1-2. Elitokeko lipi li kasi pokati kolondaka vi sangiwa kelivulu Liukundi 11:6, lupange woku kunda olondaka viwa Viusoma?

KOLOFEKA vimue omanu va tambuluiya ciwa eci va yeva olondaka viwa. Momo citava okuti, ovio ovina va lavokaile oku yeva! Pole, kolofeka vikuavo omanu ka va lekisa onjongole ku Suku ale Kembimbiliya. Vocikanjo o kasi omanu va tambuluiya ndati olondaka viwa? Nda omanu va tava ale ka va tava, Yehova o yongola okuti tu amamako oku kunda toke eci a popia hati, upange waco wa tẽlisiwa.

² Eci otembo ya sokiyiwa la Yehova yi pitilapo, upange woku kunda u ka imũha kuenje “esulilo liya.” (Mat. 24:14, 36) Osimbu otembo yaco ka ya pitĩlilepo, tu pokola ndati kolondaka viokuti, “eka ka li ka lembuke”? *—Tanga Ukundi 11:6.

3. Nye tu konomuisa vocipama cilo?

³ Vocipama ca pita tua konomuisa ovina vikuãla tu sukila oku linga, oco tu litunde ciwa kupange woku kala “anyanga vomanu.” (Mat. 4:19) Ocipama cilo, ci ka konomuisa ovina vitatu vi ka vokiya onjongole yetu yoku amamako oku kunda ndaño tu liyaka lovitangi. Tu ka kũlĩhĩsavo esunga lieci ci kuetele esilivilo oku konomuisa atosi akuãimo ndeci, (1) oku yuvula oku liwekapo, (2) oku lekisa epandi kuenda (3) oku amamako oku pamisa ekolelo.

4. Momo lie tu sukilila oku amamako lupange Yehova a tu ĩha?

⁴ Yesu wa tukuile ovina via laikele oku pita koloneke via sulako kuenda ovina viaco via ponduile oku tateka olondonge  viaye, oku tẽlisa upange woku kunda. Eye wa vetiya olondonge viaye oku amamako oku ‘lavulula.’ (Mat. 24:42) Koloneke vilo, tu kasivo oku mola ovina vi tateka omanu ndeci ca kala koloneke via Noha okuti, ka va kapeleko esapulo liaye. (Mat. 24:37-39; 2 Pet. 2:5) Omo liaco, etu ka tu yongola oku liwekapo oku linga upange Yehova a tu ĩha.

5. Ndomo ca tangiwa kelivulu Liovilinga 1:6-8, upange woku kunda wa laikele oku lisanduila toke pi?

⁵ Koloneke vilo, etu tu sukila oku tiamisila utima kupange woku kunda olondaka viwa Viusoma. Yesu wa popele okuti olondonge viaye via ponduile oku amamako oku kunda noke yolofa viaye kuenda via ponduile oku linga upange walua okuti, owu a linga u sule. (Yoa. 14:12) Noke lioku fa kua Yesu, vamue pokati kolondonge viaye va tiukila kupange woku pipa. Kuenje Yesu noke lioku pinduiwa, wa linga ocikomo kuenda wa kuatisa vamue pokati kolondonge viaye oku kuata olõsi vialua. Noke yocikomo caco Yesu wa ivaluisa olondonge viaye okuti, upange woku kunda kuenda oku linga olondonge wa velapo okuti upange ukuavo u sule. (Yoa. 21:15-17) Eci pa kambele otembo yitito oco Yesu a ende kilu, eye wa sapuila olondonge viaye okuti upange una a fetikile wa ponduile oku lisanduila kolonepa viosi vio Isareli. (Tanga Ovilinga 1:6-8.) Noke lianyamo amue, Yesu pocakati cocinjonde cimue wa lekisa kupostolo Yoano ovina via laikele oku pita “keteke lia Ñala.” * Pokati kovina Yoano a mola, pa kala cimue ci komõhisa, eye wa mola okuti: Ungelo umue “wambata olondaka viwa viotembo ka yi pui” kuava va tunga “kolofeka viosi, kapata osi, kalimi osi kuenda komanu vosi.” (Esit. 1:10; 14:6) Ocili okuti ocipango ca Yehova koloneke vilo ceci okuti, tu amamako oku linga upange woku kunda u kasi oku lingiwa voluali luosi, toke eci owo u sulila.

