1-3. Ovina vipi via pita pokati ka Euodia la Suntuke? Tu pondola oku yuvula ndati ovitangi viaco? (Tala ociluvialuvia kefetikilo liocipama.)

TUA sumbila calua Embimbiliya momo tua kũlĩha okuti olio Elivulu limue lia velapo lia Suku. Vembimbiliya mu sangiwa alungulo a pondola oku tu kuatisa oku yuvula ovitangi kuenda li tu lungulavo eci tu linga ovina ka via sungulukile. Tu pondola oku kapako ndati alungulo aco? Sokolola ulandu wakãi vavali olombuavekua kocita catete okuti Euodia kuenda Suntuke. Embimbiliya li lombolola okuti ovo va lihoya pokati pole, ka li lombolola esunga liaco. Tu kũlĩhĩsi ovina vimue via pita lavo.

² Citava okuti Euodia wa laleka vamanji vamue oco va ka lile kumosi. Pole, ka lalekele Suntuke. Noke, eci Suntuke a mola okuti omanu va lalekiwa va kala lesanju omo liovina via pita kondalelo yaco, wa temele calua. Citava okuti eye wa sokolola ndoco: ‘Si tava kesunga lieci Euodia ka ndi lalekele! Momo eye ekamba liange lia velapo.’ Suntuke wa kala oku sima okuti Euodia ko sole kuenda ko kapeleko. Omo liaco, Suntuke wa lalekavo omanu vamue oco va lile kumosi konjo yaye pole, ka lalekele Euodia! Ocitangi caco, ca nena etepiso komanu vakuavo  vekongelo. Embimbiliya li lekisa okuti Paulu wa lungula vamanji vaco vavali kuenda wa va vetiya oco pokati kavo pakale ombembua. Citava okuti, ovo va yeva kelungulo liaco kuenje va amamako oku fendela Yehova lesanju.​—Va Filipoi 4:2, 3.

³ Koloneke vilo citava okuti vakongelo etu, olonjanja vimue vamanji va siatavo oku kuata ovitangi pokati kavo. Pole, nda tua kuama olonumbi vi sangiwa Vembimbiliya, tu pondolavo oku tetulula ovitangi vi sangiwa pokati ketu. Ocili okuti, tu pondola oku yuvula ovitangi viaco. Eci tu pokola kovina Embimbiliya li popia, tu lekisa okuti, tua kolela kuenda tua velisapo Elivulu lia Yehova.​—Osamo 27:11.

4, 5. Elungulo lipi Ondaka ya Suku li tu ĩha liatiamẽla koku lava ovisimĩlo vietu?

⁴ Ocili okuti, ka ca lelukile oku lava ovisimĩlo vietu. Citava okuti, pamue tu sumua ale tu kuata onyeño omo liomunu umue wa tu popia lãvi. Olonjanja vimue va tu tata lãvi omo liovituwa vietu, ekova ale ekalo liomuenyo wetu. Citava okuti, ovina viaco vi pondola oku tu sumuisa calua capiãla enene nda ovina viaco vĩvi, via popiwa la manji umue. Elungulo lipi tu sanga vondaka ya Suku okuti li pondola oku tu kuatisa?

⁵ Yehova wa kũlĩha ovina vi pondola oku pita lomanu nda ka va lavele ovisimĩlo viavo. Eci tu sumua ale ceci tu kuata onyeño, tu popia ovina vimue okuti noke tu livela. Vembimbiliya, Yehova o tu longisa ndomo tu pondola oku lava ovisimĩlo vietu poku popia hati: “Ku ka teme lonjanga.” Ocili okuti, tu pondola oku yuvula ovitangi vialua nda tua pokola kalungulo atiamẽla koku yuvula oku tema lonjanga! (Tanga Ukundi 7:9; Olosapo 16:32.) Embimbiliya li tu sapuilavo okuti tu sukila oku ecela omanu vakuavo. Yesu wa popia hati, nda ka tu ecela omanu va tu lueyela Yehova ka ka tu ecelavo. (Mateo 6:14, 15) Anga hẽ o sukila oku kuata epandi kuenda oku lekisa onjongole yoku ecela omanu vakuavo?

