1. Momo lie tu popela okuti ovina viosi via tiamẽla ku Yehova? (Tala ociluvialuvia kefetikilo liocipama.)

OVINA viosi via tiamẽla ku Yehova! Eye wa lulika “ilu, lilu liovailu kuenda oluali la cosi ci kasimo.” (Esinumuĩlo 10:14; Esituluilo 4:11) Omo okuti Yehova eye wa lulika omanu, vosi yetu tua tiamẽla kokuaye. (Osamo 100:3) Pokati komanu vosi Suku a lulika, wa nõla vamue oco va tiamẽle kokuaye lonjila yimue yilikasi.

2. Ndomo Embimbiliya lilombolola, elie wa tiamẽla ku Yehova lonjila yimue yi likasi?

² Osamo 135 yi lombolola okuti afendeli va Yehova vakuekolelo ko Isareli yosimbu, va kala ‘vaye muẽle.’ (Osamo 135:4) Handi vali, ocitumasuku ca Hosea ca popele okuti vana ka va tiamẽlele kepata lia va Isareli va laikele oku kala afendeli va Yehova. (Hosea 2:23) Ocitumasuku caco ca tẽlisiwa eci Yehova a fetika oku nõla omanu vana ka va tiamẽlele  kepata lia va Isareli oco va ka viale la Kristu kilu. (Ovilinga 10:45; Va Roma 9:23-26) Vana va nõliwa lespiritu sandu va tukuiwa hati, ‘ofeka yi kola.’ Ovo ‘ocipiñalo ca velapo’ ca Yehova. (1 Petulu 2:9, 10) Pole, nye ci popiwa catiamẽla Kakristão vosi vakuekolelo koloneke vilo okuti, va kuete elavoko lioku kala otembo ka yi pui palo posi? Yehova wa va tukulavo okuti ‘omanu vange’ kuenda “va nõliwa lame.”—Isaya 65:22.

3. Koloneke vilo, elie o kuete ukamba ulikasi la Yehova? (b) Nye tu lilongisa vocipama cilo?

³ Koloneke vilo, ‘okacunda katito,’ okuti vana va kuete elavoko lioku kala kilu otembo ka yi pui kuenda “olomeme vikuavo” okuti vana va kuete elavoko lioku kala palo posi otembo ka yi pui, va kasi oku fendelela kumosi Yehova “vocunda cimuamue.” (Luka 12:32; Yoano 10:16) Tu yongola oku eca olopandu vietu ku Yehova omo liukamba u likasi tu kuete laye. Vocipama cilo, tu lilongisa ndomo tu pondola oku eca olopandu vietu ku Yehova, omo liukamba waco u likasi.

4. Tu eca ndati olopandu vietu ku Yehova, omo a ecelela okuti tu kuata ukamba laye kuenda Yesu wa ci lingavo ndati?

⁴ Tu eca olopandu vietu ku Yehova eci tu litumbika kokuaye kuenda oku papatisiwa. Kuenje vosi yetu tu pondola oku limbuka okuti tua tiamẽla ku Yehova kuenda tu yongola oku u pokola. (Va Heveru 12:9) Yesu haico a lingavo eci a papatisiwa. Ndaño okuti eye wa tiamẽlele kepata limue lia litumbikile ale ku Yehova, eye wa lieca olumue ku Yehova. Ci kasi ndu okuti eye wa popia hati: “Oku linga ocipango cove, a Suku yange, oco sanjukila.”—Osamo 40:7, 8.

5, 6. (a) Nye Yehova a popia eci Yesu a papatisiwa? (b) Ocindekaise cipi ci tu kuatisa oku kuata elomboloko ndomo Yehova a liyeva catiamẽla kelitumbiko lietu?

