku eca kokuaye etambululo lekuatiso Liembimbiliya. Handi vali, eci tu lilongisa ndomo Yesu, Paulu kuenda omanu vakuavo va amamako oku kunda, tu vetiyiwavo oku amamako oku kunda ndaño ka ca lelukile. Eci tu sapuila komanu vakuavo ovina tua siata oku lilongisa kelilongiso lietu lio pokolika kuenda ndomo tua siata oku kuatisiwa, tu pondola oku va vetiya oku lilongisa Embimbiliya oco va kuatevo onima.

5. Lombolola ndomo o pondola oku kuatisa ondonge yove oku kuata ocituwa coku lilongisa Embimbiliya.

⁵ Citava okuti, o lipula ndoco: ‘Ndi pondola oku pindisa ndati omunu ndi longisa Embimbiliya oco a kuate ocituwa coku lilongisa Embimbiliya olonjanja viosi?’ Onjila yimue o sukila oku kuama, oku lekisa kokuaye ndomo a pondola oku pongiya atambululo, velivulu o kasi oku lilongisa laye. O pondolavo oku u lekisa ndomo a sanga alomboluilo a vokiyiwako velivulu Embimbiliya li Longisa Nye?, kuenda oku sanga ovinimbu Viembimbiliya via tukuiwa. Handi vali, u lekisavo ndomo a lipongiya  kolohongele kuenda oku eca atambululo. U vetiya oku tanga ovipama Viutala Wondavululi, lo Despertai! via siata oku sandekiwa. Noke, u lekisa ndomo a sanga atambululo kapulilo Embimbiliya, ndeci poku kuama o Biblioteca da Torre de Vigia, ale OCISELEKO CALIVULU vo Internet. Nda o ndonge yi seteka olonjila viaco poku linga elilongiso lio pokolika, o ka kuata esanju kuenda o ka lekisa onjongole yoku lilongisa ovina vialua.

6. (a) O pondola oku kuatisa ndati ondonge yove oku lekisa ocisola Kembimbiliya? (b) Nye omunu o longisa Embimbiliya a pondola oku linga nda wa kuata ocituwa coku lilongisa Embimbiliya?

⁶ Eci tu longisa Embimbiliya komunu umue, tu yongola okuti omunu waco o limbuka okuti Embimbiliya li kuete esilivilo lia velapo momo li pondola oku u kuatisa oku kũlĩha ciwa Yehova. Poku ci linga, tu sukila oku yuvula oku kisika omunu oco a lilongise Embimbiliya, pole tu lekisa kokuaye ndomo a pondola oku sola lilongiso liaco. Osimbu omunu tu longisa Embimbiliya amamako oku ci linga o ka kuata esanju ndeli Liukualosamo eci a imba ocisungo hati: “Ame puãi, ciwa oku kala ocipepi la Suku. Nda nola Yehova Suku ha lingi ocikolo cange.” (Osamo 73:28) Ocili okuti espiritu sandu lia Yehova li pondola oku kuatisa omunu o yongola oku kuata ukamba la Yehova.

7. Yesu wa pindisa ndati olondonge viaye oco va kunde olondaka viwa? (Tala elitalatu kefetikilo liocipama.)

⁷ Tu pondola oku lilongisa ovina vialua konjila ndomo Yesu a pindisa ovapostolo vaye. Eye wa enda oku kunda kumue lolondonge viaye kuenje olondonge via mola ndomo Yesu a longisa omanu. Yesu wa ecavo kokuavo olonumbi vi lekisa ndomo va pondola oku kunda. (Mateo, ocipama 10) ^[1] (Tala etosi kesulilo liocipama cilo.) Vokuenda kuotembo yimue yitito o vapostolo va Yesu va lilongisa ndomo va longisa ocili komanu. (Mateo 11:1) Tu lilongisa ovina vivali tu pondola oku kuama oco tu pindise vana va fetika ndopo oku kunda oco tẽlise ciwa upange woku kunda.

8, 9. (a) Yesu wa tata ndati omunu lomunu kupange woku kunda? (b) Tu pondola oku kuatisa ndati akundi vana va fetika ndopo oku kunda oco va sapele lomanu ndeci Yesu a linga?

⁸ Sapela Lomanu. Yesu ka endaile oku sapela lomanu valua olonjanja viosi. Pole, olonjanja vimue wa enda oku sapela lomunu umosi kuenda wa enda oku ci linga lukamba wocili. Eye wa lekisa onjongole yoku sapela lukãi umue weya oku tapa ovava vocisimo ca kala ocipepi lolupale luo Sukare. (Yoano 4:5-30) Yesu wa sapelavo la Mateo Lewi, ukuakutambula elisimu kuenda wo laleka oco a linge ondonge yaye. Mateo wa tava kelaleko liaco, noke wa laleka Yesu kuenda omanu vakuavo oku lia konjo yaye. Konjo yaco Yesu wa sapela lomanu valua.—Mateo 9:9; Luka 5:27-39.

