1. Nye olonjali vi yongola oku kũlĩha osimbu omãla vavo ka va papatisiwile?

TU KŨLĨHĨSI eci ca pita la manji Blossom Brandt eci a nõlapo oku papatisiwa. Eye wa soneha ndoco: “Vokuenda kuolosãi vialua, nda enda oku sapela lolonjali viange catiamẽla konjongole yange yoku papatisiwa kuenje va enda oku vangula lame catiamẽla kondaka yaco. Ovo va yonguile oku limbuka nda nda kũlĩha ovina via kongela konjila nda nõla. Kuenje nda papatisiwa keteke 31 ya Cembanima yunyamo wo 1934.” Koloneke vilo, olonjali via siatavo oku kuatisa omãla vavo oku nõla onjila yaco yi kuete esilivilo. Nda omõla umue o talamẽla oku papatisiwa, pole, ka kuli esunga liaco lioku talamẽla, ci pondola oku nyõla ukamba waye la Yehova. (Tiago 4:17) Olonjali vakualondunge osimbu omõlavo ka papatisiwile, va yongola oku kũlĩha nda eye wa lipongiyila oku kala ondonge ya Kristu.

2. (a) Ocitangi cipi vamanji vamue va nyula akongelo va limbuka? (b) Nye tu konomuisa vocipama cilo?

 ² Vamanji vamue vakuakunyula akongelo va siata oku limbuka okuti, amalẽhe valua va kuete ci panda 20 kanyamo, handi ka va papatisiwile ndaño okuti va kulila vocili. Ovo va litenda okuti Olombangi Via Yehova omo lioku enda enda kolohongele kuenda kupange woku kunda. Pole, handi ka va litumbikile ku Yehova loku papatisiwa omo liasunga amue. Olonjanja vimue, olonjali vi sima okuti omãla vavo ka va lipongiyile handi oco va papatisiwe. Omo liaco, vocipama cilo tu konomuisa ovina vikuãla via siata oku tateka olonjali vimue oku vetiya omãla vavo oco va papatisiwe.

3. Nye ca sakalaisa olonjali via manji Blossom?

³ Olonjali via manji Blossom via tukuiwa kocinimbu catete, via sakalalele nda eye wa kala vutunga woku kũlĩha elomboloko liepapatiso leci ca kongelamo. Olonjali vi limbuka ndati nda omõlavo wa lipongiyila oku litumbika ku Yehova?

4. Ocihandeleko ca Yesu ci sangiwa ku Mateo 28:19, 20 ci kuatisa ndati olonjali koloneke vilo?

⁴ Tanga Mateo 28:19, 20. Embimbiliya ka li tukula anyamo omunu a sukila oku kuata oco a papatisiwe. Pole, olonjali vi sukila oku sokolola lutate eci ci lomboloka oku linga olondonge. Kelimi lio Helasi, ondaka oku ‘linga olondonge’ ya tukuiwa kelivulu lia Mateo 28:19, yi lomboloka oku longisa omunu locimãho coku u kuatisa oco a linge ondonge. Ondonge omunu umue o lilongisa kuenda o kuete elomboloko lialongiso a Yesu kuenje o nõlapo oku pokola kokuaye. Tunde eci omãla va citiwa, olonjali vi sukila oku va longisa locimãho coku va kuatisa oco va litumbike ku Yehova kuenda oku kala olondonge via Kristu. Ocili okuti, oloñaña ka vi kuete ukũlĩhĩso oco vi papatisiwe. Pole, Embimbiliya li lekisa okuti omãla vatito va pondola oku kuata elomboloko kuenda oku sola ocili Cembimbiliya.

5, 6. (a) Elomboloko lipi tu kuata liatiamẽla kepapatiso lia Timoteo? (b) Onjila yipi ya velapo olonjali vi sukila oku kuama oco vi kuatise omãla vavo?