⁵ Eci Yesu a papatisiwa Yehova wa liyeva ndati? Embimbiliya li popia hati: “Noke yoku papatisiwa, Yesu wa tunda vovava; ilu lia yuluka yu wa mola espiritu sandu lia Suku lia loka ndopomba kuenje lio wila. Tala! Kilu kua tunda ondaka yiti: ‘U Omõlange wa soliwa, ndo sanjukila.’” (Mateo 3:16, 17) Yesu wa tiamẽlele ale ku Suku. Yehova wa sanjukile eci a mola okuti Yesu wa tumbika omuenyo waye koku u vumba lika Eye. Yehova o sanjukavo eci tu tumbika omuenyo wetu kokuaye kuenje eye o tu sumũlũisa.—Osamo 149:4.

⁶ Pole, Yehova o kuete ale cosi! Tu pondola oku eca vali nye kokuaye? Sokolola ulume umue o kuete olonelẽho via fina vocumbo caye. Eteke limue okamõla kaye kufeko wopa onelẽho yimue wa yeca kokuaye. Ndaño okuti onelẽho yaco ya tunda ale vocumbo caye, pole, eye o sanjukila ombanjaile yaco. Eci ci lekisa okuti omõlaye u sole. Onelẽho omõlaye a eca kokuaye ya velelepo vali okuti, olonelẽho vikuavo vi kasi vocumbo caye vi sule. Cimuamue haico okuti, Yehova o sanjukavo eci tu lekisa onjongole yoku tumbika omuenyo wetu kokuaye.—Etundilo 34:14.

7. Elivulu lia Malakiya li tu kuatisa ndati oku kuata elomboloko ndomo Yehova a liyeva eci umue a yongola oku u vumba lutima wosi?

⁷ Tanga Malakiya 3:16. Momo lie ci kuetele esilivilo oku tumbika omuenyo  wetu ku Yehova kuenda oku papatisiwa? Ocili okuti tunde eci ove wa lulikiwa vimo lia ina yove wa tiamẽlele ale Kululiki wove, Yehova. Pole, sokolola ndomo Yehova a yeva esanju eci ove o tava Kuviali waye loku litumbika kokuaye! (Olosapo 23:15) Yehova wa kũlĩha vana vo vumba kuenda olonduko viavo o vi soneha ‘velivulu liaye lionjivaluko.’

8, 9. Nye Yehova a pinga ku vana okuti olonduko viavo via sonehĩwa ‘velivulu lionjivaluko’?

⁸ Nda tu yongola okuti onduko yetu yamamako ‘velivulu lionjivaluko’ lia Yehova, tu sukila oku linga cimue. Malakiya wa popia okuti tu sukila oku sumbila Yehova kuenda oku sokolola konduko yaye. Nda tua fendela omunu umue ale ocina cimue, onduko yetu velivulu lia Yehova yupiwamo!—Etundilo 32:33; Osamo 69:28.

⁹ Oku likuminya oku linga ocipango ca Yehova loku papatisiwa, hacoko lika ci sukiliwa. Ovina evi vi lingiwa lika onjanja yimosi, pole, oku fendela Yehova ci lingiwa vomuenyo wetu wosi. Eteke leteke, osimbu tu kasi lomuenyo, tu lekisi kovituwa vietu okuti tu pokola Yehova.—1 Petulu 4:1, 2.

10. Oku litepa kupi ku sukila oku kala pokati komanu vana va vumba Yehova la vana ka vo vumbi?

¹⁰ Vocipama ca pita, tua lilongisa okuti, Kaini, la Salomone kuenda va Isareli, va popele okuti va kasi oku fendela Yehova, pole, ka va pokuile kokuaye. Ovolandu a-a a tu longisa okuti, oku popia lika okuti tu kasi oku fendela Yehova ka ci tẽla. Tu sukila oku suvuka eci cĩvi kuenda oku sola eci ciwa. (Va Roma 12:9) Yehova wa popia hati, paka kala etepiso “pokati keci ciwa leci cĩvi, loku tepisavo pokati ku o vumba Suku lu ko vumbi.”—Malakiya 3:18.

