UPOSTOLO Paulu wa vetiyiwa oku soneha ovituwa ecea vina tu lekisa lekuatiso liespiritu sandu lia Suku. (Va Galatia 5:22, 23) Ovituwa viaco viosi, vi tukuiwa okuti “epako liespiritu.” * (Tala etosi pombuelo yemẽla.) Epako liaco li panga onepa ‘komunu wokaliye.’ (Va Kolosai 3:10) Ndeci uti umue u sukila ovava oco wime apako, tu sukilavo espiritu sandu oco tu kuate ovituwa via tiamẽla kepako liespritu.—Osamo 1:1-3.

Ocituwa catete Paulu a tukula, ocisola. Ocituwa caco ci kuete esilivilo lipi? Paulu wa popia hati nda omunu ka kuete ocisola, eye a “cimueko.” (1 Va Korindo 13:2) Pole, ocisola ci lomboloka nye kuenda tu lekisa ndati ocituwa caco?

Ka ca lelukile oku lombolola lonjila ya suapo ondaka ocisola, pole, Embimbiliya lilekisa ndomo omunu o kuete ocisola a tuwa. Embimbiliya li lekisa okuti, ocisola ci “pandikisa kuenda ci lingainga eci ciwa, ci yolaila evi viesunga, cecaila ovina viosi, ci kolela ovina viosi, ci lavoka ovina viosi, ci pandakaisa kovina viosi.” Omunu wosi o kuete ocisola, o sakalala la vakuavo kuenda ekamba limue liwa. Handi vali, omunu ka kuete ocisola, ukuesepa, ukuepela, ka kuete esumbilo, ukuacipululu kuenda ka tẽla oku ecela vakuavo. Ocili okuti, ka tu yongola oku tuwa ndoco, pole, tu yongola oku lekisa ocisola okuti, “ka ci sandi ovina vialio muẽle.”—1 Va Korindo 13:4-8.

“Suku eye ocisola.” (1 Yoano 4:8) Ovina viosi Yehova a linga vi situlula ocisola caye komanu. Elinga lia velapo liocisola caye, poku tuma Yesu palo posi oco a tale ohali kuenda oku tu fila. Upostolo Yoano wa popia hati: “Ocisola ca Suku ca situluiwa ndoco kokuetu okuti, Suku wa tuma Omõlaye wongunga voluali okuti tu kuata omuenyo mekonda liaye. Ocisola ka ci lomboloka okuti, etu tua sola Suku, puãi Suku eye wa tu sola kuenda wa tuma Omõlaye ndocilumba coku tuvika akandu etu.” (1 Yoano 4:9, 10) Omo lielinga liaco liocisola ca Suku, akandu etu a pondola oku ecelua, loku kuata elavoko liomuenyo kopui.

Yesu wa lekisavo okuti o sole omanu, poku linga ocipango ca Suku. Upostolo Paulu o tu sapuila ndoco: Omo “liocipango” caco tua kolisiwa mekonda liocilumba cetimba lia Yesu Kristu ca eciwa onjanja yimosi.” (Va Heveru 10:9, 10) Ka kuli omunu nda wa tẽla oku lekisa ocisola caco. Yesu wa popia hati: “Lomue o kuete ocisola ca velapo ndeci, okuti omunu o pesila omuenyo waye akamba vaye.” (Yoano 15:13) Hanga hẽ etu ka tua lipuile tu pondola oku  setukula ocisola Yehova la Yesu va tu kuetele? Oco, tu pondola! Tu kũlĩhisi ndomo tu ci linga.

Paulu o tu vetiya okuti: “Lingi olosetukuli via Suku ndomãla va soliwe, kuenda endaili vocisola ndeci Kristu a tu sola poku eca omuenyo waye kokuetu.” (Va Efeso 5:1, 2) Oku “endaila vocisola” ci lomboloka nye? Ci lomboloka oku lekisa ocisola kovina viosi tu linga komuenyo wetu, okuti ka tu ci vangula lika. Upostolo Yoano wa soneha ndoco: “Atumãla, ka tu ka soli londaka pamue lelimi, te lovilinga kuenda locili.” (1 Yoano 3:18) Tu lekisavo ocisola cetu ku Yehova kuenda komanu eci tu kunda “olondaka viwa Viusoma.” (Mateo 24:14; Luka 10:27) Onjila yikuavo yoku “endaila vocisola,” poku kala vakuepandi, vakuahenda kuenda va kuakuecela. Tu kapako elungulo Liembimbiliya liokuti: “Ndeci Yehova o weceli lutima wosi, cimuamue haico vu linga.”—Va Kolosai 3:13.

Nda tu eca elungulo limue ku vakuetu, ka ci lomboloka okuti ka tu va sole. Olonjali vimue oco vi lungule omãla vavo omo lioku lipilikila cimue, vi linga ovina omãla va yongola. Pole, olonjali vina vi sole omãla vavo, vi sukila oku kuata utõi woku va lungula. Cimuamue haico okuti, omo Yehova Suku eye ocisola, “o pindisa una a sole.” (Va Heveru 12:6) Ocisola ci tu vetiyavo oku eca epindiso nda ci sukiliwa. (Olosapo 3:11, 12) Tu ivaluki okuti vosi yetu, ka tua lipuile kuenda olonjanja vialua tu lueya poku lekisa ocisola. Omo liaco, vosi yetu tu likolisiliko oku kuata ocisola. Tu ci linga ndati? Tu konomuisi olonepa vitatu.

