1, 2. (a) Nye Yesu a pinga vohutililo ya sulako a linga kumue lolondonge viaye? (b) Momo lie Yesu a lekisila esakalalo liatiamẽla koku likuata omunga?

YESU wa sakalalele calua kueci catiamẽla koku likuata omunga, vokuenda kuondalelo yaye ya sulako lovapostolo vaye. Eci a kala oku likutilila lavo, eye wa popia okuti olondonge viaye vi kala vimuamue ale vi likuata omunga ndeci eye la Isiaye va likuete omunga. (Tanga Yoano 17:20, 21.) Olondonge via Yesu poku likuata omunga, nda ca eca uvangi komanu vakuavo okuti, Yehova wa tumile Yesu palo posi. Omanu va ponduile oku limbuka olondonge viocili via Yesu, omo liocisola va likuetele pokati kuenda ocisola caco nda ca kuatisa olondonge oku likuata omunga.—Yoano 13:34, 35.

² Tu pondola oku kuata elomboloko lieci Yesu a popela kuteke waco catiamẽla koku likuata omunga. Eye wa limbukile okuti pokati kovapostolo vaye ka pa kaile omunga ya suapo. Momo, ovapostolo va lihoyisa “nda helie wa velelepo pokati kavo” ndeci va lingile ale tete. (Luka 22:24-27; Marko 9:33, 34) Onjanja yikuavo, Tiago la Yoano va pinga ku Yesu oco a va  ĩhe ocitumãlo ca velapo Vusoma wo kilu coku tumãla kondio ocipepi laye.—Marko 10:35-40.

3. Nye ca enda oku tateka olondonge via Kristu oku likuata omunga kuenda apulilo api tu konomuisa?

³ Onjongole yoku kuata unene kuenda oku livelisapo, hacoko lika ca ponduile oku tateka olondonge via Kristu oku likuata omunga. Koloneke via Yesu, pokati komanu ka pa kaile oku likuata omunga omo liesuvu kuenda olonepele. Olondonge via Yesu via sukilile oku yuvula ovisimĩlo viaco ka via sungulukile. Vocipama cilo, tu konomuisa apulilo ndeci: Nye Yesu a linga catiamẽla kolonepele? Eye wa kuatisa ndati olondonge viaye oku yuvula oku kuata ocame, pole vi kala vakuesunguluko kuenda vi likuata omunga? Ongangu ya Yesu lovina eye a longisa vi tu kuatisa ndati oku amamako oku likuata omunga?

4. Tukula ulandu umue watiamẽla kolonepele via lekisiwa ku Yesu.

⁴ Yesu wa tatiwavo lolonepele. Eci Filipu a sapuila Nataneli okuti wa sanga Mesiya, Nataneli wa popia hati: “Ko Nasara hẽ ku tunda cimue ciwa?” (Yoano 1:46) Citava okuti Nataneli wa kũlĩhĩle okuti Mesiya wa laikele oku citiwa ko Beteleme, ndomo ca popele ocitumasuku ca Mika 5:2. Pamue eye wa simĩle okuti o Nasara ka ya kaile imbo lia velapo okuti, mu citiwila Mesiya. Kua kalavo va Yudea va kemãlele okuti va enda oku sepula Yesu omo a tunda ko Galilea. (Yoano 7:52) Va Yudea valua va kuatele ovisimĩlo viokuti omanu vo ko Galilea va sule. Va Yudea vakuavo va seteka oku sepula Yesu poku u tukula okuti u Samaria. (Yoano 8:48) Va Samaria va kala vakuepata limue lia litepa kuenda etavo liavo lia litepelevo leli lia va Yudea. Va Yudea la va Galilea ka va sumbilile va Samaria kuenda va enda oku va yuvula.—Yoano 4:9.