11. Oco ci leluke komanu vosi oku limbuka okuti tu fendela lika Yehova nye va sukila oku linga?

¹¹ Tu eca olopandu ku Yehova, omo a tu nõla oco tu kale afendeli vaye! Ci leluka komanu vosi oku limbuka okuti tua tiamẽla ku Yehova. (Mateo 5:16; 1 Timoteo 4:15) Lipula ndoco: ‘Omanu vakuavo va pondola hẽ oku limbuka okuti ame ndi pokola muẽle ku Yehova? Ndi kuete hẽ esanju lioku sapuila omanu okuti ame Ndimbangi ya Yehova?’ Sokolola esumuo Yehova a pondola oku yeva nda tu kuete osõi yoku sapuila vakuetu okuti tua tiamẽla kokuaye.—Osamo 119:46; tanga Marko 8:38.

12, 13. Nye vamue va siata oku linga okuti ci tateka omanu oku limbuka nda ovo Olombangi muẽle Via Yehova?

¹² Pole, ci sumuisa calua omo okuti, Olombangi vimue Via Yehova handi vi setukula “espiritu lioluali.” Kuenje omo liocituwa caco, ovo ka va litepele la vana ka va fendela Yehova. (1 Va Korindo 2:12) “Espiritu lioluali” li vetiya omanu oku tiamisila utima koloñeyi vietimba. (Va Efeso 2:3) Ndeci, ndaño okuti tua siata oku tambula olonumbi  vialua, vamue va nõlapo oku wala uwalo ka wa sungulukile. Ovo va wala uwalo watõla hawo u molẽhisa etimba, ndaño kolohongele via Kristão. Ale ovo va nõlapo oku vinda esinga lonjila yimue ka ya sungulukile. (1 Timoteo 2:9, 10) Kuenje eci ci pondola oku tateka omanu oku limbuka nda ovo Olombangi Via Yehova ale sio.—Tiago 4:4.

¹³ Evi vimue pokati kovituwa ka via sungulukile Olombangi vimue Via Yehova vi lekisa okuti, ka va litepele loluali. Ndeci vamue povipito, va piluka lonjila yimue ka ya sungulukile loku lekisa ovituwa ka vi taviwa Kakristão. Vamue va kapa alitalatu avo kuenda asapulo amue vo Internet okuti a situlula ovisimĩlo viavo violoñeyi vietimba. Citava okuti ovo ka va sombisiwa vekongelo Liakristão ndu okuti va linga ekandu linene, pole, va pondola oku kokela ocilondokua kuvamanji vakuavo va kasi oku likolisilako oku litepa loluali.—Tanga 1 Petulu 2:11, 12.

14. Nye tu sukila oku linga oco tu teyuile ukamba ulikasi tu kuetele Yehova?

¹⁴ Ovina viosi vi kasi voluali vi vetiya oku tiamĩsila utima wetu ‘koloñeyi vietimba, koloñeyi viovaso, loku litunila ovina viomuenyo.’ (1 Yoano 2:16) Etu okuti tua tiamẽla ku Yehova, tua litepa lomanu vakuavo. Etu tua “likala ovina vi lipatãla locipango ca Suku kuenda oku likala oloñeyi violuali,” loku ‘kala lolondunge, lesunga kuenda oku sumbila Suku voluali lulo.’ (Tito 2:12) Ekalo liomuenyo wetu, oku kongelamo ovina tu vangula, okulia, oku nyua, uwalo kuenda oku talavaya, ci limbukiwe ku vosi okuti tua tiamẽla ku Yehova.—Tanga 1 Va Korindo 10:31, 32.

15. Momo lie tu sukilila oku kala vakuahenda kuenda oku lekisa ocisola Kakristão vakuavo?

¹⁵ Ndomo tu tata vamanjetu, tu lekisa okuti tua kapako ukamba tu kuetele Yehova. Ovo va tiamẽla ku Yehova, ndeci etu. Nda tua ivaluka ovina evi, tu ka va tata lohenda kuenda ocisola. (1 Va Tesalonike 5:15) Momo lie ci kuetele esilivilo? Yesu wa sapuila olondonge viaye hati: “Poku ci linga, vosi va limbuka okuti vulondonge viange—nda wa lisoli pokati.”—Yoano 13:35.

