1. Ndomo ca tangiwa Kosamo 18:46, soma Daviti wa sokisa Yehova la nye?

 ETU tu kasi voluali lumue okuti, ovitangi ale asakalalo vi pondola oku pongolola ekalo liomuenyo wetu vocipikipiki. Pole, tu pandula calua omo okuti, tu kuete ekuatiso lia Yehova Suku! Kocipama ca pita tua lilongisa okuti Yehova, o Suku yimue ukuamuenyo kuenda olonjanja viosi wa likapelako oku tu kuatisa. Eci tu tambula ekuatiso liaye, tu limbuka okuti, “Yehova o kasi lomuenyo!” (Tanga Osamo 18:46.) Soma Daviti noke lioku soneha olondaka evi wa tukula Yehova okuti, “Handa yange.” Oco hẽ, nda Daviti wa tukula Yehova okuti o kasi lomuenyo, momo lie eye o sokisila locina cimue ka ci kuete omuenyo okuti, ohanda?

2. Nye tu lilongisa vocipama cilo?

² Vocipama cilo, tu konomuisa esunga lieci Yehova a tukuiwila okuti, Handa kuenda ndomo esokiso liaco, li tu longisa catiamẽla kokuaye. Tu konomuisavo esunga lieci tu kolelela ku Yehova kuenda oku u tukula hati, Handa yetu. Oku sulako tu konomuisa ndomo tu setukula ovituwa via Yehova.

MOMO LIE YEHOVA A SOKISIWILA LOHANDA

3. Volonjila vipi Embimbiliya li tukula ondaka“Handa”? (Tala ociluvialuvia )

³ Embimbiliya li sokisa Yehova “lohanda” yimue oco ci tu kuatisa oku kũlĩha ovituwa viaye. Olonjanja vialua, eci afendeli va Yehova va eca esivayo omo liovituwa viaye vi komõhisa, ovo va situlula Yehova okuti, Handa. Onjanja yatete Embimbiliya li tukula Yehova okuti ‘Handa,’ kelivulu Liesinumuĩlo 32:4. Ana vohutililo yaye wa popia hati: “Ka kuli ewe lia lisoka la Suku yetu.” (1 Sam. 2:2) Havakuki wa tukula Yehova hati, ‘Ociteyuilo cange.’ (Hav. 1:12) Usonehi Wosamo 73 wa popia hati, Yehova o “teyuila utima wange, eye handa yange.” (Osa. 73, 26) Toke muẽle Yehova wa li sokisavo, lohanda. (Isa. 44:8) Cilo tu konomuisa ovituwa vitatu  via Yehova vi lekisa okuti, eye o sokisiwa lohanda kuenda tu lilongisavo ndomo tu tenda Yehova okuti,“Handa yetu.” —Esin. 32:31.

4. Lonjila yipi Yehova a sokisiwa locitililo? (Osamo 94:22)

⁴ Yehova ocitililo cetu. Vokuenda kuehunguhungu linene, tu pondola oku sanga eteyuilo veleva limue. Cimuamue haico okuti, eci tu lipita lovitangi vinene komuenyo wetu, tu pondolavo oku sanga eteyuilo ku Yehova. (Tanga Osamo 94:22.) Yehova o ka tu kuatisa oku teyuila ukamba tu kuete laye. Eye wa tu likuminya okuti lacimue ocitangi tu liyaka laco cilo, ci kamamako otembo ka yi pui. Handi vali, Yehova wa likuminya oku linga ovina via velapo. Kovaso yoloneke, eye o kamalako ovina viosi vi tu kokela esakalalo kuenda ohali.—Esek. 34:25, 26.

5. Yehova o pondola oku kala ndati ewe Liocitililo cetu?

⁵ Onjila yimue yoku sanga Ocitililo ku Yehova, poku likutilila kokuaye. Eci tu likutilila, Yehova o tu ĩha ‘ombembua yaye’ yina yi lava utima kuenda ovisimĩlo vietu. (Va Fil. 4:6, 7) Kũlĩhĩsa eci ca lipita la manji Artem okuti, wa kapiwile vokayike omo lioku teyuila ekolelo liaye. Onganji yimue yo pulisa olonjanja vialua, yo tata lavi kuenda oku u saluisa. Manji Artem wa popia hati: “Eci onganji ya enda oku mbilikiya nda kuataile esakalalo lialua. . . . Olonjanja viosi nda likutilila oku pinga ombembua yo vutima kuenda olondunge. Pole, ndaño lelambalalo liaco, nda kuata utima wa tula. Lekuatiso lia Yehova, ca kala ndu okuti ñasi oku teyuiwa locimbaka cimue.”

