“Ondaka ya Suku . . . yi Kuete Unene”
“Ondaka ya Suku yi kasi lomuenyo kuenda yi kuete unene.”—VA HEVERU 4:12.
Ovisungo: 114, 113
1. Nye ci ku vetiya oku kolela okuti Ondaka ya Suku yi kuete unene? (Tala ociluvialuvia kefetikilo liocipama cilo.)
AFENDELI va Yehova va kolela okuti ondaka yaye, “yi kasi lomuenyo kuenda yi kuete unene” komanu. (Va Heveru 4:12) Tua siata oku limbuka unene Wembimbiliya komuenyo wetu kuenda komuenyo wa vakuetu. Omanu vamue osimbu ka va lingile Olombangi Via Yehova, va kala ovimunu, va enda oku nyua olodroga kuenda oku linga evĩho liukahonga. Omanu vakuavo va kuatele olombongo vialua kuenda ekemãlo, pole, va limbuka okuti ka va kuatele ovina viosi komuenyo wavo. (Ukundi 2:3-11) Tua siata oku limbuka okuti omanu valua ka va kuatele elavoko, cilo va kuete momo va sanga onjila ya sunguluka omo liunene Wondaka ya Suku. Tu sole calua oku tanga Vutala Wondavululi, ovolandu alua a sanjuisa, vovipama losapi hati, “Embimbiliya Li Pongolola Omuenyo Womanu.” Omanu valua noke yoku linga Akristão, va amamako oku pamisa ukamba wavo la Yehova lekuatiso Liembimbiliya.
2. Unene Wondaka ya Suku wa kuatisa ndati omanu vo kocita catete?
2 Koloneke vilo, omanu valua noke yoku lilongisa Embimbiliya va linga apongoloko. Kocita catete, vamanji vana va kuatele elavoko lioku enda kilu, va lingavo apongoloko. (Tanga 1 Va Korindo 6:9-11.) Eci Paulu a popia catiamẽla ku vana ka va ponduile oku piñala Usoma wa Suku, eye wa amisako hati: “Vamue pokati kene va kuatele ovituwa viaco.” Ondaka ya Suku kuenda espiritu sandu liaye, via kuatisa omanu vaco oku linga apongoloko. Pole, vamue noke yoku kala Akristão, va linga akandu anene kuenje va nyõla ukamba wavo la Yehova. Embimbiliya li tukula manji umue wa kala ombuavekua okuti noke wa tundisiwa. Pole, noke wa linga a pongoloko kuenje wa tambuiwa vali. (1 Va Korindo 5:1-5; 2 Va Korindo 2:5-8) Ndaño lovitangi vialua, vamanji yaco va tẽla oku linga apongoloko lekuatiso Liondaka ya Suku. Oku kũlĩha ovina viaco ci tu kuatisa oku kolela kunene Wembimbiliya.
3. Nye tu lilongisa vocipama cilo?
3 Ondaka ya Suku yi kuete unene walua. Omo okuti Yehova wa tu ĩha ondaka yaye, tu yongola oku talavaya layo lonjila yimue yiwa. (2 Timoteo 2:15) Vocipama cilo, tu lilongisa eci tu sukila oku linga oco tu talavaye ciwa lunene Wembimbiliya (1) komuenyo wetu, (2 ) kupange woku kunda kuenda (3) poku linga olohundo. Ovina tu lilongisa vi tu kuatisa oku lekisa ocisola cetu kuenda oku eca olopandu ku Yehova, una o tu longisa oco tu kuatisiwe.—Isaya 48:17.
KOMUENYO WETU
4. (a) Nye tu sukila oku linga oco tu kuatisiwe Londaka ya Suku? (b) O sokiya ndati otembo yoku tanga Embimbiliya?
4 Oco tu ecelele okuti Ondaka ya Suku yi tu kuatisa, tu sukila oku yi tanga eteke leteke. (Yehosua 1:8) Vosi yetu tu kuete ovina vialua vioku linga, pole, ka tu ka eceleli okuti ovina viaco oku kongelamo ovikele vietu, vi tu tateka oku tanga Embimbiliya. (Tanga Va Efeso 5:15, 16.) Tu sukila oku sanda otembo yoku tanga Embimbiliya nda komẽle, nda kekumbi ale koñolosi. Nda tua ci linga tu kala ndukualosamo wa popia hati: “Sole cimue ovihandeleko viove. Ndukuaku vi sokolola ño-o eteke liosi.”—Osamo 119:97.
Ka tu ka eceleli okuti, ovikele vietu vi tu tateka oku tanga Embimbiliya eteke leteke
5, 6. (a) Momo lie tu sukilila oku sokolola kovina tua tanga? (b) Tu sokolola ndati kueci tua tanga? (c) Oku tanga Embimbiliya loku sokolola kovina wa tanga ca ku kuatisa ndati?
