1. Vepuluvi lipi pamue ka ci leluka oku vumba Yehova?

VEPULUVI lipi o sima okuti ka ca lelukile oku vumba Yehova? Ceci o liyaka lovitangi vialua, ale ceci ku kuete ovitangi vialua? Eci tu liyaka lovitangi ca leluka kokuetu oku kolela Yehova. Pole, nye tu linga eci tu sangiwa votembo yombembua? Anga hẽ tu ivalako esilivilo lioku vumba Suku? Yehova wa lungula va Isareli okuti eci ca laikele oku pita.—Esin. 6:10-12.

2. Soma Asa wa sia ongangu yipi?

² Soma Asa ongangu yimue yiwa yomunu wa lekisa olondunge poku kolela lutima wosi Yehova. Eye wa vumba Yehova ci kaile kotembo yĩvi kuenda kotembo yombembua. Vokuenda kuomuenyo waye wosi, “utima wa Asa wa sungulukila Yehova.” (1 Olos. 15:14) Asa wa lekisa okuti wa vumbile Yehova lutima waye wosi poku malako efendelo liesanda ko Yuda. Embimbiliya li popia hati: “Ovotala osi olosuku viavakualofeka wa a leñula lolonumbuko le, kuenda wa lundula oviñumañuma kuenda wa timbula Asera.” (2 Asa. 14:3, 5) Eye wopa Mahaka inakulu yaye komangu ya velapo yoku kala onasoma yatete vusoma. Momo lie? Momo eye wa tumbika efendelo liesanda lioviteka.—1 Olos. 15:11-13.

3. Nye tu konomuisa vocipama cilo?

³ Asa ka nyõlele lika oviteka. Eye wa tumbika efendelo liocili, wa kuatisa omanu vo ko Yuda oku fendela vali Yehova. Yehova  wa sumũlũisa Asa la va Isareli lotembo yombembua. * Vokuenda kueci ci soka ekũi lianyamo liuviali wa Asa, “ofeka ya kala lepuyuko.” (2 Asa. 14:1, 4, 6) Vocipama cilo, tu ka lilongisa ndomo Asa a talavaya lotembo yaco yombembua. Noke tu ka konomuisa ongangu Yakristão vo kocita catete okuti ndeci Asa, va talavaya kotembo yombembua. Oku sulako tu tambulula epulilo eli: Nda ove o kasi vofeka yimue okuti ombiali yecelela Olombangi Via Yehova oku fendela lelianjo, o talavaya ndati ciwa lotembo yaco yombembua?

4. Ndomo ca tangiwa kelivulu 2 Liasapulo 14:2, 6, 7, soma Asa wa talavaya ndati lotembo yombembua?

⁴ Tanga 2 Asapulo 14:2, 6, 7. Asa wa sapuila omanu okuti Yehova eye ‘wa va muisa epuyuko.’ Asa ka simĩle okuti otembo yombembua ya kala otembo yoku sanjukila omuenyo. Pole, eye wa fetika oku tunga alupale, ovimbaka, olosapalalo kuenda olombundi. Eye wa sapuila omanu vo ko Yuda hati: “Ofeka lopo yetu.” Nye Asa a yonguile oku popia? Wa yonguile oku popia okuti ka kua kaile ovanyãli vofeka va laikele oku va tateka oku linga ovongende kuenda oku tunga. Eye wa vetiya omanu oku talavaya ciwa lotembo yaco yombembua.

5. Momo lie soma Asa a pamisila olohoka viaye?

⁵ Asa wa talavayavo ciwa lotembo yombembua poku pamisa olohoka viaye. (2 Asa. 14:8) Anga hẽ eci ci lekisa okuti eye ka kolelele Yehova? Sio. Pole, Asa wa kũlĩhĩle okuti ca kala ocikele caye ndosoma oku pongiyila omanu ovitangi va laikele oku liyaka lavio kovaso yoloneke. Asa wa kũlĩhĩle okuti otembo yombembua va Yudea va kuatele ka ya laikele oku tumala otembo ka yi pui kuenje eci ca kala ocili.

