YEHOVA SUKU o yongola okuti afendeli vaye va kuata ombembua. Handi vali, eye o yongola okuti pokati kavo pa kala ombembua. Nda va ci linga, vekongelo Liakristão vocili mu kala ombembua. Ombembua yaco ya siata oku vetiya omanu valua oku iya vekongelo.

Ulume umue wa kala ocimbanda kofeka yo Madagaskar, wa limbuka ombembua ya kala pokati Kolombangi Via Yehova kuenje wa popia hati, ‘Nda ndi yongola oku tiamẽla ketavo limue ndi linga Ombangi ya Yehova.’ Noke liotembo yimue wa liwekapo oku fendela olondele, wa linga apongoloko volohuela viaye kuenda wa fetika oku fendela Yehova, Suku yombembua.

Ndeci ulume waco a linga, omanu valua vokuenda kuanyamo va siatavo oku tiamẽla kekongelo Liakristão vocili kuenda va siata oku sanga ombembua va yongola. Pole, Vembimbiliya tu tangamo okuti, “ukuse lalivelo” vekongelo, ci nyõla ukamba kuenda ci nena ovintangi. (Tiago 3:14-16) Embimbiliya li tu ĩha elungulo oco tu yuvule ovitangi kuenda oku pamisa ombembua yetu la vamanji. Tu konomuisi ndomo elungulo liaco lia kuatisa omanu vamue.

“Sia kuatele ukamba uwa la manji umue nda kala oku talavaya laye. Eteke limue eci tua kala oku lihoyisa, omanu vavali va ci mola.”—Manji CHRIS.

“Manji umue ukãi tua enda oku kundila kumosi, wa liwekapo oku enda lame kupange woku kunda. Noke wa liwekapo oku vangula lame. Sia kuatele elomboloko lieci a nõlelapo oku ci linga.”—Manji JANET.

“Tua kala oku sapela votelefone omanu vatatu. Eci umue pokati ketu wosika, nda sima okuti eye wa yika o telefone. Kuenje nda popia olondaka vimue ka via sungulukile viatiamẽla komunu waco votelefone pole, omunu waco puãi ka yikile handi otelefone yaye.”—Manji MICHAEL.

“Vekongelo ndi kasi, akundi vavali votembo yosi va fetika oku kuata ovitangi. Umue pokati kavo wa fetika oku sepula ukuavo. Ovitangi via kala pokati kavo via kala oku sumuisa vamanji vakuavo.”—Manji GARY.

Ovolandu atukuiwa ndeti, ka a lekisa okuti ovitangi viaco via kala vinene. Pole, ovina viaco vi pondola oku kokela esumuo lialua komanu va kasi oku liyaka lovina viaco kuenda oku nyõla ombembua vekongelo. Vamanji vaco va kapako elungulo Liembimbiliya kuenda va tumbulula ombembua. Ovinimbu vipi Viembimbiliya via va kuatisa?

“Ko ka liyenji vonjila.” (Efetikilo 45:24) Yosefe wa eca elungulo ku vahuvaye eci va kala oku tiukila ku isiavo. Nda omunu umue ka tẽla oku li kandangiya konyeño kuenda o tema lonjanga, ocitangi cimue citito o ci tenda okuti cinene. Handi vali, omanu vakuavo va pondola oku tema. Manji Chris wa limbuka okuti ka ca lelukile kokuaye oku kala embombe kuenda oku kuama olonumbi. Eye wa yonguile oku linga apongoloko kuenje wa pinga ongecelo kumanji va lihoyisile pokati. Noke manji Chris wa likolisilako oku likandangiya konyeño yaye. Eci manji a limbuka  okuti manji Chris wa kala oku linga apongoloko eye wa ci lingavo. Cilo ovo va kuete ombembua kuenda va kasi oku vumbila kumosi Yehova.

“Nda ka pa li alungulo ovina vi sokiyiwa vi nyõleha.” (Olosapo 15:22) Eci ekamba lia manji Janet a liwekapo oku vangula laye, Manji Janet wa nõlapo oku kapako ocinimbu eci Cembimbiliya. Noke wa ka sapelele la manji yaco. Manji Janet wa pula ku manji yaco nda wo linga ocina cimue co sumuisa. Kefetikilo lomue pokati kavo wa yonguile oku sapela lukuavo. Pole, osimbu va kala oku sapela levando, va potolola ocitangi caco lombembua. Manji yaco wa limbuka okuti ka kuatele elomboloko liocitangi cimue va lipita laco kosimbu kuenda manji Janet ka lingile lacimue okuti nda ca temisa manji yaco. Noke manji yaco wa pinga ongecelo ku manji Janet kuenje cilo kavali kavo va linga akamba kuenda va kasi oku vumbila kumosi Yehova.