⁵ Timoteo wa kala ondonge yimue ya nõlelepo oku vumba Yehova eci a kala handi umalẽhe. Upostolo Paulu wa popia hati, Timoteo wa fetika oku lilongisa ocili Condaka ya Suku “tunde vutila.” Isiaye ka kaile ufendeli wa Yehova, pole, inaye la inakulu yaye vo kuatisa oku sola Ondaka ya Suku. Omo liaco, wa kuata ekolelo lia pama. (2 Timoteo 1:5; 3:14, 15) Eci a kuata ci panda 20 kanyamo wa loñolohele kuenje wa tambula ovikele vilikasi vekongelo.—Ovilinga 16:1-3.

⁶ Omãla va litepa momo havosiko va loñoloha vonjanja yimuamue. Vamue va kuata lonjanga elomboloko liocili Cembimbiliya, va nõla onjila ya sunguluka kuenje va papatisiwa osimbu va kasi amalẽhe. Pole, vakuavo va papatisiwa lika eci va kulapo kamue. Olonjali vakualondunge ka vi kisika omãla vavo oku papatisiwa. Ovo va kuatisa omãla vavo oku amamako oku loñoloha kespiritu. Olonjali vi sanjuka eci omãla vavo va kapako olondaka vi sangiwa kelivulu Liolosapo 27:11. (Tanga.) Pole, vi sukila oku ivaluka okuti ocimãho cavo oku kuatisa omãla vavo oco va linge olondonge. Poku ci linga olonjali vi sukila oku lipula ndoco: ‘Omõlange  o kuete hẽ ukũlĩhiso wa suapo oco a litumbike ku Yehova loku papatisiwa?’

7. Anga hẽ omunu o sukila oku kũlĩha alongiso osi Embimbiliya oco a papatisiwe? Ci lombolola.

⁷ Eci olonjali vi longisa omãla vavo, vi va kuatisa oku kũlĩha ocili. Ukũlĩhĩso waco u ka vetiya omãla oku litumbika ku Suku. Pole, ka ci lomboloka okuti omõla te o kũlĩha ovina viosi Viembimbiliya oco a litumbike ku Yehova loku papatisiwa. Momo, olondonge viosi via Kristu vi sukila oku amamako oku lilongisa ndaño via papatisiwa ale. (Tanga Va Kolosai 1:9, 10.) Oco hẽ ukũlĩhiso upi omunu a sukila oku kuata osimbu ka papatisiwile?

8, 9. Nye ca pita lukuakayike ko Filipu kuenda nye tu lilongisa kulandu waye?

⁸ Tu kũlĩhĩsi ndomo olonjali vi kuatisiwa lulandu wepata limue kosimbu. (Ovilinga 16:25-33) Kunyamo 50, Paulu wa endele kolupale luo Filipu kungende waye wavali wumisionaliu. Osimbu a kalako eye kumue la Sila va lundiliwa, va kuatiwa kuenda va kapiwa vokayike. Vokati kuteke, vocipikipiki kua pita ocilemawe cinene, ca yikula apito osi okayike. Ukuakayike wa sima okuti olomandekua viosi via tila kuenje wa yonguile oku liponda. Pole Paulu wo tateka. Noke Paulu la Sila va sapuila ukuakayike lepata liaye ocili catiamẽla ku Yesu. Ovo va tava kovina va lilongisa viatiamẽla ku Yesu kuenda va limbuka esilivilo lioku pokola kokuaye. Kuenje va papatisiwa. Ulandu waco u tu longisa nye?

⁹ Citava okuti ukuakayike wa kala esualali limue lio ko Roma. Eye ka kũlĩhĩle Ondaka ya Suku. Omo liaco, oco a kale Ukristão wa sukilile oku lilongisa alongiso atete Embimbiliya, oku kũlĩha eci Yehova a yonguila afendeli vaye kuenda oku pokola kalongiso a Yesu. Ovina a lilongisa votembo yimue yitito vio kuatisa oku papatisiwa. Ocili okuti, eye wa sukilile oku amamako oku lilongisa vali ovina vikuavo noke yoku papatisiwa. Nda omõlove oku sapuila okuti o yongola oku papatisiwa omo a sole Yehova kuenda o yongola oku pokola kokuaye, nye o sukila oku linga? U vetiya oku ka sapela lakulu vekongelo oco ovo va nõle nda eye wa lipongiyila oku papatisiwa ale sio. * (Tala etosi pombuelo yemẽla.) Ndeci ci kasi oku linga Akristão vosi va papatisiwa, eye o ka amamako oku lilongisa ovina vialua viatiamẽla ku Yehova osimbu a kasi komuenyo,  toke otembo ka yi pui.—Va Roma 11:33, 34.