6. Nye ci pondola oku pita letu nda ka tua lavele ovisimĩlo vietu?

⁶ Nda ka tua lavele ovisimĩlo vietu, tua mamako oku kuata onyeño kuenda oku kuatela ocikumbiti omunu umue. Citava okuti pamue tu vetiyavo omanu vamue vekongelo oco va kuatevo ovisimĩlo viaco. Ocili okuti, nda tu likembisa okuti ka tu kuetele onyeño ale ocikumbiti omunu umue, omanu vakuavo va ka limbuka ekalo lietu. Nda tua kuata ocituwa caco, omanu vakuavo ka va ka lianja letu. (Olosapo 26:24-26) Akulu vekongelo va pondola oku tu kuatisa lolonumbi Viembimbimbiliya oco tu yuvule onyeño locikumbiti kuenda oku ecela omanu vakuavo. (Ovisila 19:17, 18; Va Roma 3:11-18) Eci akulu vekongelo va tu lungula, anga hẽ tu kuama olonumbi Vielivulu lia Yehova?

7, 8. (a) Yehova wa siata oku songuila ndati afendeli vaye? (b) Olonumbi vipi tu pondola oku sanga Vembimbiliya kuenda momo lie tu sukilila oku vi pokola?

⁷ Koloneke vilo, Yehova o songuila omanu vana va panga onepa kocisoko caye palo posi loku va longisa. Ndamupi? Eye wa ci linga poku nõla Kristu oco a kale “utue wekongelo” kuenda Kristu wa nõlavo “ukuenje wa kolelua haeye wa lunguka” oco a longise kuenda oku songuila afendeli va Suku. (Va Efeso 5:23; Mateo 24:45-47) Ndeci ca  pita losungu yakulu kocita catete, ukuenje wa kolelua wa kapako Embimbiliya momo olio Ondaka ya Suku. (Tanga 1 Va Tesalonike 2:13.) Olonumbi vipi tu pondola oku sanga Vembimbiliya?

⁸ Embimbiliya li tu vetiya oku endaenda kolohongele olonjanja viosi. (Va Heveru 10:24, 25) Olohongele viaco, vi vetiya vosi yetu oku tava kovina Embimbiliya lilongisa. (1 Va Korindo 1:10) Li tu vetiyavo oku ‘sandiliya tete Usoma.’ (Mateo 6:33) Embimbiliya li tu ĩha olonumbi vi tu kuatisa oku kunda konjo lanjo, volokololo kuenda kovitumãlo viosi ku sangiwa omanu. (Mateo 28:19, 20; Ovilinga 5:42; 17:17; 20:20) Olio li songuila akulu vekongelo oco va amameko oku yelisa ekongelo. (1 Va Korindo 5:1-5, 13; 1 Timoteo 5:19-21) Handi vali, Embimbiliya li tu sapuilavo okuti, tu sukila oku amamako oku liyelisa ketimba kuenda oku yuvula ovisimĩlo lovituwa Yehova anyãle.​—2 Va Korindo 7:1.

9. Helie Yesu a nõla oco a tu kuatise oku kuata elomboloko Liondaka ya Suku?

⁹ Omanu vamue va sima okuti ka va sukila omunu umue o va lomboluila ovina vi sangiwa Vembimbiliya. Pole, tunde kunyamo wo 1919, Yesu wa siata oku talavaya “lukuenje wa kolelua haeye wa lunguka” oco a kuatise afendeli va Suku oku kuata elomboloko liovina vi sangiwa Vembimbiliya kuenda oku pokola kolonumbi viaco. Nda tua pokola kolonumbi Viembimbiliya, tu ka kuatisa oku yelisa ekongelo, oku kuata ombembua kuenda oku likuata omunga. Omo liaco, li pula ndoco: ‘Anga hẽ ndi ka amamako oku kolela ku Yesu kuenda oku pokola kolonumbi via siata oku eciwa lukuenje wa kolelua?’

