1, 2. Paulu wa lekisa ndati okuti, wa sanjukilile ohenda ya piãla ya Yehova?

UPOSTOLO Paulu wa popia hati: ‘Ohenda ya piãla ya Yehova kokuange ka ya kalele yolivova.’ (Tanga 1 Va Korindo 15:9, 10.) Paulu wa kũlĩhĩle okuti, ka sesamẽlele ohenda ya Yehova. Momo, wa enda oku lambalala Akristão vocili.

² Eci Paulu a kala oku panda kolofa wa sonehela ukanda Timoteo hati: “Ndi pandula Kristu Yesu Ñala yetu, una wa nyĩha unene, omo a ndi tenda okuti nda koleliwa poku ñundika upange owu.” (1 Timoteo 1:12-14) Upange upi Paulu a tukula? Eye wa sapuila kakulu vekongelo vo ko Efeso hati: “Si tendi omuenyo wange ndocina cimue ci silivila kokuange, [pole,] ndi yongola ño oku tẽlisa ocikundi kuenda upange nda tambula ku Ñala Yesu, woku imba uvangiwolondaka viwa viohenda ya piãla ya Suku.”​—Ovilinga 20:24.

3. Upange upi ulikasi Paulu a tambuile? (Tala ociluvialuvia kefetikilo liocipama cilo.)

 ³ ‘Olondaka vipi viwa’ Paulu a kunda, kuenda via eca ndati uvangi wohenda ya Yehova? Paulu wa sapuila Akristão vo ko Efeso hati: “Wa yevi ocikundi ca nyĩhiwa omo liohenda ya piãla ya Suku, mekonda liene.” (Va Efeso 3:1, 2) Yesu wa vetiyile Paulu oco a kundile olondaka viwa komanu vakualofeka okuti, ka va kalele va Yudea. Kuenje, ca ecelela okuti, va panga onepa Kusoma wa Yehova, oco va ka viale kumue la Yesu kilu. (Tanga Va Efeso 3:5-8.) Paula wa lekisa ombili kupange woku kunda: Omo liaco, wa sila ongangu yiwa Kakristão vo koloneke vilo. Kuenje, Paulu wa eca olopandu ‘omo’ liohenda ya piãla Yehova a lekisa kokuaye.

4, 5. Momo lie tu popela okuti, “olondaka viwa Viusoma” vi lombolokavo ‘ohenda ya piãla ya Yehova’?

⁴ Tu kasi kotembo yimue okuti, afendeli va Yehova va kuete upange woku kundila ‘olondaka viwa voluali luosi okuti vi linga uvangi kolofeka viosi, oco esulilo liya noke.’ (Mateo 24:14) Olondaka viwa Viusoma, vi lombolokavo ‘esapulo liwa liohenda ya piãla ya Yehova.’ Momo lie tu popela ndoco? Momo, tu ka tambula lika asumũlũho aco, omo liohenda ya Yehova. (Va Efeso 1:3) Paulu wa eca olopandu poku lekisa ombili kupange woku kunda, omo liohenda Yehova a lekisa kokuaye. Anga hẽ tu kasi oku kuama ongangu ya Paulu?​—Tanga Va Roma 1:14-16.

⁵ Vocipama ca pita, tua lilongisa ndomo tu pondola oku kuatisiwa lohenda ya Yehova, ndaño ka tua lipuile. Omo okuti tua siata oku kuatisiwa lohenda yaye, tu kuete ocikele coku kundila omanu loku va sapuila okuti, Yehova o va kuetele ocisola, kuenda o yongola oku va kuatisa. Tu pondola oku kuatisa ndati omanu oco va ece olopandu omo liohenda Yehova a siata oku lekisa kokuavo?

6, 7. Momo lie eci tu lombolola catiamẽla kocisembi ca Yesu ci lekisila okuti tu kasi oku kundila omanu olondaka viwa viohenda ya Yehova?