⁹ Yesu wa lekisavo ukamba wocili eci a sapela la Nataneli, ndaño okuti eye wa popele ovina ka via sungulukile viatiamẽla komanu vo ko Nasara. Omo okuti Yesu wa lekisa ukamba poku sapela laye, Nataneli wa pongolola  ovisimĩlo viaye ka via sungulukile viatiamẽla ku Yesu una wa kala u Nasara. Kuenje eci ca vetiya Nataneli oku lilongisa ovina vialua viatiamẽla ku Yesu. (Yoano 1:46-51) Ulandu waco u tu longisa okuti, eci tu lekisa ukamba wocili poku sapela lomanu, ci va vetiya oku yevelela lutate ovina tu va sapuila. ^[2] [Tala etosi kesulilo liocipama.] Nda tua ci linga tu ka lekisa ongangu yiwa kakundi vana va fetika ndopo oku kunda.

10-12. (a) Yesu wa lekisa ndati onjongole komanu poku va kundila olondaka viwa? (b) Tu pondola oku kuatisa ndati vana va fetika ndopo oku kunda oco va mioñolole uloño wavo woku longisa ocili Cembimbiliya?

¹⁰ Longisa omanu va kuete onjongole yoku yevelela. Ndaño okuti Yesu wa kuatele upange walua, pole eci omanu va kuatele onjongole yoku yevelela, wa sandiliya otembo yoku kala lavo kuenda oku va longisa ovina vialua. Eteke limue omanu valua va liongolola kohulo yokalunga oco va yevelele Yesu. Kuenje Yesu wa tunda vowato la Petulu noke va fetika oku longisa omanu. Eye wa yonguilevo oku longisa ulandu umue ku Petulu. Yesu wa linga ocikomo cimue kuenje eci ca ecelela okuti Petulu o pipa olõsi vialua. Eye wa sapuila Petulu hati: “Oku upisa cilo, o linga enyanga liomanu.” Vepuluvi liaco Petulu kumue lomanu vakuavo va kala laye “va tiuwiya awato kongongo, va sia cosi” kuenje va kuama Yesu.—Luka 5:1-11.

¹¹ Nikodemo wa yonguilevo oku lilongisa ovina vialua ku Yesu. Omo okuti Nikodemo watiamẽlele Konjango ya Vakuakusombisa, eye wa kuatele usumba kovina omanu va laikele oku popia nda vo mola okuti o kasi oku sapela la Yesu. Omo liaco, wa nõlapo oku sandiliya Yesu kuteke. Kuenje Yesu wa sapela laye kuenda wo lomboluila ovina vialua vi kuete esililvilo lia velapo. (Yoano 3:1, 2) Olonjanja viosi Yesu wa sanda otembo yoku longisa ocili komanu kuenda oku pamisa ekolelo liavo. Tu sukilavo oku nyula omanu vapuluvi ana okuti tu pondola oku va sanga kolonjo viavo loku va kuatisa oku kuata elomboloko Liembimbiliya.

¹² Eci tu talavaya lakundi vana va fetika ndopo oku kunda, tu pondola oku va longisa ndomo va pondola oku linga epasu komanu va lekisa onjongole kupange woku kunda. Tu sukilavo oku laleka akundi vana va fetika ndopo upange woku kunda oco tu lingile kumosi apasu kuenda oku longisa Embimbiliya komanu. Poku ci linga, va ka limbuka okuti oku kuatisa omanu vakuavo oco va lilongise ocili catiamẽla ku Yehova cinena esanju. Kuenje ci va vetiya oku kuata onjongole yoku linga apasu loku longisa Embimbiliya komanu vana va lekisa onjongole. Va ka lilongisavo oku kuata epandi kuenda oku amamako oku kunda ndaño okuti eci va linga apasu ka va sangi omanu kolonjo viavo.—Va Galatia 5:22; Tanga o kakasia losapi hati: “ Eye ka Liwekelepo.”

13, 14. (a) O pondola oku setukula ndati ongangu yomanu vana va tukuiwa Vembimbiliya okuti va likolisilako oku kuatisa omanu vakuavo? (b) Olonjila vipi o sukila oku kuama oco o pindise amalẽhe kuenda vana va fetika ndopo oku kunda oco va lekise ocisola ku vamanji?

¹³ Yehova o yongola okuti afendeli vaye va likuatela ocisola kuenda oku likuatisa pokati. (Tanga Luka 22:24-27; 1 Petulu 1:22.) Embimbiliya li lombolola okuti Yesu wa eca ovina viosi oku kongelamo omuenyo waye oco a kuatise omanu vakuavo. (Mateo 20:28) Dorka “wa kala ukuahenda kuenda wa enda oku linga oviali viwa.” (Ovilinga 9:36, 39) Maria ‘wa lingila upange walua’ vamanji ko  Roma. (Va Roma 16:6) Tu pondola oku kuatisa ndati vana va fetika ndopo oku kunda oku limbuka esilivilo lioku lingila ovina viwa vamanji?

