1. Ondaka yipi yi kuete esilivilo Yesu a tukula vuteke wa sulako a kala lolondonge viaye?

YESU kuteke wa sulako a kala lolondonge viaye osimbu ka file, wa tu kula ocisola ci panda 30 kolonjanja. Eye wa sapuila olondonge viaye okuti, via sukilile oku ‘lisola pokati.’ (Yoano 15:12, 17) Ocisola cavo ca sukilile oku muiwa lomanu vakuavo loku limbukiwa okuti ovo olondonge viocili via Kristu. (Yoano 13:34, 35) Ocisola Yesu a tukula ci lekisiwa lutima wosi, hacombambeko kuenda ci kuete unene. Yesu wa popia hati: “Lomue o kuete ocisola ca velapo ndeci, okuti omunu o pesila omuenyo waye akamba vaye. Ene wakamba vange nda vu linga eci ndu tumi.”—Yoano 15:13, 14.

2. (a) Afendeli va Suku koloneke vilo, kovina vipi va kũlĩhĩwa? (b) Apulilo api tu konomuisa vocipama cilo?

² Afendeli va Yehova koloneke vilo, va kũlĩhiwa okuti vakuacili, ocisola cavo ci lekisiwa lutima wosi kuenda va pamisa omunga yavo. (1 Yoano 3:10, 11) Ocisola caco ci lekisiwa komanu vakuafeka yosi, vakuapata osi, vakualimi osi  kuenda kovitumãlo viosi tu kasi. Afendeli va Yehova koluali luosi, va likuetele ocisola cocili. Momo lie ocisola ci kuetele esilivilo koloneke vilo? Yehova la Yesu va tu pamisa ndati locisola? Tu lekisa ndati ocisola caco poku lembeleka loku pamisa vakuetu?—1 Va Korindo 8:1.

3. Oloneke ‘viohali yalua’ vi kasi oku kokela nye komanu?

³ Tu kasi koloneke ‘viohali yalua’ kuenda omuenyo weyuka “upami wao lesumuo.” (2 Timoteo 3:1-5; Osamo 90:10) Omanu vamue omo liohali yalua va kuete ovisimĩlo vioku liponda. Ci pitãhala 800.000 komanu va siata oku liponda anyamo osi, volosegundu vi soka 40, omunu umosi o liponda. Ci sumuisa calua omo okuti, vamue vamanjetu Akristão va siatavo oku kuata ovisimĩlo viaco kuenje va liponda.

4. Omanu vapi va tukuiwa Vembimbiliya okuti va kuatele onjongole yoku fa?

⁴ Kosimbu, afendeli vamue va Suku va liyevavo ndoco kuenje omo liovitangi va yonguile oku fa. Ndeci, Yovi wa kala levalo lialua kuenje wa popia hati: “Nyehula omuenyo wange. Si yongola oku kala ño lomuenyo.” (Yovi 7:16; 14:13) Yona wa sumuilevo kuenje wa popia hati: “Cilo, A Yehova, njupe omuenyo wange, momo ca mbelapo oku fa, oku kala lomuenyo ci sule.” (Yona 4:3) Uprofeto Eliya wa yeva esumuo lialua kuenje wa popia hati: “Ndoco yapa! Kaliye a Yehova, njupe omuenyo wange.” (1 Olosoma 19:4) Pole, Yehova wa solele calua afendeli vaco vakuekolelo kuenje wa yonguile okuti va kala lomuenyo. Eye ka va pisile omo liovisimĩlo viavo. Omo liaco, wa va kuatisa oku kuata onjongole yoku kala komuenyo oco vamameko oku u vumba lekolelo.

