Isia ya Rehovama, Salomone, wa kala osoma yo ko Isareli vokuenda kueci ci soka 40 kanyamo. (1 Olosoma 11:42) Eci isiaye a fa, Rehovama wa tunda ko Yerusalãi wa enda ko Sekeme oco a ka linge o soma. (2 Asapulo 10:1) Anga hẽ wa kuata usumba woku piñala usoma? Salomone wa kũlĩhiwile omo liolondunge viaye vialua. Kuenje Rehovama wa sukilile oku eca uvangi wokuti o kuete olondunge vioku potolola ovitangi vinene.

Va Isareli va kala lusumba kuenje va tuma olomunga oco va sapele la Rehovama oku linga eci ovo va yonguile okuti eye o ci linga, poku popia hati: “So wa lemisile okanga yetu. Kaliye ove leluisa upange wa kãla wa so, lokanga yaye yi lema yina a tu kapele, oco tu ku vumbe.”—2 Asapulo 10:3, 4.

Rehovama onjila a sukilile oku nõla ka ya lelukile. Nda wa lingile eci omanu va yonguile, eye lepata liaye kuenda vana va kala kelombe, nda va pumba ovikuata vimue via posoka va kuatele. Pole, ka tavele kepingilo liomanu kuenje va lekisa esino kokuaye. Nye eye a linga? Tete wa sapela lakulu vana va kuatisile isiaye. Ovo vo sapuila hati, yevelela omanu. Pole, wa pula amalẽhe vakuotunga waye kuenda wa nõlapo oku tata omanu lungangala. Eye wa va sapuila hati: “Tate wa lemisile okanga yene, ame puãi mbadekako. Tate wo yamboli lolohava, ame puãi ndu yambuli lenyenya.”—2 Asapulo 10:6-14.

Wa limbuka hẽ eci tu lilongisilako? Koloneke vilo, tu kuete akulu valua pokati ketu okuti, va kasi oku vumba Yehova vokuenda kuanyamo alua kuenje va pondola oku tu kuatisa oku nõla onjila yiwa. Tu lekisi olondunge kuenda tu va yeveleli.—Yovi 12:12.

Kaliye Rehovama wa li kongela lolohoka viaye oco a ka linge uyaki lapata ana o sinĩla. Pole, Yehova wa tuma uprofeto Semaya oku va sapuila hati: “Ko ka lamaneliko, ko ka yaki la vamanjene va Isareli.  Tiukili omunu omunu konjo yaye, omo ocina eci ca tunda kokuange.”—1 Olosoma 12:21-24. *—Tala etosi pombuelo yemẽla.

Ku Rehovama ca lelukile hẽ oku yevelela Yehova? Nye omanu nda va sima catiamẽla kosoma yavo yokaliye? Eye wa va sapuilile okuti o va yambula “lenyenya,” pole, ka lingile lacimue catiamẽla kesino liaco! (Sokisa 2 Asapulo 13:7.) Catiamẽla kueci omanu va sapuilile soma kuenda olohoka viaye, “va yeva kondaka ya Yehova, va tiukila yu va enda lonjila yavo, ndondaka ya Yehova.”

Nye tu lilongisilako? Olonjanja viosi ciwa oku pokola ku Suku ndaño okuti omanu va tu popia lãvi poku ci linga. Suku o tu sumũlũisa eci tu pokola kokuaye.—Esinumuĩlo 28:2.

Rehovama wa sumũlũisiwa hẽ omo liepokolo liaye? Rehovama wa vialele epata lio ko Yuda, la Benjamini kuenje eye wa nõlapo oku tunga alupale o kaliye vovikanjo viaco. Wa tungavo alupale amue a koka “kuenje wa a pamisa calua.” (2 Asapulo 11:5-12) Ca velapo ceci okuti, vokuenda kuotembo yimue wa pokola kovihandeleko via Yehova. Omo okuti apata ekũi wusoma a fetika oku fendela oviteka, omanu valua va enda ko Yerusalãi oco va ka kuatise Rehovama kuenda efendelo liocili. (2 Asapulo 11:16, 17) Omo Rehovama wa pokuile ku Yehova, usoma waye weya oku pamisiwa.

