1, 2. (a) Ocikele cipi ci kuete esilivilo Salomone a tambuile? (b) Momo lie Daviti a kuatela esakalalo la Salomone?

SALOMONE wa tambuile ocikele cimue ci likasi. Yehova wo nõla oco a kale mitavaso yupange woku tunga onembele ko Yerusalãi okuti, upange umue wa velelepo kovopange osi oku tunga! Onembele yaco ya sukilile oku ‘posoka calua’ oco ekemalo lieposo liaco likũlĩhĩwe kolonepa viosi violuali. Handi vali, ocina ca velapo ceci okuti, onembele ya laikele oku kala “onjo ya Yehova Suku yocili.”—1 Asapulo 22:1, 5, 9-11.

² Soma Daviti wa kolelele okuti Suku wa laikele oku kuatisa Salomone. Pole, Salomone wa kala ‘handi umalẽhe kuenda ka kolele.’ Eye wa ponduile hẽ oku kuata utõi woku linga upange wosi wa kongelele voku tunga onembele? Ale omo lioku kala umalẽhe calua nda co tateka oku ci linga? Salomone oco a kuate onima yiwa wa sukilile oku kuata utõi loku linga upange.

3. Salomone wa lilongisa nye kutõi wa isiaye?

 ³ Citava okuti Salomone wa lilongisila calua kutõi wa isiaye, Daviti. Eci Daviti a kala umalẽhe, wa liyaka lovinyama viatema viovusenge oco a teyuile olomeme via isiaye. (1 Samuel 17:34, 35) Eye wa lekisavo utõi poku liyaka locindululu capama okuti Goliata. Pole, lekuatiso lia Suku, Davi wa ponda Goliata lewe.—1 Samuele 17:45, 49, 50.

4. Momo lie Salomone a sukilile oku kuata utõi?

⁴ Tua kũlĩha esunga lieci Daviti a kuatela omoko yoku vetiya Salomone oku kuata utõi kuenda oku tunga onembele. (Tanga 1 Asapulo 28:20.) Salomone nda ka kuatele utõi, usumba nda wo tateka oku fetika upange kuenda nda ka tẽlisile ocikele caye.

5. Momo lie tu sukilila oku kuata utõi?

⁵ Ndeci Salomone a linga, tu sukilavo ekuatiso li tunda ku Yehova oco tu kale vakuotõi loku tẽlisa upange eye a tu ĩha. Vocipama cilo, tu lilongisa ovolandu omanu vamue va lekisa utõi kosimbu. Tu li longisavo ndomo tu lekisa utõi kuenda oku tẽlisa upange wetu.

6. Meomo lie utõi wa Yosefe u komõhisila?

⁶ Sokolola ndomo Yosefe wa lekisa utõi eci ukãi wa Potifara o yonja oco a linge laye evĩho liukahonga. Eye wa kũlĩhile okuti nda ka tavele oku ci linga omuenyo waye nda wa kala kohele. Pole, wa lekisa utõi kuenda wa likala lonjanga epingilo liukãi waco oco kaka linge ekandu.—Efetikilo 39:10, 12.

7. Rahava wa lekisa ndati utõi? (Tala ociluvialuvia kefetikilo liocipama cilo.)

⁷ Rahava ongangu yikuavo yoku lekisa utõi. Eci olondavululi vio ko Isareli via endele konjo yaye ko Yeriko, eye nda wa kuata usumba loku likala oku vakuatisa. Pole, omo lioku kolela Yehova wa lekisa utõi poku vundisa alume vaco vavali kuenda oku va kuatisa oku puluka. (Yehosua 2:4, 5, 9, 12-16) Rahava wa kolelele okuti, Yehova eye Suku yocili kuenda wa kũlĩhĩle okuti wa ponduile oku eca ofeka yaco ku va Isareli. Omo liaco, Rahava ka kuatele usumba womanu vo ko Yeriko oku kongelamo soma. Pole, wa lekisa utõi kuenje wa popela epata liaye leye muẽle.—Yehosua 6:22, 23.

8. Utõi wa Yesu wa vetiya ndati ovapostolo vaye?

⁸ Ovapostolo va Yesu va lekisavo utõi walua. Ovo va mola utõi Yesu a lekisa kuenje ca va kuatisa oku u setukula. (Mateo 8:28-32; Yoano 2:13-17; 18:3-5) Eci va Sadukeo va seteka oku va tateka oco va liwekepo oku longisa catiamẽla ku Yesu, ovapostolo va likala oku ci linga.—Ovilinga 5:17, 18, 27-29.