⁶ Koloneke vilo, omanu valua ka va kapeleko ovina vĩvi va siata oku linga. Momo, ka va kũlĩhĩle esunga lieci omanu va sukilila ocilumba cocisembi oco va popeliwe. Kulivo omanu valua va limbuka okuti, ka va kuete esanju omo liovina vĩvi va siata oku linga komuenyo wavo. Ovo va pondola lika oku kuata elomboloko liekandu, eci Olombangi Via Yehova vi va lekisa Vembimbiliya ovina viatiamẽla kondaka yaco. Va pondolavo oku limbuka ndomo vosi yetu tua linga vakuakandu, kuenda eci tu sukila oku linga, oco tu yovoke kekandu. Nda omunu umue o yongola oku sanjuisa Yehova o kuata elomboloko liaco, cu vetiya oku eca olopandu kokuaye, omo lioku tuma Yesu palo posi oco a tu yovole kekandu kuenda kolofa. Yehova wa linga ovina viaco, omo liocisola kuenda ohenda a siata oku lekisa kokuetu.​—1 Yoano 4:9, 10.

⁷ Paulu wa lombolola ovina viatiamẽla ku Yesu omõla wa Yehova, una a sole calua. Eye wa popia hati: ‘Vokuaye tu kuete eyovo omo liocisembi cosonde yaye kuenda ongecelo yakandu etu omo liohenda ya  piãla ya Yehova.’ (Va Efeso 1:7) Ocisembi ca Kristu, ceca uvangi wocisola Yehova a tu kuetele. Tu sanjuka calua poku kũlĩha okuti, Yehova o pondola oku ecela akandu etu, kuenje, tu kuata utima wa yela omo liocilumba ca Yesu! (Va Heveru 9:14) Omo liaco, tu sukila oku kundila omanu olondaka viwa!

8. Momo lie omanu vakuakandu va sukilila oku kuata ukamba la Yehova?

⁸ Nda omunu ka lekisa ekolelo kocilumba cocisembi ca Yesu, o linga unyãli wa Yehova. Omo liaco, tu kuete ocikele coku sapuila komanu oco va limbuke okuti, va pondola oku kala akamba va Yehova. Upostolo Yoano wa soneha ndoco: “[Omunu] wosi o kolela Mõla o kuete omuenyo ko pui; puãi wosi ka pokola ku Mõla ka kuata omuenyo, pole onyeño ya Suku yi kala ño laye.” (Yoano 3:36) Tu kuete esanju lialua omo lioku kũlĩha okuti, ocisembi ca Kristu ci pondola oku tu kuatisa oku kuata ukamba la Yehova Suku. Paulu wa tukula ulandu waco poku popia hati: ‘Ene wa litepeli kuenda wa kali ovanyali va Yehova, omo ovitima viene via tiamisiwilile lika kovilinga vĩvi. Pole, Yehova wa linga ekamba liene omo liolofa via Yesu.’​—Va Kolosai 1:21, 22.

9, 10. (a) Ocikele cipi Kristu a eca kolombuavekua? (b) “Olomeme vikuavo” via siata oku kuatisa ndati olombuavekua?

⁹ Kristu wa eca Kakristão olombuavekua ‘upange woku kuatisa omanu’ oco va kuate ukamba la Yehova. Paulu wa popia hati: ‘Ovina viosi vi tunda ku Yehova una o linga ukamba letu mekonda lia Kristu. Eye, wa tu ĩha upange woku kuatisa omanu oco va kuate ukamba laye. Momo, vonduko ya Kristu, Yehova wa linga ukamba lomanu, kuenda ka tendele akandu omanu loku va pisa. Kuenje wa tu kundika esapulo lioku kuatisa omanu oco va kuate ukamba laye. Omo liaco, tulomunga vonduko ya Kristu, ndeci Suku a linga epingilo mekonda lietu. Omo okuti tulomunga vonduko ya Kristu, tu pinga tuti: ‘Kuati ukamba la Suku.’​—2 Va Korindo 5:18-20.

