1-3. (a) Osamo 147 ya sonehiwa otembo yipi? (b) Nye tu lilongisa Kosamo 147?

TUA siata oku pandiya omunu umue omo lioku tẽlisa ciwa upange umue ale ocituwa caye tu sole. Vosi yetu tu vetiyiwa oku sivaya Suku! Tu sivaya Suku omo liunene waye walua, poku mola ovina vi komohĩsa a lulika kuenda tu u sivaya omo liocisola a lekisa caye kokuetu poku eca omõlaye ndocilumba cocisembi.

² Eci tu tanga Osamo 147, tu limbuka okuti u sonehi walio wa kuata onjongole yalua yoku sivaya Yehova. Eye wa vetiyavo omanu vakuavo oku sivayela kumosi Suku.​—Tanga Osamo 147:1, 7, 12.

³ Ka tua kũlĩhĩle onduko yusonehi Wosamo 147. Citava okuti, eye wa kala komuenyo otembo va Isareli va tiukila ko Yerusalãi eci Yehova a va yovola ko Bavulono. (Osamo 147:2) Ukualosamo wa sivaya Yehova omo okuti afendeli Vaye va ponduile vali oku ka fendela kofeka yavo. Ukualosamo wa kuata vali asunga akuavo oku siyaya Yehova. Asunga aco api?  Asunga api o kuete oku “Sivaya Yehova”?​—Osamo 147:1

4. Eci Soma Kuro a yovola va Isareli, va liyeva ndati kuenda momo lie?

⁴ Va Isareli eci va kala ko Bavulono va tala ohali yalua. Vana va va tuala kumandekua va enda oku va pembula loku va popia vati: “Tu imbili cimue ocisungo co ko Siono.” Pole, va Yudea ka va tavele oku imba. Momo o Yerusalãi, yina ya kala ono yavo yesanju, ya nyõliwa. (Osamo 137:1-3, 6) Ovo va sumuĩle calua kuenje va sukilile elembeleko. Pole, ndomo ca popiwile vondaka ya Suku, Yehova wa kuatisa afendeli vaye. Wa ci linga ndati? Kuro Soma yo ko Persia wa yula o Bavuluno kuenda wa popia hati: ‘Yehova wa ñundika oku u tungila onjo ko Yerusalãi.’ Kuro wa sapuilavo va Isareli hati: “U wosi pokati kene o tiamẽla komanu vaye, Yehova Suku yaye a kale kumue laye kuenda a lamaneleko.” (2 Asapulo 36:23) Olondaka viaco via lembeleka calua va Isarele ko Bavulono!

5. Nye Ukualosamo a popia catiamẽla kunene wa Yehova woku tu kayisa?

⁵ Yehova wa lembeleka va Isareli vosi okuti, omunu lomunu. Cimuamue aco Yehova a siata oku linga koleneke vilo. Ukualosamo wa soneha hati, Suku “o sakola ava va teka kovitima kuenje itika apute avo.” (Osamo 147:3) Omo liaco, eci tu vela ale ceci tu sumua tu koleli okuti, Yehova o tu tata. Yehova o sanjukila oku tu lembeleka kuenda o sakula evalo lietu liovutima. (Osamo 34:18; Isaya 57:15) Eye o tu ĩha olondunge kuenda o tu pamisa oco tu tẽle oku yula ovitangi.—Tiago 1:5.

6. Tu kuatisiwa ndati lolondaka Viosamo 147:4? (Tala elitalatu kefetikilo liocipama.)

⁶ Ukualosamo noke yoku vanja kilu wa popia hati, Yehova “o tenda olombungululu viosi” kuenda “viosi o vi tukula olonduko viavio.” (Osamo 147:4) Ukualosamo wa mola olombungululu, pole, ka kũlĩhĩle etendelo liaco. Koleneke vilo, olonoño via kũlĩha okuti vocengele cetu muli olohuluwa vialua violombungululu. Citava okuti, kilu kuli olohuluwa lolohuluwa Vioviengele! Ocili okuti, omanu ka va pondola oku tenda olombungululu, pole Ululiki o pondola. Eye wa kũlĩha olombungululu viosi kuenda o vi tukula olonduko viavio. (1 Va Korindo 15:41) Ndeci Suku a kulĩha cosi catiamẽla kolumbungululu, eye wa kũlĩhavo ovina viosi viatiamela kokuove. Yehova wa kũlĩha onduko yove. Otembo yosi wa kũlĩha a pa o kasi, ndomo o liyevite kuenda ovina o sukila!

