1. Nye uprofeto Isaia a popele catiamẽla ku Yesu kuenda momo lie eci ci lembelekela?

OCITUMASUKU ca Isaya catiamẽla ku Yesu Kristu ci tu lembeleka kuenda ci tu ĩha elavoko. Isaya wa popele okuti Yesu, “ka tetulula ndeci ci lete ovaso aye, pamue oku teta onimbu ndeci ci yeva ovatũi aye” pole eye, “o tetuluila olosuke lesunga.” (Isaya 11:3, 4) Momo lie eci ci lembelekela? Momo tu kasi voluali lumue lue yuka olonepele okuti omanu va lipisa pokati lovina va lete. Etu tu sukila Onganji yimue ya lipua, okuti Yesu, una okuti lalimue eteke a tu pisa ndeci a lete lovaso!

2. Nye Yesu a tu handeleka oku linga kuenda nye tu konomuisa vocipama cilo?

² Oloneke viosi, tua siata oku popia ovina viatiamẽla ku vakuetu. Pole, etu ka tua lipuile ndeci Yesu, omo liaco, ovisimĩlo vietu ka via lipuilevo. Kokuetu ci leluka calua oku yapuisiwa leci tu lete. Yesu wa handeleka hati: “Ko ka tetululi leci ci molẽha lovaso, puãi tetululi lesunga.” (Yoano 7:24) Yesu o yongola okuti  tu u setukula kuenda ka tu pisa vakuetu omo liekalo liavo. Vocipama cilo, tu lilongisa olonepa vitatu vi pondola oku yapuisa ovisimĩlo vietu ndeci: ovina viatiamẽla kekova liomunu ale ofeka, olombongo omunu a kuete kuenda anyamo omunu a kuete. Konepa lonepa tu ka konomuisa ndomo tu pokola ku Yesu kuenda ndomo tu yuvula oku pisa vakuetu omo liekalo liavo.

3, 4. (a) Momo lie Petulu a pongoluila ocisimĩlo a kuatela Vakualofeka? (Tala ociluvialuvia kefetikilo liocipama.) (b) Elomboloko lipi liokaliye Yehova a longisa Petulu?

³ Sokolola ndomo upostolo Petulu a liyeva eci vo sapuila oco a ende ko Kaisarea konjo yulume umue Ukualofeka o tukuiwa Korneliu! (Ovilinga 10:17-29) Petulu wa kula lovisimĩlo viokuti vakualofeka va vihĩsiwa. Pole, kueya oku pita cimue ca pongolola ovisimĩlo viaye. Petulu wa tambula ocinjonde ca tunda ku Suku. (Ovilinga 10:9-16) Vocinjonde caco, Petulu wa mola cimue ci kasi ndelasola lia tunda kilu mua kala ovinyama via tendiwile okuti via vĩha. Kuenje kua yevala ondaka yo sapuila hati: “A Petulu, votoka, vi ponda kuenda lia!” Olonjanja vitatu, Petulu wa likala. Onjanja lonjanja, ondaka yo sapuila hati: “Ku ka tukule ovina Suku a yelisa okuti via vĩha.” Noke liocinjonde, Petulu ka kuatele elomboloko lieci ondaka ya yonguile oku u sapuila. Kuenje alume va tumiwa la Korneliu va pitĩla. Espiritu sandu lia songuila Petulu oku enda konjo ya Korneliu, noke eye wa enda lalume va tumiwa.

⁴ Nda Petulu wa pisile “leci ci molẽha lovaso,” eye nda ka tavele oku enda konjo ya Korneliu. Va Yudea ka va endaile kolonjo via Vakualofeka. Oco hẽ momo lie Petulu a endela? Ndaño okuti eye wa kala ukualonepele la Vakualofeka, ocinjonde eye a kuata kuenda eci espiritu sandu lio songuila ca pongolola ovisimĩlo viaye. Petulu noke yoku yevelela Korneliu, wa popia hati: “Ocili, cilo nda limbuka okuti Suku hokuacameko, pole, volofeka viosi omunu una u sumbila loku linga ovina via sunguluka, o taviwa laye.” (Ovilinga 10:34, 35) Elomboloko eli liokaliye lia komõhisa calua Petulu kuenda Akristão vosi. Ndamupi?

5. (a) Yehova o yongola okuti Akristão vosi va kuata elomboloko lie? (b) Ndaño okuti tua kũlĩha ocili, ovisimĩlo vipi tu pondola oku kuata?