5. Olonepele vipi via lekisiwa kolondonge via Yesu?

⁵ Asongui vetavo lia va Yudea ka va sumbililevo olondonge via Yesu. Va Fariseo va va tukula vati, ‘owiñi wa siñaliwa.’ (Yoano 7:47-49) Omanu vana ka va tangelele kolosikola vietavo lia va Yudea kuenda ka va kuamele oviholo viaco, va Fariseo va enda oku va tenda okuti ka va kuete esilivilo kuenda omanu vaño. (Ovilinga 4:13, etosi) Yesu lolondonge viaye va tatiwile lolonepele, omo okuti omanu vo kotembo yaco va velisilepo etavo liavo, ekalo liomuenyo wavo kuenda ekova liavo. Ocame caco, ca yapuisilevo olondonge kuenda onjila ndomo va tata vakuavo. Oco ovio viamameko oku likuata omunga, via sukilile oku pongolola ovisimĩlo viavo.

6. Tukula ulandu umue u lekisa ndomo tu pondola oku yuliwa lolonepele.

⁶ Koloneke vilo, voluali tu kasi mue yuka olonepele. Omanu va pondola oku lekisa olonepele kokuetu, ale oku lekisa olonepele komanu vakuavo. Manji umue ukãi okuti cilo ukundi wotembo yosi kofeka yo Australia wa popia hati: “Esuvu liange liatiamẽla komanu vakuekova liyela, lia kala oku livokiya  osimbu nda tiamisila utima kekambo liesunga lia lingiwa kepata Aborigine lio kosimbu kuenda lio koloneke vilo.” Esuvu liaye lia livokiyavo omo liovina vo lingaile. Manji umue ulume wo kofeka yo Kanada wa lombolola ndomo a enda oku li yeva poku popia hati: “Nda simĩle okuti omanu va vangula elimi lio Fransesi va velelepo.” Eye wa popia okuti, omo liaco sia solele vana va vangula elimi Liongelesi.

7. Nye Yesu a linga catiamẽla kolonepele?

⁷ Ndeci ca pita koloneke via Yesu, olonepele koloneke vilo via livokiya calua okuti ka ca lelukile oku pongolola ovisimĩlo viaco. Nye Yesu a linga catiamẽla kovisimĩlo viaco? Catete, eye lalimue eteke a kuatele olonepele. Handi vali, ka lekasaile ocame. Eye wa kundila omanu vosi, ci kale olohuasi, olohukũi, va Fariseo, va Samaria, vakuakutambula elisimu kuenda vakuakandu. Cavali, Yesu wa longisa olondonge viaye loku lekisa ongangu yaye kokuavo, okuti ka va kuatela vakuavo ovisimĩlo ka via sungulukile ale oku va kuatela olonepele.

8. Onumbi yipi ya velapo yi kuatisa omunga yetu? Ci lombolola.

⁸ Yesu wa longisa onumbi yimue yi kuete esilivilo lia velapo okuti oyo ociseveto comunga yetu. Eye wa sapuila olondonge viaye hati: “Vosi yene vu vamanji.” (Tanga Mateo 23:8, 9.) Vosi yetu tu vamanji omo vosi tumãla va Adama. (Ovilinga 17:26) Yesu wa popia okuti olondonge viaye via kalavo vamanji, omo okuti vosi va kũlĩhĩle Yehova, Isiavo wo kilu. (Mateo 12:50) Vosi yavo va pangele onepa kepata lia Suku loku likuata omunga omo liocisola kuenda ekolelo. Eli olio esunga lieci upostolo Paulu poku sonehela ovikanda kakongelo, a tukuila Akristão hati, vamanjaye.—Va Roma 1:13; 1 Petulu 2:17; 1 Yoano 3:13. *—Tala etosi pombuelo yemẽla.

9, 10. (a) Momo lie va Yudea ka va kuatele esunga lioku velisapo epata liavo? (b) Yesu wa lekisa ndati okuti ka ca sungulukile oku sepula omanu va kuepata likuavo? (Tala ociluvialuvia kefetikilo liocipama.)