7, 8. (a) Nye Yehova a kũlĩha catiamẽla kokuetu? (b) Tukula ulandu umue u lekisa ohenda ya Yehova.

⁷ Yehova wa kũlĩha ovitangi o kasi oku lipita lavio kuenda o kuete unene woku ku kuatisa oku liyaka lovitangi viaco. (Tanga Osamo 147:5.) Pamue o sima okuti ocitangi o kasi oku liyaka laco ka ca lelukile kuenda ku pondola oku ci yula. Suku wa kũlĩha apondolo etu “ivaluka okuti tuneketela.”  (Osamo 103:14) Omo okuti ka tua lipuile, pamue tua siata oku linga ocina cimue ka ca sungulukile olonjanja vialua. Vosi yetu tua yevele ale esumuo omo liovina tua popia, omo lioku kuata onjongole ka ya sungulukile, ale omo lioku kuatela onya vakuetu! Ndaño Yehova hacoko a siata oku linga, pole, wa kũlĩha ciwa eci ci kasi vutima wetu.​—Isaya 40:28.

⁸ Wa limbukile ale ndomo eka lia pama lia Yehova lia ku kuatisa oku yula ovitangi? (Isaya 41:10, 13) kũlĩhĩsa eci ca pita lukundi umue wotembo yosi o tukuiwa hati Kyoko. Eye wa sumuile calua eci a tambula ocikele cokaliye. Pole, manji Kyoko wa limbuka ndati okuti Yehova wa kũlĩha ovitangi viaye? Vekongele liokaliye a ilukila, vamanji valua va kapeleko esumuo liaye. Eye wa liyeva ndu okuti Yehova wa kala oku u sapuila hati: “Ame u sule, a momoko okuti ukundi wotembo yosi, pole, momo vumõlange kuenda wa litumbika kokuange. Njongola okuti o kuata esanju komuenyo momo undingupange yange!” komuenyo wove wa limbukile ale ndomo Yehova a siata oku lekisa okuti, wa kũlĩha ciwa ovina okasi oku pita lavio?

9, 10. Onjila yipi ya velapo ya Yehova yoku tu kuatisa? Tu kula ulandu umue.

⁹ Vosi yetu tu sukila ovina vimue ndeci, okulia, uwalo kuenda onjo. Pamue o sakalala calua omo lioku sima okuti ku ka kuata okulia. Pole, Yehova wa lulika ongongo oco yime okulia kualua kuomanu vosi, kuenda ‘komãla vovikuamanga nda va lila.’ (Tanga Osamo 147:8, 9.) Nda Yehova o tekula ovikuamanga, tua kolelela okuti o ka tu ĩhavo ovina tu sukila.​—Osamo 37:25.

