1, 2. (a) Olonjali vimue vi liyeva ndati nda omãla vavo va yongola oku papatisiwa? (b) Momo lie vana va yongola oku papatisiwa va sukilila oku lipula ovo muẽle nda va litumbika ku Yehova? (Tala ociluvialuvia kefetilo liocipama.)

OLONJALI via Maria via luluvalela kokuaye osimbu a kala oku votoka kumue la vakuavo oco va papatisiwe. Hundi wa linga apulilo avali. Maria wa tambulula londaka yi yevala ciwa. Noke wa papatisiwa.

² Olonjali via Maria via kuata esanju lialua omo okuti omõlavo wa litumbika ku Yehova kuenda wa papatisiwa. Pole, osimbu Maria ka papatisiwile inaye wa kuata esakalalo. Eye wa lipula ndoco: ‘Anga hẽ Maria umalẽhe calua oco a papatisiwe? Eye wa kũlĩha eci ca kongela voku litumbika ku Yehova? Anga hẽ nda wa kevelelapo vali oco a papatisiwe?’ Olonjali vialua vakuacisola, via siatavo oku linga apulilo aco eci omõla umue a va sapuila okuti o yongola oku papatisiwa. (Ukundi 5:5) Ocili okuti, oku litumbika ku Yehova loku papatisiwa oyo  onjila ya velapo omunu a pondola oku nõla komuenyo waye.—Tanga pokakasia losapi hati: “ Ove wa Litumbika ku Yehova?”

3, 4. (a) Upostolo Petulu o tu longisa ndati okuti epapatiso li kuete esilivilo lia velapo? (b) Momo lie Petulu a sokisila epapatiso locimbalaku ca tungiwa la Noha?

³ Upostolo Petulu wa sokisa epapatiso locimbaluku ca tungiwa la Noha. Eye hati: ‘Epapatiso, liu popelivo cilo.’ (Tanga 1 Petulu 3:20, 21.) Ocimbaluku ca eca uvangi komanu wokuti Noha wa yonguile oku linga ocipango ca Yehova lutima wosi. Noha wa linga upange Yehova a ecele kokuaye. Omo liekolelo a kuata, Yehova wo popela Ketande kumue lepata liaye. Nye Petulu a yongola oku tu longisa?

⁴ Eci omanu va mola ocimbaluku, va limbuka okuti Noha wa kolelele Suku. Eci omanu va mola umue o papatisiwa, va limbuka okuti wa litumbika ku Suku omo liekolelo a kuetele kepinduko lia Kristu. Vana va papatisiwa va pokola ku Suku kuenda va linga upange eye a va ĩha, ndeci Noha a linga. Ndeci Yehova a popela Noha Ketande, eye o ka popelavo afendeli vaye vakuekolelo va papatisiwa eci a ka kundula oluali lulo lũvi. (Marko 13:10; Esituluilo 7:9, 10) Omo liaco, ci kuete esilivilo oku litumbika ku Yehova kuenda oku papatisiwa. Ocili okuti, nda omunu ka yongola oku papatisiwa o pumba epuluvi lioku kala komuenyo otembo ka yi pui.

5. Nye tu lilongisa vocipama cilo?

⁵ Noke yoku kũlĩha esilivilo liepapatiso, tu sukila oku kũlĩha atambulula apulilo atatu akuaĩmo ndeci: Nye Embimbiliya li popia catiamẽla kepapatiso? Nye omunu a sukila oku linga osimbu ka papatisiwile?  Momo lie olonjanja viosi tu sukilila oku ivaluka esilivilo liepapatiso eci tu longisa omãla vetu, ale vana tu longisa Embimbiliya?

6, 7. (a) Epapatiso Yoano a linga lia kuata elomboloko lipi? (b) Epapatiso lipi Yoano a linga okuti lia velelepo apapatiso akuavo kuenda momo lie?

