1. Lipi esunga lia velapo tu kuete lioku kuata esanju?

TU SANJUKA calua poku yeva ndomo afendeli va Suku va kasi oku tuisa ocinyi cavo! Kunyamo wa pita, afendeli va Yehova va songola eci ci pitahãla 10.000.000 kalilongiso Embimbiliya. Kuenje omanu valua va lekisa onjongole veya Konjivaluko kuenda va lilongisa eci catiamẽla kocisembi okuti ombanjaile yocisola ca Yehova.—1 Yoano 4:9.

2, 3. (a) Ocina cipi ka ci tu tateka oku “tua ndocinyi”? (b) Nye tu lilongisa vocipama cilo?

² Koluali luosi, Olombangi Via Yehova vi vangula alimi alitepa. Pole, eci ka ci tu tateka oku sivaya Yehova ndepata limue li likuete omunga. (Esituluilo 7:9) Elimi liosi tu vangula ale kofeka tu kasi, tu pondola oku tua “ndocinyi voluali.”—Va Filipoi 2:15.

³ Upange wetu woku kunda, omunga yetu Yakristão kuenda ombili yetu, cosi ci nena esivayo ku Yehova. Tu pondola oku tuisa ndati ocinyi cetu kovina evi vitatu?—Tanga Mateo 5:14-16.

4, 5. (a) Ndaño okuti tu tuisa ocinyi cetu kupange woku kunda, kolonepa vipi vikuavo tu sukilavo oku ci linga? (b) Onima yipi yi tunda koku lekisa ohenda? (Tala ociluvialuvia kefetikilo liocipama.)

⁴ Oku kunda kuenda oku longisa omanu oco va linge olondonge onjila yimue ya velapo yoku tuisa ocinyi cetu. (Mateo 28:19, 20) Kunyamo 1925, ocipama losapi hati, “Ocinyi Vowelema” ca lombolola okuti, vokuenda kuoloneke via sulako lomue o ka kolela Ñala nda eye ka kuatele “epuluvi lioku tuisa ocinyi caye.” Noke ca amisako hati: “Eye wa ci linga poku tukula olondaka viwa komanu vo kilu lieve kuenda poku ci lekisa eye muẽle oku tuisa ocinyi.” (Utala Wondavululi 1 Yevambi, 1925) Ndaño okuti tu tuisa ocinyi cetu kupange woku kunda, ovilinga vietu vi ecavo esivayo ku Yehova. Eci tu kunda, omanu valua va tu mola. Eci tu yola lavo loku va lama, ci va kuatisa oku kuata ovisimĩlo via sunguluka viatiamẽla kokuetu kuenda ku Suku tu fendela.

⁵ Yesu wa sapuila kolondonge viaye hati: “Eci wiñili vonjo yimue, lami vakuanjo yaco.” (Mateo 10:12) Kovaimbo amue Yesu a kundila, omanu va kuatele ocituwa coku yekisa ovingendeleyi kolonjo viavo. Koloneke vilo, kovitumãlo vialua ocituwa caco ka ci kasiko vali. Olonjanja vialua omanu va kala lonyeño ale va tema, eci va mola okuti omunu umue ka va kũlĩhĩle weya konjo yavo. Pole, nda tua lekisa ukamba kuenda umbombe ovo va ka lianja. Poku eca uvangi vokololo lokakãlu kalivulu, ove wa limbuka ale okuti, nda wa memenako kamue loku lekisa ukamba poku lama, siti omanu va lianja kuenda vopa alivulu? Citava okuti ovo va lekisa onjongole yoku sapela!

6. Nye ca siata oku kuatisa ohueli yimue ya kuka oku lekisa ombili kupange woku kunda?

⁶ Ohueli yimue okuti ya kuka kofeka yo Inglaterra, yi kasi ale anyamo alua okuti ka yi kundila vali konjo lanjo omo liocitangi cavo cuhayele. Kuenje va yeka okamesa kalivulu posamua yonjo yavo. Ovo va kasi ocipepi losikola yimue kuenje va kapa alivulu a vetiya olonjali vina viya okupa omãla vavo kosikola. Olonjali vimue vi upa alivulu oku kongelamo elivulu Os Jovens Perguntam—Respostas Práticas, Volume 1 kuenda 2. Manji umue ukãi ukundi wotembo yosi olonjanja vimue o likongela lohueli yaco. Olonjali vi limbuka okuti manji ukundi wotembo yosi wa lianja kuenda vi limbukavo okuti ohueli yi yongola oku kuatisa omanu vakuavo. Isia umue wa fetika oku lilongisa Embimbiliya.

7. O pondola oku kuatisa ndati ovingendeleyi vi kasi posongo yove?

⁷ Koloneke vilo, valua va tila kolofeka viavo kuenje cilo va kasi kolofeka vikuavo ndovingendeleyi. O pondola oku kuatisa ndati ovingendeleyi vi kasi posongo yove oco vi lilongise eci catiamẽla ku Yehova? Catete, o sukila oku lilongisa ndomo va lama velimi liavo. Handi vali, nda wa talavaya lo JW Language, o pondola oku lilongisa olondaka vimue okuti, vi va vetiya oku kuata onjongole yoku ku yevelela. Kuenje o pondola oku va  lekisa olovideo lalivulu a sangiwa velimi liavo okuti vi kasi vonumbi yetu yo Internete jw.org.—Esinumuĩlo 10:19.