¹⁰ Ocina ca velapo ceci okuti, Yehova o tu ĩha ovina tu sukila oco tu amameko lekolelo lia pama kuenda o tu ĩha “ombembua ya Suku yina ya piãla olondunge viosi.” (Va Filipoi 4:6, 7) Manji umue o tu kuiwa Mutsuo lukãi waye, va limbuka ndomo Yehova a va kuatisa. Eci kofeta yo Japãu kunyamo wo 2011, kua pita ocilunga candunde ovava okalunga, ovo va puluka kolofa poku tilila kolusoka luonjo yavo. Ovikuata vialua va kuatele via nyõleha. Ovo valale vohondo yikuavo kosapalalo yaco okuti ka mua kaile ocinyi kuenda mua talalele calua. Eci kua ca va sandiliya cimue ca ponduile oku va pamisa. Va sanga lika o Anuário yo 2006. Eci manji Mutsuo a yikula elivulu liaco wa sanga okasapi hati, “Os Maiores Tsunamis já Registrados.” Onepa yaco yi lombolola eci catimẽla kocilemawe cimue ca pita ko Sumatra kunyamo wo 2004, ca koka ovilunga viandunde ovava okalunga okuti, via koka enyõleho lialua. Manji Mutsuo lukãi waye va lila calua eci va tanga ovolandu a vamanjetu. Ovo va limbuka okuti Yehova wa va ihã elembeleko va sukilile. Yehova wa va tatavo poku va ĩha ovina va sukilele. Noke vamanji vokolonepa vikuavo kofeka yo Japãu va eca ekuatiso va sukilele. Pole, ocina ca va pamisa calua apasu avamanji va tumiwuile locisoko ca Yehova. Manji Mutsuo wa popia Hati: “Nda limbuka okuti Yehova wa kala letu kuenda wa tu tata.” Ulandu owu u lekisa okuti Suku, tete o tu pamisa konepa yespiritu noke o tu ĩha ovina tu sukila ketimba.

11. Nye tu sukila oku linga oco tu kuatisiwe la Yehova Suku?

¹¹ Yehova o “votola ava va kangisua.” Eye o tu sole kuenda olonjanja viosi o tu kuatisa. (Osamo 147:6a) Tu kuatisiwa ndati lekuatiso li tunda ku Suku? Poku pamisa ukamba wetu laye. Oco tu ci linge, tu sukila oku kala ambombe. (Sofoniya 2:3) Ambombe va kolela okuti Yehova votembo ya sokiyiwa o ka malako ungangala voluali lohali yosi. Yehova o sanjuka calua omanu vaco.

12, 13. Oco tu kuatisiwe la Yehova, nye tu sukila oku yuvula? (b) Yehova o sanjukila velie?

¹² Ocina cikuavo ceci okuti, Suku “o kupuila posi olondingaĩvi.” (Osamo 147:6b) Ka tu yongola okuti ovina viaco vi li pita letu! Tu yogola okuti Suku o lekisa kokuetu  ocisola caye ka ci pui. Omo liaco, tu suvuki eci eye a nyale. (Osamo 97:10) Tu sukilavo oku yuvula evĩho liukahonga. Eci ci lekisa okuti tu sukila oku yuvula ovina viosi vi pondola oku tu vetiya oku ci linga, oku kongelamo oku tala omanu va kasi epolõla haivo va linga ukahonga. (Osamo 119:37; Mateo 5:28) Oku ci linga ka ca lelukile pole, nda tua likolisilako tu ka tambula asumulũho a Yehova.

¹³ Ka tu tẽla oku yula uyaki waco lika wetu. Tu sukila oku kolela ku Yehova. Anga hẽ eye o sanjuka nda tu sanda ekuatiso kovina omanu va siata oku kolela ? Sio,Yehova “ka yolela ongusu yokavalu.” Tu sukila hẽ oku kolela kongusu yetu muẽle ale komanu vakuavo? Yehova“ka sanjukila ovolu ulume.” (Osamo 147:10) Omo liaco, tu amamiko oku likutilila ku Yehova oco a tu kuatise loku pinga kokuaye oco a tu yovole ka kulueya etu. Yehova lalimue eteke a ka kava oku yevelela olohutililo viaco. “Yehova o sanjukila ava vo sumbila, ava va imba ovaso ocisola caye ka ci pui.” (Osamo 147:11) Omo okuti eye ukuacili kuenda o tu sole, tua kolela okuti eye o ka tu kuatisa oku yula olonjongole vietu vĩvi.