⁶ Omunu watete tu tanga Vembimbiliya okuti wa patatisa vakuavo, Yoano Upapatisi. (Mateo 3:1-6) Momo lie omanu veyilila kokuaye oco va papatisiwe? Momo va lekisa okuti va likekembela akandu avo lutima wosi kuenda va limbuka okuti va sinĩlile Ocihandeleko ca eciwile ku Mose. Pole, epapatiso lia velapo Yoano a linga lia kuata elomboloko lia litepa. Yoano wa kuata esumũlũho lioku papatisa Yesu omõla wa lipua wa Suku. (Mateo 3:13-17) Yesu lalimue eteke a lingile ekandu. Omo liaco ka sukilile oku likekembela. (1 Petulu 2:22) Momo lie a papatisiwila? Oco a lekise okuti wa nõlelepo oku linga ocipango ca Suku.—Va Heveru 10:7.

⁷ Eci Yesu a fetika oku kunda, olondonge viaye via fetika oku papatisa vakuavo. (Yoano 3:22; 4:1, 2) Omanu vaco va papatisiwilevo omo lioku likekembela akandu avo momo va sinĩlile Ocihandeleko ca eciwile ku Mose. Pole, noke liolofa via Yesu kuenda epinduko liaye, vana va yonguile oku kala olondonge viaye va sukilile oku papatisiwa omo liesunga likuavo.

8. (a) Nye Yesu a handeleka noke yoku pinduiwa? (b) Momo lie Akristão va sukilila oku papatisiwa?

⁸ Kunyamo 33, noke liepinduko lia Yesu, eye wa molẽha kowiñi weci cipitahãla 500 komanu. Citava okuti olio epuluvi a popia hati: “Kuendi, ka longisi omanu vo kolofeka viosi oco va linge olondonge, va papatisili vonduko ya Tate la Mõla kuenda espiritu sandu, va longisi oku linga ovina viosi ndo kundiki.” (Mateo 28:19, 20; 1 Va Korindo 15:6) Yesu wa handelekele ovapostolo vaye oku longisa omanu oco va linge olondonge. Wosi o yongola oku kala ondonge yaye, ale oku tambula “okanga” yaye o sukila oku papatisiwa. (Mateo 11:29, 30) Oco omunu a vumbe Suku lonjila yimue Yu sanjuisa, o sukila oku tava okuti Suku wa nõla Yesu oco a tẽlise ocipango Caye. Noke o papatisiwa loku taviwa la Suku. Embimbiliya lieca ovovangi alua a lekisa okuti, olondonge viatete via Yesu via kũlĩhĩle esilivilo lioku papatisiwa. Ovio ka via kuatele ovisimĩlo viokuti vi sukila oku kevelela kuenje oco vi papatisiwe noke.—Ovilinga 2:41; 9:18; 16:14, 15, 32, 33.

9, 10. Nye tu lilongisa catiamẽla kepapatiso liulume u Etiopia kuenda liupostolo Paulu?

⁹ Tanga Ovilinga 8:35, 36. Tu kũlĩhĩsi ulandu wulume umue u Etiopia wa kala oku tiukila konjo noke yoku ka fendela vonembele ko Yerusalãi. Ungelo wa Yehova wa tuma Filipu oku u kundila kuenje Filipu wo lomboluila “olondaka viwa viatiamẽla ku Yesu.” Ulume waco u Etiopia nye a linga? Eye wa limbuka esilivilo lioku tava Yesu okuti eye Ñala kuenje wa nõlapo oku linga ovina Yehova a yonguila Akristão. Vepuluvi liaco haico a papatisiwa.

