1. Ocituwa coluali coku likapako ci pondola oku nyõla ndati umbombe wetu?

MOMO lie ca tĩlila oku kapako ovina tu lilongisa Vondaka ya Suku? Esunga limue lieli okuti, oco tu linge eci ca sunguluka, tu sukila oku kala ambombe. Koloneke vilo “via sulako,” ca tĩla calua oku lekisa umbombe, momo omanu “va linga vakuakulisola ovo muẽle, vakuakusola olombongo, vakuakulipanda, vakuakulivelisapo” haivo “ka va tẽla oku likandangiya.” (2 Timoteo 3:1-3) Omo okuti tuafendeli va Suku, tua kũlĩha okuti ovituwa viaco ka via sungulukile, pole, pamue ci molẽha ndu okuti vana va lekisa ovituwa viaco, va kuete ekalo liwa kuenda va kuete esanju liocili. (Osamo 37:1; 73:3) Tu lipula ndoco: Ndi likolisilako hẽ oku pitisa kovaso asukila a vakuetu okuti ange ci sule? Anga nda nda lekisa umbombe, omanu va ka lekisa hẽ esumbilo kokuange? (Luka 9:48) Nda tua ecelela okuti ocituwa coluali coku livelisapo ci tu yapuisa, tu nyõla ukamba tu kuete la vamanji kuenda ci tateka omanu  vakuavo oku limbuka okuti, Tuakristão. Pole, eci tu lilongisa ovolandu afendeli va Suku ndomo va lekisa umbombe, loku setukula ongangu yavo, tu kuata onima yiwa.

2. Nye tu lilongisila kafendeli va Suku vo kosimbu?

² Nye ca kuatisa afendeli va Suku kosimbu oku kala akamba vaye? Nye va linga oco vo sanjuise? Nye ca va kuatisa oku linga eci ca sunguluka? Eci tu tanga ovolandu avo Vembimbiliya loku sokolola kueci tua tanga, ekolelo lietu li pama.

3, 4. (a) Yehova o tu longisa ndati? (b) Ndaño tu kuete ale ukũlĩhĩso, nye tu sukila vali oco tu pamise ekolelo lietu?

³ Yehova o tu ĩha ovina tu sukila oco ekolelo lietu liamameko oku pama. Etu tu tambula alungulo awa kuenda epindiso li tunda Vembimbiliya, valivulu etu, vonumbi yetu yo Internet, vo JW Broadcasting kuenda kolohongele viekongelo, lolohongele vimbo. Pole, Yesu wa popia okuti tu sukila vali cikuavo okuti ukũlĩhisoko lika. Eye hati: “Okulia kuange oku linga ocipango cu wa numa loku tẽlisa upange waye.”—Yoano 4:34.

⁴ Oku linga ocipango ca Suku ca kala ndokulia ku Yesu. Oku li tekula lokulia kua pongiyiwa ciwa ceca ongusu vetimba lietu. Cimuamue haico okuti, oku linga ocipango ca Suku ci tu kuatisa kuenda ci pamisa ekolelo lietu. Wa liyevele ale hẽ okuti eci enda koku kunda o yeva ekavo kuenje poku tiuka o yeva esanju lekavuluko?

5. Asumũlũho api tu kuata nda tua lekisa olondunge?

⁵ Eci tu linga ovina Yehova a yongola kokuetu, tu lekisa olondunge. (Osamo 107:43) Vana va kuete olondunge va kuata ovina vialua viwa. “Cosi omunu a livela ka ci lisoki laye. . . Eye uti womuenyo kuava vo kuatelela. Ava vosi vo kuata va sumũlũha.” (Olosapo 3:13-18) Yesu wa popia hati: “Nda wa kũlĩhi ovina evi, vu sumũlũha nda vu vi linga.” (Yoano 13:17) Olondonge via Yesu via ponduile oku kuata esanju poku amamako oku linga eci Yesu a va handeleka. Komuenyo wavo wosi va sukilile oku kapako alongiso aye loku kuama ongangu yaye.