14. Ekolelo lipi ukualosamo a kuatele?

¹⁴ Yehova wa likuminya oku tu kuatisa eci tu liyaka lovitangi. Eci va Isareli va tiukila ko Yerusalãi, ukualosamo wa va ivaluisa ndomo Yehova a va kuatisa. Ukualosamo wa popia hati: “O kolisa olomimbiliko violombundi viove, o sumũlũisa omãla vove vovokati kove. O ku ñualisa lovikanjo.” (Osamo 147:13, 14) Ukualosamo wa kuata esanju poku kũlĩha okuti Yehova wa laikele oku kolisa olombundi vio lupale oco a teyuile afendeli vaye. Omo liaco co kuatisa oku kolapo.

15-17. (a) Olonjanja vimue tu liyeva ndati omo liovitangi vietu, pole Yehova o tu kuatisa ndati Londaka yaye? (b) Tukula ulandu umue u lekisa ndomo Embimbiliya li tu kuatisa.

¹⁵ Pamue tu sakalala calua omo liovitangi tu kasi oku liyaka lavio, pole, Yehova o ka tu ĩha olondunge oco tu yule ovitangi viaco. Ukualosamo wa popia hati, Suku “o tuma ocihandeleko caye kilu lieve. Ondaka  yaye yenda lonjanga yalua.” Ukualosamo wa popiavo okuti Suku o lokisa ombundu, ocikokoto, kuenda ociwe. Noke wa pula hati: “Helie o talama lombambi yaye?” Eye wa popia hati, Yehova “o tuma ondaka yaye, o vi yengulula.” (Osamo 147:15-18) Omo okuti Yehova o songuila ociwe lombundu haeye ukualondunge viosi lunene wa velapo, eye o tu kuatisavo oku yula ovitangi.

¹⁶ Koloneke vilo, Yehova o tu songuila Londaka yaye, Embimbiliya. Ukualosamo wa popia hati, ondaka ya Yehova “yenda lonjanga yalua” oco yi tu kuatise. Suku o tu songuila lonjila ya sunguluka kuenda votembo ya sesamẽla. Eye o ci linga lekuatiso Liembimbiliya, lalivulu “ukuenje wa kolelua haeye wa lunguka,” lo JW Broadcasting, lo jw.org, lekuatiso liakulu vekongelo kuenda lia vamanjetu. (Mateo 24:45) Wa limbukile ale komuenyo wove okuti Yehova wa ku songuila “lonjanga”?

¹⁷ Kũlĩhĩsa ulandu wa Manji umue o tu kuiwa Simone wa lombolola ndomo Ondaka ya Suku yokuatisa. Eye wa simĩle okuti ka kuete esilivilo kuenda Yehova ko sanjukilele. Kuenje, eci a sumũile calua, wa likutilila ku Yehova loku u pinga oco o kuatise. Eye wa mamakovo oku lilongisa Embimbiliya. Manji Simone wa popia hati: “Olonjanja viosi eci ndi liyaka locitangi cimue ndi limbuka okuti Yehova o nyĩha ongusu yaye kuenda o ndi songuila.” Eci ca siata oku kuatisa Manji Simone oku kuata ocituwa ca sunguluka.

18. Momo lie tua kolelela okuti Yehova o kasi ocipepi letu kuenda a sunga api tu kuete oku “Sivaya Yehova!”?

¹⁸ Ukualosamo wa kũlĩhĩle okuti pokati kapata osi okilu lieve, Yehova wa nõlelepo lika epata lia va Isareli oco li linge afendeli vaye. Ovo lika va tambuile “ondaka” ya Suku kuenda “ovisila viaye.” (Tanga Osamo 147:19, 20.) Koloneke vilo, tu kuetevo esumũlũho linene lioku tukuiwa londuko ya Suku. Tu kuete esanju lioku kũlĩha Suku, omo lioku kuata ondaka yaye yi tu songuila kuenda ukamba uwa tu kuete laye. Ndeci usonehi Wosamo 147 a linga, tu kuetevo asunga alua oku “Sivaya Yehova!” kuenda oku vetiya vakuetu oku ci lingavo.