OMO okuti ekalo liomuenyo lia tĩla ‘koloneke vilo via sulako,’ tu sukila oku kuata epandi lialua. (2 Timoteo 3:1-5) Omanu valua voluali ka va lekisa epandi. Ovo vakuacipululu, vakuamanya kuenda ka va tẽla oku likandangiya. Omo liaco, tu sukila oku lipula ndoco: ‘Ame hẽ ndi lekisa ekambo liepandi lomanu vosi? Nye ci lomboloka oku kuata epandi liocili? Nye ndi sukila oku linga oco epandi li pange onepa komuenyo wange?’

Nye ci lomboloka ondaka “epandi” ndomo ya tukuiwa Vembimbiliya? Ka ci lomboloka lika oku pandikisa locitangi cimue. Omunu ukuepandi o pandikisa locimãho cimue, coku lavoka okuti ocitangi caco eteke limue ci potoluiwa. Eye ka li sokolola lika eye muẽle, pole, wa kapakovo ovitangi via vakuavo, ndaño via vana vo sumuisa, ale vana vo tata lekambo liesunga. Omunu waco amamako oku lavoka okuti ekalo liaco li pongoloka. Eci ka ci komõhisa momo Embimbiliya li popia okuti, epandi li tunda kocisola. * (Tala etosi pombuelo yemẽla.) (1 Va Korindo 13:4) Epandi li pangavo onepa “kepako liespiritu.” (Va Galatia 5:22, 23) Kuenje nye tu sukila oku linga oco tu kuate epandi liocili?

Oco tu kale vakuepandi tu sukila oku likutilila oco tu pinge ekuatiso liespiritu sandu lia Yehova, lina eye a eca ku vana vo kolela. (Luka 11:13) Espiritu liaco li kuete unene walua, pole, oco tu kuatisiwe, ekalo lietu te li likuata lolondaka tua tukula volohutililo vietu. (Osamo 86:10, 11) Eci ci lomboloka okuti, tu sukila oku likolisilako oku lekisa epandi eteke leteke loku ecelela okuti ci panga onepa komuenyo wetu. Pamue ka ci leluka oku ci linga. Nye ci pondola oku tu kuatisa?

Tu sukila oku lilongisa kuenda oku setukula ongangu ya lipua ya Yesu. Eci upostolo Paulu a lombolola eci catiamẽla ‘komunu wokaliye,’ okuti mua kongela epandi, eye wa tu vetiya ndoco: “Ombembua ya Kristu yi lava ovitima viene.” (Va Kolosai 3:10, 12, 15 etosi) Oco tu ci linge, tu sukila oku kuama ongangu ya Yesu kuenda oku kolela okuti, votembo ya sokiyiwa Suku o ka potolola ovitangi viaco. Nda tua lekisa ekolelo, lacimue ci ka tu tateka oku lekisa epandi, ndaño muẽle ceci tu pita lovitangi.​—Yoano 14:27; 16:33.

Vosi yetu tu yongola okuti oluali luokaliye luiya lonjanga. Pole, tua lilongisa okuti tu sukila oku kuata epandi lialua eci tu limbuka ndomo Yehova a siata oku pandikisa letu. Embimbiliya li tu sapuila hati: “Yehova ka livala lohuminyo yaye ndeci omanu vamue va sima, pole, eye o pandikisa lene, momo ka yongola okuti umue o nyõliwa, puãi o yongola okuti vosi va likekembela.” (2 Petulu 3:9) Omo liaco, eci tu sokolola ndomo Yehova a siata oku pandikisa letu, ci tu kuatisavo oku pandikisa lavakuetu. (Va Roma 2:4) Kapuluvi api tu sukila oku lekisa epandi?

Kuli apuluvi alua komuenyo wetu tu sukila oku lekisa epandi. Ndeci, tu sukila epandi okuti ka tu teti vakuetu kondaka nda tu yongola oku popia cimue ci kuete esilivilo. (Tiago 1:19) Tu sukilavo oku lekisa epandi eci umue a tu sanumula. Pole, nda ka tu kuete ocituwa coku lekisa epandi, ciwa oku ivaluka ndomo Yehova la Yesu va tenda akulueya etu. Ovo ka va tiamisila utima kaku lueya etu. Pole, ovo va luluvalela kovina viwa tu kuete kuenda lepandi va ecelela okuti tu miñolola ovituwa vietu.​—1 Timoteo 1:16; 1 Petulu 3:12.

Etu tu sukilavo oku lekisa epandi eci umue a tu sapuila okuti tua popia ale tua linga ovina vimue ka via sungulukile. Citava okuti, ocisimĩlo cetu catete oku popia lãvi omunu waco kuenda oku liteyuila. Pole, Ondaka ya Suku yi tu sapuila oco tu lekise ocituwa cimue ca sunguluka. Olio li popia hati: “Ava va kasi lutima wepandi ovo va velapo, ava va kuete utima woku lisola ovo va sule. Ku ka teme lonjanga, momo okutema kua tunga volonulo viaveke.” (Ukundi 7:8, 9) Omo liaco, nda umue wa popia cimue catiamẽla kokuetu okuti haciliko, tu sukila oku lekisa epandi loku sokolola lutate osimbu ka tua tambuluile. Eci oco Yesu a linga eci omanu vo lundila.​—Mateo 11:19.

