TU KASI voluali lumue luasakalalo, omo liaco pamue ci tĩla calua oku sanga ombembua. Ndaño muẽle ceci tu sanga ombembua, oyo ka yi kala otembo yalua. Nye Embimbiliya li popia okuti oco ci tu kuatisa oku sanga ombembua yocili haiyo yi kala otembo ka yi pui? Kuenda tu kuatisa ndati omanu vakuavo oku ci lingavo?

Oco tu kuate ombembua yocili, te tu liyeva okuti tu kasi oku teyuiwa kuenda tua kolapo. Tu sukila oku kuata akamba vawa kuenda ocina ca velapo ukamba wetu la Suku. Ndamupi tu ci linga?

Ovihandeleko kuenda olonumbi via Yehova olonjanja viosi vi tu kuatisa. Eci tu pokola kokuavio, tu lekisa okuti tua kolela Yehova kuenda tu yongola oku kuata ukamba laye. (Yeremiya 17:7, 8; Tiago 2:22, 23) Noke Yehova o kala ekamba lietu loku tu ĩha ombembua yovutima. Kelivulu lia Isaya 32:17 ku popia hati: “Epako liesunga ombembua. Lonima yesunguluko utima wa tula kuenda ekolelo ka li pui.” Tu pondola oku kuata ombembua yocili nda tu pokola ku Yehova.—Isaya 48:18, 19.

Yehova wa siatavo oku tu ĩha ombanjaile yimue ya velapo yi tu kuatisa oku kuata ombembua ka yi pui. Ombanjaile yaco, espiritu sandu liaye.—Ovilinga 9:31.

Upostolo Paulu wa popia okuti, ombembua yi panga onepa ‘kepako liespiritu.’ (Va Galatia 5:22, 23) Espiritu lia Suku li nena ombembua, omo liaco, tu sukila oku ecelela okuti espiritu sandu li tu songuila nda tu yongola oku kuata ombembua. Tu ci linga ndati?

Catete, tu sukila oku tanga Ondaka ya Suku oloneke viosi. (Osamo 1:2, 3) Nda tu sokolola lutate kovina tu tanga, espiritu li tu kuatisa oku kuata elomboloko liatiamẽla kovisimĩlo via Yehova. Tu lilongisa ndomo eye amamako oku lekisa ombembua kuenda esunga lieci ombembua yi  kuetele esilivilo lialua kokuaye. Eci tu kapako ovina tu lilongisa Vembimbiliya, ombembua vomuenyo wetu yi livokiya.—Olosapo 3:1, 2.

Cavali, eci tu likutilila tu sukila oku pinga espiriti lia Suku. (Luka 11:13) Yehova o likuminya ku vana vo pinga ekuatiso hati: “Ombembua ya Suku yina ya piãla olondunge viosi, yi lava ovitima viene kuenda ovisimĩlo viene vu Kristu Yesu.” (Va Filipoi 4:6, 7) Nda tua kuata ukamba umue wa pama la Yehova kuenda tua kolela kespiritu liaye, eye o tu ĩha ombembua yovutima.—Va Roma 15:13.

Embimbiliya lia siata oku kuatisa omanu valua oku pongolola omuenyo wavo, kaliye va kuete ombembua la Yehova, va kuete ombembua yovutima kuenda ombembua lomanu vakuavo. Nye ca va kuatisa oku linga apongoloko aco?

Vamanji vamue osimbu ka va fetikile oku lilongisa ocili, va kala vakuakutema kuenda olongangala. Pole, ovo va likolisilako oku linga apongoloko kuenje cilo, vomboka, vakuepandi kuenda va lekisa ombembua komanu vakuavo. * (Tala etosi pombuelo yemẽla.) (Olosapo 29:22) Limbuka ndomo manji umue ulume o tukuiwa hati Daviti kuenda manji umue ukãi o tukuiwa hati Rahele, va linga apongoloko aco vomuenyo wavo.

Manji Daviti osimbu ka fetikile oku lilongisa ocili, eye olonjanja vimue wa enda oku popia lãvi vakuavo kuenda wa kuata ocituwa coku keloha poku vangula lepata liaye. Noke eye wa limbuka okuti wa sukilile oku linga apongoloko. Nye a linga oco a kuate ombembua? Daviti wa popia hati, “Nda fetika oku kapako olonumbi Viembimbiliya komuenyo wange kuenje esumũlũho lieyililako lieli okuti, pokati ketu vepata pali esumbilo lialua.”