6. Momo lie tu kolelela ku Yehova olonjanja viosi? (Isaya 26:3, 4)

⁶ Yehova wa koleliwa. Ndeci ci pita lomunda yimue, ale ewe limue okuti ka vi pondola oku tunda pocitumãlo cayo, Yehova lalimue eteke a ka pongoloka kuenda wa likapelako oku tu kuatisa olonjanja viosi. Tu pondola oku kolela kokuaye momo eye “Handa ka pui.” (Tanga Isaya 26:3, 4.) Yehova o kamamako oku kala lomuenyo kuenda wa li kapelako oku tẽlisa olohuminyo viaye, oku yevelela olohutililo vietu kuenda oku tu ĩha ekuatiso liosi tu sukila. Tu pondolavo oku kolela ku Yehova momo eye ukuacili ku vana vo vumba. (2 Sam. 22:26) Eye lalimue eteke a ka ivalako ovina tuo lingila vonduko yaye kuenda olonjanja viosi o ka tu sumũlũisa omo liovina viaco.—Va Hev. 6:10; 11:6.

7. Nye ci pondola oku lipita letu nda tua kolela ku Yehova? (Talavo ociluvialuvia.)

⁷ Tu pondola oku tenda Yehova okuti, Ewe lietu nda tua kolela kokuaye. Tua kolela okuti eci tu pokola kokuaye ndaño tu lipita lovitangi, eye o tu kuatisa. (Isa. 48:17, 18) Olonjanja viosi tu limbuka ndomo Yehova a tu kuatisa, ekolelo lietu kokuaye li livokiya kuenda tu kolela okuti, eye lika o pondola oku tu kuatisa eci tu liyaka loloseteko vinene. Olonjanja viosi, eci tu liyaka locitangi cimue ka ca lelukile, tu pondola oku limbuka esilivilo lioku kolela ku Yehova. Eci oco ca lipita la manji umue o tukuiwa Vladimir, eye hati: “Otembo nda kala vokayike ca ñuatisa oku vokiya ukamba wange la Yehova. Nda lilongisa oku kolela vali calua ku Yehova, omo nda kala lika liange kuenda Yehova eye lika wa ponduile oku ndi kuatisa.”

8. (a) Momo lie tu popela hati Yehova ka pongoloka? (b) Momo lie tu popela okuti esumũlũho linene oku kuata Yehova nda Handa yetu? (Osamo 62:​6, 7)

 ⁸ Yehova ka pongoloka. Ndeci ci lipita lewe limue linene, ekalo lia Yehova kuenda ocipango caye lalimue eteke ci pongoloka. (Mal. 3:6) Eci Adama la Eva va sinĩla Yehova, eye ka pongoluile ocipango caye catiamẽla komanu. Upostolo Paulu wa popia hati Yehova “ka pondola oku li likala eye muẽle.” (2 Tim. 2:13) Eci ci lomboloka okuti, nda tu lipita locitangi cipi nda cipi, ale vakuetu va tu linga cimue cĩvi, Yehova lalimue eteke a ka pongolola onjila yaye yoku tetulula ovina, ocipango caye kuenda olonumbi viaye. Omo liaco, tu pondola oku kolela ku Suku yetu una ka pongoloka, loku kolela okuti, o ka tu kuatisa kapuluvi osi ka a lelukile kuenda oku tẽlisa olohuminyo viaye vio kovaso yoloneke.—Tanga Osamo 62:6, 7.

9. Nye wa lilongisa kulandu wa manji Tatyana?

⁹ Eci tu sokolola kovituwa viwa via Yehova kuenda kocipango caye catiamẽla kongongo lo komanu, ci tu kuatisa oku tula utima kuenda oku amamako oku kala vakuacili poku liyaka loloseteko. (Osa. 16:8) Eci oco ca lipita lamanji umue ukãi o tukuiwa Tatyana, una wa kapiwile vokayike omo lioku teyuila ekolelo liaye. Eye hati: “Nda liyeva ndu okuti nda kala likawange. Kefetikilo ca kala ndoseteko yimue. Nda yeva esumuo lialua.” Pole, noke eye wa fetika oku sokolola ku Yehova, kocipango caye catiamẽla komanu kuenda wa limbuka esunga lieci ca kuatela esilivilo oku pandikisa koloseteko a kala oku lipita lavio. Kuenje co kuatisa oku tula utima loku kuata ongusu yoku pandikisa. Eye wamisako hati: “Oku kuata elomboloko lieci ca kala oku lipita lame, ca ñuatisa oku ivaluka okuti nda kala vekalo liaco omo lioku kolela Yehova. Kuenje ca ñuatisa oku liwekapo oku li sokolola ame muẽle.”

10. Yehova o pondola oku kala ndati Handa yetu cilo?

¹⁰ Ndopo tu ka liyaka locitangi cimue ka ca lelukile kuenda tu ka sukila oku kolela calua ku Yehova, okuti kosimbu ci sule. Omo liaco, ci kuete esilivilo lialua cilo oku pamisa ekolelo lietu ku Yehova liokuti, eye o ka tu ĩha ekuatiso liosi tu sukila oco tuamamiko oku kolela kokuaye. Tu ci linga ndati? Tu ci linga poku tanga ovolandu afendeli va Yehova vo kosimbu a sangiwa Vembimbiliya kuenda ovolandu a vamanji vo koloneke vilo okuti, va kuatisiwa omo lioku kolela ku Yehova. Poku tanga ovolandu aco, sokolola ndomo Yehova a kuatisa afendeli vaye. Sanda otembo yoku sokolola kovolandu a-a. Nda wa ci linga, o ka limbuka okuti Yehova Handa yove.