¹⁰ Ulandu ukuavo wa Saulu. Epata liosi lia va Yudea lia nõliwile la Suku, pole wa va likala momo ka va pokuile kokuaye. Saulu  wa kũlĩhĩle okuti va Yudea va kala oku vumba Yehova lonjila yimue ya sunguluka kuenje wa fetika oku lambalala Akristão. Pole, eteke limue Yesu una Saulu a simĩle okuti wa fa, wa sapela laye oku upisa kilu. Nye Saulu a linga? Eye wa tava lesanju kekuatiso Liukristão Ananiya. Embimbiliya li popia okuti: “Eye wa votoka kuenda wa papatisiwa.” (Ovilinga 9:17, 18; Va Galatia 1:14) Noke weya oku kũlĩhĩwa okuti upostolo Paulu. Limbuka okuti, eci Saulu a kuata elomboloko liokuti Suku wa nõla Yesu oco a tẽlise ocipango Caye, vepuluvi liaco haico a papatisiwa.—Tanga Ovilinga 22:12-16.

11. (a) Nye ci vetiya vana va longisiwa Embimbiliya koloneke vilo oku papatisiwa? (b) Tu liyeva ndati eci umue a papatisiwa?

¹¹ Koloneke vilo, cimuamue haico ca siata oku pita lomanu valua va longisiwa Embimbiliya amalẽhe lakulu. Omo okuti va sole kuenda va kolela kueci Embimbiliya li popia, va nõlapo oku litumbika ku Yehova kuenda oku papatisiwa. Ocili okuti, elivala liohundo yepapatiso yi lingiwa kolohongele vimbo levi viofeka, epuluvi limue lilikasi. Olombangi Via Yehova vi sanjuka calua eci omanu va longisiwa Embimbiliya va tava kocili loku nõlapo oku papatisiwa. Olonjali vi sanjuka calua eci omãla vavo va linga cimuamue. Vokuenda kunyamo wupange wo 2017, ci pitahãla 284.000 komanu va papatisiwa, loku lekisa okuti va litumbika ku Yehova. (Ovilinga 13:48) Ocili okuti, ovo va kuata elomboloko liokuti Akristão va sukila oku papatisiwa. Pole nye va sesamẽla oku linga osimbu ka va papatisiwile?

12. Vana tu longisa Embimbiliya nye va sukila oku linga osimbu ka va papatisiwile?

¹² Osimbu omanu tu longisa Embimbiliya ka va papatisiwile, va sukila oku lilongisa ocili catiamẽla ku Suku, kocipango caye komanu, kongongo kuenda eci a linga oco yovole omanu. (1 Timoteo 2:3-6) Ovo va sukilavo oku kuata ekolelo, li pondola oku va kuatisa oku pokola kolonumbi via Yehova loku liwekapo oku linga ovina eye a nyãle. (Ovilinga 3:19) Eci ci kuete esilivilo momo Yehova ka sanjukila elitumbiko liomunu una amamako oku linga eci a nyãle. (1 Va Korindo 6:9, 10) Pole, kuli ovina vikuavo. Vana va yongola oku litumbika ku Yehova va sukila oku enda enda kolohongele viekongelo oku kunda olondaka viwa loku longisa omanu. Eci ocikele comunu wosi o yongola oku kuama Kristu. (Ovilinga 1:8) Omunu o longisiwa Embimbiliya o sukila tete oku eca ananga aco osi. Noke pokolika,  o litumbika ku Yehova vohutililo kuenje o papatisiwa.

13. Eci tu kasi oku longisa vakuetu, nye tu sukila oku ivaluka?

¹³ Eci tu kuatisa omãla vetu la vana tu longisa Embimbiliya oku eca enanga li sukiliwa, tu ivaluki okuti vana va yongola oku kala olondonge viocili via Yesu te va papatisiwa. Kuenje ka tu ka kuata ohele yoku va sapuila esilivilo lioku litumbika kuenda oku papatisiwa. Tu yongola okuti, omãla vetu la vana tu longisa Embimbiliya va amamako oku kula konepa yespiritu oco va papatisiwe!

