ECI Yesu a longisa olondonge viaye ndomo va ponduile oku kunda olondaka viwa, eye wa va lungula okuti halonjanja viosiko omanu va ka va yevelela. (Luka 10:3, 5, 6) Cimuamue haico kupange wetu woku kunda. Omanu vamue tua siata oku sanga ka va lekisa onjongole ale vakuamanya. Eci ovo va lekisa ovituwa viaco, ka ci leluka kokuetu oku lekisa ohenda kokuavo kuenda oku va kundila.

Omunu ukuahenda wa kapako asukila lovitangi via vakuavo, o va kuetele ocikembe kuenda o sanda oku va kuatisa. Pole, nye ci pondola oku pita nda tua liwekapo oku lekisa ohenda komanu tu sanga kupange woku kunda? Ka tu kuata vali ombili, ale ka tu lekisa onjongole yoku kunda kuenda ka tu va kuatisa vali. Tu pondola oku sokisa ombili yetu londalu. Oco ondalu yamameko oku taima yi sukila olohũi vialua. Cimuamue haico okuti, oco ombili yetu yi pame, tu sukila oku kala vakuahenda!—1 Va Tesalonike 5:19.

Tu lekisa ndati ohenda ndaño okuti pamue ca tĩla oku ci linga? Tu konomuisi ovolandu atatu tu sukila oku setukula ndeci: Wa Yehova, wa Yesu kuenda wupostolo Paulu.

Vokuenda kuanyamo alua amanu va siata oku popia uhembi watiamẽla ku Yehova. Pole, eye amamako oku kala “ukuacali la vakualutukãi kuenda olondingaĩvi.” (Luka 6:35) Eye o lekisa ndati ohenda yaye? Eye o lekisa epandi komanu vosi. Yehova o yongola okuti “omanu vosi” va popeliwa. (1 Timoteo 2:3, 4) Ndaño okuti Yehova o suvuka olondingaĩvi, pole, omanu va kuete esilivilo kokuaye kuenda ka yongola okuti umue pokati kavo o fa.—2 Petulu 3:9.

Yehova wa kũlĩha okuti Satana wa loñoloha calua koku tiamisila utima womanu kuhembi. (2 Va Korindo 4:3, 4) Omanu valua va siata oku longisiwa uhembi watiamẽla ku Suku tunde vutila. Omo liocitangi caco ci tĩla kokuavo oku tava kocili. Pole, Yehova o kuete onjongole yoku va kuatisa. Tua ci kũlĩha ndati?

Sokolola ndomo Yehova a liyeva catiamẽla komanu vo ko Ninivei. Ndaño okuti va kala olongangala Yehova wa sapuila Yona hati: “Oco he, ame si kuatela ohenda imbo linene lia Ninivei, muna mũli ocita lakui avali kolohũlũkãi viomanu via supa, haivo ka va kũlĩhĩle oku tepisa eka liondio leka liepĩli?” (Yona 4:11) Yehova wa kuatela ohenda omanu vaco omo ka va kũlĩhĩle ocili catiamẽla kokuaye. Kuenje wa tuma Yona oku va lungula.

Ndeci Yehova a kuatela ohenda omanu, etu haicovo tu linga. Ovo va soliwe. Etu tu kuete onjongole yoku kuatisa omanu ndeci Yehova, oco va lilongise eci catiamẽla kokuaye ndaño omanu vaco ka va lekisa onjongole kocili.

Yesu wa setukula Isiaye poku lekisa ohenda komanu “momo va kala oku talisiwa ohali loku sakalaisua ndolomeme ka vi kuete ungombo.” (Mateo 9:36) Yesu wa kũlĩhĩle esunga lieci omanu vaco va talisiwila ohali. Esunga liaco lieli okuti, asongui vatavo va enda oku va tata lãvi kuenda oku va longisa ovohembi. Ndaño okuti Yesu wa kũlĩhĩle okuti valua veya kokuaye oku u yevelela omo liasunga alua ka va lingile olondonge viaye, pole, wa va longisa ovina vialua.—Marko 4:1-9.

Eci omanu ka va tava kesapulo tu va kundila, tu sukila oku kũlĩha esunga lieci ovo ka va tavela.  Citava okuti va kuete ovisimĩlo vĩvi viatiamẽla Kembimbiliya, ale ceci catiamẽla Kakristão, momo ovo va siata oku mola okuti vamue va litukula okuti Akristão, va linga ovina ka via sungulukile. Vamue va siata oku yeva alundi atiamẽla kovina etu tu tava. Handi vali, vakuavo va kuete usumba wokuti vangandiavo, ale omanu va lisungue lavo va pondola oku va sepula nda ovo va yevelela kesapulo tu va kundila.

Omanu vamue tu sanga kupange woku kunda va siata oku pita lovitangi komuenyo wavo okuti vi va nenela esumuo lialua. Manji Kim okuti o misionalia wa popia hati, omanu valua vocikanjo caye va pita luyaki kuenje va pesela ovina vialua va kuatele. Ovo ka va kuete elavoko lia kolapo liokovaso yoloneke. Ovo va sumua calua kuenda ka va kolelele omunu laumue. Omanu vovocikanjo caco olonjanja vimue va seteka oku tateka Olombangi via Yehova oco va liwekepo oku kunda. Manji Kim eteke limue wa kuatiwa osimbu a kala oku kunda.