¹⁰ “Olomeme vikuavo” vi kuete esumũlũho lioku kuatisa olombuavekua kupange woku kunda. (Yoano 10:16) Omo okuti “olomeme vikuavo” via tumiwa la Kristu, vi kuete ocikele coku kundila omanu ocili ci sangiwa Vembimbiliya, kuenda oku va kuatisa oco va kuate ukamba la Yehova. Upange woku kunda u kuete esilivilo lia velapo, momo u panga onepa kohenda Yehova a siata oku lekisa komanu.

11, 12. Momo lie oku longisa omanu ndomo va sukila oku likutilila ci kuetele esilivilo?

¹¹ Omanu valua va siata oku linga olohutililo,  momo va kũlĩha okuti, vi pondola oku va kuatisa. Pole, ka va tava okuti, Yehova wa siata oku yevelela olohutililo viavo. Ovo ka va kũlĩhĩle okuti, Yehova wa siata ‘oku yevelela olohutililo.’ Ukualosamo Daviti wa soneha ndoco: ‘Ove, okuakuyeva ohutililo, kokuove ku kokela omanu vosi. Eci akandu etu a tu luila ove o tu ecela.’​—Osamo 65:2, 3.

¹² Yesu wa sapuila olondonge viaye hati: “Nda ene vu pinga cimue vonduko yange, ndu cĩhi.” (Yoano 14:14) Olondaka evi vi lomboloka okuti, tu pondola oku kongela vohutililo ‘ovina’ tu sukila okuti, vi likuata locipango ca Yehova. Yoano wa soneha ndoco: “Eli olio ekolelo tu kuete kokuaye okuti, nda tu pinga ovina viosi vi likuata locipango caye, eye o tu yeva.” (1 Yoano 5:14) Tu sanjuka calua poku longisa omanu oco va kuate elomboloko liokuti, ohutililo ka yi pondola lika oku va kuatisa oco va kuate esanju. Pole, yi va kuatisavo oku ‘amela kocalo cohenda’ ya Yehova! (Va Heveru 4:16) Nda tu longisa omanu oco va limbuke ndomo va sukila oku likutilila ku Yehova, ci va kuatisa oku kuata ukamba laye. Kuenje, nda va liyaka lovitangi, va sanga elembeleko.​—Osamo 4:1; 145:18.

13, 14. (a) Asumũlũho api Akristão olombuavekua va ka tambula kovaso yoloneke? (b) Upange upi u komõhisa Akristão olombuavekua va ka lingila omanu vosi?

¹³ Afendeli va Yehova, va ka limbuka ciwa ohenda yaye ya piãla ‘voluali luokaliye.’ Momo lie? Momo Yehova o ka eca onima kueci ci soka 144.000 Kakristão olombuavekua yoku enda kilu, oco va ka viale la Kristu. Paulu wa soneha ovina viatiamẽla kondaka yaco poku popia hati: “Suku ukuahenda ya piãla omo liocisola caye calua, wa tu sola . . . wa tu muisa omuenyo kumue la Kristu ndaño ceci tua file kolohole, pole, omo liohenda ya piãla, ene wa yovuiwi. Kuenje eye wa tu pindula kuenda wa tu tumalisa kumue la Kristu Yesu kilu, [momo,] Suku wa ci lingila okuti voluali lu laika oku iya, eye o lekisa ohenda yaye yalua poku tu lingila ovina viwa etu tu kasi vomunga la Kristu Yesu.”—Va Efeso 2:4-7.

¹⁴ Ka tu tẽla oku sokolola ovina viosi Yehova a ka eca Kakristão olombuavekua eci va ka viala la Kristu kilu. (Luka 22:28-30; Va Filipoi 3:20, 21; 1 Yoano 3:2) “Yehova o ka lekisa ohenda yaye” Kakristão olombuavekua lonjila yimue yilikasi. Ovo va ka panga onepa ‘Koyerusalãi yokaliye’ yina yi lomboloka ondombua ya Kristu. (Esituluilo 3:12; 17:14; 21:2, 9, 10) Akristão olombuavekua va ka talavaya kumue la Yesu oco va ‘sakule olofeka.’ Ovo, va ka kuatisa omanu toke eci va ka li pua.​—Tanga Esituluilo 22:1, 2, 17.