Manji Rahele wa vetiyiwile lovituwa viopocitumãlo a kulila. Eye wa papia hati, “Cilo ñasi oku liyaka  locituwa coku kenyoha momo nda kulila vepata limue lia kala locituwa coku kenyoha.” Nye ca kuatisa Rahele oku kuata ombembua? Eye wa popia hati, “Oku likutilila lekolelo ku Yehova.”

Manji Daviti la manji Rahele vamue pokati komanu va kuata ombembua omo lioku kapako olonumbi Viembimbiliya kuenda oku kolela kespiritu sandu. Ndaño okuti tu kasi voluali lumue lua vĩha, lopo tu pondola oku kuata ombembua yovutima. Ombembua yaco, yi tu kuatisa oku kala ciwa lepata lietu kuenda la vamanji vekongelo. Pole, Yehova o tu vetiya oku ‘kala vakuambembua lomanu vosi.’ (Va Roma 12:18) Anga hẽ ci tẽliwa? Momo lie tu sukilila oku likolisilako oku kala lombembua la vakuetu?

Kupange wetu woku kunda, tua siata oku kunda esapulo liombembua liatiamẽla Kusoma wa Suku. (Isaya 9:6, 7; Mateo 24:14) Valua va lekisa onjongole kuenje va tava kesapulo liaco. Omo liaco, ovo va liyeva okuti va kolapo kuenda ka va kuata vali onyeño omo liovina vi kasi oku pita voluali. Cilo ovo va kuete elavoko liocili liokovaso yoloneke kuenje eci ci va vetiya oku “Sandiliya ombembua.”—Osamo 34:14.

Pole, havosiko kefetikilo va lekisa onjongole kesapulo tu va nenela. (Yoano 3:19) Ndaño omanu va tava ale sio, Suku o tu ĩha espiritu liaye. Olio li tu kuatisa oku amamako lombembua kuenda esumbilo eci tu kunda. Omo liaco, tu kuama elungulo lia Yesu liokuti: “Eci wiñili vonjo yimue, lami vakuanjo yaco. Nda va tava kesapulo, ombembua yene yi siale lavo; pole, nda ka va tava, tiukili lombembua yene.” (Mateo 10:11-13) Eci tu lekisa ovituwa evi, tu amamako lombembua kuenda ka tu kapiko eci omanu va popia ale ceci va linga. Tu ivaluka okuti handi tu kuete epuluvi lioku kuatisa omanu vaco kovaso yoloneke.

Tu pondolavo oku lekisa ombembua nda poku vangula lolombiali tu ci linga lesumbilo, ndaño okuti va tateka upange wetu. Ndeci, kofeka yimue yo Afrika, ombiali ka ya tavele okuti tu tunga Onjango Yusoma. Vamanjetu va kũlĩhĩle okuti va ponduile oku tetulula ocitangi caco lombembua. Ovo va tuma manji umue wa kala omisionariu kofeka yaco oco a vangule la Alto Comissariado kofeka yo Londre, ko Inglaterra catiamẽla kupange wombembua Olombangi Via Yehova via siata oku linga.

Manji wa popia hati: “Eci nda pitĩla vohondo yoku tambuila olonumbi, nda limbuka okuti omunu nda sangamo wa wala uwalo wa tiamẽla kepata limue okuti livangula elimi limue nda lilongisile. Kuenje ndo lama velimi liaye. Eye wa komõha kuenje wa ndi pula hati, ‘Weya oku linga nye kulo?’ Lesumbilo ndo sapuila okuti ndeya oku vangula la Alto Comissariado. Eye wo telefonalela kuenje weya tua li lama kelimi li vanguiwa pocitumãlo. Eye lutate wa ndi yevelela osimbu nda kala oku u lomboluila upange wombembua Wolombangi Via Yehova.”

Noke, lia Alto Comissariado oku yevelela eci manji o sapuila, wa kuata elomboloko lia suapo liupange wetu kuenda ka lekisile vali olonepele ndeci a lingile tete. Kuenje ombiali ya pongolola ovisimĩlo viaye kuenda ya ecelela okuti Olombangi Via Yehova vi tunga Onjango Yusoma. Vamanji va kuata esanju lialua! Ocili okuti eci tu tata vakuetu lesumbilo, tu kala lombembua.

Koloneke vilo, afendeli va Yehova va kasi vocumbo celau cespiritu, osimbu vo fendela lombembua. Omunu lomunu pokati ketu o sukila oku kuata ombembua loku amamako oku yi lekisa vomuenyo waye. Omo liaco, tu koleli okuti Yehova wa tu sanjukila. Kuenje voluali luo kaliye o ka tu ĩha ombembua ka yi pui.—2 Petulu 3:13, 14.