6. Tu amamako ndati oku pitisa kovaso upange woku kunda komuenyo wetu?

 ⁶ Tu pondola oku yuvula oku liwekapo oku kunda, nda tua sokolola kovina viosi Yehova a kasi oku tu lingila oco a tu kuatise. Ndeci, eye o tu ĩha okulia kualua konepa yespiritu ndeci, alivulu, ovipama vo Internet, ovipama via galãvaliwa, olovideo kuenda ovipama vio broadcasting. Sokolola ño handi: Vonumbi yetu yo Internet, muli ovipama vieci ci pitahãla 1.000 kalimi! (Mat. 24:45-47) Omanu voluali va litepa omo va tiamẽla kovitundo viopulitika, va panga onepa katavo a litepa kuenda vamue olohuasi, vakuavo olohukũi. Pole, catiamẽla kafendeli va Yehova ndaño okuti va kasi eci ci pitahãla ecelãla kolohuluwa voluali luosi, va likuete omunga. Ndeci, eci ca kala keteke 19 ya Kupupu wo 2019, Olombangi Via Yehova voluali luosi va likuata omunga poku tala ovideo yocisonehua ceteke. Vuteke waco, owiñi umue u soka 20.919.041, wa liongolola oco va linge Onjivaluko yolofa via Yesu. Tu vetiyiwa oku lekisa ombili kupange Wusoma eci tu sokolola kesumũlũho tu kuete lioku kala kohongele yaco kuenda oku kuatisiwa.

7. Ongangu ya Yesu yi tu kuatisa ndati oku tiamisila utima koku kunda?

⁷ Onjila yikuavo yoku yuvula oku liwekapo oku kunda, poku kuama ongangu ya Yesu. Eye ka ecelele okuti cimue cu tateka oku eca uvangi wocili. (Yoa. 18:37) Yesu ka tavele oku yapuisiwa, eci Satana o lekisa “ovosoma osi oluali lulamba walio”; ndaño ceci a setekiwa eci omanu va yonguile oku u lingisa osoma. (Mat. 4:8, 9; Yoa. 6:15) Eye ka yapuisiwile lonjongole yoku kuata ukuasi; kuenda ka kuatele usumba woku lambalaliwa. (Luka 9:58; Yoa. 8:59) Eci ekolelo lietu li setekiwa, ka tu konyoha nda tua ivaluka elungulo liupostolo Paulu. Eye wa vetiya Akristão oku kuama ongangu ya Yesu oco ‘ka va ka kave ndaño oku konyoha’!—Va Hev. 12:3.

8. Epandi li lomboloka nye kuenda momo lie li kuetele esilivilo cilo?

⁸ Epandi uloño woku tula utima loku kevelela toke eci ekalo limue li pongoloka. Cikale okuti tu lavoka ocitangi cimue oku pita, ale cimue ci tẽlisiwa, tu sukila oku lekisa epandi. Uprofeto Havakuki wa lavokaile okuti ekalo lĩvi liolupale luo Yuda li ka sulila. (Hav. 1:2) Olondonge via Yesu via lavokaile okuti Usoma wa Suku, wa ponduile oku “wiya ocipikipiki” loku va yovola kupika wo Roma. (Luka 19:11) Etu tu yongola okuti, Usoma wa Suku u malako evĩho loku tumbika oluali luokaliye muna mu kala lika omanu vakuesunga. (2 Pet. 3:13) Pole, tu sukila oku lekisa epandi loku talamẽla otembo ya sokiyiwa ya Yehova. Tu kũlĩhĩsi olonjila vimue Yehova a siata oku tu longisa oku lekisa epandi.

9. Ovolandu api a lekisa okuti Yehova ukuepandi?

⁹ Yehova eca ongangu ya velapo yoku lekisa epandi. Eye wa eca ku Noha otembo yalua yoku tunga ocimbaluku kuenda oku “kunda esunga.” (2 Pet. 2:5; 1 Pet. 3:20) Yehova wa yevelela Avirahama osimbu a kala loku u pula olonjanja vialua catiamẽla konjila Yehova a nõla yoku nyõla olondingaĩvi volupale luo Sodoma kuenda o Gomora. (Efet. 18:20-33) Vokuenda kuotembo yalua, Yehova wa lekisa epandi ku va Isareli vana vakuesino. (Neh. 9:30, 31) Tua limbuka okuti Yehova o lekisa epandi, momo eye eca otembo komunu wosi o yongola oku kala ekamba liaye, oco a ‘likekembele akandu aye.’ (2 Pet. 3:9; Yoa. 6:44; 1 Tim. 2:3, 4) Ongangu ya Yehova yi tu kuatisa oku lekisa epandi osimbu tuamamako oku kunda loku longisa. Eye o tu longisavo  oku lekisa epandi, pocakati cocindekaise cimue ci sangiwa Vembimbiliya.