6. Momo lie tu sukilila oku amamako oku kapako ovina tua lilongisa?

⁶ Etu tu sukilavo oku amamako oku kapako ovina tu lilongisa. Sokolola ku umue ukuakusemulũla akãlu okuti, o kuete ovimalẽho viosi, luloño woku talavaya lavio. Ovimalẽho viaco viu kuatisa oku kala omesele yiwa, pole, te lika nda wa talavaya lavio. Pamue eye o kasi anyamo alua oku linga upange waco, pole, o sukila oku amamako oku kapako eci a lilongisa nda eye o yongola oku miñolola umesele waye. Cimuamue haico okuti, eci tua fetika oku lilongisa ocili tua kuata esanju, momo tua kapeleko ovina tua tanga Vembimbiliya. Pole, oco esanju liaco liamameko, oloneke viosi tu sukila oku kapako ovina Yehova a tu longisa.

7. Nye tu sukila oku linga oco tupe esilivilo kovolandu o kosimbu?

⁷ Vocipama cilo, tu lilongisa ovina vimue vi lekisa okuti pamue ci tĩla oku kala ambombe. Tu lilongisavo ndomo afendeli vakuekolelo kosimbu vamamako oku lekisa umbombe. Pole, oku tanga lika ulandu waco ka ci tẽla. Tu sukila oku sokolola loku kapako ulandu waco komuenyo wetu.

8, 9. Nye tu lilongisa kumbombe Paulu a lekisa ndomo ca lomboluiwa Kovilinga 14:8-15? (Tala ociluvialuvia kefetikilo liocipama.)

⁸ Suku o yongola okuti omanu vosi “va kuata ukũlĩhĩso wa suapo wocili oco va popeliwe.” (1 Timoteo 2:4) O tenda ndati omanu vosi vana okuti handi ka va lilongisa ocili? Upostolo Paulu wa kundila va Yudea va kuata ale ukũlĩhĩso umue watiamẽla ku Yehova. Pole, eye wa kundilavo vana va enda oku fendela olosuku viesanda. Oku kundila omanu vaco ca seteka umbombe wa Paulu. Ndamupi?

⁹ Paulu kumue la Barnaba kungende wavo watete wumisionaliu, va enda kolupale luo Lustra. Va Lukaonia va kala ko Lustra va tenda Paulu la Barnaba ndomanu vamue va velapo pokati kavo loku va tukula lolonduko violosuku viavo viesanda okuti, Sewusi la Hermes. Anga hẽ Paulu la Barnaba va litunũla? Va ci tenda hẽ ndepongoloko liwa kalambalalo va kuata kalupale avali asulako ovo va nyula? Anga hẽ va simĩle okuti esumbilo liosi va tambula li ka kuatisa omanu oku yeva olondaka viwa? Sio! Ovo va tema calua kuenje va kaluka vati: “Momo lie vu lingila ovina evi? Etu letuvo tumanu kuenda tu kuetevo ovitangi ndene.”—Ovilinga 14:8-15.

10. Momo lie Paulu la Barnaba ka va lekisile ocituwa coku livelisapo ku va Lukaonia?

¹⁰ Eci Paulu la Barnaba va popia okuti ovo omanuvo, va yonguile oku popia okuti ovo ka va lipuile. Eci ka ci lomboloka okuti onjila yavo yoku fendela ya kala ndeyi ya va Lukaonia. Paulu la Barnaba va tumiwile la Suku ndolomisionaliu. (Ovilinga 13:2) Ovo va wavekiwa lespiritu sandu kuenda va kuata elavoko limue lilikasi. Ndaño lelavoko liaco, ka va livelisilepo. Ovo va kũlĩhĩle okuti omanu vaco va laikelevo oku kuata elavoko lioku enda kilu nda va tava kolondaka viwa.