Ca piãla enene olonjali, vi sukila oku lekisa epandi poku kuatisa omãla vavo eci va va pindisa ale oku va lungula poku yuvula ovitiwa ka via sungulukile. Kũlĩhĩsa ulandu wa manji Mattias, o talavaya ko Betele yo Eskandinavia. Mattias eci a kala umalẽhe, akamba vaye vo kosikola va fetika oku u sanumula omo liovina a kala oku lilongisa. Catete, olonjali viaye ka via kũlĩhĩle ovina via kala loku pita. Pole, ovo va fetika oku limbuka okuti Mattias wa kala latatahãi atiamẽla kovina a kala oku lilongisa. Manji Gillis, okuti isia ya Mattias wa popia okuti eye kumue lukãi waye va sukilile oku kuata epandi lialua kocitangi caco. Mattias wa sukilile oku linga apulilo ndeci: “Suku helie? Anga hẽ Embimbiliya Ondaka muẽle ya Suku? Tua kũlĩha ndati okuti Suku eye muẽle o tu yonguila ovina evi?” Eye wa pula vali ku isiaye hati: “Momo lie vakuetu va mopela lãvi nda ame si tava kovina ove o tava?”

Manji Gillis wa lombolola hati: “Pamue apulilo omõletu a enda oku lingiwa lonyeño, pole,  onyeño yaco ka yi kuatelele ame ale ina yaye, puãi wa yi kuatela omo liovina a kala oku lilongisa, momo wa fetika oku liyeva ndu okuti ocilemo kokuaye.” Manji Gillis wa kuatisa ndati omõlaye? “Ame lomõlange tua tumala kuenda tua sapela olowola vialua.” Olonjanja vimue, manji Gillis wa kala oku yevelela Mattias kuenda wo linga apulilo amue oco a kũlĩha ovisimĩlo vi kasi vutima waye. Olonjanja vimue, manji Gillis wa enda oku lombolola ovina vimue komõlaye kuenda wo sapuila oco a vi sokolole okuti eteke likuavo vamisako lombangulo yaco. Olonjanja vimue, manji Gillis wa popia okuti eye muẽle wa sukililevo oku sokolola kovina a laikele oku sapuila omõlaye. Omo lioku sapela olonjanja vialua, Mattias wa fetika oku kuata elomboloko liocisembi kuenda elomboloko liokuti Yehova o tu sole, lomoko Yehova a kuete yoku tu viala. Isiaye wa popia hati: “Cambata otembo kuenda olonjanja vimue ka ca lelukile pole, kamuekamue ocisola a kuetele Yehova ca livokiya. Ame lukãi wange tua sanjuka calua omo okuti, epandi lietu lalikolisilo etu a kuatisa omõletu ndaño okuti wa kala umalẽhe tua tẽla oku vetiya utima waye.”

Osimbu manji Gillis lukãi waye va kala oku kuatisa omõlavo, va kũlĩhĩle okuti Yehova wa ponduile oku va kuatisa. Manji Gillis wa popia hati: “Olonjanja vimue nda sapuila Mattias okuti ocisola cocili tu u kuetele oco ca mbetiya ame la ina yove oku likutilila calua ku Yehova oco a ku kuatise oku kuata elomboloko.” Olonjali evi vi kuete esanju liocili omo okuti va lekisa epandi kuenda ka va liwekelepo!

Etu tu sukilavo epandi eci tu tata umue ukuepata, ale ekamba limue li kuete uveyi u kasi otembo yalua. Kũlĩhĩsa ulandu wa Ellen * (tala etosi pombuelo yemẽla), okuti o kasivo ko Eskandinavia.

Ci soka ecelãla kanyamo a pita, ulume wa Ellen wa kuata ocitangi cimue ca nyõla owoño waye. Omo liaco, ka ponduile vali oku kuata esanju, esumuo ale ohenda. Ocitangi caco ca tĩlile calua ku Ellen. Ellen wa popia hati: “Ca sukilile oku kuata epandi lialua kuenda oku linga olohutililo vialua.” Wamisako hati: “Ocisonehua ndi sole calua haico ci ndembeleka Va Filipoi 4:13, ku popia hati: ‘Kovina viosi ñuete ongusu mekonda lia una o nyĩha unene.’” Omo liekuatiso kuenda unene wa Yehova Ellen wa pandikisa locitangi caco.​—Osamo 62:5, 6.

Ocili okuti Yehova eye ongangu yiwa yoku lekisa epandi. (2 Petulu 3:15) Olonjanja vialua, tu tanga Vembimbiliya eci catiamẽla kepandi linene lia Yehova. (Nehemiya 9:30; Isaya 30:18) Ivaluka hẽ ndomo Yehova a liyeva eci Avirahama o linga apulilo alua atiamẽla kocisimĩlo Caye coku kundula Sodoma? Yehova ka tetele Avirahama kondaka. Eye lepandi wa yevelela apulilo lasakalalo osi Avirahama a kuatele. Kuenje Yehova wa lekisa okuti wa yeva asakalalo a Avirahama poku u sapuila hati, Eye ka ka kundula Sodoma ndaño mua sangiwa ekũi kalume vakuesunga volupale luaco. (Efetikilo 18:22-33) Yehova olonjanja viosi o yevelela lepandi kuenda lalimue eteke a temele!

Epandi li kuete esilivilo lialua momo li panga onepa komunu wokaliye Akristão vosi va sukila oku kuata. Nda tua likolisilako oku lekisa epandi liocili, tu ka eca esivayo ku Isietu ukuepandi, Yehova kuenda tu ka kala pokati ka “vana okuti omo liekolelo kuenda epandi va piñala olohuminyo.”​—Va Heveru 6:10-12.