10. Elivulu lia Esekiele li lombolola ndati ocisoko ca Yehova co kilu?

¹⁰ Lekuatiso Liembimbiliya, tu lilongisa okuti afendeli va Yehova kilu va sokiyiwa ciwa. Esekiele vocinjonde wa mola Yehova oku endisa ekãlu limue lia ponduile oku ñualela lonjanga oku li yongola oku enda. (Esekiele 1:4-28) Ekãlu liaco li lomboloka ocisoko ca Suku kilu, okuti va pokola kolonumbi viaye. Ocisoko caco ca siatavo oku kuatisa ocisoko caye palo posi. Sokolola kapongoloko a siata oku lingiwa vocisoko ca Suku vokuenda kuanyamo ekũi a sulako. Ivaluka okuti Yehova eye wa siata oku songola apongoloko aco. Omo liaco, ndopo Yesu kumue lovangelo va ka kundula oluali lulo lua vĩha. Lomue vali o ka sepula onduko ya Yehova ale oku popia lãvi onjila yaye yoku viala!

11, 12. Nye ocisoko ca Yehova ca siata oku linga koloneke vilo via sulako?

¹¹ Sokolola ovina ocisoko ca Yehova ca siata oku linga koloneke vilo via sulako. Upange woku tunga. Vamanji valua va siata oku talavaya kupange woku tunga ombala yokaliye Yolombangi Via Yehova yi sangiwa volupale luo Warwick ko Nova Yorke kofeka  yo Estados Unidos. Vamanji vakuavo, va siata oku lieca olumue kupange woku tunga Olonjango Viusoma kuenda olofiliale. Vamanji vaco va siata oku songuiwa Loseketa yi Songuila Upange Woku Tunga. Tu eca olopandu ku vamanji valua va lieca olumue kupange waco woku tunga! Afendeli va Yehova kolonepa viosi va likolisilako oku eca ovina va kuete oco va kuatise kupange waco. Yehova o sumũlũisa afendeli vaye omo lioku lekisa umbombe kuenda ekolelo.​—Luka 21:1-4.

¹² Upange woku pindisa. Yehova o sanjukila oku pindisa afendeli vaye. (Isaya 2:2, 3) Sokolola olosikola vialua tu kuete vioku pindisa. Vimue pokati kolosikola viaco vievi: Osikola Yakundi Votembo Yosi, Osikola Yakundi Vusoma, Osikola yo Gileada, Osikola ya Vamanji va Iñila Ndopo ko Betele, Osikola ya Vamanji va Nyula Akongelo Lakãi Vavo, Osikola Yakulu Vekongelo, Osikola Yupange Wusoma, kuenda Osikola Yocisoko Cakulu vo ko Betele Lakãi Vavo. Vonumbi yetu yo Internet, jw.org, tu pondola oku sangamo Embimbiliya kuenda alivulu akuavo a sandekiwa valimi alua. Vonumbi  yaco, mu sangiwavo ovipama vi likasi vi pondola oku kuatisa omãla, apata kuenda mu sangiwavo ovipama vikuavo viokaliye via sandekiwa. Wa siata hẽ oku talavaya lo jw.org, kupange woku kunda kuenda kefendelo liene liepata?