11. Tu lekisa ndati umbombe ndowu wa Paulu eci tu kunda?

¹¹ Eyi oyo onepa yatete yoku lekisa okuti tuambombe ndeci Paulu. Etu lalimue eteke ka tu ka simi okuti ocikele cetu coku kunda, ale ovikele vikuavo Yehova a tu ĩha oco tu vi tẽlise, vi tu vetiya oku livelisapo. Tu lipula ndoco: ‘Omanu va kasi vocikango cange ndi va tenda ndati? Anga hẽ komanu vamue ndi lekisa olonepele?’ Koluali luosi Olombangi Via Yehova vi likolisilako oku sandiliya vana va yongola oku yeva olondaka viwa. Vamue va likolisilako oku lilongisa elimi ale ovituwa viomanu va tendiwa okuti va sule. Pole, ovo lalimue eteke va sima okuti va velapo omanu vana ovo va kundila. Kuenje va likolisilako oku kũlĩha ekalo liomunu lomunu, oco va kuatise valua oku tava kesapulo Liusoma.

12. Epafra wa lekisa ndati okuti wa kapeleko vakuavo?

¹² Onepa yikuavo yoku lekisa okuti tuambombe, oku likutililako vamanji vana ‘va kuete ale ekolelo ndeli lietu.’ (2 Petulu 1:1) Eci oco Epafra a linga. Embimbiliya li u tukula lika olonjanja vitatu. Eci Paulu a kala vokayike ko Roma, wa sonehela Akristão va Kolosai catiamẽla ku Epafra hati: “Eye olonjanja viosi o likolisila oku u likutililiko.” (Va Kolosai 4:12) Epafra wa kũlĩhĩle ciwa vamanji kuenda wa va kapeleko calua. Paulu  wo tukula hati, “ekamba liumandekua,” omo liaco, Epafra wa kuatelevo ovitangi. (Filemone 23) Ndaño lovitangi a kuata, wa kapeleko asukila a vakuavo kuenda wa eca ekuatiso kokuavo. Epafra wa enda oku likutililako vamanji loku va tukula kolonduko, etu tu sukilavo oku ci linga. Olohutililo viaco vi kuete unene walua.—2 Va Korindo 1:11; Tiago 5:16.

13. O setukula ndati ongangu ya Epafra eci o likutilila?

¹³ Sokolola komunu umue okuti poku likutilila u tukula konduko. O pondola oku sokolola kakamba vove vekongelo, ale kapata wa kũlĩha okuti va kasi oku liyaka lovitangi. Pamue ovitangi viavo vioku nõla onjila va sukila oku kuama, ale oku tamãlala kayonjo. O pondolavo oku likutililako vamanji vana okuti, olonduko viavo vi kasi vo jw.org vonepa: “Testemunhas de Jeová Presas por Causa de Sua Fé.” (Tala okasapi hati, IMPRENSA > CASOS JURÍDICOS.) O pondolavo oku likutililako vana va fisa, vana va pita lovilunga, ale luyaki la vana va kasi lekambo liolombongo. Kuli vamanji valua va sukila olohutililo vietu. Eci tu va likutililako, tu lekisa okuti ka tua kapeleko lika olonjongole vietu muẽle, pole, tua kapakovo asukila a vakuetu. (Va Filipoi 2:4) Yehova o yeva olohutililo viaco.

14. Yehova o lekisa ndati okuti onjeveleli ya velapo?

¹⁴ Onepa yikuavo yoku lekisa okuti tuambombe, oku kala onjeveleli yiwa. Tiago 1:19 ku tu sapuila okuti tu sukila oku kala “vakuanjanga koku yevelela.” Yehova eye wa velapo koku yevelela. (Efetikilo 18:32; Yehosua 10:14) Kũlĩhĩsa olondaka vi sangiwa kelivulu Lietundilo 32:11-14. (Tanga.) Ndaño okuti Yehova ka sukilile ocisimĩlo ca Mose, eye wa ecelela okuti Mose o lombolola ndomo a liyevite. O pondola hẽ oku yevelela lepandi umue wa lueyele kosimbu  kuenje noke wa kapako elungulo liove? Ocili okuti, Yehova o yevelela lepandi omanu vosi va likutilila lekolelo.

