Ukuonene Wosi wa Kapako Omanu
“[Yehova] wa kũlĩha ovatimba etu, ivaluka okuti tuneketela.”—OSAMO 103:14.
1, 2. (a) Lonjila yipi Yehova a tata omanu okuti ca litepa ndomo omanu va kemãla va siata oku ci linga? (b) Ovina vipi tu lilongisa vocipama cilo?
OMANU va kemãla va kangisa vakuavo, ale va va talisa ohali. (Mateo 20:25; Ukundi 8:9) Pole, Yehova lalimue eteke a ci linga! Ndaño okuti eye Omunu wa Velapo, haeye ukuonene wosi voluali luosi, wa kapako calua omanu ka va lipuile. Eye ukuahenda kuenda wa kapako asakalalo etu lovina tu sukila. Eye ivaluka okuti ka tua lipuile kuenda wa kũlĩha okuti ka tu tẽla oku linga ovina viosi, omo liaco, lalimue eteke a tu pinga oku linga ovina ka tu tẽla.—Osamo 103:13, 14.
2 Vembimbiliya, tu lilongisa ndomo Yehova a kapako afendeli vaye. Tu kũlĩhĩsi ovolandu atatu: Tete, ndomo Yehova a kuatisa umalẽhe Samuele oco a ece esapulo liesombiso Kocitunda Cinene Eli. Vali, ndomo Yehova a lekisa epandi ku Mose eci Mose a liyeva okuti ka pondola oku songuila va Isareli oku tunda Kegito. Tatu, ndomo Yehova a tata va Isareli eci va tunda Kegito. Nye tua lilongisa kovolandu a-a catiamẽla ku Yehova kuenda tu u setukula ndati?
WA KUATISA OMÕLA UMUE
3. Ocina cipi ca pita lumalẽhe Samuele vuteke umue kuenda apulilo api tu sukila oku linga? (Tala ociluvialuvia kefetikilo liocipama.)
3 Samuele wa fetika oku vumba votavernakulu eci eye a kala omõla. (1 Samuele 3:1) Vuteke umue, osimbu a enda oku pekela, kua molẽha ocina cimue ci komõhisa calua. * (Tala etosi pombuelo yemẽla.) (Tanga 1 Samuele 3:2-10.) Samuele wa yeva okuti umue wa kala oku u vilikiya. Eye wa sima okuti, Ocitunda Cinene Eli. Kuenje lonjanga yalua wa votoka, wa lupukila ku Eli, hati: “Ame ulo momo wa ñovonga.” Pole Eli wo sapuila hati: “Sia ku kovongele.” Eci ovina viaco via pita olonjanja vivali, Eli wa limbuka okuti Suku eye wa kovonga Samuele. Eli wa sapuila Samuele ovina a laikele oku popia onjanja yikuavo, kuenje Samuele wa pokola. Momo lie Yehova ka sapuilile Samuele kefetikilo okuti eye wa kala oku u vilikiya? Embimbiliya ka li ci lombolola. Pole, citava okuti Yehova wa ci lingila omo okuti wa kapeleko ekalo lia Samuele.
4, 5. (a) Nye Samuele a linga eci Yehova o tuma oku eca esapulo limue ku Eli? (b) Ulandu owu u tu longisa nye catiamẽla ku Yehova?
4 Tanga 1 Samuele 3:11-18. Ocihandeleko ca Yehova ci popia okuti omãla va sukila oku sumbila akulu, ca piãla enene vana va kuete ocikele. (Etundilo 22:28; Ovisila 19:32) Omo liaco, ca tĩla oku sokolola okuti umalẽhe umue nda Samuele o pasuka omẽle enda ku Eli kuenje lutõi walua u sapuila esombiso linene li tunda ku Suku. Embimbiliya li tu sapuila okuti, Samuele “wa kala lohele yoku lomboluila Eli ocinjoinjoi.” Kuenje Suku wa situluila Eli okuti Eye wa kala oku vilikiya Samuele. Omo liaco, Eli wa pinga ku Samuele oco ka ko limbike lacimue co sapuila Suku. Samuele yu “wo sapuila cosi.”