¹⁴ Tu pondola oku ci linga poku laleka vana va fetika ndopo oku kunda oco tu ka nyule vamanji va kuka kuenda vana va vela. Eci olonjali vi linga esokiyo lioku nyula vamanji vaco va kuka, nda citava va sukila oku ci linga kumue lomãla vavo. Akulu vekongelo va pondola oku laleka amalẽhe ale vana va fetika ndopo oku kunda oco va ende kumosi eci va yongola oku ambata okulia ale oku semulũla ocikuata cimue ca nyolẽha konjo ya manji umue wa kuka. Eci amalẽhe kuenda vana va fetika ndopo oku kunda va limbuka ndomo vamanji va likuatisa pokati, va ka lilongisavo oku ci linga. Ukulu umue wekongelo osimbu a kala oku kundila vimbo limue, olonjanja viosi wa enda oku likolisilako oku nyula vamanji va kala vimbo liaco. Manji umue umalẽhe wa lingaile ungende kumue laye, wa lilongisa kongangu yiwa yukulu waco wekongelo, poku sokolola ovina a sukila oku linga oco a kuatise vamanji.—Va Roma 12:10.

15. Momo lie akulu vekongelo va sukilila oku kuatisa vamanji alume oco va tẽlise ciwa ovikele viavo vekongelo?

¹⁵ Yehova wa eca kalume ocikele coku longisa Ondaka yaye vekongelo. Omo liaco, ci kuete esilivilo okuti vamanji alume va likolisilako oku longisa ciwa eci va tambula ocikele coku linga olohundo. Nda ove ukulu wekongelo, o sukila oku yevelela ciwa eci oñuatisi yimue yekongelo yi linga ohundo, oco u kuatise apa eye a sukila oku mioñolola. (Nehemiya 8:8) ^[3]—Tala etosi kesulilo liocipama.

16, 17. (a) Paulu wa lekisa ndati onjongole yoku kuatisa Timoteo? (b) Akulu vekongelo va pondola oku pindisa ndati vamanji alume oco va linge angombo vekongelo kovaso yoloneke?

¹⁶ Kuli esukila lialua lioku pindisa vamanji alume oco va linge angombo vekongelo. Paulu wa pindisa Timoteo kuenda wo vetiyavo oku pindisa vamanji vakuavo. Eye wa sapuila Timoteo hati: “Amamako oku kuata ongusu vohenda ya piãla yi tunda vu Kristu Yesu; kuenda kovina wa yeva kokuange okuti valua va ci imbila uvangi kuenje ovina viaco vi kundika kalume va koleliwa, vana okuti noke va tẽla oku vi longisa ku vakuavo.” (2 Timoteo 2:1, 2) Timoteo wa lilongisa ovina vialua la Paulu, una wa kala ukulu wekongelo haye upostolo. Eye wa lilongisa ndomo a pondola oku mioñolola uloño waye woku kunda kuenda ndomo a kuatisa vamanji vakuavo vekongelo.—2 Timoteo 3:10-12.

¹⁷ Paulu wa kala otembo yalua la Timoteo oco a limbuke okuti Timoteo wa pindisiwa ciwa. (Ovilinga 16:1-5) Akulu vekongelo va  sukila oku setukula Paulu poku laleka oloñuatisi viekongelo via loñoloha oco olonjanja vimue va ende kumosi poku nyula vamanji. Poku ci linga, ci kuatisa oloñuatisi viekongelo oku lilongisa ndomo akulu vekongelo va longisa vamanji, va lekisa epandi, ocisola kuenda oku kolela ku Yehova poku tata ocunda caye.—1 Petulu 5:2.

18. Momo lie oku pindisa vamanji kupange wa Yehova ci kuetele esilivilo kokuetu?

¹⁸ Koloneke vilo via sulako, vana va fetika ndopo oku kunda va sukila oku pindisiwa oco va loñolohe kupange woku kunda. Vamanji alume va sukila oku lilongisa ndomo va pondola oku tẽlisa ciwa ovikele viavo vekongelo. Yehova o yongola okuti afendeli vaye va pindisiwa ciwa, kuenda wa tu ĩha ocikele coku kuatisa vana va fetika ndopo oku kunda. Ci kuete esilivilo oku likolisilako oku pindisa vamanji ndeci Yesu la Paulu va linga. Omo liaco, tu sukila oku pindisa vamanji valua momo handi kuli upange walua woku kunda u sukila oku lingiwa, osimbu esulilo lioluali lulo ka lueyile.

19. Momo lie o sukilila oku kolela okuti o pondola oku kuata onima yiwa kalikolisilo ove oku pindisa vamanji kupange wa Yehova?

¹⁹ Tu sukila oku sanda otembo, kuenda oku likolisilako oco tu pindise vana va fetika ndopo oku kunda. Pole, tu pondola oku kolela okuti Yehova la Yesu va tu kuatisa oco tu pindise ciwa vamanji. Tu pondolavo oku kuata esanju poku mola okuti vana tua pindisa va kasi ‘oku talavaya calua loku likolisilako’ oku tẽlisa ovikele viavo vekongelo ale kupange woku kunda. (1 Timoteo 4:10) Tu sukilavo oku likolisilako oco tu amameko oku pamisa ekolelo lietu, oku kuata ovituwa via sunguluka kuenda oku kuata ukamba la Yehova.