5. Momo lie vamanji va sukilila ocisola cetu koloneke vilo?

⁵ Koleneke vilo, vamanji valua va kasi oku liyaka lovina vi nena asakalalo kuenje va sukila ocisola cetu. Vamue va kasi oku lambalaliwa. Vakuavo va kasi oku pandikisa ndaño loku sanumuiwa, ale oku popiwa lãvi kovopange avo. Handi vali, ovo va yeva ekavo lialua omo lioku talavaya olowola vialua, ale omo liupange u kavisa calua. Vamue va kuete ovitangi vialua vepata. Pamue va kasi lohueli yina okuti ka yi vumbi Yehova kuenje otembo yosi va popiwa lãvi. Omo liovitangi evi kuenda vikuavo, valua va liyeva okuti ka va kuete ongusu loku litenda okuti ka va kuete esilivilo. Elie o pondola oku va kuatisa?

6. Ocisola ca Yehova ca pamisa ndati ofendeli vaye?

⁶ Yehova o lembeleka afendeli vaye poku popia okuti, o va sole kuenda o kamamako oku va sola otembo ka yi pui. Sokolola ndomo va Isareli va liyeva eci Yehova a va sapuila hati: “Ove wa soliwa ca piãla lame haive nda ku sumbila muẽle” kuenda “ku ka kuate usumba, momo ñasi kumue love”! (Isaya 43:4, 5) Etu tua kũlĩha okuti omunu lomunu o soliwe la Yehova. * (Tala etosi pombuelo.) Ohuminyo yi sangiwa Vembimbiliya yeyi hati: “Eye ukuonene woku ku muisa eyulo. O ku sanjukila lonjolela.”—Sofoniya 3:16, 17.

7. Yehova o sokisiwa ndati lonjali yi lemba omõlaye? (Tala ociluvialuvia kefetikilo liocipama.)

 ⁷ Yehova wa likuminya oku pamisa loku lembeleka omanu vaye ndaño lovitangi vialua va siata oku liyaka lavio. Eye wa popia hati: “Oco vu nyamako, vu pakatiwa, kuenje wangatiwi kolongolo viayo. Ndeci umue a lembiwa la inaye haico ndu lembi.” (Isaya 66:12, 13) Sokolola ndomo oñaña yi liyeva eci inaye o wangata ale ceci apapala laye! Yehova oku sole calua kuenje eye o yongola okuti ove o kolapo. Ku ka kuate atatahãi okuti ove o kuete esilivilo lialua ku Yehova.—Yeremiya 31:3.

8, 9. Ocisola ca Yesu ci tu kuatisa oku linga nye?

⁸ Esunga likuavo tua kũlĩha okuti Yehova o tu sole lieli okuti: ‘Suku wa sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.’ (Yoano 3:16) Ocilumba ca Yesu ci lekisa okuti eye o tu solevo kuenda ocisola caco ci tu pamisa. Embimbiliya li popia okuti ka kuli ‘ohali ale ongongo’ yi pondola “oku tu tepa kocisola ca Kristu.”—Va Roma 8:35, 38, 39.

⁹ Pamue tu liyaka lovitangi vimue okuti vi onguisa etimba lietu, ale ovisimĩlo kuenje ci tepulula esanju lietu lioku vumba Yehova. Pole, oku sokolola ndomo Kristu a lekisa ocisola caye kokuetu, ci tu ĩha ongusu yoku pandikisa. (Tanga 2 Va Korindo 5:14, 15.) Ocisola ca Yesu ci tu ĩha onjongole yoku amamako oku kala lomuenyo loku vumba Yehova. Eci ci tu kuatisa oku amamako ndaño tu pita lovilunga, alambalalo, esumuo ale asakalalo.

10, 11. Helie o kuete ocikele coku pamisa vamanji va sumua? Ci lombolola.

¹⁰ Yehova o talavayavo lekongelo oco a tu pamise locisola caye. Eci tu lekisa ocisola ku vamanji, tu lekisavo okuti tu sole Yehova. Tu lingi cosi ci tava poku kuatisa vamanji, oco va limbuke okuti va kuete esilivilo kuenda va soliwe la Yehova. (1 Yoano 4:19-21) Upostolo Paulu wa soneha hati: “Amamiko oku likolisa pokati loku lipamisa, ndeci vu kasi ale oku ci linga.” (1 Va Tesalonike 5:11) Akulu vekongelo havoko lika va kuete ocikele coku ci linga. Omunu lomunu pokati ketu o sukila oku setukula Yehova la Yesu poku eca elembeleko ku vamanji.—Tanga Va Roma 15:1, 2.

