1, 2. Momo lie tu sukilila oku kũlĩhĩsa ndomo tu lembeleka vana va fisa ngandiavo? (Tala elitalatu kefetikilo liocipama.)

MANJI umue o tukuiwa Susi wa popia hati: “Kunyamo watete eci omõletu a fa tua yeva evalo lialua vutima kuenda esumuo.” Manji umue okuti ukãi waye wa fa ocipikipiki, wa popia hati, “evalo a yeva ka li sokisiwa.” Ocili okuti, omanu valua va siatavo oku kuata evalo liaco kutima. Koloneke vilo, vamanji valua ka va lavokaile okuti vangandiavo va fa osimbu o Harmagedo ka yeyile. Pamue ove o kuetevo omunu umue o sole okuti wa fa, ale wa kũlĩha umue wa sumua omo lioku fisa ngandiaye. Citava okuti o lipula ndoco: ‘Omanu va fisa va pondola ndati oku liyaka lesumuo liaco?’

² Omanu vamue va siata oku popia vati, otembo oyo ovihemba vi sakula apute osi. Anga hẽ eci ocili? Ukãi umue ocimbumba wa popia hati, “Nda limbuka okuti ovina omunu a linga ovio vi u kuatisa esumuo liaye oku pita.” Ndeci,  epute oco li kaye li sukila otembo kuenda utate. Cimuamue aco, evalo lio vutima oco li pite ci sukilavo otembo kuenda utate. Omo liaco, nye ci kuatisa omunu wa fisa ngandiaye oku tepulula evalo liaye liovutima?

3, 4. Momo lie tua kolelela okuti Yehova wa kũlĩha ciwa esumuo lietu?

³ Yehova Isietu ukuacikembe, eye lika ono yelembeleko lia velapo tu sukila. (Tanga 2 Va Korindo 1:3, 4.) Eye ongangu ya velapo yoku lekisa ohenda kuenda wa likuminya kafendeli vaye hati: “Ame, ame ndukuakukulemba.”—Isaya 51:12; Osamo 119:50, 52, 76.

⁴ Isietu ukuacisola wa yevavo esumuo omo liolofa viafendeli vaye a solele calua ndeci, Avirahama, Isake, Yakoba, Mose kuenda Soma Daviti. (Atendelo 12:6-8; Mateo 22:31, 32; Ovilinga 13:22) Embimbiliya li tu sapuila okuti, Yehova o lavoka lesanju eteke a ka pindula afendeli vaco vakuekolelo. (Yovi 14:14, 15) Kotembo yaco, ovo va ka kuata esanju kuenda uhayele wa lipua. Yehova wa yevavo esumuo eci Omõlaye wongunga a fa. Embimbiliya li lekisa okuti Yesu eye Suku “a sanjukilile.” (Olosapo 8:22, 30) Tu sokololi esumuo Yehova a kuata poku mola ndomo omõlaye a kala oku talisiwa ohali toke kolofa.—Yoano 5:20; 10:17.

5, 6. Yehova o tu lembeleka ndati?

⁵ Tua kolela okuti Yehova o ka tu kuatisa. Omo liaco, tu pondola oku likutilila kokuaye loku u situluila evalo tu yevite vutima kuenda esumuo. Tu lembelekiwa calua poku limbuka okuti Yehova wa kũlĩha ovisimĩlo vietu kuenda o tu ĩha elembeleko tu sukila! Pole eye o ci linga ndati?

⁶ Onjila yimue Yehova a tu lembeleka layo, poku tu ĩha espiritu sandu liaye. (Ovilinga 9:31) Yesu wa likuminya hati, Isietu o ka eca unene wespiritu liaye komanu vosi vo pinga. (Luka 11:13) Manji Susi wa tukuiwa kefetikilo wa popia hati: “Tua enda oku kekama o lonjanja vialua kolongolo loku pinga ku Yehova oco a tu lembeleke. Kuenje, tua limbuka okuti ombembua ya Suku ya lava ovitima vietu lovisimĩlo vietu.”—Tanga Va Filipoi 4:6, 7.