“Nda wa nena ombanjaile yove kutala kuenje wa ivaluka okuti manjove u kuetele ondaka yimue, sia ombanjaile yove ocipepi lutala, kuende. Tete ka lisunguluise la manjove.” (Mateo 5:23, 24) Yesu wa eca elungulo liaco Kohundo yaye a lingila komunda. Manji Michael noke lioku popia olondaka ka via sungulukile kumanji ukuavo, wa yeva esumuo. Eye wa nõlapo oku linga cosi ci tava oco a tetulule ocitangi caco. Noke wa enda kumanji yaco oco a pinge ongecelo kokuaye. Nye ca pita noke? Manji Michael wa popia hati: “Manjange wa nõlapo oku ngecela.” Kuenje va tumbulula ukamba wavo.

“Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo.” (Va Kolosai 3:12-14) Ivaluka akundi vavali votembo yosi va lihoyisa kupange woku kunda? Ukulu umue wekongelo wa va kuatisa locisola oco va limbuke okuti ovina va kala oku linga via kala oku sumuisa omanu vakuavo. Eye wa va ivaluisa okuti ovo va sukilile oku likuatela epandi omunu lukuavo oco va kuatise ekongelo oku kala lombembua. Ovo va tava kuenda va kapako elungulo liaco. Cilo ovo va linga akamba kuenda va siata oku kundila kumosi olondaka viwa.

Elungulo li sangiwa vukanda wa Va Kolosai 3:12-14, li pondola oku ku kuatisa oku lekisa umbombe, oku ecela omunu wa ku sumuisa loku ivalako ocitangi caco. Pole, nye tu sukila oku linga nda ka tu kasi oku tẽla oku ecela omunu wa tu lueyela? Kelivulu lia Mateo 18:15 tu sangako onumbi yimue yi pondola oku tu kuatisa. Ndaño okuti Yesu wa kala oku sapela eci ca tiamẽla kakandu anene pole, eye wa lombolola ovina vimue tu pondola oku linga nda tu kuete ocitangi lamanji umue. Lumbombe tu ka sapela lamanji yaco kuenda oku likolisilako oku tetulula ocitangi caco.

Vembimbiliya mu sangiwa olonumbi vialua vi pondola oku tu kuatisa. Vialua pokati kolonumbi viaco mua kongela oku kolela kespiritu sandu lia Suku oco tu lekise “epako liespiritu.” Ovituwa viaco vievi: “Ocisola, esanju, ombembua, epandi, esunga, ohenda, ekolelo, umbombe kuenda oku likandangiya.” (Va Galatia 5:22, 23) Sokolola kulandu owu. Omakina yimue yi talavaya lika ciwa nda yi kuete ulela. Cimuamue haico okuti, ci ka leluka vali calua oku linga  ukamba lomanu vakuavo nda tua lekisa ovituwa viaco via tunda ku Yehova.

Omunu lomunu pokati ketu o kuete ovituwa via litepa. Tu kuete ovituwa via litepa, onjila ndomo tu tenda ovina kuenda ndomo tu popia. Ovina viaco vi pondola oku nena esanju pokati kukamba u sangiwa pokati ketu. Pole, ovituwa vietu via litepa vi pondolavo oku nena ovitangi pokati ketu. Ukulu umue wekongelo wa loñoloha wa tukula ulandu umue ndomo ovina viaco vi pondola oku pita poku popia hati: “Omunu umue ka vangula calua ci tava okuti ka ci leluka kokuaye oku linga ukamba lomanu vakuavo. Ndaño okuti ovituwa viaco, vi molẽha ndu okuti ka vi kuete esilivilo pole, vi pondola oku koka ovitangi.” Ove hẽ, o tava okuti pokati komanu vana va kuete ovituwa vialitepa lalimue eteke pa ka kala ukamba uwa? Tu konomuisi ovolandu ovapostolo vavali. Eci tu sokolola ku Petulu citava okuti, tu sima komunu umue okuti olonjanja viosi o popia ovina vi kasi vutima waye. Pole, eci tu sokolola ku Yoano citava okuti, tu sokolola kumanji umue ukuacisola okuti osimbu handi ka popele ondaka yimue o sokolola ovina a popia ale vievi a ka linga. Petulu la Yoano va kuata ovituwa vialitepa. Pole, va talavaya kumosi poku vumba Yehova. (Ovilinga 8:14; Va Galatia 2:9) Ovina viaco vi pondolavo oku pita letu koloneke vilo. Akristão va kuete ovituwa via litepa, va pondola oku talavayela pamosi locisola.

Pole, nye ci popiwa nda umue vekongelo o kasi, wa popia ale wa linga ovina vimue via ku sumuisa? Ci kuete esilivilo oku ivaluka okuti, ndeci Kristu a fila manji wa ku lueyela eye wa ku filavo kuenda o yongola okuti  ove o lekisa ocisola kumanjove . (Yoano 13:34, 35; Va Roma 5:6-8) Ka ca sungulukile oku kuata ovisimĩlo viokuti ku kuata vali ukamba lomunu waco ale ku sapela vali laye. Omo liaco, lipula ndoco: ‘Anga hẽ manjange o kasi oku linga ovina vimue okuti ka vi litava lovihandeleko via Yehova? O kasi hẽ oku ndi sumuisa locipango? Ale tu kuete lika ovituwa via litepa? Anga hẽ eye o kuete ovituwa vimue viwa okuti ndi pondola oku vi setukula?