Eci usoma wa Rehovama wa pamisiwa eye wa linga ocina cimue ka ca sungulukile. Wa liwekapo oku pokola kovihandeleko via Yehova kuenda wa fetika oku fendela olosuku viesanda! Momo lie? Anga hẽ omo inaye a tiamẽlele kepata lia va Amoni a vetiya ovisimĩlo viaye? (1 Olosoma 14:21) Etu ka tua ci kũlĩhĩle, pole, omanu va kuama ongangu yaye yĩvi. Omo liaco, Yehova wa ecelela okuti Soma Sisiake wo Kegito o katukila alupale alua vusoma wa Yuda. Ndaño Rehovama wa pamisile alupale aco, lopo va va katukila!—1 Olosoma 14:22-24; 2 Asapulo 12:1-4.

Ovitangi vieya oku livokiya eci Sisiake lolohoka viaye va katukila o Yerusalãi kuna Rehovama a vialele. Kuenje uprofeto Semaya wa eca esapulo lia tunda ku Suku ku Rehovama hati: “Omo wa njanduluki, oco ame ndo weceli peka lia Sisiake.” Rehovama wa liyeva ndati omo liesapulo eli? Wa lekisa epokolo! Embimbiliya hati: “Olombuale via Isareli kumue la Soma va liketisa kuenje vati, Yehova Ukuesunga.” Kuenje Yehova wa popela Rehovama kuenda ka ecelele okuti o Yerusalãi yi yõliwa.—2 Asapulo 12:5-7, 12.

Noke Rehovama wamamako oku viala o Yuda yosi. Osimbu ka file wa eca olombanjaile vialua komãla vaye. Citava okuti eye wa ci lingila oco ovo ka va ka sinĩle manjavo Aviya una wa laikele oku u piñala kusoma. (2 Asapulo 11:21-23) Poku ci linga, Rehovama wa lekisa olondunge okuti eci a kala umalẽhe ci sule.

Ndaño okuti Rehovama wa linga ovina vimue viwa, Embimbiliya lia lombolola eci catiamẽla kuviali waye hati: “Wa lingainga eci cĩvi.” Momo lie? Momo “ka kapeleko utima waye oku sanda Yehova.” Kuenje Yehova ko sanjukilile.—2 Asapulo 12:14.

Nye tu lilongisila kekalo lia Rehovama? Olonjanja vimue wa enda oku linga ovina vi sanjuisa Suku. Handi vali, wa lingila ovina viwa afendeli va Yehova. Pole, ka kuatele ukamba wa pama la Yehova kuenda ka kuatelevo onjongole yiwa yoku u sanjuisa. Kuenje wa liwekapo oku linga eci ca sunguluka kuenda wa fetika oku fendela olosuku viesanda. O pondola oku lipula ndoco: ‘Eci Rehovama a tava kelungulo lia Yehova, anga hẽ wa ci lingila omo okuti, wa limbuka oku lueya kuaye kuenje wa yonguile oku sanjuisa Suku?’ Ale momo vakuavo vo sapuilile eci a sukilile oku linga? (2 Asapulo 11:3, 4; 12:6) Noke yotembo yimue, eye wa linga vali eci ka ca sungulukile. Eye wa litepele calua la sekulu yaye Soma Daviti! Ocili okuti Daviti wa linga akandu. Eye lumbombe walua wa likekembela kakandu anene a lingile. Wa solaile  Yehova kuenda efendelo liocili vomuenyo waye wosi.—1 Olosoma 14:8; Osamo 51:1, 17; 63:1.

Tu pondola okupa esilivilo lialua kulandu owu Wembimbiliya. Ci sanjuisa eci omanu va kuatisa apata avo kuenda va lingila vakuavo ovina viwa. Pole, oco tu kuate ohenda ya Yehova, tu sukila oku u fendela lonjila yimue yu sanjuisa kuenda oku pamisa ukamba wetu laye.

Oco tu kuate ocimãho caco, tu sukila oku kuatela Yehova ocisola calua. Ndeci tu lava ondalu oco ka yi kame loku vokiya olohũi kokuayo, tu vokiyavo ocisola cetu ku Suku poku lilongisa ondaka yaye olonjanja viosi, oku sokolola ovina tua tanga kuenda oku pandikisa lolohutililo. (Osamo 1:2; Va Roma 12:12) Kuenje ocisola caco ci ka tu vetiya oku sanjuisa Yehova kovina viosi tu linga. Handi vali, ci tu vetiya oku limbuka ekandu lietu eci tu lueya kuenda oku pinga ku Yehova oco a tu ecele. Omo liaco ka tu ka kala nda Rehovama, pole, tu amamako oku kala vefendelo liocili.—Yuda 20, 21.