15, 16. Yehova o ka lekisa ndati ohenda yaye ‘kolomeme vikuavo’ kovaso yoloneke?

 ¹⁵ Elivulu lia Va Efeso 2:7, li lombolola okuti, Yehova o ka lekisa ohenda yaye ‘voluali luokaliye.’ Kotembo yaco, omanu vosi va ka kala palo posi, va ka limbuka ‘ohenda ya Yehova.’ (Luka 18:29, 30) Yehova o ka lekisavo ohenda yaye eci a ka pindula omanu ‘va fa.’ (Yovi 14:13-15; Yoano 5:28, 29) Velie va ka pinduiwa? Yehova o ka pindula omanu vosi vakuekolelo va fa osimbu Kristu ka file handi, kuenda “olomeme vikuavo” vi kasi oku fa koloneke vilo via sulako. Vosi yavo va ka pinduiwa, oco vamameko oku vumba Yehova.

¹⁶ Omanu valua okuti eci va fa ka va kũlĩhĩle Yehova, va ka pinduiwavo. Yoano wa soneha ndoco: “Nda mola ava va fa, ava vanene lava vatito va tumãla kovaso yocalo kuenje kua yikuiwa oviña. Pole, ociña cikuavo ca yikuiwa; okuti ociña comuenyo. Ava va fa va sombisiwa lovina via sonehiwa voviña ndomo ci likuata lovilinga viavo. Kuenje okalunga ka eca ava va fa va kalamo, kufa Leyambo va eca ava va fa va kalamo kuenda omunu lomunu wa sombisiwa ndomo ci likuata lovilinga viaye.” (Esituluilo 20:12, 13) Omanu va ka pinduiwa va ka kuata epuluvi lioku lilongisa ovina viatiamẽla ku Yehova, kuenda va ka pokola kuviali waye. Ovo va ka lilongisa ndomo va pondola oku kapako ovina vi sangiwa Vembimbiliya, kuenda va ka lilongisavo olonumbi vi sangiwa ‘voviña’ viokaliye.  Ovina viosi via tukuiwa ndeti, vi ka eca uvangi wohenda ya piãla ya Yehova.

17. Nye tu sukila oku ivaluka eci tu kundila omanu?

¹⁷ Koloneke vilo, oku kunda olondaka viwa Viusoma ci kuete esilivilo lia velapo okuti kosimbu ci sule. Momo esulilo li kasi ocipepi! (Marko 13:10) Tu sukila oku ivaluka okuti, upange woku kunda weca esivayo ku Yehova. Tu linga ndati upange waco? Tu sukila oku amamako oku sapuila komanu okuti, voluali luokaliye tu ka tambula asumũlũho alua, omo liohenda ya piãla ya Yehova.

18, 19. Tu kuatisa ndati omanu oco va limbuke esilivilo liohenda ya piãla ya Yehova?

¹⁸ Poku kundila omanu, tu sukila oku va sapuila okuti, eci Usoma wa Kristu u ka viala oluali, va ka tambula asumũlũho lekuatiso liocisembi. Kuenje, vokuenda kuotembo va ka li pua. Embimbiliya li popia hati: “Oviluvo viaco vi ka yovuiwa kupika wetimba li nyõleha okuti vi kuata eyovo liulamba womãla va Suku.” (Va Roma 8:21) Ovina viaco vi ka tẽlisiwa lika omo liohenda ya piãla ya Yehova.

¹⁹ Tu kuete esumũlũho lioku sapuila komanu olohuminyo viosi via Yehova vi sangiwa kelivulu Liesituluilo 21:4, 5, li popia hati: “[Yehova o ka] puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.” Yehova una wa tumãla kocalo wa popia hati: “Tala! Ovina viosi ndi vi lingisa viokaliye.” Noke wa popiavo hati: “Soneha, momo olondaka evi via koleliwa kuenda viocili.” Eci tu kundila omanu olondaka viwa tu eca esivayo kohenda ya piãla ya Yehova!