Ocina Yehova a linga ca vetiya Samuele, oku amamako oku lekisa epokolo kuenda esumbilo
5 Esapulo liaco ka lio komõhisile momo “ukuenje umue wa Suku” wa sapuilile ale Eli ondaka ndeyi. (1 Samuele 2:27-36) Ulandu owu u tu longisa okuti olondunge via Yehova via piãla kuenda wa kapako omanu.
6. Nye tu lilongisila konjila ndomo Suku a kuatisa umalẽhe Samuele?
6 Ove hẽ umalẽhe? Nda oco, ulandu watiamẽla kumalẽhe Samuele u ku kuatisa oku kuata elomboloko liokuti Yehova wa kapako ovitangi viove kuenda ekalo liove. Citava okuti o kuete osõi kuenda ca ku tĩlila oku kundila akulu, ale oku kala umalẽhe umue wa litepa lamalẽhe vakuavo. Pole, kolela okuti Yehova o yongola oku ku kuatisa. Omo liaco, likutilila kokuaye kuenda u sapuila viosi vi kasi vutima wove. (Osamo 62:8) Sokolola kovolandu a sangiwa Vembimbiliya atiamẽla kamalẽhe ndeci wa Samuele. Sapela la vamanji vakuotunga wove ale akulu vana okuti va yula ovitangi ndevi o kasi oku liyaka lavio. Citava okuti va ku sapuila ndomo ovo va kuatisiwa la Yehova lonjila yimue ka va la vokaile.
WA KUATISA MOSE
7, 8. Yehova wa lekisa ndati okuti wa kapeleko calua ovisimĩlo via Mose?
7 Eci Mose a kuata 80 kanyamo, Yehova wa eca kokuaye ocikele cimue ka ca lelukile okuti: oku yovola va Isareli kupika Kegito. (Etundilo 3:10) Citava okuti ocikele eci ca yokokisa Mose, momo eye wa kala ungombo ko Midiane vokuenda kueci ci soka 40 kanyamo. Kuenje Mose wa popia hati: “Ame hẽ elie okuti ngenda ku Fareo si kopa va Isareli ve Egito?” Yehova wo Kumbulula hati: “Ame ñala love.” (Etundilo 3:11, 12) Yehova wo sapuilavo okuti akulu vo ko Isareli va ka “yeva ondaka” yaye. Oco Mose wa kumbulula hati: “Puãi ndi ci ale okuti ka va nava, ka va yevi kondaka yange.” (Etundilo 3:18; 4:1) Ku Mose ca kala ndu okuti Yehova wa lueya! Pole, Yehova wa lekisa epandi ku Mose. Eye wa eca ku Mose unene woku linga ovikomo. Kuenje Mose eye omunu watete wa tukuiwa Vembimbiliya okuti wa kuata unene waco.—Etundilo 4:2-9, 21.
8 Ndaño lovina viosi evi, Mose wa lekisa vali ocitangi cikuavo. Eye wa popia okuti ka tẽla oku vangula ciwa. Suku wo sapuila hati: ‘Ame ndi kala love osimbu o vangula kuenda hu longisa eci o sukila oku popia.’ Anga hẽ Mose wa tava? Sio, eye wa pinga ku Suku oco a tume omunu ukuavo! Kuenje eci ca temisa Yehova. Ndaño ndoco, eye wa kapeleko ovisimĩlo via Mose, noke wa tuma Arone oco a kale kapitiya ka Mose.—Etundilo 4:10-16.
9. Epandi lia Yehova kuenda ohenda yaye ya kuatisa ndati Mose oku kala usongui uwa?
9 Ulandu owu u tu longisa nye catiamẽla ku Yehova? Omo okuti Yehova Ukuonene Wosi, eye wa ponduile oku talavaya lunene waye oco a yokokise Mose loku kokisa okuti o pokola. Pole, Yehova wa lekisa epandi lohenda kuenda wa vetiya ufendeli waye una wa liketisa haeye womboka okuti wa laikele oku u kuatisa. Anga hẽ eci ca kuatisa? Ca kuatisa! Mose wa linga usongui wa velapo wafendeli va Suku. Eye wa likolisilako oku lekisa ocisola kuenda oku kapako vakuavo, ndeci Yehova a linga kokuaye.—Atendelo 12:3.