⁹ Noke Yesu wa sapuila olondonge viaye oco va litende okuti vamanji kuenje wa va vetiyavo oco va kale ambombe. (Tanga Mateo 23:11, 12.) Ndomo tua siata oku lilongisa olonjanja vimue epela lia enda oku koka oku litepa kovapostolo. Koloneke via Yesu, omanu va velisilepo calua epata liavo. Va Yudea valua va kolelele okuti va velelepo vokuavo, omo okuti va kala omãla va Avirahama. Pole, Yoano Upapatisi wa va sapuila hati: “Suku o pondola oku votola ovawe a-a oco a linge omãla va Avirahama.”—Luka 3:8.

¹⁰ Yesu wa longisa okuti ka ca sungulukile omanu oku velisapo lika ekova liavo. Yesu wa ci lekisa eci umue ukuavisonehua o pula hati: “Ukuetu waco helie?” Oco Yesu a tambulule epulilo liaco, wa tukula olusapo lumue. Ulume umue u Yudea wa tipuiwa lovingumba kuenda vo sia vonjila. Va Yudea vamue va pita ponele yaye, ka vo kuatisile. Pole, ulume umue u Samaria wa kuatela ohenda u Yudea kuenje wo wambata. Yesu wa malusula olusapo luaco poku sapuila ukuavisonehua okuti wa sukilile oku setukula ulume u Samaria. (Luka 10:25-37) Yesu wa lekisa okuti u Samaria wa ponduile oku  longisa va Yudea oku sola omanu va lisungue lavo.

11. Momo lie olondonge via Yesu via sukilile oku yuvula olonepele kuenda eye wa va kuatisa ndati oku kuata elomboloko liaco?

¹¹ Osimbu Yesu ka endele handi kilu, wa sapuila olondonge viaye oku kundila “vo Yudea yosi kuenda vo Samaria toke kasukiyo o kilu lieve.” (Ovilinga 1:8) Oco upange waco u lingiwe olondonge via Yesu via sukilile oku yuvula epela kuenda olonepele. Yesu olonjanja vialua wa enda oku tukula ovituwa viwa viomanu vakuafeka yikuavo kuenje eci ca pongiya olondonge viaye oco va kundile kolofeka viosi. Ndeci, Yesu wa pandiya kesongo umue wolohoka u kuafeka yikuavo wa kuatele ekolelo limue likomohĩsa. (Mateo 8:5-10) Kimbo liaye ko Nasara, Yesu wa lombolola ndomo Yehova a kuatisa vakuafeka yikuavo, ndeci ocimbumba co ko Foinike ko Sarepata kuenda Namana ukuavilundu wo ko Suria. (Luka 4:25-27) Yesu wa kundilavo ukãi umue u Samaria kuenje wa kala vimbo liaco oloneke vivali momo, omanu va kala lonjongole yoku yeva esapulo liaye.—Yoano 4:21-24, 40.

12, 13. (a) Ocituwa cipi ovapostolo va lekisa eci va mola Yesu oku longisa ukãi u Samaria? (Tala ociluvialuvia kefetikilo liocipama.) (b) Nye ci lekisa okuti Tiago la Yoano ka va kuatele elomboloko lieci Yesu a kala oku va longisa?

¹² Ka ca lelukile kovapostolo oku yula olonepele. Ovo va komõha eci va mola okuti Yesu o kasi oku longisa ukãi umue u Samaria. (Yoano 4:9, 27) Momo lie? Citava okuti a songui vatavo a va Yudea ka va siataile oku vangula lukãi umue powiñi capiãla enene ukãi u Samaria okuti o kuete ovituwa ka via sungulukile. Ovapostolo va sapuila Yesu oco a lie, pole, Yesu wa velisilepo oku sapela lukãi u Samaria okuti okulia ku sule. Suku wa yonguile okuti Yesu o kunda loku linga eci Eye a yonguile, omo liaco wa kundila ukãi u Samaria kuenje eci ca kala ndokulia kokuaye.—Yoano 4:31-34.