Manji Kim wa amamako ndati oku lekisa ohenda ndaño okuti omanu vo tata lãvi? Eye olonjanja vialua wa enda oku ivaluka olondaka vi sangiwa kelivulu Liolosapo 19:11 ku popia hati: “Olondunge viomunu vi kandangiya onyeño yaye.” Eci a sokolola ovitangi via pita lomanu vovocikanjo caye, cu vetiya oku va kuatela ohenda. Havosiko vana eye a enda oku sanga vo tambula ciwa. Pole, vocikanjo caco mua kala omanu valua vawa eye a sukilile oku pasuisa.

Tu sukila oku lipula ndoco: ‘Nda okuti sia kũlĩhĩle ocili, ocituwa cipi nda nda lekisa, nda Olombangi Via Yehova via ndi kundilile?’ Handi vali, nye nda nda linga nda okuti nda yevele ovina vimue vialundi viatiamẽla Kolombangi Via Yehova? Pamue nda ka tua lekisile onjongole yoku yeva kesapulo kuenda nda tua sukila oku tatiwa lohenda. Yesu wa popia hati, tu sukila oku tata vakuetu ndeci etu tu yongolavo oku tatiwa. Omo liaco, tu sukila oku kuata elomboloko ndomo vakuetu va liyevite kuenda oku lekisa epandi kokuavo, ndaño okuti ka ca lelukile.—Mateo 7:12.

Upostolo Paulu wa lekisa ohenda ndaño muẽle komanu vana va enda oku lekisa ungangala kocikele caye coku kunda. Momo lie? Momo eye wa ivaluka ocituwa a kuatele kosimbu. Eye wa popia hati : “Nda kala ukuakupembula, ukuakulambalala kuenda ukuakutondala. Puãi nda lekisiwa ohenda, momo nda kala vonumbi kuenda sia kuatele ekolelo.” (1 Timoteo 1:13) Paulu wa kũlĩhĩle okuti Yehova la Yesu va lekisile ohenda yalua kokuaye. Eye wa kũlĩhĩle esunga lieci omanu va yonguilile oku imula upange woku kunda a kala oku linga.

Olonjanja vimue Paulu wa enda oku sanga omanu va kolelele calua kalongiso esanda. Ndamupi  eye a liyeva? Kelivulu Liovilinga 17:16, tu tangako okuti osimbu a kala ko Atenai eye “wa sakalala poku mola okuti olupale lueyukile oviteka.” Paulu wa tiamisila ombangulo yaye kovina omanu va kala oku linga oco a va longise. (Ovilinga 17:22, 23) Eye wa kuama olonjila via litepa poku kundila omanu vokolonepa via litepa, oco a ‘linge ukuavina viosi okuti o popela vamue.’—1 Va Korindo 9:20-23.

Eci tu kundila omanu vana ka va lekisa onjongole kesapulo tu va kundila ale ku vana va tava kovina viuhembi, tu sukila oku linga nda Paulu. Tu pondola oku tiamisila ombangulo yetu kovina tua kũlĩha catiamẽla kokuavo, oco tu va kuatise oku lilongisa eci catiamẽla ‘kondaka yiwa yesanju.’ (Isaya 52:7) Manji umue o tukuiwa hati, Dorothy wa popia okuti: “Vocikanjo cetu omanu valua va longisiwa okuti Suku ongangala kuenda ukuakusombisa. Ndi pandiya omanu vaco omo liombili yavo yoku tava ku Suku, noke ndi tukula eci Embimbiliya li popia catiamẽla kocisola ca Yehova kuenda kolohuminyo viaye viokovaso yoloneke.”

Osimbu tu lavoka esulilo lioluali lulo, tu kũlĩhi okuti ovituwa vĩvi viomanu vi “amamako.” (2 Timoteo 3:1, 13) Pole, ka tu ka eceleli okuti ocituwa cavo ci tu tateka oku lekisa ohenda ale oku lekisa esanju. Yehova o pondola oku tu ĩha ongusu okuti ‘eci cĩvi ci yuliwa leci ciwa.’ (Va Roma 12:21) Ukundi umue wotembo yosi o tukuiwa hati, Jessica wa popia okuti, wa siata oku sanga omanu vakuepela haivo va tu popia lãvi kuenda esapulo tu siata oku kunda. Eye wa popia vali hati: “Pamue ci lingisa onyeño. Eci ndi fetika ombangulo, ndi linga ohutililo yovutima ku Yehova kuenda ndi pinga ekuatiso liaye oco ndi tende omanu ndeci eye a va tenda.” Eci ci kuatisa Jessica oku yuvula oku tiamisila ovisimĩlo kekalo liaye, pole, o sokolola ndomo a pondola oku kuatisa omanu.

Etu tu sukilavo oku vetiya vamanjetu eci tu kundila kumosi lavo. Manji Jessica wa popia hati nda o kasi kupange woku kunda la vamanji vakuavo kuenje umue pokati kavo o tukula ulandu umue ũvi, eye o yuvula oku tiamisila utima kulandu waco. Pole, eye o vangula ovina via sunguluka, ndeci onima yiwa yi tunda kupange wetu woku kunda, ndaño okuti vamue ka va tava kesapulo liaco.

Yehova wa kũlĩha okuti olonjanja vimue ka ca lelukile kokuetu oku kunda. Eye o sanjuka calua eci tu setukula ohenda yaye! (Luka 6:36) Pole, Yehova ka ka lekisa ohenda kuenda epandi komanu voluali lulo otembo yosi. Tu koleli okuti eye wa kũlĩha ciwa otembo esulilo lioluali lulo lu keya. Omo liaco, upange wetu woku kunda wonjanga. (2 Timoteo 4:2) Tu sukila oku amamako oku kala vakuambili kupange woku kunda kuenda oku lekisa ohenda “komanu vosi.”