Nda eye o sole oku vangula calua okuti ove ci sule, momo lie ku talavayela laye kupange woku kunda loku limbuka ovina o pondola oku lilongisa kokuaye? Nye ci popiwa nda okuti eye o kuete ocituwa coku eca okuti ove ci sule? Wa siata hẽ oku limbuka esanju li tunda koku eca ombanjaile yimue komunu umue wa kuka, komunu o vela ale komunu umue o kuete esukila limue? Anga hẽ o lilongisila komunu waco ndomo o pondola oku kuata ocituwa coku eca? Ndaño okuti, ove kuenda manji ukuavo vu kuete ovituwa vialitepa o pondola oku tiamisila utima wove kovituwa viaye viwa. Ndaño okuti, ka wa kuateli ukamba uwa kosimbu, vu pondola oku kala akamba vawa. Ovina viaco vi ka ku kuatisi oku kuata ombembua pokati kene kuenda vekongelo.

Kocita catete kua kala vamanji vavali akãi va tukuiwa hati, Euodia kuenda Suntuke. Ovo va kuata ovituwa vialua via litepa pole upostolo Paulu wa va vetiya oco “va kuate utima umuamue vu Ñala.” (Va Filipoi 4:2) Etu tu yongolavo oku fendela Yehova kumosi la vamanjetu kuenda oku kuata ombembua vekongelo.

Momo lie tu sukilila oku siapo lonjanga ovisimilo ka via sungulukile viatiamẽla komanu vakuavo? Tu pondola oku sokisa ovisimĩlo viaco ndowangu u tundila pokati kolonelẽho via fina. Nda ka tua tukũile owangu waco, u nyõla olonelẽho viaco. Cimuamue haico okuti, nda tua ecelelela okuti  ovisimĩlo ka via sungulukile vi livokiya, ci pondola oku koka ovitangi vekongelo. Pole, nda tu sole Yehova kuenda vamanji tu ka likolisilako oco tu teyuile ombembua vekongelo.

Eci tu likolisilako oku linga ombembua lomanu vakuavo, tu ka limbuka okuti pokati ketu ovina vi ka tunda ciwa. Ombangi yimue ya Yehova wa lipita lulandu waco. Vulandu waye wa popia hati: “Nda limbuka okuti manji umue wa enda oku ndi tata ndu okuti ndi mola utito. Ovina viaco via enda oku ndi kokela onyeño yalua. Onyeño yange ya fetika oku livokiya. Kuenje nda sokolola ndoco: ‘Nda eye ka lekisa esumbilo kokuange si lekisavo esumbilo kokuaye.’”

Noke manji yaco wa sokolola kovituwa viaye. Eye wa popia hati: “Nda fetika oku sokolola kovituwa viange ka via sungulukile kuenda nda yeva esumuo lialua. Nda limbuka okuti, nda sukilile oku linga apongoloko kovisimĩlo viange. Noke yoku likutilila ku Yehova catiamẽla kocitangi caco, nda landa ombajaile yimue yitito kuenda nda soneha okokanda kamue katito oco ndi pinge ongecelo omo lioku lekisa ovituwa vimue ka via sungulukile. Noke, tua likuata kapepe kuenda tua nõlapo oku ivalako ovina viosi via lipita letu. Tunde keteke liaco ka tua la kuata vali ovitangi.”

Omanu vosi va sukila ombembua. Pole, ovisimĩlo ka via sungulukile ale epela vi pondola oku vetiya omanu oku linga ovina ka via sungulukile. Ovina viaco via siata voluali. Pole, eci hacoko Yehova a lavoka kafendeli vaye. Pokati Kolombangi via Yehova, pa sukila oku kala ombembua kuenda omunga. Yehova wa vetiya Paulu oku sonehela Akristão oco va ‘endaende lesunguluko ndeli va kovongiwila” lalio. Eye wa va vetiya oku ci linga ‘lumbombe walua, loku omboka, lepandi, loku pandikisa omunu lukuavo locisola, loku kuata ombembua omunu lukuavo, loku likolisila oku likuata omunga, yina va tambula omo liespiritu sandu.’ (Va Efeso 4:1-3) ‘Ombembua kuenda omunga’ yi sangiwa pokati kafendeli va Yehova, vi kuete esilivilo lia velapo. Omo liaco, omunu lomunu pokati ketu o sukila oku likolisilako oku pamisa ukamba wetu kuenda oku potolola ovitangi viosi vi pondola oku iya pokati ketu.