⁵ Yehova vocakati ca Petulu wa kuatisa Akristão vosi oku kuata elomboloko liokuti Eye hokuacameko. Ku Yehova, ekova lietu, ofeka, epata ale elimi, cosi cimuamue. Omo liaco, nda tua sumbila Suku loku linga eci ca sunguluka, tu taviwa laye. (Va Galatia 3:26-28; Esituluilo 7:9, 10) Citava okuti ovina viaco ove wa vi kũlĩha ale. Nye o sukila oku linga nda wa kulila kofeka ale vepata limue okuti muli olonepele vialua? Ndaño o sima okuti ku kuete olonepele, handi  citava okuti o kuata ovisimĩlo violonepele? Ndaño okuti Petulu wa kuatisa vakuavo oku limbuka okuti Suku hokuacameko, lopo handi eye wa lekisa ocame. (Va Galatia 2:11-14) Tu pondola oku pokola ndati ku Yesu kuenda oku liwekapo oku pisa vakuetu omo liekalo liavo?

6. (a) Nye ci tu kuatisa oku liwekapo oku kuata olonepele? (b) Ulandu wa manji umue o kuete ovikele vekongelo nye wa lombolola catiamẽla kokuaye?

⁶ Oco tu kũlĩhe nda tu kuete ovisimĩlo vimue violonepele, tu sukila oku likũlĩhĩsa etu muẽle. Tu sukilavo oku kũlĩhĩsa ekalo lietu lovina tu kasi oku lilongisa Vondaka ya Suku. (Osamo 119:105) Tu pondolavo oku pula kekamba limue nda eye wa limbuka ocituwa cimue colonepele kokuetu, cina okuti ka tu tẽla oku ci limbuka. (Va Galatia 2:11, 14) Pamue tu kuete ovisimĩlo viaco kuenje ka tu limbuka okuti tu kasi oku yapuisiwa! Eci oco ca pita la manji umue o kuete ocikele vekongelo. Eye wa soneha ulandu umue watiamẽla kohueli yimue yi kasi kupange wakundi votembo yosi. Ulume waco wa kala ukuepata limue lia tendiwile okuti li sule. Manji o kuete ocikele wa soneha ulandu, wa tukula ovina viwa viatiamẽla kulume waco, pole, wamisako hati: “Ndaño okuti ulume waco wa kala lina lia tendiwile okuti li sule, ovituwa viaye kuenda ekalo liomuenyo waye via kuatisa vakuavo oku kuata elomboloko liokuti oku kala ukuepata liaco ka ci lomboloka oku kuata omuenyo umue wefuki hawo u sule, ndeci ca tuwa omanu valua vakuepata liaco.” Nye tu lilongisilako? Ndaño tu kuete ovikele vialua vocisoko ca Yehova, tu sukila oku likũlĩhĩsa etu muẽle kuenda oku tava ekuatiso oco tu limbuke nda tu kuete ovisimĩlo violonepele. Nye tu sukila oku linga?

7. Tu lekisa ndati okuti ‘tua yikula ovitima vietu?’

⁷ Nda ‘tua yikula ovitima vietu,’ olonepele tu ka vi piñanya locisola. (2 Va Korindo 6:11-13) Ove hẽ o sole lika oku kala lomanu vakuekova liove, vakuafeka, vakuepata, ale vakuelimi liove? Nda oco, sanda otembo yoku kala lomanu vakuepata likuavo. Laleka vamanji vakuepata likuavo oco vu talavayeli kumosi kupange woku kunda. Handi vali, va laleka konjo yove okulia kumosi, ale oku lingila kumosi olomapalo. (Ovilinga 16:14, 15) Vokuenda kuotembo vutima wetu mu yuka lika ocisola kuenje ka mu kala vali olonepele. Kaliye tu ka lilongisa onepa yikuavo yoku ‘tetulula leci ci molẽha lovaso.’

8. Nye tu lilongisa kolondaka tu sanga kelivulu Liovisila 19:15 li tu kuatisa ndomo tu tata ohuasi ale ohukũi?

⁸ Tu tati vakuetu lonjila yimue yiwa, ndaño okuti omanu vaco olohuasi ale olohukũi. Kelivulu Liovisila 19:15 ku popia hati: “Ko ka sumbili ocipala cosuke, ku ka kemainye ocipala cekope; puãi tetuluila ukuele lesunga.” Ekalo liomunu umue ohuasi ale ohukũi  li vetiya ndati onjila ndomo tu tata omunu waco?

9. Olondaka vipi vi sumuisa Salomone a tukula kuenda vi tu longisa nye?

⁹ Salomone wa vetiyiwa oku soneha olondaka evi vi sumuisa hati: “Osuke yi suvukiwa ndaño lu va lisungue, ohuasi puãi yi kuete akamba va lua.” (Olosapo 14:20) Elivulu eli liolosapo li tu longisa nye? Nda ka tua kuatele utate, tu sanda lika oku kuata ukamba lavamanji olohuasi okuti vamanji olohukũi sio. Momo lie ci kokela ohele oku pisa omanu omo liovina va kuete ale vievi ka va kuete?