13. Ocikele cipi afendeli va Yehova va kuete?

¹³ Tu kuete esumũlũho linene lioku panga onepa kocisoko ca Yehova kuenda oku kũlĩha eci eye a tu yonguila! Omo liaco, ka tu sukila lika oku kũlĩha ovina vi sanjuisa Suku, pole, tu kuetevo ocikele coku pokola kokuaye kuenda oku linga ovina via sunguluka. Ndaño okuti omanu valua va sanjukila oku linga ovina vĩvi, etu tu sukila oku “suvuka evĩho,” ndeci Yehova a siata oku linga. (Osamo 97:10) Tu yuvuli ovisimĩlo viomanu vana okuti “cĩvi vati, Ciwa, lava va tukula ciwa vati, Cĩvi.” (Isaya 5:20) Omo okuti tu yongola oku sanjuisa Yehova tu sukila oku likolisilako oku liyelisa kolonepa viosi. (1 Va Korindo. 6:9-11) Ovina Yehova a tu sapuila Vembimbiliya vi pondola oku tu kuatisa. Etu tu u kuetele ocisola, kuenda tu yongola oku lekisa ekolelo kokuaye. Tu pondola oku pokola kolonumbi viaye eci tu sangiwa konjo, vekongelo, kupange woku sanda eteku, kosikola kuenda kovitumãlo vikuavo. (Olosapo 15:3) Sokolola olonepa vimue tu sukila oku lekisa ekolelo lietu ku Suku.

14. Olonjali vi pondola oku kolela ndati Yehova?

¹⁴ Ndomo tu pindisa omãla vetu. Lekuatiso Liembimbiliya Yehova wa siata oku eca olonumbi ndomo olonjali vi pondola oku pindisa omãla vavo. Akristão vocili, va sukila oku kuata utate oco ka va ka yapuisiwe lovisimĩlo violuali lulo. (Va Efeso 2:2) Kovitumãlo vimue isia umue o pondola oku sokolola ndoco: ‘Ukãi eye o kuete ocikele coku pindisa omãla.’ Pole, Embimbiliya li vetiya olonjali oku longisa omãla vavo ovina viatiamẽla ku Yehova. (Va Efeso 6:4) Olonjali vina okuti vi sole Yehova vi yongola okuti omãla vavo va kuata ukamba uwa laye, ndeci Samuele a linga eci a kala umãlehe.​—1 Samuele 3:19.

15. Tu pondola oku kolela ndati Yehova eci tu nõla onjila yimue komuenyo wetu?

¹⁵ Ndomo tu nõla onjila tu yongola oku kuama. Osimbu ka tua nõlele onjila yimue tu kuama komuenyo wetu, tu sukila oku kũlĩha ovisimĩlo via Yehova catiamẽla konjila yaco, momo tu yongola oku lekisa ekolelo kokuaye. Embimbiliya kuenda ocisoko ca Yehova vi pondola oku tu kuatisa. Koloneke vilo, olonjali vimue okuti vi kasi kofeka yikuavo, vi nõlapo oku tuma omãla vavo kofeka yavo oco va ka kale lepata liavo. Olonjali viaco vi amamako oku kala vofeka yaco oku talavaya oco va kuate olombongo. Ocili okuti, omunu lomunu eye o nõla onjila a kuama, pole, olohueli vi sukila oku lipula ndoco: ‘Cipi ocisimĩlo ca Yehova catiamẽla konjila tua kuama?’ (Tanga Va Roma 14:12.) Ci kuete esilivilo lia velapo oku sokolola  ovina Embimbiliya li popia osimbu ka tua nõlele onjila tu kuama catiamẽla kepata lietu kuenda kupange wetu. Tu sukila ekuatiso lia Isietu momo, ka tu pondola oku suñamisa olonjila vietu.​—Yeremiya 10:23.