14. Momo lie tu yuvuila oku kisika umue oco a papatisiwe?

¹⁴ Ka tu ka kisiki omõla ale una tu longisa Embimbiliya oku papatisiwa. Momo Yehova ka tu kisika oku u vumba. (1 Yoano 4:8) Eci tu longisa vakuetu, tu va kuatisa oku kũlĩha ndomo ci kuete esilivilo kokuavo oku kuata ukamba uwa la Yehova. Omo liaco, nda omunu tu longisa Embimbiliya o sanjukila oku kũlĩha ocili catiamẽla ku Suku kuenda o yongola oku linga ovina viosi Akristão vocili va sukila oku linga, eye o nõlapo oku papatisiwa.—2 Va Korindo 5:14, 15.

15, 16. (a) Anga hẽ kuli anyamo a sokiyiwila omunu oco a papatisiwe? Ci lombolola. (b) Momo lie una tu longisa Embimbiliya a sesamẽlela oku papatisiwa vali ndaño okuti wa papatisiwa ale vetavo likuavo?

¹⁵ Ka kuli anyamo a sokiyiwila omunu oco a papatisiwe. Momo omanu va litepa, vamue va kula lonjanga konepa yespiritu, pole, vakuavo sio. Valua va papatisiwa  peci handi va kala amalẽhe kuenda va kasi oku amamako oku vumba Yehova osimbu va kasi oku kuka. Vakuavo va fetika lika oku lilongisa ocili Cembimbiliya okuti va kuka ale kuenje va papatisiwa. Vamue va kuete eci ci pitahãla 100 kanyamo!

¹⁶ Ukãi umue okuti wa papatisiwile ale vatavo akuavo, wa fetika oku lilongisa Embimbiliya. Kuenje wa pula komunu wa kala oku u longisa Embimbiliya nda o sukila oku apatisiwa vali. Ulongisi waye, wo lekisa Vembimbiliya ovinimbu vimue vi tambulula epulilo liaye. Omo okuti ukãi waco wa kuata elomboloko lieci Embimbiliya li longisa, wa nõlapo oku papatisiwa ndaño okuti wa kuata ale 80 kanyamo. Nye tu lilongisa kulandu owu? Yehova o tava lika epapatiso lietu nda tua kũlĩha ocili catiamẽla kocipango caye. Ndaño okuti tua papatisiwa ale vetavo likuavo, oco tu kale Olombangi Via Yehova tu sukila vali oku papatisiwa.—Tanga Ovilinga 19:3-5.

17. Nye omunu a sukila oku sokolola keteke a papatisiwa?

¹⁷ Eteke omunu a papatisiwa o sanjuka calua. Handi vali, oyo otembo yoku sokolola lutate kovina via kongela kelitumbiko liaye kuenda kepapatiso. Ocili okuti, omunu o sukila oku likolisilako oco a linge ovina viosi vi kisikiwa Kakristão vocili. Momo olondonge via Yesu ka vi ‘lisanjuisa ovio muẽle, te oku sanjuisa una wa va fila kuenje wa pinduiwa.’—2 Va Korindo 5:15; Mateo 16:24.

18. Apulilo api tu ka konomuisa vocipama cikuãimo?

¹⁸ Ndomo tua ci konomuisa vocipama cilo, oku nõlapo oku kala Ukristão wocili ocikele cimue cinene. Eli olio esunga lieci ina ya Maria a lingila apulilo a tukuiwa kefetikilo liocipama. Nda ove vunjali, pamue o lipula ndoco: ‘Omõlange wa li pongiyila oku papatisiwa? Wa kũlĩha ovina viatiamẽla ku Yehova oco a litumbike kokuaye? Omõlange o sukila oku kuata elilongiso liwa kuenda upange osimbu ka papatisiwile? Nda wa linga ekandu noke yoku papatisiwa?’ Tu ka konomuisa apulilo aco vocipama cikuãimo kuenda tu ka lilongisa ndomo olonjali Akristão vi pondola oku kuata ovisimĩlo via sunguluka viatiamẽla kepapatiso.