9. Ndomo ca sonehiwa kelivulu 2 Timoteo 1:7, utõi wetu u tunda pi?

⁹ Yosefe, Rahava, Yesu kuenda ovapostolo, va nõlelepo oku linga eci ca sunguluka. Ovo ka va lekisile utõi omo lioku kolela kolondunge  viavo muẽle, pole, va ci linga omo lioku kolela ku Yehova. Nda tu yongola oku lekisa utõi, tu sukilavo oku kolela ku Yehova okuti kolondunge vietu muẽle hakoko. (Tanga 2 Timoteo 1:7.) Tu konomuisa ndomo tu lekisa utõi poku liyaka lovitangi vepata kuenda vekongelo.

10. Momo lie amalẽhe Akristão va sukilila oku kuata utõi?

¹⁰ Kuli olonjila vialua amalẽhe Akristão va sukila oku lekisa utõi oco va vumbe Yehova. Ovo va ci linga, poku lilongisa kongangu ya Salomone wa lekisa utõi eci a nõla lolondunge onjila ya sunguluka, oco a malusule oku tunga onembele. Ndaño okuti amalẽhe va pondola oku songuiwa lolonjali viavo poku nõla olonjila vimue, pole, va sukila oku nõla ovo muẽle onjila ya velapo va yongola oku kuama. Ovo va sukilavo oku kuata utõi poku nõla lolondunge akamba vavo, ovitalukilo, oku amamako oku liyelisa kovina viosi loku nõla nda va papatisiwa kuenda oku vumba Yehova. Amalẽhe va sukila oku kuata utõi oco ka va ka linge ocipango ca Satana, una wa siata oku imbula Suku.—Olosapo 27:11.

11, 12. (a) Mose wa lekisa ndati utõi? (b) Amalẽhe va setukula ndati ongangu ya Mose?

¹¹ Ocina cimue ca velapo amalẽhe va sukila oku linga, oku tumbika ovimãho. Kolofeka vimue, amalẽhe va siata oku vetiyiwa oku tiamisila utima kosikola ya velapo, loku sanda upange umue va feta olombongo vialua. Kolofeka vikuavo okuti kuli ocitangi cekambo liolombongo, amalẽhe valua va vetiyiwa oku talavaya calua oco va kuatise epata liavo. Nda o kasi oku liyaka locitangi caco, sokolola kongangu ya Mose. Eye wa tekuiwa lomõla ukãi wa Fereo, kuenje nda wa kuata ocimãho coku kala ohuasi ale omunu wa kemãla. Citava okuti wa vetiyiwa lepata liaye Kegito, lalongisi kuenda lolondunguli! Pole, Mose wa lekisa utõi kuenda wa nõlelepo oku kala lafendeli va Suku. Mose wa lekisa utõi poku tunda Kegito loku sia ovokuasi aco, kuenje wa kolela Yehova lutima wosi. (Va Heveru 11:24-26) Omo liaco, Yehova wo sumũluisa kuenda o ko sumũluisa vali calua kovaso yoloneke.

¹² Nda amalẽhe va tumbika ovimãho vioku vumba Yehova loku pitisa kovaso Usoma, Yehova o va sumũluisa. Eye o va kuatisa poku va ĩha ovina epata liavo li sukila. Kocita catete, umalẽhe Timoteo wa velisilepo komuenyo waye oku vumba Suku kuenje ove o pondolavo oku ci linga. * (Tala etosi pombuelo yemẽla.)—Tanga Va Filipoi 2:19-22.

13. Utõi wa kuatisa ndati manji umue ukãi umalẽhe oku tẽlisa ovimãho viaye?

¹³ Manji umue ukãi wo ko Alabama, kofeka yo Estados Unidos, wa sukilile utõi oco a tumbike ovimãho kupange wa Suku. Eye wa popia ndoco: “Eci nda kala omõla, nda kuata osõi yalua. Sia tẽlele oku vangula ciwa lomanu Vonjango Yusoma capiãla enene poku kundila konjo lanjo.” Pole lekuatiso liolonjali kuenda vamanji vakuavo vekongelo, umãlehe waco wa tẽlisa ocimãho caye coku kala ukundi wotembo yosi. Eye wa amisako hati: “Oluali lua Satana, lu  vetiya omanu oku tiamisilia utima kosikola ya velapo, oku kuata ekemãlo, lolombongo kuenda oku kuata ovina vialua.” Pole, wa limbukavo okuti omanu valua ka va tẽlisile ovimãho viavo kuenje ca va kokela lika esumuo kuenda ovitangi. Eye amisako vali hati: “Oku vumba Yehova ca ndi nenela esanju lialua kuenda ndi liyevite okuti nda tẽlisa ovimãho viange.”