6. Akristão vo kocita catete va talavaya ndati lotembo yombembua?

⁶ Ndaño Akristão vo kocita catete olonjanja vimue va lambalaliwile, va kuatelevo otembo yombembua. Nye ovo va linga vokuenda kuotembo yaco yombembua? Alume vaco vakuekolelo kuenda akãi, va kunda olondaka viwa okuti ka va liwekelepo. Ulandu u sangiwa kelivulu Liovilinga u popia okuti, ovo va “endela vonjila yoku sumbila Yehova.” Ovo vamamako oku kunda olondaka viwa kuenda onima yeyililako oku “livokiya.” Ocili okuti, Yehova wa sumũlũisa ombili yavo yoku kunda vokuenda kuotembo yombembua.—Ovil. 9:26-31.

7-8. Paulu kuenda vakuavo va talavaya ndati lepuluvi va kuata? Ci lombolola.

⁷ Olondonge vio kocita catete, via sanda apuluvi osi oku sandeka olondaka viwa. Ndeci, eci upostolo Paulu a limbuka okuti wa ponduile oku kundila omanu valua ko Efeso, eye wa kala volupale luaco oku kunda kuenda oku linga olondonge.—1 Va Kor. 16:8, 9.

⁸ Paulu Lakristão vakuavo va kuatele epuluvi likuavo eci kua molẽha ocitangi coku seviwa evamba kunyamo wa 49 K.K. (Ovil. 15:23-29) Noke yoku eciwa kuonumbi yaco kakongelo, olondonge via likolisilako calua oku “kunda olondaka viwa via Yehova.” (Ovil. 15:30-35) Lonima yipi? Embimbiliya li popia okuti, “akongelo va amamako oku pamisiwa vekolelo loku livokiya eteke leteke.”—Ovil. 16:4, 5.

9. Ekalo lipi li sangiwa kolofeka vialua koloneke vilo kuenda nye tu sukila oku lipula etu muẽle?

⁹ Kolofeka vialua koloneke vilo, tu pondola oku kunda lelianjo. Anga hẽ ove o kasi vofeka yimue okuti muli elianjo liefendelo? Nda oco, lipula ove muẽle, ‘Ndi kasi oku talavaya ndati lelianjo liaco?’ Koloneke vilo via sulako viesakalalo, ocisoko ca Yehova ca litumbika kupange unene woku kunda kuenda woku longisa okuti, lalimue eteke wa lingiwile koluali luosi. (Mar. 13:10) Kuli ovina vialua tu pondola oku linga kupange waco!

10. Ukanda 2 Timoteo 4:2, u tu vetiya oku linga nye?

¹⁰ O pondola oku talavaya ndati ciwa lotembo yombembua? (Tanga 2 Timoteo 4:2.) Momo lie ku kũlĩhĩsila ekalo liove kuenda oku konomuisa nda ove ale umue ukuepata liove o pondola oku vokiya upange waye woku kunda, ndeci oku litumbika kupange wakundi votembo yosi? Yilo hayoko otembo yoku sanda oku kala ohuasi kuenda oku kuata ovipako, momo ovina viaco ka vi ka puluka letu kohali ya piãla.—Olosap. 11:4; Mat. 6:31-33; 1 Yoa. 2:15-17.

11. Nye vamue va linga oco va kuatise omanu valua oku yeva olondaka viwa?

¹¹ Akundi valua va lilongisa elimi limue liokaliye oco va kuatise vakuavo oku lilongisa catiamẽla ku Yehova. Ocisoko ca Suku ci va kuatisa poku pongolola alivulu a kunamẽla Vembimbiliya kalimi alua. Ndeci, kunyamo wo 2010, alivulu etu a sandekiwa kueci ci soka 500 kalimi. Cilo, etendelo liaco lia livokiya eci ci pitahãla 1.000 kalimi!