7, 8. Momo lie tua kolelela okuti Yesu o tu lembeleka?

⁷ Eci Yesu a kala palo posi wa setukula ciwa ovituwa via Isiaye, kolondaka kuenda kovilinga. (Yoano 5:19) Yehova wa tuma Yesu palo posi oco a ‘petule ava va teka itima’ kuenda ‘vosi va sumua.’ (Isaya 61:1, 2; Luka 4:17-21) Omanu va limbukile okuti Yesu wa kũlĩhĩle ohali yavo kuenda wa lekisa onjongole yoku va kuatisa.—Va Heveru 2:17.

 ⁸ Eci Yesu a kala umalẽhe, wa kuatavo akamba kuenda vangandiaye va fa. Citava okuti Isiaye wokatumba Yesefe, wa fa eci Yesu a kala handi umalẽhe.  * (Tala etosi pombuelo yemẽla.) Sokolola ndomo Yesu a kala poku liyaka lesumuo liaye muẽle, lesumuo lia ina yaye kuenda lia vamanjaye.

9. Yesu wa lekisa ndati ohenda eci Lasaru a fa?

⁹ Yesu vokuenda kupange waye woku kunda, wa lekisa okuti wa kũlĩhĩle ciwa omanu kuenda wa va kuatela ohenda. Eci ekamba liaye Lasaru a fa, Yesu wa yeva evalo vutima ndeli Maria la Marta va yeva. Ohenda a va kuatela yaluile kuenje wa fetikavo oku lila, ndaño wa kũlĩhĩle okuti wa laikele oku pindula Lasaru.—Yoano 11:33-36.

10. Tua kolela ndati okuti Yesu wa kũlĩha ciwa ekalo lietu koloneke vilo?

¹⁰ Olondaka vielembeleko Yesu a popia vi tu kuatisa ndati koloneke vilo? Embimbiliya li lekisa ciwa okuti Yesu ka pongolokele. Olio li popia hati, “Yesu Kristu umuamue, ndeci a kala hẽla haico a kala etali.” (Va Heveru 13:8) Eye o tukuiwa hati, “Usongui wa Velapo womuenyo” momo wa tu yovola oco tu kale otembo ka yi pui. Yesu wa kũlĩhãvo ohali yomunu lomunu kuenda “o pondola oku kuatisavo vana va kasi oku nyikiwa.” (Ovilinga 3:15; Va Heveru 2:10, 18) Omo liaco, tua kolela okuti Yesu handi o yeva esumuo eci omanu va tala ohali. Eye wa kũlĩha esumuo liavo kuenda o va lembeleka eci ‘va sukila ekuatiso.’ —Tanga Va Heveru 4:15, 16.

11. Ovinimbu vipi Viembimbiliya via siata oku ku lembeleka?

¹¹ Ulandu wa tiamẽla kesumuo lia Yesu eci Lasaru a fa, umue pokati kovisonehua vialua vielembeleko vi sangiwa Vondaka ya Suku. Eci ka ci tu komohisa, momo “ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko.” (Va Roma 15:4) Nda ove wa sumua omo lioku fisa ngandiove, o pondolavo oku sanga elembeleko vovinimbu Viembimbiliya vi kuãimo:

• “Yehova yu ocipepi la vakuavitima via teka; Eye o popela ava va kasi lovitima via samba.”—Osamo 34:18, 19.

• “Eci atatahãi a nduila vutima, okulemba kuove a Yehova okuo ku ñolisa.”—Osamo 94:19.

• “Ñala yetu Yesu Kristu kuenda Suku Isietu, una wa tu sola, okuti wa eca elembeleko ka li pui lelavoko liwa omo liohenda ya piãla, a lembeleke ovitima viene loku vu pamisi.”—2 Va Tesalonike 2:16, 17. *—Tala etosi pombuelo yemẽla.

