Kunyamo wo 1970 Vakuakulembulula ovina, va sanga ociña cimue ca nyanyõha ko Ein Gedi, ko Isareli ocipepi Lokalunga ka ka kuete Akimba. Ovo va sanga ociña caco vosunangonga, cina ca lembikiwile eci ofeka yo Isareli ya nyõliwa, kocita cepandu O.Y. Omo okuti ociña caco ka ca kaile ciwa ca tĩlile oku kuata elomboloko lieci ci kasimo; kuenda ka ca tavele oku ci nyanyumũla. Pole omo liuloño u tukuiwa hati, 3-D ca tava oku “nyanyumũla” ociña caco. Omo liuloño waco, ca tava oku tanga vali eci ci kasimo.

Nye ca sangiwamo? Ociña caco ca kala ocisonehua cimue Cembimbiliya. Ocisonehua caco ci lekisa ovinimbu vielivulu Liovisila. Vovinimbu viaco, mua kongela onduko ya Suku kelimi lio Heveru poku kuama o Tetragrama. Ociña caco ca lembuluiwa pokati kocita catete O.Y. kuenda kocita cakuãla, okuti oco ociña cosimbu calua Cembimbiliya kelimi lio Heveru okuti oco ca sangiwa tete koviña vio Qumran. Ulume umue ukuasapulo yo The Jerusalem Post o tukuiwa Gil Zohar, wa soneha hati: “Tunde eci ociña caco ca sangiwa ko Ein Gedi pa pitile ale ci soka ohulukãi yanyamo oku ci sokisa loviña vina via sangiwile Vokalunga ka ka kuete Akimba kunyamo wo 2.000, kesulilo Lionembele Yavali kuenda ociña co Códice Aleppo cina ca sonehiwa kocita cekũi lecelãla O.Y.” Ndomo ca lomboluiwa lolonoño, ociña ca muñuluiwa ci lekisa okuti o Massorético da Torá, “ya teyuiwa lutate vokuenda kuanyamo alua kuenje ka mua lingiwile apongoloko la amue.”