10. Ovitangi vipi Tiago a lungula viatiamẽla Kakristão?

¹⁰ Nda tu pisa vamanji omo lioku kala olohuasi ale olohukũi, tu koka olonepele vekongelo. Eci ca pita lakongelo amue kocita catete kuenje Tiago wa lungula Akristão vaco catiamẽla kocitangi caco. (Tanga Tiago 2:1-4.) Ka tu ka eceleli okuti vekongelo lietu mu kala olonepele. Omo liaco, tu yuvula ndati oku pisa omanu omo liovina va kuete?

11. Anga hẽ ukamba omunu a kuetele Yehova wa tamba kovina eye a kuete? Ci lombolola.

¹¹ Tu sukila oku kapako vamanjetu ndeci Yehova a va kapako. Omunu ka soliwa lika la Yehova omo okuti ohuasi ale ohukũi. Ukamba wetu la Yehova ka wa tambele kolombongo vialua tu kuete ale kovikuata. Olondaka Yesu a popia viocili viokuti: “Ci tĩla ohuasi oku iñila Vusoma wo kilu,” pole,  eye ka popele okuti eci ka ci tẽliwa. (Mateo 19:23) Yesu wa popiavo hati: “Ene vulosuke, wa sumũlũhi, momo Usoma wa Suku wene.” (Luka 6:20) Pole, eci ka ci lomboloka okuti olosuke viosi via enda oku yevelela Yesu kuenda via tambula asumũlũho alikasi. Kua kala olosuke vialua ka via kuamele Yesu. Ocili okuti, ka tu pondola oku pisa ukamba omunu a kuetele Yehova, omo liovina a kuete.

12. Nye ovisonehua vi popia catiamẽla kolohuasi kuenda kolohukũi?

¹² Pokati kafendeli va Yehova, pa sangiwa vamanji vamue okuti olohuasi vakuavo olohukũi. Pole, vosi va sole Yehova kuenda vo vumba lutima wosi. Ovisonehua vi tukula omanu olohuasi okuti, “ka va tiamisila elavoko liavo kukuasi u pua pua, te ku Suku.” (Tanga 1 Timoteo 6:17-19.) Ondaka ya Suku yi lungulavo afendeli vosi va Yehova ci kale olohuasi ale olohukũi catiamẽla kohele yoku sola calua olombongo. (1 Timoteo 6:9, 10) Nda tua tenda vamanji ndeci Yehova a va tenda, ka tu ka va pisa omo liovina va kuete ale ka va kuete. Nye ci popiwa catiamẽla kanyamo omunu a kuete? Anga hẽ eli esunga limue lioku pisa vakuetu?

13. Nye Embimbiliya li tu longisa catiamẽla koku lekisa esumbilo kakulu?

¹³ Embimbiliya li lombolola okuti, tu sukila oku sumbila vana vakuka. Kelivulu Liovisila 19:32 ku popia hati: “Votokela kovaso u o kuete owele, sumbila ocipala cekongo; sumbila Suku yove.” Kelivulu Liolosapo 16:31 ku tu sapuila hati, “owele ocifuto culamba ca sangiwa vomuenyo wesunga.” Paulu wa sapuila Timoteo oco ka ka sepule akulu vendamba pole, wa sukilile oku va tata nda va isia. (1 Timoteo 5:1, 2) Ndaño okuti Timoteo wa kuatele ocikele cimue okuti vamanji akulu ci sule, eye wa sukilile oku va tata lohenda kuenda oku va sumbila.

14. Vepuluvi lipi tu sukila oku eca elungulo komunu umue ukulu wendamba?

¹⁴ Nye ci popiwa nda ukulu umue wendamba wa linga ekandu limue liocipango ale wa sandeka esapulo limue li sumuisa Yehova? Yehova ka ecela omunu wa lueya ocipango ndaño okuti omunu waco ukulu, ale wa sumbiwa. Kũlĩhĩsa onumbi yi sangiwa kelivulu lia Isaya 65:20 hati: “U wa fa osimbu ka tẽlĩsile ocita canyamo o tendiwa ndu wa siñaliwa.” Tu sanga onumbi yimuamue vocinjonde ca Esekiele. (Esekiele 9:5-7) Ca velapo vali ceci okuti, tu sukila oku sumbila Yehova, Ukuasimbu. (Daniele 7:9, 10, 13, 14) Esumbilo tu lekisa kokuaye li tu ĩha utõi tu sukila oco tu lungule omunu una o sukila ekuatiso, ndaño okuti ukulu wendamba.—Va Galatia 6:1.