Ove hẽ o tata vakuene ndomo Yehova a va tata? (Tala ocinimbu 10)
10. Tu kuatisiwa ndati nda tua kapako vakuetu ndeci Yehova a linga?
10 Nye tu lilongisila kovolandu a-a? Nda ove ulume umue ohueli, pamue u isia ale ukulu wekongelo, o kuete ocikele ku vakuene. Omo liaco, ci kuete esilivilo oku setukula Yehova oku lekisa esumbilo, ocisola, lepandi kukãi wove, komãla vove kuenda komanu vosi vekongelo. (Va Kolosai 3:19-21; 1 Petulu 5:1-3) Nda wa setukula Yehova Suku kuenda Yesu Kristu okuti eye Mose wa Velapo, ci leluka ku vakuene oku sapela love kuenje o ka va pamisa. (Mateo 11:28, 29) Handi vali, o ka kala ongangu yiwa kokuavo.—Va Heveru 13:7.
UKUONENE HAEYE UPOPELI
11, 12. Yehova wa pamisa ndati va Isareli loku va teyuila eci va tunda Kegito?
11 Citava okuti kua kala eci ci pitãhala olohulukãi vitatu via va Isareli va tunda Kegito kunyamo 1513 osimbu Kristu keyile. Pokati kowiñi waco pa kala omãla, akulu kuenda citava okuti pa kalavo vana va vela ale ovilema. Owiñi waco wa sukilile Usongui umue o va tata ciwa haeye wa va kapako. Eci oco Yehova a linga vocakati ca Mose. Kuenje va Isareli va liyeva okuti va kolapo poku siapo ocitumãlo va kala.—Osamo 78:52, 53.
12 Yehova wa pamisa ndati afendeli vaye loku va teyuila? Eye wongolola va Isareli ‘ndovimunga viasualali’ eci va tunda Kegito. (Etundilo 13:18) Omo okuti va lipongiya ciwa, va ponduile oku limbuka okuti Suku eye wa kala oku va songuila. Yehova “kutanya wa va songuila lelende” kuenda “luteke locinyi condalu” kuteke ca va ivaluisa okuti ovo va kala la Yehova oku va songuila kuenda oku va teyuila. (Osamo 78:14) Va Isareli va sukilile ekuatiso liaco omo liovina vikuavo via laikele oku pita.
Yehova wa tata ndati va Isareli eci va yoka Okalunga Kakusuka? (Tala ocinimbu 13)
13, 14. (a) Yehova wa lekisa ndati okuti wa kapeleko va Isareli eci va yoka Okalunga Kakusuka? (b) Yehova wa lekisa ndati okuti unene waye wa velepo okuti wa va Egito u sule?
13 Tanga Etundilo 14:19-22. Sokolola okuti o kasi pokati ka va Isareli. Wa sakalala. Ovanyali va Egito va kasi konyima yove kuenda kovaso yove kuli Okalunga Kakusuka. Kuenje Suku o linga ocikomo cimue. Elende lina lia kala kovaso ove li sondolokela konyima yocilombo, pokati kove la va Egito. Kaliye ovo va kasi vowelema, pole, ocilombo cove ci kuete ocinyi calua! Kuenje ove o mola okuti Mose woluĩla eka liaye kilu liokalunga kuenda ofela yimue yalua yeya, ya tepa pokati okalunga loku sia onjila. Ove, lepata liove kuenda ovinyama viosi vu pita posi ya kukuta kumue la va Isareli vosi. O komõha omo okuti osi yaco ka yi kuete onata, haiyo ka yi sielena. Oyo ya kukuta kuenda ya kola, ca leluka oku endelamo. Kuenje eci ca kuatisa omanu vosi la vana va hongua va pitĩla ciwa konele yikuavo.