14. Vepuluvi lipi olonjali Akristão vi sukila oku lekisa utõi?

¹⁴ Olonjali Akristão vi sukilavo oku kuata utõi. Citava okuti, cime cove o pinga kokuove oco o talavaye olowola vialua keteke lia sokiyiwila efendelo liepata, upange woku kunda kuenda olohongele viekongelo. Ove o sukila oku kuata utõi woku sapuila cimue cove okuti, ku pondola oku ci linga kuenda oku eca ongangu yiwa komãla vove. Pamue olonjali vimue vekongelo, vi ecelela okuti omãla vavo va linga ovina ku yongola okuti, omãla vove va vi lingavo. Nda olonjali viaco via ku pula esunga lieci omãla vove ka va lingila ovina viaco, ove hẽ o kuata utõi woku va lomboluila lesumbilo?

15. Osamo 37:25 kuenda Heveru 13:5, vi kuatisa ndati olonjali?

¹⁵ Olonjali vi sukilavo oku kuata utõi oco va kuatise omãla vavo oku tumbika ovimãho vioku vumba Yehova. Olonjali vimue, vi kuete ohele yoku vetiya omãla vavo oco va litumbike kupange wakundi votembo yosi, oku kundila kovitumãlo kuli esukila liakundi, oku talavaya ko Betele, ale oku kuatisa oku tunga Olonjango Viusoma kuenda Violohongele Vinene. Ovio pamue vi kuete  ohele yokuti, omãla vavo ka va ka tẽla oku va kuatisa eci va kuka. Pole, olonjali vakualondunge, vi lekisa utõi kuenda vi kolela kolohuminyo via Yehova. (Tanga Osamo 37:25; Va Heveru 13:5.) Ovio vi sukilavo oku kuatisa omãla vavo oku kuata utõi loku kolela ku Yehova.—1 Samuele 1:27, 28; 2 Timoteo 3:14, 15.

16. Olonjali vimue via kuatisa ndati omãla vavo oku tumbika ovimãho kupange wa Yehova kuenda onima yipi omãla vavo va kuata?

¹⁶ Ohueli yimue kofeka yo Estados Unidos ya kuatisa omãla vavo oku tiamisila utima kupange wa Yehova. Ulume wa popia hati: “Osimbu omãla vetu ka va fetikile oku enda loku vangula, tua enda oku sapela lavo catiamẽla kesanju li tunda koku kala ukundi wotembo yosi kuenda oku kuatisa ekongelo. Eci oco ocimãho va kuete cilo. Omo okuti omãla vetu va tumbika ovimãho loku vi tẽlisa, ci va kuatisa oku tamãlala kayonjo oluali lua Satana loku tiamisila utima koku vumba Yehova.” Manji umue ulume okuti o kuete omãla vavali, wa soneha ndoco: “Olonjali vialua via siata oku pesela ongunsu yavo lolombongo oco vi kuatise omãla vavo oku tẽlisa ovimãho viatiamela, kolomapalo vioku tasula ombunje, lolomapalo vikuavo kuenda oku lilongisa calua kosikola. Pole, ci kuete esilivilo oku pesela ongunsu kuenda ovina tu kuete, oco tu kuatise omãla vetu oku tẽlisa ovimãho vi va kuatisa oku amamako lukamba wavo la Yehova. Ndi sanjuka calua poku limbuka okuti omãla vetu, va tẽlisa ovimãho vioku vumba Yehova.” Omo liaco kolela okuti Yehova o sumũluisa calua olonjali vina vi kuatisa omãla vavo oku tumbika ovimãho kupange wa Yehova loku vi tẽlisa.

17. Tukula ovolandu oku lekisa utõi vekongelo.

¹⁷ Tu sukilavo oku lekisa utõi poku tetulula ovitangi vekongelo. Akulu vekongelo va sukila oku lekisa utõi poku tetulula ovitangi viomanu va lueya ale ceci va kuatisa vana okuti, va sukila lonjanga ekuatiso liolondotolo. Akulu vamue vekongelo va siata oku nyula omanu va kasi vokayike oco va longise Embimbiliya ku vana va lekisa onjongole loku linga olohongele. Nye ci popiwa catiamẽla ku vamanji akãi ka va kuelele? Ovo va kuete apuluvi alua oku lekisa utõi kuenda oku vumba Yehova. Ovo va pondola oku kala akundi votembo yosi, oku ilukila kovitumãlo kuna kuli esukila, oku kuatisa Kupange Woku Tunga Olonjango Viusoma kuenda oku pindisiwa Kosikola Yupange Wusoma. Vamue va lalekiwa oku enda Kosikola yo Gileada.