Catete, pinga ku Yehova espiritu sandu liaye, oco li ku kuatise oku kuata ocisola. Yesu wa popia hati, Yehova eca “espiritu sandu ku vana vo pinga.” (Luka 11:13) Nda tua pinga espiritu sandu loku ecelela okuti li tu songuila, ocisola cetu ci livokiya. (Va Galatia 5:16) Nda ove ukulu wekongelo, pinga espiritu sandu oco li ku kuatise oku eca elungulo locisola li tunda Vembimbiliya. Nda unjali, pingavo espiritu sandu oco li ku kuatise oku pindisa locisola omãla vove.

Cavali, sokolola ndomo Yesu a lekisa ocisola ndaño ceci a enda oku sepuiwa. (1 Petulu 2:21, 23) Nda wa sanumuiwa ale wa tatiwa lekambo liesunga, li pula ndoco: ‘Nda ca kaile Yesu nda nye a linga?’ Manji umue ukãi o tukuiwa hati Leigh, wa siata oku linga epulilo liaco kuenje cu kuatisa oku sokolola osimbu ka nõlele onjila yimue. Eye hati: “Eteke limue, ukãi umue ndi talavaya laye, wa tumisa esapulo limue lioku ndi popia lãvi komanu vakuavo tu talavayela kumosi kuenda eci catiamẽla kupange wange. Eci ca ndi temisa calua. Pole, nda sokolola ndoco: ‘Nda ca kaile Yesu nda nye a linga?’ Eci ca ndi kuatisa oku tulumuha. Noke, nda limbuka okuti eye wa kala oku pita locitangi cimue coku vela. Eli olio esunga lieci a popela olondaka viaco okuti ka sokoluile vali. Oku sokolola kongangu ya Yesu yoku lekisa ocisola ndaño ceci a enda oku sanumuiwa, ca ñuatisavo oku lekisa ocisola kukãi waco.” Omo liaco, nda tua setukula ongangu ya Yesu, tu ka amamako oku lekisa ocisola ku vakuetu.

Catatu, lilongisa oku lekisa ocisola poku pitisa kovaso olonjongole via vakuene. Ocisola caco, oco ondimbukiso Yakristão vocili. (Yoano 13:34, 35) Embimiliya li tu vetiya oku kuata “ocituwa ndeci Kristu Yesu a kuatelevo.” Eci Yesu eya palo posi, “wa sia cosi a kuatele” kuenda omo lietu “wa pokola toke kokufa.” (Va Filipoi 2:5-8) Eci tu setukula ongangu yocisola ca Yesu, tu fetikavo  oku sokolola ndeye kuenje ci tu kuatisa oku pitisa kovaso olonjongole via vakuetu.

Kuli asumũlũho alua a tunda koku lekisa ocisola. Tu kukihisi ovolandu avali:

• ONGONGELA YA VAMANJI VOLUALI LUOSI: Eci tu nyula akongelo akuavo, ci kale okuti vofeka yetu ale kofeka yi kuavo, tua kũlĩha okuti vamanjetu va ka tu yolela locisola. Esumũluho linene oku kũlĩha okuti “vamanji voluali luosi” va tu kuetele ocisola! (1 Petulu 5:9) Ocisola caco, ci sangiwa lika pokati kafendeli va Yehova.

• OMBEMBUA: Omo liocisola, tu “pandikisa omunu lukuavo” kuenda ci tu kuatisa oku “kuata ombembua.” (Va Efeso 4:2, 3) Tua siata oku limbuka ombembua yaco eci tu enda kolohongele viekongelo, kolohongele vimbo kuenda viofeka. Ku tava hẽ okuti, oku kuata ombembua voluali lulo esumũlũho limue linene? (Osamo 119:165; Isaya 54:13) Eci tu likolisilako oku kuata ombembua la vakuetu, tu lekisa ocisola cocili kokuavo kuenje ci sanjuisa Isietu wokilu.—Osamo 133:1-3; Mateo 5:9.

Upostolo Paulu wa soneha hati: “Ocisola ci pamisa.” (1 Va Korindo 8:1) Eci ci lomboloka nye? Kelivulu 1  Va Korindo kocipama 13, upostolo Paulu wa lombolola ndomo ocisola ci pamisa, ale, ndomo ocisola ci kuete esilivilo komuenyo wetu. Ocipama caco Cembimbiliya ca tukuiwile okuti, “Osamo Yocisola.” Paulu wa popia hati, ocisola ka ci sandi ovina vialio muẽle. (1 Va Korindo 10:24; 13:5) Omunu wosi o kuete ocisola, ukuepandi, ukuahenda kuenda wa kapako ovisimĩlo via vakuavo. Omanu vaco va kuatisa apata, lakongelo oku kuata ocisola kuenda omunga.—Va Kolosai 3:14.

Kuli olonjila vialua vioku lekisa ocisola ku Suku. Kuenje ocisola caco ci kongela omanu vosi, ci kale ava va tunda kolofeka vikuavo, vakuekova liñi ale vakuelimi likuavo, vosi yetu tu pondola oku vumba Yehova, “lutima umuamue” loku likuata omunga. (Sofoniya 3:9) Tua nõlapo oku lekisa ocituwa caco ca Yehova oloneke viosi.