12. Tu lembeleka ndati vakuetu?

¹² Omanu vana sumua omo lioku fisa ngandiavo va siatavo oku sanga elembeleko vekongelo Liakristão. (Tanga 1 Va Tesalonike 5:11.) O pondola oku pamisa ndati loku lembeleka vana va kuete “utima wa nyumãla?” (Olosapo 17:22) Ivaluka okuti kuli “eteke lioku ũha, kuenda eteke lioku popia.” (Ukundi 3:7) Ukãi umue ocimbumba o tukuiwa hati Dalene wa popia okuti, vana va sumua omo lioku fisa ngandiavo va sukila oku situlula ovisimĩlo viavo leci va yevite vutima. Omo liaco, ocina ca velapo o sukila oku linga oku yevelela lutate. Manji Junia okuti manjaye ulume wa li ponda, wa popia hati, “Ndaño ku pondola oku kuata elomboloko liasuapo liesumuo liomunu wa fisa, ca velapo oku lekisa onjongole yoku kũlĩha ndomo va li yevite.”

13. Nye tu sukila oku ivaluka catiamẽla kesumuo lioku fisa?

¹³ Tu sukila oku ivaluka okuti, onjila yoku lekisa ndomo tu liyevite kuenda ndomo tu situlula esumuo lietu ya litepa. Olonjanja vimue ka ca lelukile oku situlula evalo tu yevite vutima. Ondaka ya Suku yi lekisa okuti: “Utima u kũlĩha okuvala kuawo muẽle; wiñi ka litengi vesanju liawo.” (Olosapo 14:10) Ndaño okuti omunu umue o situlula ndomo a li yevite, pamue ka ci leluka komanu vakuavo oku kuata elomboloko lieci a kasi oku popia.

14. Olondaka vipi tu sukila oku popia oco tu lembeleke vana va sumua omo lioku fisa?

¹⁴ Ocili okuti ka ca lelukile oku kũlĩha ovina tu yongola oku sapuila komunu una wa sumua omo lioku fisa ngandiaye. Pole, Embimbiliya li popia okuti, “elimi liukualondunge puãi li sakula.” (Olosapo 12:18) Omanu valua va siata oku kuama ovinimbu Viembimbiliya lolondaka vielembeleko vi sangiwa vombrochura losapi hati, Quando Morre Alguém Que Amamos, oco va lembeleke vana va fisa. * (Tala etosi pombuelo yemẽla.) Olonjanja vialua ocina ca velapo o sukila oku linga, oku ‘lila lava va lila.’ (Va Roma 12:15) Manji Gaby okuti ulume waye wa fa, wa popia hati: “Onjila yimue yoku situlula eci ndi yevite vutima oku lila. Eli olio esunga lieci ndi lembelekiwa eci akamba va lila lame. Ndi limbuka okuti si kasi lika liange kuenda ovo va kũlĩha evalo liange.”

15. Nye tu sukila oku linga nda ka tu kuete utõi woku sapuila komunu wa fisa olondaka vielembeleko? (Talavo pokakasia hati: “ Olondaka Vielembeleko.”)

¹⁵ Nda o sima okuti ku kuete utõi woku sapuila olondaka vielembeleko komunu wa fisa, ci tava okuti o tumisa ukanda umue ale esapulo limue votelefone. O pondola  oku tukula ocisonehua cimue ci lembeleka, ocituwa cimue ciwa ivaluka komunu wa fa, ale oku sapela ovina wa sola kokuaye. Manji Junia wa popia hati: “Eci ndi tambula okokanda kolondaka vielembeleko ale elaleko limue lioku kala lavamanji ci ndi kuatisa calua.” “Ovina viaco vi ndi kuatisa oku limbuka okuti ndi soliwe kuenda nda kapiwako lavamanji.”