14 Tanga Etundilo 14:23, 26-30. Osimbu ovina evi vi kasi oku pita, Fareo lepela liaye kuenda uveke, o fetika oku landula ove kuenda va Isareli vosi. Noke Mose oluĩla vali eka liaye kilu liokalunga kuenje ovimbaka vivali viovava via likongela. Fareo kuenda olohoka viaye va sitikiwa lovava. Lomue pokati kavo o supapo!—Etundilo 15:8-10.
15. Ulandu owu u ku longisa nye catiamẽla ku Yehova?
15 Ulandu owu u tu longisa ocina cimue catiamẽla ku Yehova. Eye ha Sukuko yombuanja kuenda ovituwa viaye vi tu pamisa loku tu teyuila. (1 Va Korindo 14:33) Ndungombo umue ukuacisola haeye o tata olomeme viaye, Yehova o tata a fendeli vaye lonjila yimue yi komõhisa. Eye o va pamisa kuenda o va teyuila kovanyali vavo. Eci ci tu pamisa kuenda ci tu lembeleka calua osimbu tu panda kesulilo lioluali lulo.—Olosapo 1:33.
16. Tu pondola oku kuatisiwa ndati poku kũlĩhĩsa ndomo Yehova a yovola va Isareli?
16 Koloneke vilo, Yehova o tata afendeli vaye ndocimunga. Eye o va kuatisa oco vamameko oku kuata ukamba uwa laye loku va teyuila kovanyali vavo. Handi vali, eye o ka amamako oku ci linga vokuenda kuohali ya piãla yi kasi ale ocipepi. (Esituluilo 7:9, 10) Ci kale amalẽhe ale akulu, olombeyi ale ovilema, afendeli va Suku ka va ka kuata usumba ale oku yokoka vokuenda kuohali ya piãla. * (Tala etosi pombuelo yemẽla.) Ocili okuti ovo va ka lekisa utõi! Ovo va ivaluka olondaka via Yesu vi popia hati: “Talami ngo kuenda kuati utõi, momo eyovo liene li kasi ocipepi.” (Luka 21:28) Ndaño ceci va ka lambalaliwa la Goge, okuti ocimunga cimue colofeka capama vali calua, okuti Fareo o sule, afendeli va Suku va ka kolela okuti Yehova o ka va teyuila. (Esekiele 38:2, 14-16) Momo lie? Momo va kũlĩha okuti Yehova ka pongoloka. Yimue vali onjanja, o ka lekisa okuti eye Upopeli ukuacisola haeye ukuahenda lafendeli vaye.—Isaya 26:3, 20.
17. (a) Tu kuatisiwa ndati eci tu lilongisa ovolandu a lekisa ndomo Yehova a tata afendeli vaye? (b) Nye tu ka lilongisa vocipama cikuavo?
17 Vocipama cilo, tua mola ovolandu amue a lekisa ndomo Yehova a tata lohenda, a songola kuenda a yovola afendeli vaye. Osimbu o sokolola kovolandu aco, lilongisa ovina viokaliye viatiamẽla ku Yehova poku konomuisa lutate ovina vimue kua kũlĩhĩle osimbu. Lonjila eyi o ka lilongisa ovina vialua viatiamẽla kovituwa vi komõhisa via Yehova kuenje ocisola u kutele kuenda ekolelo vi ka pamisiwa. Vocipama cikuavo, tu ka lilongisa olonjila tu pondola oku setukula Yehova poku kapako omanu vosi, vepata lietu, vekongelo kuenda kupange woku kunda.
^ tini. 3 Josefo, ulume umue u Yudea haeye ukuasapulo wa popia hati, kotembo yaco Samuele wa kuata 12 kanyamo.
^ tini. 16 Ca sunguluka oku limbuka okuti omanu vamue va ka supuluka ko Harmagedo, ovilema. Eci Yesu a kala palo posi eye wa sakula omanu va kuata “ovovei aiñi aiñi” ale ovitangi vikuavo. Ovina eye a linga vi lekisa eci a ka lingila vana va ka supuluka ko Harmagedo. (Mateo 9:35) Vana va ka pinduiwa va ka kala luhayele wa suapo.