15. Tu setukula ndati Yehova poku sumbila vakuetu?

¹⁵ Lipula ndoco: ‘Nda Yehova wa lekisa umbombe poku yevelela omanu ndeci, Avirahama, Rahele, Mose, Yehosua, Manoa, Eliya kuenda Hesekiya, si pondolavo hẽ oku ci linga? Nda sumbila hẽ vamanji vosi poku kuama alungulo avo loku a kapako nda ci sukiliwa? Vekongelo ndi kasi, ale vepata, muli hẽ ava va sukila ekuatiso liange? Nye ndi sukila oku linga konepa eyi?’—Efetikilo 30:6; Olonganji 13:9; 1 Olosoma 17:22; 2 Asapulo 30:20.

16. Soma Daviti wa lekisa ocituwa cipi eci Simei o sanumula?

¹⁶ Umbombe, u tu kuatisavo oku likandangiya eci vakuetu va tu tata lãvi. (Va Efeso 4:2) Tu kuete ulandu umue uwa kelivulu lia 2 Samuele 16:5-13. (Tanga.) Simei, ukuepata lia Soma Saulu, wa sanumula kuenda wa katukila Daviti kumue lakuenje vaye. Nda ca tava okuti Daviti o tutuiya Simei, pole, ka ci lingile, lepandi lialua eye wa ecelela okuti Simei u siñala. Daviti wa likandangiya ndati? Tu ci kũlĩhĩsa poku tanga Osamo yatatu.

17. Nye ca kuatisa Daviti oku lekisa ocituwa coku likandangiya kuenda tu u setukula ndati?

¹⁷ Daviti wa soneha Osamo yatatu eci omõlaye Avisalome a seteka oku u ponda. Ca kala votembo Simei a katukila Daviti, pole, Daviti wa sanga ongusu poku likandangiya. Ndamupi? Kosamo 3:4, tu tanga olondaka via Daviti hati: “Mbilikiya Yehova lolukandi, kuenje eye o nambuluila komunda yaye yi kola.” Eci tu tatiwa lãvi tu sukila oku likutilila ndeci Daviti a linga. Kuenje Yehova o tu ĩha espiritu sandu liaye oco tu pandikise. O pondola hẽ oku likandangiya, ale oku kala ukuakuecela eci umue a ku sanumula? Wa kolela hẽ okuti Yehova wa kapako ovitangi viove kuenda oku kuatisa loku ku sumũlũisa?

18. Tu kuatisiwa ndati poku kapako olonumbi via Yehova?

¹⁸ Eci tu linga ovina tua kũlĩha okuti via sunguluka, tu lekisa olondunge kuenda Yehova o tu sumũlũisa. Embimbiliya Kolosapo 4:7 li popia hati: “Kuata olondunge.” Ndaño okuti olondunge via kunamẽla kukũlĩhĩso, pole, mua kongela ovina vialua okuti haku kuatako lika elomboloko liocina cimue. Volondunge mua kongela oku nõla onjila tu kuama. Ndaño muẽle olonjinji vi lekisa olondunge. Ovio ka via kũlĩhĩle ovina, pole, vi kuete olondunge vioku soleka okulia kuondombo. (Olosapo 30:24, 25) Kristu o tukuiwa okuti “olondunge via Suku,” olonjanja viosi wa linga ovina vi sanjuisa Isiaye. (1 Va Korindo 1:24; Yoano 8:29) Suku o tu sumũlũisavo eci tu lekisa olondunge poku nõla onjila ya sunguluka kuenda oku amamako lumbombe. (Tanga Mateo 7:21-23.) Omo liaco, amamako oku kuatisa vekongelo oco vosi va vumbe Yehova lumbombe. Ocili okuti, ci sukila otembo lepandi oku kapako ovina tua kũlĩha okuti via sunguluka. Poku ci linga, tu lekisa umbombe kuenje umbombe u tu nenela esanju cilo kuenda kovaso yoloneke.