10, 11. (a) Nye olonjali vimue via siata oku sima? (b) Nye ci teyuila omõla?

¹⁰ Olonjali vimue vi sima okuti omãla vavo va papatisiwa lika noke yoku malusula oku tanga kosikola ya velapo kuenda oku kuata upange umue wa kemãla. Pamue olonjali vi kuete esunga liaco, pole vi sukila oku lipula ndoco: ‘Eci ci ka kuatisa hẽ omõlange oku kuata ekalo liwa komuenyo? Ci likuata hẽ lolonumbi Viembimbiliya? Nye Yehova a yongola okuti oco tu linga komuenyo wetu?’​—Tanga Ukundi 12:1.

¹¹ Ci kuete esilivilo oku ivaluka okuti oluali lulo lovina vi kasimo vi lipatãla locipango ca Yehova. (Tiago 4:7, 8; 1 Yoano 2:15-17; 5:19) Oku kuata ukamba la Yehova oco lika ocina ca velapo ci teyuila omõla ku Satana kuenda koluali luaye lua vĩha. Nda olonjali vi velisapo epindiso lio kosikola kuenda oku kuata upange wa kemãla, omãla vavo va ka sima okuti ovina violuali ovio via velapo okuti ukamba wavo la Yehova u sule. Eci ci koka ohele. Ene alonjali, vu yongola hẽ okuti oluali lulo lu longisa omãla vene oku sima okuti ovina viaco vi ka va nenela esanju liocili? Onjila ya velapo yoku kuata ekalo liwa kuenda esanju liocili oku pitisa kovaso Yehova komuenyo wetu.—Tanga Osamo 1:2, 3.

12. Momo lie olonjali vimue vi simĩla okuti omãla vavo va sukila oku amisapo oco va papatisiwe?

¹² Onjali yimue yukãi ya lombolola esunga lieci eye ka yonguilile okuti omõlaye ukãi o papatisiwa. Eye hati: “Esunga liaco esokiyo lioku tundisiwa.” Olonjali vimue vi simavo okuti oco omãla vavo va papatisiwe, va sukila oku amisapo toke eci va kula oco va yuvule oku linga ovina ka via sungulukile. (Efetikilo 8:21; Olosapo 22:15) Olonjali viaco pamue vi sima okuti nda omãla vavo ka va papatisiwile ka va tundisiwa vekongelo. Anga hẽ ocisimĩlo caco ca sunguluka?—Tiago 1:22.

13. Nda umue ka papatisiwile, ci lomboloka okuti ka kuete ocikele kovaso a Yehova? Ci lombolola.

¹³ Ocili okuti, olonjali ka vi yongola okuti omãla vavo va papatisiwa osimbu ka va lipongiyilile oku litumbika ku Yehova. Pole, ka ca sungulukile oku sima okuti omõla ka  kuete ocikele kovaso a Yehova osimbu ka papatisiwile. Omõla o kuata ocikele kovaso a Yehova eci a kũlĩha ovina Eye a tenda okuti via sunguluka levi ka via sungulukile. (Tanga Tiago 4:17.) Olonjali vakualondunge ka va tateka omãla vavo oku papatisiwa. Ndaño okuti handi vatito, ovo va va longisa oku sola ovina Yehova a sole loku suvuka ovina a nyãle ndeci ovo va siata oku linga. (Luka 6:40) Ocisola omãla va kuetele Yehova ci ka va teyuila koku linga akandu anene, momo va ka linga ovina Yehova a tenda okuti via sunguluka.—Isaya 35:8.