12. Omanu va kuatisiwa ndati poku yeva esapulo Liusoma kelimi liavo? Tukula ulandu umue.

¹² Omanu va liyeva ndati eci va yeva ocili Condaka ya Suku kelimi liavo muẽle? Kũlĩhĩsa ulandu wa manji umue wa kuatisiwa lohongele yofeka ya lingiwa volupale luo Memphis, Tennessee, ko Estados Unidos. Ohongele yaco ya lingiwa kelimi lio Kinyarwanda okuti, elimi limue li vanguiwa ko Rwanda, ko Kongo (Kinshasa) kuenda ko Uganda. Noke liohongele  manji ukãi o vangula o Kinyarwanda, wa lombolola hati: “Eyi oyo onjanja yatete nda kuata elomboloko liovipama viosi viohongele tunde eci nda ilukila ko Estados Unidos okuti, pa pita ale 17 kanyamo.” Ocili okuti, manji yaco wa vetiyiwa calua eci a yeva ovipama kelimi liaye. Nda ekalo li ku ecelela, anga hẽ o pondola oku lilongisa elimi likuavo oco o kuatise omunu umue vocikanjo cove? Ka ci vetiya hẽ oku kũlĩha okuti, vocikanjo cekongelo liove muli vamue va sanjukila oku vangula elimi likuavo? Elikolisilo liove li ka ku nenela esanju lialua.

13. Vamanji ko Rusia va talavaya ndati lotembo yombembua?

¹³ Vamanjetu, havosiko va kuete elianjo lioku kunda. Momo olonjanja vimue, olombiali vi tateka upange wetu woku kunda. Ndeci, kũlĩhĩsa ulandu wa vamanjetu ko Rusia. Ovo va lambalaliwile vokuenda kuanyamo alua, pole, noke kosãi Yelombo yunyamo wo 1991, olombiali via va ĩha elianjo liefendelo. Kotembo yaco, ko Rusia kua kala lika 16.000 kakundi. Eci pa pita akũi avali kanyamo, etendelo liaco lia livokiya eci ci pitahãla 160.000 kakundi! Ocili okuti, vamanji va talavaya lolondunge eci ovo va kuata epuluvi lioku kunda lelianjo. Pole, otembo yaco yombembua ka ya tumãlele. Kuenje ndaño okuti, vofeka yaco ovina via pongoloka, lopo ovo va kasi oku amamako oku lekisa ombili kupange wa Yehova. Ovo vamamako oku vumba Yehova, poku kuama olonjila viosi vi va ecelela oku vumba Yehova.

14-15. Yehova wa talavaya ndati lunene waye oco a kuatise soma Asa?

¹⁴ Koloneke via Asa, otembo yombembua yeya oku sulila. Ocimunga cinene colohoka  okuti, ci pitahãla olohuluwa, ca tunda ko Etiopia. Usongui wavo wa kala Sera, una wa kolelele okuti eye lolohoka viaye va ka yula o Yuda. Pole, Soma Asa ka kolelele ketendelo, eye wa kolelele ku Yehova, Suku yaye. Asa wa likutilila hati: “Tu kuatise, a Yehova, Suku yetu, momo tua liyeka kokuove. Vonduko yove, omo tueyilila oku liyaka lowiñi u.”—2 Asa. 14:11.

¹⁵ Ndaño okuti olohoka via va Etiopia via kuatele etendelo lialua liasualali, Asa wa kũlĩhĩle unene wa Yehova kuenda uloño waye woku kuatisa omanu Vaye. Kuenje Yehova wa kuatisa omanu vaye. Olohoka via va Etiopia via yuliwa.—2 Asa. 14:8-13.