8, 9. (a) Olohongele viokati kosemana vi tu kuatisa ndati? (b) Olonjali vi kuatisa ndati omãla vavo oku mioñoloha koku eca atambululo vekongelo?

⁸ Yehova o tu ĩha ovina viosi tu sukila oco tu talavaye lavio kupange woku kunda. Ndeci, ovina tu lilongisa Vekalo Lietu Tuakristão Kuenda Oku Kunda, vi tu kuatisa oku linga epasu kuenda oku fetika alilongiso Embimbiliya.

⁹ Eci akombe veya volohongele vietu, olonjanja vialua va komoha omo liatambululo a eciwa lomãla vetu. Ove o pondola oku longisa omõlove oco a ece etambululo volondaka viaye muẽle. Omanu vamue va vetiyiwa oku iñila vocili eci va yeva omãla oku lekisa ekolelo liavo poku eca atambululo lonjila yimue ya leluka kuenda lutima wosi.—1 Va Korindo 14:25.

10. Efendelo liepata li kuatisa ndati apata oku likuata omunga?

¹⁰ Eci tu likolisilako oku pindisa epata lietu oco tu talavayele kumosi vomunga lombembua, tu eca esivayo ku Yehova. Nda ove u isia, linga esokiyo lioku kuata Efendelo Liepata olonjanja viosi. Apata alua atalela kumosi ocipama co JW Broadcasting, noke va sapela ndomo va pondola oku kapako ovina va lilongisa. Ivaluka okuti elungulo lieciwa komõla utito lia litepa leli lieciwa komõla umalẽhe. Linga cosi ci tava oco o kuatise omunu lomunu vepata liove, okupa  esilivilo kefendelo liepata.—Osamo 148:12, 13.

11-13. Tu kuatisa ndati ekongelo tu kasi oku pamisa omunga yetu?

¹¹ Ndaño okuti ove umalẽhe, o pondola oku kuatisa vosi vekongelo oku limbuka okuti va kuete esilivilo. Onjila yimue yoku ci linga, oku kuata ukamba lavamanji va kuka. Va pulisa eci ca siata oku va kuatisa oku amamako oku vumba Yehova vokuenda kuanyamo alua. Ovo va pondola oku ku sapuila ovolandu alua a kuete esilivilo. Ocili okuti ovo va ka pamisiwa kuenda ove o ka pamisiwavo! Vosi yetu, ci kale amalẽhe ale akulu, tu pondola oku tambula ciwa akombe veya Vonjango yetu Yusoma, oco va lianje. O sukila oku va lama lonjolela kuenda oku va kuatisa oku sanga olomangu loku va lekisa kuvamanji vakuavo. Va kuatisa oco va lianje.

¹² Nda wa nõliwa oco o songole ohongele yupange woku kunda, o sukila oku kuatisa vana va kuka oku amamako oku tuisa ocinyi cavo. Linga esokiyo okuti ovo va kuata ocikanjo va sesamẽla. Nõla amalẽhe vamue va pondola oku talavaya lavo. Vamanji va kuka kuenda vana va kuete ocitangi cuhayele pamue va sumua omo ka va kasi oku kunda vali calua ndeci va lingaile. Pole, ovo va ka sanjuka eci va limbuka okuti ove wa va kapako kuenda wa kapakovo ekalo liavo. Ndaño okuti va kasi ale otembo yalua vocili, ovilinga viove viohenda vi pondola oku va vetiya oku amamako oku lekisa ombili kupange woku kunda.—Ovisila 19:32.

¹³ Va Isareli va kuatele esanju poku fendelela kumosi Yehova. Ukualosamo wa soneha ndoco: “Ciwa cimue, ca posoka muẽle, nda ava vasitue va tunga pamosi lombembua!” (Tanga Osamo 133:1, 2.) Eye wa sokisa omunga yaco lulela woku waveka, u salalisa etimba hawo u lẽha ciwa. Ndeci ulela u linga, tu pondolavo oku salalisa vamanji poku lekisa esanju kuenda umbombe. Eci ci pamisa calua omunga vekongelo. Nye o sukila oku linga oco o kũlĩhe ciwa vamanji vekongelo o kasi?—2 Va Korindo 6:11-13; etosi.

14. O pondola oku tuisa ndati ocinyi posongo yove?

¹⁴ Ocinyi cove ci pondola oku tua pocitumãlo cosi o sangiwa. Ohenda yove yi ka vetiya vana o lisungue lavo oku lekisa onjongole yoku lilongisa ovina vialua viatiamẽla ku Yehova. Lipula ndoco: ‘Omanu va lisungue lame nye va sima catiamẽla kokuange? Onjo yange ya tatiwa ciwa kuenda ya yela? Posongo yeca hẽ uvangi uwa? Nda siata hẽ oku kuatisa vana ndi lisungue lavo?’ Eci o kuata epuluvi limue, pulisa vamanji vamue, ndomo ovituwa viavo viwa via vetiya epata, vana va lisungue, vana va talavayela kumosi kuenda vana va tangela kumosi. Nda wa ci linga o ka yeva ovolandu awa.—Va Efeso 5:9.

