1. Nye tu yeva vutima omo liekolelo lietu?

EKOLELO ocituwa cimue ka ci sangiwa komanu vosi. (2 Va Tesalonike 3:2) Pole, Yehova eca ekolelo komanu vosi vo fendela. (Va Roma 12:3; Va Galatia 5:22) Tu kuete esanju lialua momo Yehova wa siata oku tu ĩha ekolelo!

2, 3. (a) Tu kuatisiwa ndati omo lioku kuata ekolelo? (b) Apulilo api tu konomuisa?

² Yehova wa eca Omõlaye wongunga okuti wosi o kolela kokuaye o pondola oku kuata ongecelo yakandu. Eci ca ecelela okuti omanu va kuata ukamba la Yehova kuenda oku kala komuenyo otembo ka yi pui. (Yoano 6:44, 65; Va Roma 6:23) Ocili okuti, Yehova o tu kuetele ohenda yalua! Ndaño okuti tua kuakandu kuenda tu sesamẽla oku fa, Yehova wa limbuka okuti tu pondola oku linga ovina viwa. (Osamo 103:10) Eye wa tu kuatisa oku lilongisa olondaka viwa viatiamẽla ku Yesu kuenda kocilumba caye. Eci tua fetika oku lekisa ekolelo ku Yesu kuenda oku kuama ongangu yaye, tua fetika oku tiamisila utima wetu komuenyo ko pui!​—Tanga 1 Yoano 4:9, 10.

³ Nye tu pondola oku lilongisa vali catiamẽla kekolelo? Anga hẽ oku  kũlĩha ovina Suku a tu lingila kuenda evi a ka tu lingila kovaso yoloneke, ci lomboloka okuti tu kuete ale ekolelo? Tu kũlĩhĩsi ovina vikuavo tu sukila oku linga.

4. Eci tu kuata ekolelo tu kuatisiwa ndati?

⁴ Eci tu lekisa ekolelo ku Yehova kuenda ku Yesu, ka tu kũlĩha lika ovina va tu lingila ale vievi va ka tu lingila kovaso yoloneke. Pole, tu kuatavo onjongole yoku ambata omuenyo wetu ndomo va tu longisa. Tu kuete esanju lioku kuatisa omanu oco va kũlĩhe Yehova la Yesu. Upostolo Paulu wa popia hati: “Momo nda o sapula ondaka lomẽla wove okuti, Yesu eye Ñala, loku kolela lutima wove okuti Suku wo pindula kuava va fa, o popeliwa. Momo lutima omunu o lekisa ekolelo li tuala kesunga, puãi lomẽla o sapula ondaka yi tuala kepopelo.”​—Va Roma 10:9, 10; 2 Va Korindo 4:13.

5. Momo lie ekolelo li kuetele esilivilo, kuenda nye tu sukila oku linga oco tu kuate ekolelo lia pama? Tukula ulandu umue.

⁵ Ocili okuti, oco tu kuate omuenyo ko pui voluali luokaliye lua Suku palo posi, tu sukila oku kuata ekolelo kuenda oku amamako oku li pamisa. Ekolelo li sokisiwa locikũla cimue. Oco ocikũla cimue ci amameko oku kula, tu sukila oku ci tapela olonjanja viosi. Nda ka tua kapeleko ovava a tẽla, ocikũla caco ci pondola oku kukuta. Cimuamue haico okuti tu sukilavo oku kũlĩhĩsa okuti tua “kolapo kekolelo” kuenda ekolelo lietu li kasi oku amamako “oku livokiya calua.”​—Tito 2:2; 2 Va Tesalonike 1:3; Luka 22:32; Va Heveru 3:12.