16. Nye tu pondola oku lilongisa Kocihandeleko ca Mose catiamẽla kocisola Yehova a kuetele omanu vaye?

¹⁶ Ulandu Wocihandeleko ca Mose u pondola oku tu kuatisa oku kuata elomboloko ndomo tu tata vakuetu vekongelo. Vonembele ya Yehova mua kala ovikuata via nõliwila lika kefendelo. Ocihandeleko ca lomboluile ndomo va Lewi va ponduile oku tata ovikuata viaco kuenda nda omunu ka kuamele onumbi yaco wa laikele oku fa. (Atendelo 1:50, 51) Nda Yehova wa kapeleko ndomo omanu va tata ovikuata via nõliwila kefendelo liaye, eye wa ponduilevo oku kapako ndomo omanu, va tata afendeli vaye vakuekolelo! Eye wa kũlĩha ndomo tu kuete esilivilo kovaso aye eci a popia hati: ‘Nda umue wa ku lamba ove ca soka okuti, wa lamba komoliso liange.’—Sakariya 2:8.

17. Ovina vipi Yehova a ‘yevelela, kuenda o vi kapako’?

¹⁷ Uprofeto Malakiya wa popia okuti Yehova o ‘yevelela, kuenda wa kapako’ onjila ndomo afendeli vaye va tata omunu lukuavo. (Malakiya 3:16) Yehova “wa kũlĩha ava va tiamẽla kokuaye.” (2 Timoteo 2:19)  Eye wa kũlĩha ciwa ovina viosi tu linga levi tu popia. (Va Heveru 4:13) Eci tu tata lãvi vamanjetu, Yehova o ci lete. Pole, tu koleli okuti Yehova o letevo eci tu lekisa ovituwa viwa ndeci oku poka, oku kala vakuacali, vakuakuecela kuenda vakuahenda.—Va Heveru 13:16; 1 Petulu 4:8, 9.

18. Momo lie tu sukilila oku eca olopandu ku Yehova?

¹⁸ Tu yongola oku lekisa olopandu ku Yehova omo okuti tua tiamẽla kokuaye ndafendeli vaye. Tua kũlĩha okuti eci tua tumbika omuenyo wetu kokuaye, tua lekisa olondunge poku nõla onjila yaco. Ndaño okuti tu kasi “pokati kocitumbulukila ca tatama haico ca vĩha,” handi tu pondola oku “lipua, loku pua eko” kuenda oku tua “ndocinyi voluali.” (Va Filipoi 2:15) Omo liaco, tua nõlapo oku yuvula oku linga ovina Yehova a nyale. (Tiago 4:7) Etu tu sole vamanjetu kuenda tua va sumbila omo okuti va tiamẽlavo ku Yehova.—Va Roma 12:10.

19. Yehova o sumũlũisa ndati vana va tiamẽla kokuaye?

¹⁹ Embimbiliya li tu sapuila hati: “Yehova ka pañula omanu vaye.” (Osamo 94:14) Eyi ohuminyo yimue. Ndaño muẽle okuti, ekalo liomuenyo wetu li pongoloka, Yehova amamako oku kala letu. Ndaño tua fa, eye lalimue eteke a ka tu ivala. (Va Roma 8:38, 39) “Momo nda tu kasi lomuenyo, tu kasi lawo oco tu sivaye Yehova kuenda nda tu fa, tu fa oco tu sivaye Yehova. Ci kale nda tu kasi lomuenyo ale tu fa, tua tiamẽla ku Yehova.” (Va Roma 14:8) Tu lavoka otembo eci Yehova a ka pindula akamba vaye vosi vana va fa vakuekolelo. (Mateo 22:32) Ndaño muẽle cilo, tua siata oku tambula olombanjaile viwa vi tunda ku Isietu. Ndomo Embimbiliya li popia, “ofeka ya sumũlũha nda Yehova eye Suku yavo, okuti omanu vaco eye a nola va linga ocipiñalo caye.”—Osamo 33:12.