18. Vamanji akãi va kuka va pondola ndati oku lekisa utõi?

¹⁸ Tu sole calua vamanjetu akãi vakuka kuenda tu eca olopandu omo lioku kala lavo vekongelo! Ndaño okuti vamue ka va pondola vali oku linga ovina vialua va lingaile kosimbu, pole, va amamako oku lekisa utõi loku linga upange wa Yehova. (Tanga Tito 2:3-5.) Ndeci, manji umue ukãi vakuka o sukila oku lekisa utõi nda akulu vekongelo vo pinga oco a ka sapele lamanji ukãi umalẽhe catiamẽla kuwalo waye. Eye ka pondola oku kẽlohala manji umalẽhe, pole, o sukila oku vangula locisola kuenda oku u kuatisa oku sokolola ndomo uwalo waye u pondola oku sanjuisa ale oku sumuisa vakuavo. (1 Timoteo 2:9, 10) Nda vamanji akãi vakuka va lekisa ocisola cavo kovina viosi, ekongelo li pamisiwa.

19. (a) Vamanji alume va papatisiwa va lekisa ndati utõi? (b) Elivulu lia Va Filipoi 2:13 kuenda 4:13 likuatisa ndati vamanji oku kala vakuotõi?

 ¹⁹ Vamanji alume va papatisiwa va sukilavo oku kala vakuotõi loku linga upange. Nda va yongola oku kala oloñuatisi viekongelo ale akulu vekongelo, ekongelo li kuatisiwa calua. (1 Timoteo 3:1) Pole, vamanji vamue va kuete ohele yoku ci linga. Pamue manji umue omo liakandu a lingaile kosimbu, o sima okuti ka pondola oku kala oñuatisi yekongelo ale ukulu wekongelo. Manji ukuavo o sima okuti ka kuete uloño woku tẽlisa ocikele caco. Nda oco o sima, Yehova o pondola oku ku kuatisa oco o kuate utõi. (Tanga Va Filipoi 2:13; 4:13.) Ivaluka ongangu ya Mose. Eye wa simĩle okuti ka ponduile oku tẽlisa ocikele Yehova o wihĩle. (Etundilo 3:11) Pole, Yehova wo kuatisa oku kuata utõi kuenda oku linga ocipango caye. Manji umue ulume wa papatisiwa o pondola ndati oku kuata utõi? O sukila oku pinga ekuatiso ku Yehova vohutililo loku tanga Embimbiliya eteke leteke. O sukilavo oku sokolola kovolandu omanu va tukuiwa Vembimbiliya okuti va lekisa utõi. Lumbombe o sukila oku pinga kakulu vekongelo oco vo pindise kuenda oku lieca olumue poku kuatisa kovopange osi a sukiliwa vekongelo. Omo liaco, vamanji vosi alume va papatisiwa, va vetiyiwa oku kuata utõi loku likolisilako oku linga upange vekongelo!

20, 21. (a) Nye Daviti a ivaluisa Salomone? (b) Ekolelo lipi tu kuete?

²⁰ Daviti wa ivaluisa Salomone okuti, Yehova wa laikele oku kala laye toke eci a mala oku tunga onembele. (1 Asapulo 28:20) Salomone wa patekela lutate olondaka viaco kuenje ka ecelele okuti omo lioku kala umalẽhe calua kuenda ka loñolohele ci u tateka oku linga upange waco. Pole, wa lekisa utõi walua kuenda lekuatiso lia Yehova eye wa malusula oku tunga onembele vokuenda kuanyamo epanduvali lomeyu.

²¹ Ndeci Yehova a kuatisa Salomone, eye o pondolavo oku tu kuatisa oku kala vakuotõi loku tẽlisa upange wetu, ci kale vepata kuenda vekongelo. (Isaya 41:10, 13) Nda tua lekisa utõi poku vumba Yehova, tu pondola oku kolela okuti eye o tu sumũluisa cilo kuenda kovaso yoloneke. Omo liaco, ‘kuata utõi, linga upange’ wa Yehova.