6. Ukanda wa Va Heveru 11:1 u lombolola ndati olonepa vivali vioku lekisa ekolelo?

⁶ Kukanda wa Va Heveru 11:1, Embimbiliya li lekisa eci ci lomboloka ekolelo. (Tanga.) (1) Ekolelo “ociseveto covina vi lavokaiwa.” Vovina tu ‘lavoka’ mua kongela olohuminyo via Suku, viatiamẽla kovaso yoloneke. Etu tua kolela okuti ungangala ka u ka kalako vali kuenda tu lavoka oluali luo kaliye palo posi. (2) Ekolelo “uvangi wovina” ale uvangi wa koleliwa, wovina “ka vi molaiha.” Tua kũlĩha okuti, Yehova Suku, Yesu Kristu, Ovangelo, kuenda Usoma wa tumbikiwa kilu, vi kasiko muẽle ocili, ndaño okuti ka tua la vi mola. (Va Heveru 11:3) Tu pondola oku lekisa ndati ekolelo kolohuminyo via Suku kuenda kovina ka tu pondola oku mola? Tu pondola oku ci linga poku ambata omuenyo umue u li tava lolonumbi via Suku kuenda kovina tu linga levi tu popia.

7. Ongangu ya Noha yi tu kuatisa ndati oku kuata elomboloko lioku kuata ekolelo? (Tala ociluvialuvia kefetikilo liocipama.)

⁷ Nye tu pondola oku lilongisa ku Noha catiamẽla kekolelo? Upostolo Paulu wa popia eci catiamẽla ku Noha “noke yoku tambula elungulo lia Suku liovina ka vi muiwa, wa lekisa esumbilo ku Suku kuenda wa tunga ocimbaluku oco a popele vakuanjo yaye.” (Va Heveru 11:7) Omo okuti Noha wa lekisile ekolelo kovina Yehova o sapuila, eye wa tunga ocimbaluku cina cinene. Citava okuti, omanu va lisunguile laye vo pula esunga lieci a kala oku tungila ocimbaluku caco. Tua kolela okuti Noha wa eca etambululo kokuavo. Embimbiliya li lekisa okuti Noha “wa kunda esunga.” (2 Petulu 2:5) Eye wa lungula omanu okuti Suku o ka nena etande oco a kundule olondigaĩvi. Citava okuti, Noha wa popia  ndomo Yehava o sapuila hati: ‘Nda likapela muẽle oku nyõla oviendalomuenyo; momo oluali lue yuka etombo liavio,’ kuenda “ndokisa kilu lieve etande liovava; nyõla oviendalomuenyo viosi vi kasi lefuimo liomuenyo vemẽhi lilu; cosi ci kasi kilu lieve ci fa.” Noke Noha wa lombolola komanu ovina va sukilile oku linga oco va popeliwe. Yehova wa handeleka Noha ndoco: ‘Iñili vocimbaluku.’​—Efetikilo 6:13, 17, 18.

8. Nye Tiago a popia catiamẽla kekolelo?

⁸ Tiago wa sonehavo eci catiamẽla kekolelo. Citava okuti, wa ci linga noke liotembo yimue eci upostolo Paulu a sonehela va Heveru. Tiago wa soneha ndoco: “Ndekise ekolelo liove ka li kuete ovilinga kuenje ame hu lekisa ekolelo omo liovilinga viange.” (Tiago 2:18) Eye wa lombolola okuti oco tu kuate ekolelo, ka tu sukila lika oku tava kocina cimue. Momo olondele vi tavavo okuti kuli Suku, pole, ka va kolela kokuaye. Ovo va siata oku tamalãla la Yehova. (Tiago 2:19, 20) Handi vali, omunu umue o kuata ekolelo nda o linga ovina vi sanjuisa Suku poku linga ovopange awa ale ovilinga viwa. Eci oco Avirahama a linga. Tiago wa soneha ndoco: “Avirahama isietu ka tendiwile hẽ ndukuesunga mekonda liovilinga eci a lumba omõlaye Isake kutala? Limbuka okuti ekolelo liaye lia talavayela pamosi lovilinga kuenda ekolelo liaye lia kanguiwa omo liovilinga.” Tiago wa popiavo hati, ekolelo ka li kuete ovilinga ka likuete esilivilo, poku lekisa okuti: “Ndeci etimba ka li kuete efuimo lia fa, ekolelo ka li kuete ovilinga laliovo lia fa.”​—Tiago 2:21-23, 26.

9, 10. Nye ci lomboloka oku lekisa ekolelo Komõla?