5 Oku tanga lika Embimbiliya ka ci tẽla. Tu sukila oku sokolola lutate kovina tua tanga. (Osamo 1:1-3) Nda tua ci linga, tu kuatisiwa lukũlĩhĩso Wembimbiliya komuenyo wetu. Poku tanga Embimbiliya, ocimãho cetu oku upa ocili ci sangiwamo loku ci kapa vutima wetu.
6 Tu sokolola ndati kueci tua tanga? Poku tanga Embimbiliya, tu sukila oku talamapo kamue loku lipula ndoco: ‘Ovina nda tanga vi ndi longisa nye catiamẽla ku Yehova? Ndi kapako ndati ovina viaco komuenyo wange? Apongoloko api ndi sukila oku linga? Eci tu sokolola Kondaka ya Suku loku likutilila catiamẽla kovina tua tanga, tu ka vetiyiwa oku ci kapako. Kuenje, tu ka limbuka unene Wembimbiliya komuenyo wetu.—2 Va Korindo 10:4, 5.
KUPANGE WOKU KUNDA
7. Tu talavaya ndati ciwa Londaka ya Suku kupange woku kunda?
7 Ci kuete esilivilo oku talavaya Lembimbiliya olonjanja viosi tu kasi oku kunda loku longisa. Manji umue wa popia hati: “Sokolola ndu okuti o kasi oku kundila konjo lanjo la Yehova, anga hẽ nda ove lika wa vangula ale nda wa ecelela okuti Yehova o vangulavo?” Eci tu tangela omunu umue Embimbiliya, tu kasi oku ecelela okuti Yehova o vangula laye. Ocinimbu cimue Cembimbiliya okuti ca pongiyiwa ciwa, ci kuete vali unene okuti ovina tu popia vi sule. (1 Va Tesalonike 2:13) Nda o kasi kupange woku kunda o velisapo hẽ oku tanga Embimbiliya?
Eci tu tangela omunu umue Embimbiliya, tu kasi oku ecelela okuti Yehova o vangula laye
8. Momo lie ka tu sukila lika oku tanga ovinimbu Viembimbiliya eci tu kasi oku kunda?
8 Oku tangela lika ovinimbu Viembimbiliya komanu tu kundila, ka ci tẽla. Momo omanu valua ka va kuete elomboloko Liembimbiliya. Eci oco ca pita kocita catete kuenda ca siatavo koloneke vilo. (Va Roma 10:2) Omo liaco, ka tu ka simi okuti eci tu tangela omunu umue ocinimbu Cembimbiliya, tu kolela okuti co lomboloka. Tu sukila oku u kuatisa poku pitulula atosi a velapo loku u sapuila elomboloko liaco. Nda tua ci linga, Ondaka ya Suku yi ka vetiya ovitima viomanu.—Tanga Luka 24:32.
9. Tu kuatisa ndati omanu oku sumbila Embimbiliya osimbu ka tua tangele ocinimbu cimue? Ci lombolola.
9 Ovina tu popia osimbu ka tua tangele ocisonehua cimue, vi kuatisa omunu oku sumbila Embimbiliya. Tu pondola oku sapuila ndoco omunu tua sanga: “Tu kũlĩhĩse eci Ululiki wetu a popia catiamẽla kulandu owu.” Ale nda tu kasi oku sapela lomunu umue ka kũlĩhĩle cimue catiamẽla Kembimbiliya, tu sukila oku popia ndoco: “Tu kũlĩhĩse eci Ovisonehua Vikola vi tu sapuila.” Nda tua sanga omunu umue wa tiamẽla ketavo limue, pole, ka tava ku Kristu tu u pula ndoco: “Wa yevele ale ulandu owu?” Nda tua kapako ekalo liomunu lomunu kuenda ovina va kolela, tu ka likolisilako oku fetika ombangulo lonjila yimue yi va vetiya.—1 Va Korindo 9:22, 23.
10. (a) Nye ca pita lamanji umue? (b) Wa siata oku limbuka ndati unene Wondaka ya Suku kupange woku kunda?