¹³ Tiago la Yoano ka va kuatele elomboloko liulandu owu u kuete esilivilo. Eci olondonge via enda la Yesu ko Samaria, via sandiliya ocitumãlo cimue coku lala, vimbo limue lio Samaria. Pole, va Samaria ka va tavele okuti va lala vimbo liaco. Omo liaco, Tiago la Yoano va kuata onyeño yalua kuenje va pinga ku Yesu nda citava okuti o va ecelela okuti ovo va tuma ondalu yi tunda kilu oco yi nyõle yimbo liosi. Yesu lutõi walua wa va lungula. (Luka 9:51-56) Citava okuti, Tiago la Yoano, nda ka va temẽle nda eci ca pitile vimbo liavo ko Galilea. Pamue ovo va temẽle omo okuti va kala vakualonepele. Noke eci Yoano a kundila va Samaria kuenje valua vo yevelela, citava okuti wa kuata osõi omo liocituwa a lekisile.—Ovilinga 8:14, 25.

14. Ocitangi colonepele ca tetuluiwa ndati?

¹⁴ Noke yotembo yimue, ko Pendekoste kunyamo 33, kua kala ocitangi colonepele vekongelo. Eci vamanji va kala oku eca okulia kovimbumba via kala lesukila, ovo va kala oku pitãhala ovimbumba vina via vangowaile o Helasi. (Ovilinga 6:1) Citava okuti ca lingiwa omo liolonepele vialimi. Ovapostolo va tetulula ocitangi caco lonjanga. Va nõla vamanji epandu vali va loñoloha oco va ece okulia. Vamanji vosi va kuatele olonduko vio Helasi, kuenje eci ca lembeleka ovimbumba vina via sumuile.

15. Petulu wa lilongisa ndati oku yuvula oku kuatela olonepele omanu vosi? (Tala ociluvialuvia kefetikilo liocipama.)

¹⁵ Kunyamo 36 olondonge via Yesu via fetika  oku kundila omanu vo kolofeka viosi. Tete, upostolo Petulu wa enda oku kala lika la va Yudea. Noke Suku wa lekisa okuti Akristão ka citava okuti va kuata olonepele kuenje Petulu wa kundila Korneliu, kesongo kolohoka vio ko Roma. (Tanga Ovilinga 10:28, 34, 35.) Noke liotembo yimue, Petulu wa kala Lakristão vana okuti Havayudeako kuenda wa lia lavo. Vokuenda kuanyamo amue kolupale luo Antiokea, eye wa enda oku tumala kuenda oku lia Lakristão vana okuti Havayudeako. (Va Galatia 2:11-14) Paulu wa lungula Petulu kuenda Petulu wa tava kelungulo liaco. Tua ci kũlĩha ndati? Eci Petulu a soneha ukanda waye watete Kakristão va Yudea la vana okuti Havayudeako ko Asia Menor, eye wa popia eci catiamẽla kesilivilo lioku sola vamanjetu vosi.—1 Petulu 1:1; 2:17.

16. Akristão vo kocita catete va kũlĩhĩwile ndati?

¹⁶ Ocili okuti, omo liongangu ya Yesu ovapostolo va lilongisa oku sola “omanu vosi.” (Yoano 12:32; 1 Timoteo 4:10) Vokuenda kuotembo ovo va pongolola ovisimĩlo viavo ndomo va tenda omanu. Noke Akristão vo kocita catete veya oku kũlĩhĩwa omo liocisola va likuetele pokati. Kunyamo 200 usonehi umue o tukuiwa hati, Tertuliano wa lombolola eci omanu vakuavo va enda oku popia catiamẽla Kakristão hati: “Ovo va li sole pokati” kuenda “ka va kuete usumba woku fila vamanjavo.” Omo okuti Akristão vaco va wala “omunu wokaliye,” ovo va lilongisa oku tenda omanu vosi okuti vamuamue, ndeci Yehova a va tenda.—Va Kolosai 3:10, 11.