⁹ Noke lioku pita 30 kanyamo, Yoano wa soneha Evanjeliu li kuete onduko yaye kuenda ovikanda vitatu. Ndeci ca pita lasonehi vakuavo Embimbiliya, Yoano wa kuatavo elomboloko liekolelo. Olonjanja vialua, vovina Yoano a soneha wa tukula ondaka yo Helasi okuti olonjanja vimue kelimi Liongelesi li pongoluiwa okuti, ‘oku lekisa ekolelo.’

¹⁰ Yoano wa lombolola hati: “Wosi o kolela Mõla o kuete omuenyo ko pui; puãi wosi ka pokola ku Mõla ka kuata omuenyo, pole onyeño ya Suku yi kala ño laye.” (Yoano 3:36) Oco tu kolele Omõla, tu sukila oku pokola ku Yesu. Omo liaco, kolondaka Yoano a soneha, tua limbuka okuti, olonjanja vialua Yesu wa popia hati, oco tu kuate omuenyo ko pui, tu sukila oku kolela kokuaye kuenda ku Isiaye.​—Yoano 3:16; 6:29, 40; 11:25, 26; 14:1, 12.

11. Tu lekisa ndati olopandu ku Yehova omo lioku kũlĩha ocili?

¹¹ Yehova lekuatiso liespiritu sandu liaye, o tu kuatisa oku kuata elomboloko kocili catiamẽla kokuaye kuenda Komõlaye oco ci tu kuatise oku kolela kokuaye. (Tanga Luka 10:21.) Tu lekisa ndati olopandu ku Yehova, omo liovina viosi a siata oku tu lingila? Ka tu ka liwekipo oku pandula Yehova, momo wa ecelela okuti tu kuata ukamba laye lekuatiso lia Yesu okuti, “Usongui wa Velapo haeye Ukuakukanguisa ekolelo lietu.” (Va Heveru 12:2)  Tu sukila oku amamako oku pamisa ekolelo lietu poku likutilila ku Yehova kuenda oku lilongisa Embimbiliya.​—Va Efeso 6:18; 1 Petulu 2:2.

12. Nda tu kuete ekolelo nye tu sukila oku linga?

¹² Tu sukila oku amamako oku lekisa ovilinga vi eca uvangi wokuti tu kuete ekolelo lia pama kolohuminyo via Yehova. Tu pondola oku ci linga poku amamako oku kundila omanu, eci catiamẽla Kusoma wa Suku kuenda oku va kuatisa oco va linge olondonge via Yesu. Tu sukilavo oku linga “eci ciwa komanu vosi, ca piãla enene ku vamanjetu vekolelo.” (Va Galatia 6:10) Tu ci lingavo poku likosilako oku ‘lula omunu wosimbu lovilinga vialio,’ momo ka tu yongola okuti ocina cimue ci nyõla ukamba wetu la Yehova.​—Va Kolosai 3:5, 8-10.

13. Momo lie ci kuetele esilivilo oku “kolela Suku”? Nye Embimbiliya li lombolola catiamẽla kondaka yaco kuenda momo lie?

¹³ Embimbiliya li lekisa ndoco: “Oku sanjuisa Suku ka ku tẽliwa te lekolelo, momo wosi amela ku Suku loku u fendela o sukila oku kolela okuti eye o kasi lomuenyo kuenda eca onima kuava vo sanda lutima wosi.” (Va Heveru 11:6) Embimbiliya li lekisavo okuti: Oku “kolela Suku” oco ocina catate Akristão vocili va sukila oku kuata. Momo ci panga onepa ‘kociseveto.’ (Va Heveru 6:1) Ka tu sukila lika oku lekisa ekolelo, pole, tu sukilavo oku kuata ovituwa vikuavo oco tu kuate ukamba uwa la Yehova kuenda oku amamako oku pamisa ukamba waco.​—Tanga 2 Petulu 1:5-7; Yuda 20, 21.

14, 15. Momo lie oku sokisa ocisola lekolelo ci kuetele esilivilo?

¹⁴ Asonehi Vembimbiliya va tukula ekolelo olonjanja vialua okuti ovituwa vikuavo vi sule. Eci ci lekisa hẽ okuti ekolelo oco ocituwa ca velapo tu sukila oku kuata?