15. Momo lie tu sukilila oku amamako oku lavulula?

¹⁵ Nda tu yongola okuti ocinyi cetu ca amamako oku tua, tu sukila oku limbuka otembo tu kasi. Olonjanja vialua, Yesu wa  sapuila olondonge viaye hati: “Lavululi.” (Mateo 24:42; 25:13; 26:41) Nda tua sima okuti “ohali ya piãla” handi ka yi pepi, ka tu lavulula apuluvi tu kuete oku kuatisa omanu oku lilongisa catiamẽla ku Yehova. (Mateo 24:21) Kuenje kamue kamue ocinyi cetu ci pondola oku tepuluka toke eci ci imũha.

16, 17. Nye o sukila oku linga oco amameko oku kuata ocituwa conjanga?

¹⁶ Tu sukila oku amamako oku lavulula capiãla enene cilo. Ekalo lĩvi lioluali lia amamako oku livokiya. Pole, etu tua kũlĩha okuti esulilo liya votembo Yehova a sokiya. (Mateo 24:42-44) Osimbu otembo yaco ka ya pitĩlile, tu sukila oku kala vakuepandi kuenda oku tiamisila utima kovina vi laika oku iya. Tanga Embimbiliya oloneke viosi kuenda ku ka liwekepo oku likutilila ku Yehova. (1 Petulu 4:7) Lilongisila kongangu ya vamanji va kasi ale oku vumba Yehova vokuenda kuanyamo alua. O pondola oku tanga ovolandu omuenyo ndeci ocipama losapi hati, “Ndi Kuetelele Konanga yu Yuda Vokuenda Kueci ci Soka Akũi Epanduvali Kanyamo,” ci sangiwa Vutala Wondavululi 15 ya Kupupu 2012 kemẽla 18-21.

¹⁷ Litumbika koku linga upange wa Yehova. Lingila vakuene ovina viwa kuenda  sanda otembo yoku kala la vamanji. Nda wa ci linga, o ka kuata esanju kuenje o ka limbuka okuti otembo yi pita lonjanga. (Va Efeso 5:16) Afendeli va Yehova va linga ovina vialua vokuenda kuocita canyamo. Cilo tu kuete ovina vialua vioku linga okuti kosimbu ci sule. Upange wa Yehova u kasi loku livokiya calua okuti ka tua ci lavokaile. Ocili okuti, ocinyi cetu ci kasi oku amamako oku tua!

18, 19. Akulu vekongelo va tu kuatisa ndati oku kuata ombili yoku vumba Yehova? Tukula ulandu umue.

¹⁸ Ndaño okuti tua siata oku lueya, Yehova ecelela okuti tu u vumba. Oco Yehova a tu kuatise, wa tu ĩha ‘olongavelo viomanu,’ okuti akulu vekongelo. (Tanga Va Efeso 4:8, 11, 12.) Omo liaco, eci akulu vekongelo va ku nyula, sanda otembo yoku kala lavo oco upe esilivilo kolondunge viavo kuenda kelungulo.

¹⁹ Ulandu umue u lekisa okuti ohueli yimue kofeka yo Inglaterra ya kuatele ovitangi vimue volohuela viavo kuenje va pinga ekuatiso kakulu vavali vekongelo. Ukãi wa limbuka okuti ulume ka kasi oku tẽlisa ocikele caye kupange wa Yehova. Ulume wa liyeva okuti ka kuete uloño woku longisa kuenda wa limbuka okuti ka kaile oku songola efendelo liepata olonjanja viosi. Akulu vekongelo va kuatisa ohueli oku sokolola kongangu ya Yesu. Ovo va vetiya ulume oco a setukule onjila ndomo Yesu a tata olondonge viaye. Ovo va vetiyavo ukãi oco a lekise epandi kulume waye. Handi vali, ovo va ecavo olonumbi vimue, ohueli ya ponduile oku kuama kefendelo liepata kumue lomãla vovo vavali. (Va Efeso 5:21-29) Ulume wa likolisilako koku kala usongui umue uwa vepata. Akulu vekongelo vo vetiya oco ka ka liwekepo kuenda oku amamako oku kolela kespiritu lia Yehova. Ocisola kuenda ohenda akulu vekongelo va lekisa ca kala ekuatiso linene kepata eli!

20. Onima yipi o pondola oku kuata eci o tuisa ocinyi cove?

²⁰ “Vosi va sumbila Yehova loku endaila volonjila viaye, va sumũlũha.” (Osamo 128:1) Ove o sumũlũha eci o tuisa ocinyi cove. Omo liaco, longisa vakuene catiamẽla ku Suku, linga cosi ci tava oco o kuatise epata liove lekongelo oku likuata omunga kuenda amamako oku lavulula. Vakuene va ka mola ongangu yove yiwa kuenda va ka lekisavo onjongole yoku eca esivayo ku Isietu, Yehova.—Mateo 5:16.