¹¹ Vamue vekongelo va kasi oku liyaka lovitangi omo liesumuo lialua, ale asakalalo, pamue va sukila ekuatiso liolondotolo kuenda ovihemba. (Luka 5:31) Akulu vekongelo kuenda vamanji vakuavo va kũlĩha okuti ovo halondotoloko, pole, ekuatiso lelembeleko va eca, li kuete esilivilo lialua. Vosi vekongelo va pondola ‘oku lembeleka vana va sumua, oku kuatisa vana va hongua kuenda oku pandikisa la vosi.’ (1 Va Tesalonike 5:14) Tu yongola oku likolisilako oku kũlĩha ndomo vamanjetu va liyevite. Tu sukila oku lekisa epandi kokuavo loku vangula lonjila yimue yi va lembeleka eci ovo va yeva esumuo. Ove hẽ o likolisilako oku pamisa vakuene? Nye o sukila oku linga vali oco o lembeleke vamanji lonjila yimue yi va vetiya calua?

12. Tukula ulandu wa manji umue wa pamisiwa omo liocisola ca lekisiwa kokuaye vekongelo a kasi.

¹² Manji umue ukãi kofeka yo ko Europa wa popia hati: “Pamue ñuata ovisimĩlo vioku liponda, pole, ñuete ekuatiso lialua. Ekongelo ndi kasi, lia popela omuenyo wange. Vamanji olonjanja viosi va lembeleka calua kuenda vakuacisola. Ndaño okuti  havosiko va kũlĩha okuti ñasi lesumuo lialua, vamanji vekongelo olonjanja viosi va kasi lame. Mua kala ohueli yimue ya kala ndolonjali kokuange. Oyo ya ndi tata ciwa kuenda otembo yosi yi kasi lame.” Havosiko va pondola oku eca ekuatiso lonjila yimuamue. Pole, vosi yetu, tu pondola oku eca ekuatiso li sukiliwa ku vamanji. * (Tala etosi pombelo yemẽla.)

13. Nye tu sukila oku linga oco tu pamise vakuetu?

¹³ Kala onjeveleli yiwa. (Tiago 1:19) Etu tu lekisa ocisola eci tu yevelela lepandi. Linga apulilo a sunguluka oco a ku kuatise oku kuata elomboloko lieci manji a yevite. Eci eye a vanja kocipala cove o limbuka nda ove wa kapako ovitangi viaye. Osimbu eye a vangula lekisa epandi kokuaye kuenda ecelela okuti o lianja, ku ko tete kondaka. Ocituwa coku yevelela ciwa, ci ku kuatisa oku kuata elomboloko ndomo a liyevite kuenda o pondola oku u kuatisa oco a kolele kokuove. Kuenje ci leluka kokuaye oku yevelela ovina o kasi oku popia osimbu u kuatisa. Nda wa kapako vakuene, eci ci ka va lembeleka calua.

14. Momo lie tu sukilila oku yuvula oku pisa?

¹⁴ Ku ka pise vakuene. Omunu wa sumua ale, o yeva vali esumuo lialua nda wa limbuka okuti tu kasi oku u pisa. Omo liaco, ci tĩla calua etu oku u kuatisa. “Ku li u olondaka viaye viukãlu via soka ndokutoma kuosipata, elimi liukualondunge puãi li sakula.” (Olosapo 12:18) Ndaño okuti onjongole yetu a ku sumuisako una wa sumua ale, handi lopo tu u kokela evalo nda tua vangula cimue okuti ka tu sokolola vali. Oco tu lembeleke manji umue, tu sukila oku lekisa kokuaye okuti tua kapako ovitangi viaye.—Mateo 7:12.