16. Tua kũlĩha ndati okuti otembo yombembua yi laika oku sulila?

¹⁶ Ndaño ka tua kũlĩhĩle eci ci ka pita letu omunu lomunu kovaso yoloneke, pole, tua kũlĩha okuti ombembua afendeli va Yehova va kuete cilo, ka yi kala otembo yosi. Momo Yesu wa popele okuti, koloneke via sulako olondonge viaye via laikele oku “suvukiwa lolofeka viosi.” (Mat. 24:9) Cimuamue haico upostolo Paulu a popia hati: “Vosi va panga oku vumba Suku ndolondonge via Kristu Yesu, va lambalaliwavo.” (2 Tim. 3:12) Satana o kasi “lonyeño yalua” kuenda ka tu tẽla oku puluka konyeño yaye.—Esit. 12:12.

17. Volonjila vipi pamue ekolelo lietu li setekiwa?

¹⁷ Kovaso yoloneke vosi yetu tu ka liyaka loloseteko viekolelo lietu. Ndopo voluali mu ka kala “ohali ya piãla okuti ka ya la pita tunde kefetikilo lioluali toke cilo.” (Mat. 24:21) Vokuenda kuotembo yaco, vakuepata lietu va pondola oku tu ñualelapo kuenda upange wetu pamue u ka tatekiwa. (Mat. 10:35, 36) Ndeci Asa, anga hẽ tu ka kolela ku Yehova oco a tu kuatise kuenda oku tu teyuila?

18. Ndomo ca tangiwa kukanda ku Va Heveru 10:38, 39, nye ci ka tu kuatisa oku lipongiyila esulilo liombembua?

¹⁸ Yehova wa siata oku tu pongiya cilo, oco ekolelo lietu li pamisiwe. Eye o kasi oku songuila “ukuenje wa kolelua haeye wa lunguka” oco a ece okulia kuespiritu “votembo ya sokiyiwa” okuti, ku tu kuatisa oku amamako oku pama kefendelo lietu. (Mat. 24:45) Pole, tu sukila oku linga onepa yetu kuenda oku pamisa ekolelo lietu ku Yehova.—Tanga Va Heveru 10:38, 39.

19-20. Ndomo ca lekisiwa kelivulu 1 Asapulo 28:9, apulilo api tu sukila oku li linga etu muẽle kuenda momo lie?

 ¹⁹ Ndeci ca linga Soma Asa, tu sukila oku ‘sanda Yehova.’ (2 Asa. 14:4; 15:1, 2) Tu fetika oku sanda Yehova poku u kũlĩha kuenda oku papatisiwa. Tu sandiliya apuluvi osi oku pamisa ocisola cetu ku Yehova. Oco tu kũlĩhe ndomo tu kasi oku litunda konepa eyi, tu sukila oku lipula ndoco, ‘Nda siata hẽ oku endaenda kolohongele olonjanja viosi?’ Eci tu enda kolohongele vi pongiyiwa locisoko ca Yehova, tu tambula ekavuluko liocili kespiritu kuenda elembeleko li tunda ku vamanjetu. (Mat. 11:28) Tu sukila oku lipulavo ndoco, ‘Anga hẽ ndi kuete ocituwa ciwa coku linga elilongiso lio pokolika?’ Nda ove o kasi lepata liove, o sanda hẽ otembo yoku linga efendelo liepata olosemana viosi? Ale nda o kasi lika liove, o sanda hẽ otembo yoku ci linga ndu okuti o panga onepa kepata limue? Handi vali, o likolisilako hẽ oku panga onepa kupange woku kunda loku linga olondonge?

²⁰ Momo lie tu sukilila oku linga apulilo a-a? Embimbiliya li tu sapuila okuti, Yehova o kũlĩhĩsa ovisimĩlo vietu kuenda eci ci kasi vovitima vietu kuenje tu sukilavo oku ci linga. (Tanga 1 Asapulo 28:9.) Nda tua limbuka okuti tu sukila oku linga apongoloko amue kovimãho vietu, kovituwa ale kovisimĩlo, tu sukila oku pinga ku Yehova oco a tu kuatise oku linga apongoloko aco. Yilo oyo otembo yoku lipongiyila etu muẽle koloseteko vi laika oku iya kovaso. Omo liaco, ku ka ecelele okuti cimue ci ku tateka oku talavaya lolondunge votembo yombembua!