Ocinimbu eci ci popia hati: “Vofeka yimue nda o lete okuti olosuke vi kasi loku lingisiwa, pamue o lete okuti esunga locili vi kasi loku upiwamo longusu, ku ka ci komohele; momo ombiali yinene yi kasi oku ci linga yi lavuluiwa leyi ya velapo vali; kuenje kilu liavo kuli vali yimue ya velapo vosi.” —Uku. 5:8.

Kocisimĩlo comanu, olondaka evi vi popia eci catiamẽla kalume va kuete unene woku viala. Pole, nda tua sokolola lutate, ovio vi sitululavo ocili catiamẽla ku Yehova, cina ci tu lembeleka kuenda ci tu ĩha elavoko.

Elivulu Liukundi 5:8 li tiamisiwila kombiali yi talisa ohali olosuke loku va likala esunga. Ombiali yi sukila oku ivaluka okuti yi kasi oku lavuluiwa la umue okuti wo velapo kuviali. Handi vali, citava okuti kuli olombiali vikuavo okuti unene wavo wa velapo vali. Ci sumuisa oku limbuka okuti vuviali womanu, olombiali viosi evi vakuavitukiko kuenda omanu va tala ohali omo liekambo liavo liesunga.

Pole, ndaño okuti ovina viosi vĩvi ovo va linga vi moleha ndu okuti vi kamamako, ci tu lembeleka oku kũlĩha okuti Yehova o kasi oku lavulula ndaño muẽle olombiali via velapo vuviali womanu. Etu tu pondola oku pinga ekuatiso ku Suku kuenda oku tuika ocitele cetu kokuaye. (Osa. 55:22; Va Fil. 4:6, 7) Tua kũlĩha okuti, “ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” —2 Asa. 16:9.

Omo liaco, elivulu Liukundi 5:8 li tu ivaluisa oluali tu kasi kuenda li tu ivaluisavo okuti kuli umue o kuete unene wa velapo vali. Cavelapo vali ceci okuti, ocinimbu caco ci tu kuatisa oku limbuka okuti Yehova eye Ukuonene Wosi. Cilo, eye o kasi oku viala pocakati Comõlaye, Yesu Kristu okuti, Soma Yusoma. Ukuonene Wosi una o lete cosi kuenda vosi, ukuesunga kuenda Omõlaye ukuesungavo.