15. Ovimalẽho vipi tu sukila oku kuama oco tu pamise vamanji?

¹⁵ Vetiya vakuene lekuatiso Liondaka ya Suku. (Tanga Va Roma 15:4, 5.) Embimbiliya lia tunda ku “Suku una o tu lembeleka haeye o tu pamisa,” omo liaco, ka ci komõhisa okuti tu sanga elembeleko lialua vondaka yaye. Tu kuetevo o Índice das Publicações da Torre de Vigia kuenda Elivulu Lioku Konomuisa Liolombangi Via Yehova. Poku talavaya lovimalẽho evi, tu sanga ovisonehua kuenda alivulu tu sukila oku kuama, oco tu lembeleke vamanji loku va vetiya.

16. Ovituwa vipi vi tu kuatisa oku lembeleka umue wa sumua calua?

¹⁶ Lekisa ohenda kuenda ukamba. Yehova eye “Isia yohenda kuenda Suku yelembeleko liosi,” eye o kuetele ‘ohenda’ afendeli vaye. (Tanga 2 Va Korindo 1:3-6; Luka 1:78; Va Roma 15:13) Paulu wa sia ongangu yiwa, momo eye wa setukula Yehova. Eye wa soneha hati: “Eci tua kala pokati kene tuo tati lohenda, ndeci ina a tata locikembe omãla vaye. Omo tuo kuateli ohenda, ka tua nõlele lika oku wĩhi olondaka viwa via Suku, pole, tuo wĩhivo ovimuenyo vietu, momo vu soliwi letu.” (1 Va Tesalonike 2:7, 8) Eci tu lekisa ohenda ndeci Yehova, tu eca elembeleko lina manji a pinga vohutililo!

17. Tu tenda ndati vamanji okuti ci tu kuatisa oku va pamisa?

 ¹⁷ Ku ka lavoke okuti vamanji ka va lueya. Tava okuti vakuene va pondola oku lueya. Nda o lavoka oku lipua ku vamanji, ci ku nenela esumuo. (Ukundi 7:21, 22) Tu ivaluki okuti Yehova, ka lavoka kokuetu cina ka tu tẽla oku linga. Omo liaco, tu sukila oku lekisa epandi komunu lukuavo. (Va Efeso 4:2, 32) Ka tu yongola oku linga cimue ci kokisa vamanji oku sima okuti, ka va tẽla oku linga cimue, ale oku va sokisa lomanu vakuavo. Pole, tu va vetiya loku va pandiya omo liovina viwa va tẽla oku linga. Eci ci pondola oku va kuatisa oku kuata esanju osimbu va vumba Yehova.—Va Galatia 6:4.

18. Momo lie tu sukilila oku pamisa vakuetu locisola?

¹⁸ Afendeli vosi va Yehova va soliwe calua laye kuenda la Yesu. (Va Galatia 2:20) Etu tu sole calua vamanji, omo liaco, tu sukila oku va tata lumbombe. Tu sukila oku ‘kakatela kovina vi koka ombembua kuenda kovina vioku likuatisa pokati.’ (Va Roma 14:19) Tu lavoka omuenyo Voluali Luokaye muna okuti, ka mu ka kala vali eci ci tu kokela esumuo! Lomue vali o ka vela kuenda ka mu ka kala vali uyaki. Omanu ka va ka fa vali omo liekandu va piñala, kuenda ka ku ka kala vali elambalalo, ovitangi viapata, ale ovina vi sumuĩsa. Kuenje kesulilo liohulukãi yanyamo, omanu vosi va ka lipua. Vana va ka amamako oku pandikisa koseteko ya sulako va ka nõliwa la Yehova ndomãla vaye palo posi oco va kuate “eyovo liulamba womãla va Suku.” (Va Roma 8:21) Omo liaco, vosi yetu tu lekisi ocisola ci pamisa kuenda tu likuatisi pokati oco tu kale voluali luokaliye lua Suku.