10. Ndomo ca tangiwa kukanda wa Tiago 5:7, 8, ocindekaise cukuakulima ci tu longisa nye?

¹⁰ Tanga Tiago 5:7, 8. Ocindekaise cukuakulima, ci tu longisa ndomo tu lekisa epandi. Ocili okuti, ovikũla vimue vi kula lonjanga. Pole, ovikũla vikuavo, ca piãla enene vina vi eca apako, vi tumala otembo yalua oco vime. Ko Isareli otembo ombuto yimbiwa posi, toke koku ungula, ca enda oku ambata olosãi epandu. Ukuakulima wa enda oku imba ombuto posi, eci ombela yi fetika, kotembo yondombo kuenda ungula eci ombela yi sulila pokuenye. (Mar. 4:28) Etu tu lekisa olondunge, nda tua setukula epandi liukuakulima. Pole, oku ci linga ka ca lelukile.

11. Epandi li tu kuatisa ndati kupange woku kunda?

¹¹ Omo liekambo lioku lipua, olonjanja vialua tu yongola oku mola lonjanga onima yupange wetu. Pole, nda tu yongola okuti ovikũla vepia lietu vima, tu sukila oku senda, oku imba ombuto, oku sonjola kuenda oku tapela. Nda tu yongola oku longisa omanu oco va linge olondonge, tu sukila oku likolisilako calua. Cambata otembo oku kuatisa una tu longisa Embimbiliya, oco a siepo olonepele kuenda oku lekisa ocisola. Epandi li tu kuatisa oku yuvula oku sumua, eci omanu tu kundila ka va tu yevelela. Eci omanu va lekisa onjongole yoku tu yevelela kuenda oku lilongisa, tu sukila oku vokiya epandi lietu. Ka tu pondola oku kisika una tu longisa Embimbiliya oku pama kekolelo. Olonjanja vimue olondonge via Yesu ka via kuataile lonjanga elomboloko lieci eye a kala oku longisa. (Yoa. 14:9) Tu ivaluki okuti tu pondola oku kũla kuenda oku tapela, pole, Suku eye o kulisa.—1 Va Kor. 3:6.

12. Tu lekisa ndati epandi eci tu kundila umue ukuepata lietu?

¹² Pamue tu kuata ocitangi coku lekisa epandi eci tu kundila umue ukuepata lietu.  Onumbi tu sanga kelivulu Liukundi 3:1, 7 yi pondola oku tu kuatisa. Oyo yiti: ‘Kuli . . . eteke lioku ũha, kuenda eteke lioku popia.’ Ovilinga vietu viwa vi pondola oku kuatisa vakuepata lietu oku lekisa onjongole yoku yevelela esapulo liocili, pole, olonjanja vimue tu sukila oku sanda otembo yoku va sapuila eci catiamẽla ku Yehova. (1 Pet. 3:1, 2) Tu sukila oku lekisa epandi komanu vosi, oku kongelamo epata lietu osimbu tu kunda kuenda oku longisa.

13-14. Ovolandu api oku kuata epandi tu sukila oku setukula?

¹³ Tu sukila oku setukula epandi liomanu va tukuiwa Vembimbiliya kuenda liafendeli va Yehova koloneke vilo. Havakuki wa yonguile okuti ohali yi pua, pole, eye wa lekisa epandi eci a popia hati: “Ñala ño-o kutala wange woku lavela.” (Hav. 2:1) Upostolo Paulu wa popia lutima wosi okuti, wa yonguile oku “tẽlisa” upange waye. Kuenje lepandi eye wamamako oku “imba uvangi wolondaka viwa.”—Ovil. 20:24.

¹⁴ Kũlĩhĩsa ulandu wohueli yimue okuti ya pita kosikola yo Gileada kuenje va tumiwa kolofeka kuna okuti Olombangi via Yehova vitito kuenda atavo alua vali ana okuti Hakristãoko. Kuenje omanu vamue ovo lika va tava oku lilongisa Embimbiliya. Pole, vana va kalela kumosi kosikola yo Gileada okuti va kasi kolofeka vikuavo, va va sapuila okuti va kasi oku kuata onima yiwa yoku songola alilongiso alua Embimbiliya kuenda omanu vaco, va kasi oku kuatisiwa oku linga Olombangi Via Yehova. Ohueli yamamako oku kunda lepandi, ndaño okuti omanu valua vocikanjo cavo ka va lekisa onjongole yoku yevelela. Noke lioku kunda ecelãla kanyamo vocikanjo cimue ca molẽha ndu okuti omanu vaco ka va lekisa onjongole, ohueli ya kuata esanju lioku mola umue pokati kolondonge oku papatisiwa. Ovolandu o kosimbu la-a o koloneke vilo a tu longisa nye? Vamanji vaco ka va liwekelepo oku lekisa ombili kuenda ovoko avo ka a lembukile kuenje Yehova wa va sumũlũisa omo liepandi liavo. Omo liaco, tu ‘kali olosetukuli via vana okuti omo liekolelo kuenda epandi va piñala olohuminyo.’—Va Hev. 6:10-12.