¹⁵ Paulu wa sokisa ekolelo locisola. Eye wa soneha ndoco: ‘Nda ndi kuete ekolelo lioku sondolola olomunda, pole, si kuete ocisola, si cimueko.’ (1 Va Korindo 13:2) Yesu wa popia hati, ‘Ocihandeleko ca velapo’ oku sola Suku. (Mateo 22:35-40) Ocisola ci pondola oku tu kuatisa oku kuata ovituwa vialua vi sanjuisa Suku. Embimbiliya li popia okuti ocisola “ci kolela ovina viosi.” Ocisola ci tu kuatisa oku tava, ale oku kolela kovina viosi  Suku a popia vi sangiwa Vembimbiliya.​—1 Va Korindo 13:4, 7.

16, 17. Nye Embimbiliya li popia catiamẽla kekolelo kuenda ocisola? Ocituwa cipi ca velapo kuenda momo lie?

¹⁶ Ekolelo kuenda ocisola ovituwa vimue vi kuete esilivilo, kuenda asonehi Vembimbiliya va tukula olondaka viaco vivali. Paulu wa vetiya vamanji oku ‘wala ociteyuilo covonete cekolelo kuenda ocisola.’ (1 Va Tesalonike 5:8) Petulu wa soneha eci catiamẽla ku Yesu ndoco: “Ene vu sole Kristu, ndaño ka wa lo moli. Ndaño ene ka vu leti cilo, lopo wa koleli kokuaye.” (1 Petulu 1:8) Tiago wa pulisa ku vamanjaye Akristão olombuavekua hati: “Suku ka nõlele hẽ vana va tendiwa loluali okuti olohukũi, oco va linge olohuasi vekolelo kuenda vakapiñala Kusoma, una eye a likuminyile ku vana vo sole?” (Tiago 2:5) Yoano wa soneha hati, ocihandeleko ca Suku ceci okuti: “Tu kolela onduko Yomõlaye Yesu Kristu kuenda tu lisola pokati.”​—1 Yoano 3:23.

¹⁷ Paulu wa soneha ndoco: “Cilo pa siala vitatu: Ekolelo, elavoko, ocisola; puãi pokati kavio ocisola oco ca velapo.” (1 Va Korindo 13:13) Kovaso yoloneke, ka tu ka sukila vali oku lekisa ekolelo kolohuminyo via Suku, momo voluali luokaliye ovina viaco vi ka tẽlisiwa. Tu ka kuata esanju komuenyo ndomo ca lekisiwa Vembimbiliya. Pole, tu ka sukila oku amamako oku lekisa ocisola ku Suku kuenda komanu. Omo liaco, ocisola tu va kuetele ci ka amamako oku livokiya otembo ka yi pui.

18, 19. Ekolelo afendeli va Suku va lekisa koloneke vilo lia nena onima yipi, kuenda elie osesamẽla esivayo?

¹⁸ Afendeli va Yehova koloneke vilo, va kuete ekolelo Kusoma wa Suku kuenda va siata oku kuatisa Kusoma waco. Ovo va likuetele ocisola. Momo va siata oku ecelela okuti espiritu sandu lia Suku li songuila omuenyo wavo. (Va Galatia 5:22, 23) Onima yipi ya siata oku ililako? Ci pitahãla olohuluwa ecelãla lia vamanji voluali luosi, va kuete ombembua kuenda omunga vakongelo va sangiwa. Ocili okuti, ekolelo kuenda ocisola ovituwa vimue vi kuete esilivilo lia velapo.

¹⁹ Tu likuete omunga omo okuti Suku yetu wa siata oku tu kuatisa oku ci linga. Ocili okuti, eye o sesamẽla esivayo lietu. (Isaya 55:13) Tu eca olopandu kokuaye omo lioku ecelela okuti tu ‘yovuiwa mekonda liekolelo.’ (Va Efeso 2:8) Yehova o ka amamako oku kuatisa omanu valua, oco va lekise ekolelo kokuaye. Noke voluali mu ka kala lika omanu va lipua okuti, vakuesunga haivo va kuete esanju kuenje va ka eca esivayo ku Yehova otembo ka yi pui!