15. Nye tua lilongisa kupostolo Paulu catiamẽla koku sumbila vamanji amalẽhe vekongelo?

¹⁵ Nye ci popiwa nda manji umue umalẽhe? Ci lomboloka okuti eye ka sesamẽla oku sumbiwa? Hacoko. Paulu wa sonehela Timoteo hati: “Lomue ka ka ku lavise omo wumalẽhe. Puãi lekisa ongangu yiwa ku vakuekolelo, koku vangula, kovituwa, kocisola, kekolelo kuenda koku pua eko.” (1 Timoteo 4:12) Eci Paulu a soneha olondaka evi, citava okuti Timoteo wa kuata 30 kanyamo. Kuenje Paulu wo wĩha ovikele vinene. Nye tu lilongisilako? Ka citava okuti tu  pisa vamanji amalẽhe omo lianyamo avo. Sokolola ovina vialua Yesu a linga eci a kuata lika 33 kanyamo!

16, 17. (a) Akulu vekongelo va pondola oku nõla ndati manji umue oco a kale oñuatisi ale ukulu wekongelo? (b) Ovisimĩlo viomunu ale ovituwa viofeka vi pondola oku lipatãla ndati leci Ovisonehua vi popia?

¹⁶ Kapata amue omanu ka va sumbila amalẽhe. Kuenje, eci ci koka okuti akulu vamue vekongelo, ka va eci ocikele kumanji umue umalẽhe oco a kale oñuatisi ale ukulu wekongelo, ndaño okuti eye o kuete uloño woku ci linga. Pole, Embimbiliya ka lieci onumbi yanyamo omunu a sukila oku kuata oco a kale oñuatisi ale ukulu wekongelo. (1 Timoteo 3:1-10, 12, 13; Tito 1:5-9) Nda ukulu umue wekongelo o ci linga omo liocituwa cofeka yaye, eye ka kasi oku kuama Ondaka ya Suku. Akulu vekongelo, ka citava okuti va kuama ovisimĩlo viavo muẽle ale ovituwa viofeka yavo poku pisa amalẽhe, pole, va sukila oku kuama olonumbi Viondaka ya Suku.—2 Timoteo 3:16, 17.

¹⁷ Nda akulu vekongelo ka va kuama olonumbi Viembimbiliya poku nõla vamanji oco va kale oloñuatisi ale akulu vekongelo, akulu vaco vekongelo va pondola oku tutuiya onjongole ya vamanji vana va loñoloha. Kofeka yimue, oñuatisi yimue yekongelo ya tẽlisa ciwa ovikele viaye kuenje akulu vekongelo va limbuka okuti, ndomo ci lekisa olonumbi Viembimbiliya eye o pondola oku kala ukulu wekongelo. Pole, akulu vamue vekongelo okuti vakuka, va popia hati, eye umalẽhe calua oco a kale ukulu wekongelo, omo liaco, ka vo nõlele oku kala ukulu wekongele. Ci sumuisa calua omo okuti, manji ka nõliwile oku kala ukulu wekongelo, omo akulu vekongelo va kuama ovisimĩlo viavo muẽle. Ovisimĩlo ndevi, via siata calua kolonepa vialua violuali. Ci kuete esilivilo oku kolela kolonumbi Viembimbiliya okuti kovisimĩlo vietu muẽle ale oku kuama ovituwa viofeka hacoko. Omo liaco, tu pokoli ku Yesu loku liwekapo oku pisa vakuetu omo liekalo liavo.

18, 19. Nye ci tu kuatisa oku tenda vamanjetu ndomo Yehova a va tenda?

¹⁸ Ndaño ka tua lipuile, tu pondola oku yuvula oku tenda vakuetu locame, ndeci Yehova a siata oku ci linga. (Ovilinga 10:34, 35) Omo liaco, tu sukila oku kapako olonumbi Viondaka ya Suku. Eci tu vi kapako, tu kasi oku pokola kocihandeleko ca Yesu cokuti, “ko ka tetululi leci ci molẽha lovaso.”—Yoano 7:24.

¹⁹ Soma yetu okuti, Yesu Kristu, o ka sombisa omanu vosi. Esombiso liaye li ka kunamẽla kolonumbi viesunga via Suku, ka ka ci linga ndeci ci lete ovaso aye, pamue ndeci ci yeva ovatũi aye. (Isaya 11:3, 4) Vosi yetu tu sanjukila oku lavoka otembo yaco!