15. Onjila yipi yatete ekolelo lietu li pondola oku pamisa ombili yetu yoku kunda?

¹⁵ Tua kolela kesapulo tu kunda, omo liaco, tu yongola oku kundila omanu valua. Tua kolelavo kohuminyo yi sangiwa Vondaka ya Suku. (Osa. 119:42; Isa. 40:8) Tu lete oku tẽlisiwa kuovitumasuku koloneke vilo. Tu letevo ndomo omanu va kasi oku pongolola ekalo liomuenyo wavo, eci va fetika oku kapako olonumbi Viembimbiliya. Ovina evi, vi tu vetiya oku kolela okuti olondaka viwa Viusoma, esapulo limue omanu vosi va sukila oku yeva.

16. Ndomo ca tangiwa Kosamo 46:1-3, ekolelo ku Yehova kuenda ku Yesu li tu kuatisa ndati oku vokiya ombili kupange woku kunda?

¹⁶ Tua kolelavo ku Yehova, Ono yesapulo tu kunda kuenda ku Yesu, una Yehova a eca omoko yoku viala Ndosoma Yusoma wa Suku. (Yoa. 14:1) Ndaño okuti pamue tu liyaka lovitangi, Yehova olonjanja viosi o ka kala ocitililo cetu kuenda ongusu yetu. (Tanga Osamo 46:1-3.) Handi vali, etu tua kolela okuti Yesu o kasi oku songuila upange woku kunda oku upisa kilu, pocakati cunene kuenda omoko Yehova o wĩha.—Mat. 28:18-20.

17. Tukula ulandu umue u lekisa esunga lieci tu sukilila oku amamako oku kunda.

¹⁷ Ekolelo li tu kuatisa oku limbuka okuti Yehova o sumũlũisa alikolisilo etu, pamue o ci linga lonjila yimue ka tua lavokaile. (Uku. 11:6) Ndeci, eteteke leteke olohuluwa viomanu, vi komõha poku mola otuakãlu tuetu tualivulu. Anga hẽ, onjila eyi yoku kunda ya siata oku  eca onima yiwa? Ocili okuti ya siata! Vupange Wetu Wusoma wa Kuvala wo 2014, wa lombolola eci catiamẽla kumalẽhe umue kosikola ya velapo, wa yonguile oku soneha olondaka vimue viatiamẽla Kolombangi via Yehova. Eye ka tẽlele oku sanga layimue Onjango Yusoma, pole, wa sanga otuakãlu tuetu tualivulu kuenje wa sangavo elivulu eye a yonguile. Kuenje, cilo eye Ukristão umue wa papatisiwa kuenda o kasi kupange wakundi votembo yosi. Ovolandu a-a, a tu vetiya oku amamako oku kunda, momo ci lekisa okuti handi kuli omanu va sukila oku yeva esapulo Liusoma.

18. Momo lie tua kolelela okuti upange woku kunda Usoma u ka tẽlisiwa votembo Yehova a sokiya?

¹⁸ Tu pondola oku kolela okuti upange woku kunda Usoma, u ka sulila votembo ya sokiyiwa. Kũlĩhĩsa eci ca pita koloneke via Noha. Yehova wa lekisa okuti olonjanja viosi o linga ovina votembo eye a sokiya. Ci soka 120 kanyamo osimbu etande ka lieyile, oco Yehova a sokiyile oku nena etande liaco. Noke lianyamo alua, Yehova wa tuma Noha oku tunga ocimbaluku. Citava okuti eci pa kambele 40 ale 50 kanyamo, osimbu etande ka lieyile, Noha wamamako oku tunga ocimbaluku. Ndaño okuti omanu ka vo yevelile, eye wamamako oku kunda esapulo lielungulo toke eci Yehova a popia hati, otembo yoku iñisa ovinyama vocimbaluku ya pitĩla. Noke, votembo ya sokiyiwa, ‘Yehova wa yika epito.’—Efet. 6:3; 7:1, 2, 16.

19. Onima yipi tu kuata nda ka tua ecelele okuti eka lietu li lembuka?

¹⁹ Ndopo Yehova o ka tuma okuti upange woku kunda Usoma u sulila; Eye o ka ‘yika epito’ voluali lulo lua Satana kuenda o ka nena oluali luokaliye luesunga. Osimbu otembo yaco ka ya pitĩlile, tu sukila oku setukula, Noha, Havakuki kuenda omanu vakuavo okuti, ovoko avo ka a lembukile. Omo liaco, tu yuvuli oku liwekapo, tu lekisi epandi kuenda tuamamiko oku pamisa ekolelo lietu ku Yehova kuenda kolohuminyo viaye.