16. Eci omõla umue a citiwa, nye ina yaco a nõlapo oku linga? Nye co kuatisa oku nõla onjila ya sunguluka?

¹⁶ Ohueli yimue ya ilukila kofeka yikuavo, va cita omõla, kuenje va linga esokiyo lioku tuma omõlaco kofeka yavo oco yi ka tatiwe la inakulu yaye. Pole, vokuenda kuotembo, ukãi wa fetika oku lilongisa Embimbiliya Lolombangi Via Yehova. Eye wa lilongisa okuti eye o kuete ocikele coku longisa omõlaye ovina viatiamẽla ku Yehova. (Osamo 127:3; Olosapo 22:6) Ina yaco wa likutilila ku Yehova ndeci Embimbiliya li vetiya oku linga, kuenje wa pinga ekuatiso lioku linga ovina via sunguluka. (Osamo 62:7, 8) Eye wa sapelavo catiamẽla kocitangi caco la manji wa enda oku u longisa Embimbiliya kuenda lomanu vakuavo vekongelo. Ndaño okuti epata liaye kuenda akamba vaye vo sapuila oco a tume omõlaye ku inakulu yaye, eye wa nõlapo oku linga eci ca sunguluka. Ulume waye wa limbuka ndomo vamanji va enda oku kuatisa ukãi waye kuenda omõlaye. Ovina viaco vio komõhisa calua, kuenje wa fetika oku lilongisa Embimbiliya loku endaenda kolohongele kumue lepata liaye. Sokolola esanju ina yaco a kuata poku limbuka okuti Yehova wa tambulula ohutililo yaye!

17. Eci tu kasi oku longisa Embimbiliya komunu umue olonumbi vipi tu sukila oku kuama?

¹⁷ Ndomo tu pokola kolonumbi. Nda tua kolela Suku, tu ka pokola kolonumbi tua siata oku tambula vocisoko caye. Kũlĩhisa ovina tu sukila oku linga eci tu fetika oku longisa omunu umue velivulu Embimbiliya li Longisa Nye? Tua siata oku vetiyiwa oco okuti, vokuenda kuakukutu amue tu kuatisa omunu tu longisa Embimbiliya oku kũlĩha ovina viatiamẽla kocisoko ca Yehova. Tu pondola oku talavaya lovideo losapi hati: Nye ci Lingiwa Vonjango Yusoma? kuenda o Brochura losapi hati: Velie va Kasi Oku Linga Ocipango ca Yehova Koloneke Vilo? Eci tu mala oku longisa velivulu Embimbiliya li Longisa tu pondola oku kuatisa ondonge ‘oku pamisa ekolelo liaye’ poku u longisa velivulu “Kali Vocisola ca Suku” ndaño okuti eye wa papatisiwa ale. (Va Kolosai 2:7) O kasi hẽ oku pokola kolonumbi evi via eciwa locisoko ca Yehova?

18, 19. Asunga api tu kuete oku eca olopandu ku Yehova?

¹⁸ Tu kuete asunga alua oku eca olopandu ku Yehova! Esunga limue lieli okuti, “vokuaye tu kuete omuenyo, tu lisenga senga, tu kasi komuenyo.” (Ovilinga 17:27, 28) Eye wa tu ĩhavo Elivulu liaye okuti, Embimbiliya. Ndeci Akristão vo ko Tesalonike va linga, tu sukilavo oku sumbila ombajaile eyi momo mu sangiwa esapulo li tunda ku Suku.​—1 Va Tesalonike 2:13.

¹⁹ Embimbiliya lia siata oku tu kuatisa oku amẽla ku Suku kuenda eye amẽlavo kokuetu. (Tiago 4:8) Tu eca olopandu ku Isietu omo wa siata oku tu laleka oco tu linge onepa kocisoko caye! Tua siata oku kuata esanju ndeli liukualosamo wa soneha hati: “Panduli Yehova, momo uwa, momo ohenda yaye ka yi pui.” (Osamo 136:1) Kovinimbu viosi viosamo eyi, ukualosamo wa pitulula olondaka viokuti: “Ohenda yaye ka yi pui.” Omo liaco, nda tua kolela Yehova loku pokola kolonumbi eye a siata oku tu ĩha lekuatiso liocisoko caye, eye o ka tu ĩha omuenyo ko pui kuenda o ka lekisa ohenda yaye otembo ka yi pui!