10 Valua va siata oku limbuka okuti Ondaka ya Suku yi kuete unene woku vetiya omanu vana va kundila. Tu kũlĩhĩsi ulandu wamanji umue wa linga epasu kulume umue wa kuka okuti, wa enda oku tanga olorevista vietu vokuenda kuanyamo alua. Eteke limue, manji ka ecele lika Utala Wondavululi wo kaliye, pole, wo tangelavo ocisonehua cimue Cembimbiliya. Eye wa tanga 2 Va Korindo 1:3, 4, ku popia okuti: “Isia yohenda kuenda Suku yelembeleko liosi, . . . o tu lembeleka kohali yetu yosi.” Olondaka viaco via vetiya calua ulume waco wakuka kuenje wa pinga kumanji oco a pitulule ovinimbu viaco. Noke ulume waco wa popia hati, eye lukãi waye va sukilile calua elombeleko. Omo liovinimbu viaco, eye wa yonguile oku kũlĩha ovina vialua Viembimbiliya. Ocili okuti, oku talavaya Londaka ya Suku kupange woku kunda ci kuete esilivilo lialua!—Ovilinga 19:20.
POKU LINGA OLOHUNDO
11. Vamanji va linga olohundo ocikele cipi va kuete?
11 Tu sole calua oku enda kolohongele viekongelo, vimbo kuenda viofeka, momo tu yongola oku fendela Yehova. Tua siatavo oku kuatisiwa lovina tu lilongisa. Omo liaco, vamanji va linga olohundo va kuete esumũlũho linene kuenda ocikele cinene. (Tiago 3:1) Ovo va sukila oku kũlĩha okuti ovina viosi va longisa vi tunda Vondaka ya Suku. Nda o kuete esumulũho liaco lioku linga olohundo, o pondola oku vetiya ndati olonjeveleli lunene Wembimbiliya?
12. Manji o linga ohundo o kũlĩhĩsa ndati nda ohundo yaye ya kunamẽla Vembimbiliya?
12 Embimbiliya li kuete esilivilo lia velapo vohundo. (Yoano 7:16) Omo liaco, poku linga ohundo o sukila oku yuvula oku lombolola ovolandu ale oku tukula alusapo ana okuti, ka a vetiya omanu oku tiamisila utima Kembimbiliya. Ivaluka okuti, oku tanga lika ovinimbu Viembimbiliya ka ci lomboloka okuti o kasi oku longisa Embimbiliya. Handi vali, nda wa tanga ovisonehua vialua, omanu ka va ka ivaluka ovisonehua viaco. Omo liaco, o sukila oku nõla lutate ovisonehua o yongola oku tanga. Noke, sanda otembo yoku vi tanga, oku vi lombolola, oku vi sokisa kuenda oku vi kapako. (Nehemiya 8:8) Nda wa tambula ohundo yimue, o sukila oku pongiya ohundo yaco loku tanga Ovisonehua vi sangiwamo. Likolisilako oku kuata elomboloko lielitokeko li kasi pokati kulandu waco kuenda ovisonehua. Noke nõla ovisonehua vimue vi ku kuatisa oku longisa atosi a velapo a sangiwa vohundo yaco. (O pondola oku sanga olonumbi viwa velivulu Kuatisiwa Losikola Yupange Wakristão, kocipama 21 toke 23.) Handi vali, ca velapo oku pinga ekuatiso ku Yehova oco o tẽle oku lombolola alongiso a velapo a tunda Vembimbiliya.—Tanga Esera 7:10; Olosapo 3:13, 14.
13. (a) Manji umue ukãi wa vetiyiwa ndati locisonehua cimue a yeva kohongele yimue? (b) Wa kuatisiwile ndati locisonehua cimue Cembimbiliya?
13 Manji umue ukãi kofeka yo Australia eci a kala omõla, wa lipita lovitangi vialua. Ndaño ceci a fetika oku lilongisa Embimbiliya, ka kolelele okuti Yehova u sole. Kohongele yimue, manji wa yeva ocisonehua cimue okuti co vetiya calua. Eye wa sokolola kocisonehua caco kuenje wa linga akonomuiso o vetiya oku tanga ovinimbu vikuavo Viembimbiliya. Noke wa limbuka okuti Yehova u sole. * (Tala etosi pombuelo yemẽla.) Ove hẽ wa kuatisiwile ale locisonehua cimue kohongele yekongelo, yimbo ale kohongele yofeka? —Nehemiya 8:12.
14. Tu lekisa ndati ocisola kuenda olopandu Kondaka ya Yehova?
14 Ocili okuti Embimbiliya ombanjaile ya ya Yehova kuenda tu eca olopandu omo liombanjaile yaco. Yehova wa tẽlisavo ohuminyo yaye yokuti Ondaka yaye yamamako. (1 Petulu 1:24, 25) Omo liaco, tu sukila oku tanga Embimbiliya oloneke viosi, oku kapako ovina tua tanga komuenyo wetu kuenda oku talavaya lalio oco tu kuatise vakuetu. Nda tua ci linga, tu lekisa ocisola cetu Kembimbiliya kuenda oku eca olopandu ku Yehova Suku, Usovoli walio.
^ tini. 13 Tanga pokakasia “ Kaliye Ndi Kuete Elomboloko.”