16. Onjila yipi yiwa yoku lembeleka vakuetu?

¹⁶ Olohutililo vietu vi pondola oku kuatisa vamajetu va sumua omo lioku fisa. Tu ci linga poku va kongela volohutililo vietu ale poku likutilila lavo. Ndaño okuti ka ca lelukile oku ci linga omo lioku sima okuti pamue o ka lila, pole, ohutililo o linga lutima wosi yi lembeleka calua. Manji Dalene, wa popia hati: “Olonjanja vimue eci vamanji akãi veya oku ndi lembeleka nda enda oku pinga kokuavo oco va ndi likutilileko. Eci va fetika oku likutilila, va kala ndu okuti ka va kũlĩhĩle eci va vangula, pole, noke liotembo yimue olondaka viavo vi li vokiya kuenje va linga ohutililo yimue yi pamisa. Ekolelo liavo liapama, locisola cavo kuenda esakalalo liavo kokuange, via siata oku pamisa calua ekolelo liange.”

17-19. Momo lie tu sukilila oku amamako oku eca elembeleko komanu va fisa?

¹⁷ Ka tu pondola oku kũlĩha otembo omunu lomunu a kala lesumuo omo lioku fisa omunu a sole. Eci omunu umue a fa, kefetikilo akamba kuenda epata veya oku lembeleka una wa fisa. Noke va tiukila  kolonjo viavo, pole vana va sumua va sukila vali elembeleko. Omo liaco, Lekisa onjongole yoku va kuatisa. Momo Embimbiliya li popoia okuti, “Ekamba li sola olonjanja viosi, kuenje li linga manjove koloneke viohali.” (Olosapo 17:17) Tu sukila oku lembeleka vana va fisa osimbu va sukila ekuatiso lietu.—Tanga 1 Va Tesalonike 3:7.

¹⁸ Olonjanja vialua, omunu umue o pondola oku yeva esumuo vapuluvi a likasi, poku yeva ocisikilo cimue, poku tala alitalatu, poku linga ovopange, poku yeva elemba limue, ale ekalo liotembo liunyamo okuti, vi u ivaluisa omunu wa fa. Eci ocibumba cimue ci linga ovina vimue lika waye, ndeci oku enda kohongele yimbo, Kocipito Conjivaluko, esumuo liaye li livokiya calua. Manji umue ulume ocimbumba wa popia hati: “Nda kũlĩhĩle okuti ka ivaluka eteke liolohuela vietu lika wange ka ci kaleluka. Pole, keteke liaco vamanji va sokiya lioku lia pamosi lakamba vange oco si ka kaile ulika.”

¹⁹ Ivaluka okuti vana va sumua omo lioku fisa, va sukila ekuatiso vapuluvi osi. Manji Junia hati: “Oku kala lakamba kumue lavamanji vapuluvi hana okuti ka mua kongelele eteke limue li likasi, ci kuatisa calua. Apuluvi aco a kuete esilivilo lialua kuenda a lembeleka calua.” Ocili okuti, ka tu pondola oku malako esumuo liavo ale ulika, pole, tu va lembeleka poku va lingilako ovina vimue. (1 Yoano 3:18) Manji Gaby wa popia hati: “Ndi pandula calua Yohova omo a ecelela okuti, akulu vekongelo vakuacisola va ndi kuatisa vokuenda kuovitangi viosi nda pita lavio. Ovo va ndi kuatisa oku limbuka ocisola ca Yehova.”

20. Momo lie Olohuminyo via Yehova ovio ono ya velapo yelembeleko?

²⁰ Ci lembeleka calua poku kũlĩha okuti Yehova Suku yelembeleko liosi, o kamalako esumo liosi kotembo yepinduko. (Yoano 5:28, 29) Suku wa likuminya hati, “o ka takisa olumue okufa, kuenje Ñala Yehova o puenya asuẽlẽla kovipala viosi.” (Isaya 25:8) Eci otembo yaco yi pitila, omanu ka va ka ‘lila vali lava va lila,’ pole, vosi vongongo va ka ‘yolela lava va yolela.’ (Va Roma 12:15)