17. Tu yuvula ndati ocituwa colonepele? Tukula ovolandu amue.

¹⁷ Koloneke vilo, ci pondolavo oku ambata otembo yalua oco tu siepo ovisimĩlo viatiamẽla kolonepele. Manji umue ukãi wo kofeka yo Fransa wa lombolola okuti ka ca lelukile kokuaye oku ci linga. Eye wa popia hati: “Yehova wa siata oku ndi longisa eci ci  lomboloka ocisola, eci ci lomboloka oku lekisa ocisola caco, leci ci lomboloka oku sola omanu vosi. Handi ñasi oku lilongisa oku yuvula oku kuatela vakuetu olonepele, pole, eci ka ca lelukile. Omo liaco, ndi kasi oku amamako oku likutilila catiamẽla kocitangi caco.” Manji umue ukãi wo ko Espanya wa lombolola okuti, olonjanja vimue, handi nda siata oku liyaka lovisimĩlo ka via sungulukile viatiamẽla komanu vamue. Eye wa popia hati: “Pamue nda siata oku litunda ciwa. Pole, nda kũlĩha okuti ndi sukila oku amamako oku liyaka lovisimĩlo viaco. Ndi pandula Yehova omo ndi kuete esumũlũho lioku tiamẽla kepata limue li likuete omunga.” Vosi yetu tu sukila oku li kũlĩhĩsa lutate catiamẽla kovisimĩlo vietu. Etu ka tu sukilavo hẽ oku yuvula ovisimĩlo vimue viatiamẽla kolonepele?

18, 19. (a) Asunga api tu kuete oku tambula omanu vosi? (b) Tu ci linga ndati?

¹⁸ Ciwa oku ivaluka okuti, vosi yetu tua kala ocipãla la Suku. (Va Efeso 2:12) Pole, Yehova omo liocisola caye, wamẽla kokuetu. (Hosea 11:4; Yoano 6:44) Kuenda Kristu wa tu tambula. Eye wa linga cosi citava oco tu pange onepa kepata lia Suku. (Tanga Va Roma 15:7.) Ndaño okuti ka tua li puile, Yesu wa lekisa ohenda poku tu tambula, omo liaco, lalimue eteke ka tu ka simi oku sepula vakuetu!

¹⁹ Tu kasi kesulilo lioluali lulo lua vĩha, omanu ka va likuete omunga, va likuetele olonepele kuenda esuvu. (Va Galatia 5:19-21; 2 Timoteo 3:13) Omo okuti tuafendeli va Yehova, tu kuete “olondunge vi tunda kilu,” okuti vi tu kuatisa oku yuvula olonepele kuenda oku kuata ombembua. (Tiago 3:17, 18) Tu kuete esumũlũho lioku linga ukamba lomanu vo kolofeka vikuavo, poku tava onjila ndomo va linga ovina kuenda pamue oku lilongisa elimi liavo. Eci tu linga ovina viaco, ombembua yetu yi kala “ndolui” kuenda esunga “ndapuku okalunga.”—Isaya 48:17, 18.

20. Nye ci pita eci ocisola ci pongolola ovisimĩlo vietu?

²⁰ Eci manji ukãi wo ko Australia a lilongisa Embimbiliya, ovisimĩlo viosi vĩvi violonepele kamue kamue, via imũha. Ocisola ca pongolola ovisimĩlo viaye. Manji ulume o vangula elimi lio Fransesi wo ko Kanada wa popia okuti, kaliye nda limbuka esunga lieci omanu va suvukila vakuavo omo pamue ka va li kũlĩhĩle ciwa. Eye wa lilongisa okuti, “ovituwa viomanu ka via tambele kocitumãlo va citiwila.” Noke, eye wa kuela la manji o vangula elimi Liongelesi! Ovolandu a-a, a lekisa okuti ocisola ci yula olonepele. Ocisola ci tu tokekisa vomunga yimuamue okuti ka ci tepiwa.—Va Kolosai 3:14.