14. Akulu vekongelo va kuatisa ndati olonjali?

¹⁴ Akulu vekongelo va pondola oku kuatisa olonjali oku kuata ovisimĩlo via sunguluka eci va sapela lomãla vavo catiamẽla koku kuata ovimãho kupange wa Yehova. Manji umue ukãi ivaluka olondaka manji Russell o sapuilile eci a kuata epandu kanyamo. Eye hati: “Manji Russell wa sapela lame 15 kakukutu catiamẽla kovimãho viange viespiritu.” Onima yipi manji a kuata? Noke yotembo yimue manji wa linga ukundi wotembo yosi kuenda wa amamako ci pitahãla 70 kanyamo! Ocili okuti, olondaka via sunguluka havio vi vetiya vi pondola oku kuatisa omunu vokuenda kuomuenyo waye wosi. (Olosapo 25:11) Akulu vekongelo va pondolavo oku laleka olonjali lomãla oco va kuatise kovopange amue Vonjango Yusoma. Ovo va pondola oku pinga komãla oco va linge ovina vi likuata lutunga wavo kuenda uloño wavo.

15. Vamanji vakuavo vekongelo va pondola oku kuatisa ndati amalẽhe?

 ¹⁵ Vamanji vakuavo vekongelo va pondola oku kuatisa ndati? Va ci linga poku kapako amalẽhe. Ndeci, o pondola oku luluvalela kovina amalẽhe va kasi oku linga vi lekisa okuti va kasi oku pamisa ukamba wavo la Yehova. Anga hẽ omõla umue wa tambulula ciwa kohongele, ale wa linga ciwa onepa yimue kohongele yo vokati kosemana? Eye wa kundila umue kosikola, ale wa linga ovina via sunguluka eci a setekiwa? Nda oco, u pandiya! Tu pondola oku kuata ocimãho coku sapela lamẽlehe osimbu olohongele ka via fetikile kuenda noke yolohongele. Nda tua ci linga, tu kuatisa omãla oku limbuka okuti va panga onepa “vekongelo linene.”—Osamo 35:18.

16, 17. (a) Momo lie ci kuetele esilivilo omãla oku papatisiwa? (b) Nye olonjali Akristão vi pondola oku kuata? (Tala ociluvialuvia kefetikilo liocipama.)

¹⁶ Olonjali vi kuete esumũlũho linene lioku longisa omãla vavo oku sola Yehova. (Osamo 127:3; Va Efeso 6:4) Kepata lia va Isareli, omãla va litumbikile ku Yehova tunde eci va citiwa. Pole omãla vetu hacoko. Nda olonjali vi sole Yehova kuenda ocili, ka ci lomboloka okuti omãla vavo va ka ci lingavo. Tunde keteke omõla a citiwa, olonjali vi sukila oku kuata ocimãho coku kuatisa omõlavo, oco a linge ondonge kuenda oku litumbika ku Yehova loku papatisiwa. Anga hẽ kuli ocina cimue ca velapo okuti eci ci sule? Elitumbiko, lepapatiso kuenda oku vumba Yehova lutima wosi, ovina viaco ovio vi ka kuatisa omunu oku popeliwa vokuenda kuohali yapiãla.​—Mateo 24:13.

¹⁷ Eci manji Blossom Brandt a yonguile oku papatisiwa, olonjali viaye via kũlĩhisa lutate nda eye wa lipongiya. Eci via kuata ekolelo liaco vo kuatisa konjila a nõlapo. Manji Blossom wa lombolola eci isiaye a linga luteke osimbu ka papatisiwile hati: “Tua kekama kolongolo kuenje tate wa linga ohutililo. Eye wa sapuila Yehova okuti, wa sanjukila onjila omõlaye ukãi a nõla yoku tumbika omuenyo waye ku Yehova.” Manji Blossom wa amisako hati, ndaño pa pita ale ci pitahãla 60 kanyamo, “lalimue eteke nda ivaleleko uteke waco!” Alonjali, vu pondolavo oku kuata esanju poku mola omãla vene oku litumbika loku papatisiwa oco va vumbe Yehova.