SETUKULA OVITUWA VIA YEHOVA

11. Momo lie tu yonguila oku setukula ovituwa via Yehova? (Talavo okakasia losapi hati: “ Ovimãho Vamanji Akuenje va Sukila Oku Kuata.”)

¹¹ Toke cilo, tua kũlĩha ovituwa vimue via Yehova vi tu kuatisa oku limbuka esunga lieci eye a sokisiwila Lohanda. Kaliye tu konomuisa ndomo tu setukula ovituwa viaco. Nda tua likolisilako oku setukula Yehova, tu ka tẽla oku pamisa vamanjetu. Ndeci, Yesu wa luka Simono okuti Kefa, (ca lomboloka “Petulu”). Onduko yaco yi lomboloka okuti “Ohanda.” (Yoa. 1:42) Lonjila  eyi, wa lekisa okuti Petulu wa laikele oku lembeleka vamanji vekongelo kuenda oku pamisa ekolelo liavo. Akulu vekongelo va sokisiwa “ndulembo wesenje limue linene.” Eci ci lomboloka okuti akulu vekongelo va teyuila vamanji vekongelo. (Isa. 32:2) Akulu vekongelo havoko lika va sukila oku ci linga, vosi yetu tu pondolavo oku setukula ovituwa via Yehova kuenda oku pamisa vamanji.—Va Efe. 5:1.

12. Tu Kuatisa ndati vamanjetu kotembo yovitangi?

¹² Kuatisa vamanji kotembo yovitangi. Eci vamanjetu va lipita locilunga cimue, ale uyaki, tu sukila oku va kuatisa oku sanga ocitumãlo cimue. Ekalo lĩvi lio koloneke vilo “via sulako,” li ka livokiya calua kuenda etu tu ka sukila muẽle oku likuatisa pokati. (2 Tim. 3:1) Pole, ka tu sukila lika oku eca ekuatiso lio ketimba, tu sukilavo oku eca ku vamanjetu elembeleko kuenda ocisola va sukila. Onjila yimue yoku ci linga poku sapela lavo kolohongele Vonjango Yusoma kuenda oku va ĩha elembeleko va sukila. Tu yongola okuti, vekongelo mu kala ombembua muna, vamanjetu va pondola oku sanga elembeleko kuenda ocisola. Tu kasi voluali lumue okuti, omanu valua va siata oku li tata lekambo liocisola. Omo liaco, eci vamanjetu va enda kolohongele, tu yongola oku likolisilako oco ovo va liyeve okuti va soliwe, va kavuluisiwa kuenda va kolapo.

13. Akulu vekongelo va pondola oku kala ndati ocitililo ca vamanji? (Talavo ociluvialuvia.)

¹³ Akulu vekongelo va pondola oku kala ocitililo ca vamanji va kasi oku liyaka lovitangi viñi viñi. Eci ku pita ocilunga cimue, ale oku vela kuiya ocipikipiki, akulu vekongelo lonjanga yalua va linga esokiyo lioku kuatisa vamanji. Ovo va talavayavo Lembimbiliya oco va ece olonumbi kuenda elembeleko. Vamanji va ka lianja oku pinga ekuatiso kakulu vekongelo, nda ovo va kũlĩhĩwa okuti vawa, va sunguluka kuenda va likolisilako oku kuata elomboloko ndomo vamanji va liyevite. Ukulu wosi wekongelo o lekisa ovituwa viaco,  o vetiya vamanji oku liyeva okuti va soliwe. Lonjila eyi, ci ka leluka ku vamanji oku pokola kolonumbi via kunamẽla Vembimbiliya vi eciwa lakulu vekongelo.—1 Va Tes. 2:7, 8, 11.

14. Tu lekisa ndati okuti tumanu vamue va koleliwa?

¹⁴ Kala omunu umue wa koleliwa. Etu tu yongola okuti, vakuetu va kolela okuti tu pondola oku va kuatisa eci va liyaka lovitangi. (Olosap. 17:17) Pole, nye tu sukila oku linga oco vamanji va kũlĩhe okuti tumanu vamue va koleliwa? Tu sukila oku likolisilako oku setukula Yehova eteke leteke, ndeci poku tẽlisa eci tua likuminya kuenda oku kala omunu umue ukuakuyayulako. (Mat. 5:37) Tu sukilavo oku likolisilako oku kuatisa vana va sukila ekuatiso. Handi vali, tu sukilavo oku tẽlisa ocikele cetu vekongelo ndomo ci likuata lolonumbi tua tambula.

15. Akulu vekongelo va koleliwa va pondola oku kuatisa ndati ekongelo?

¹⁵ Akulu vekongelo okuti va koleliwa va kasi ndombanjaile yimue vekongelo. Ndamupi? Eci vamanji va kũlĩha okuti va pondola oku vilikiya akulu vekongelo olonjanja viosi eci va sukila ekuatiso, ovo va tula utima. Vamanji va pondolavo  oku liyeva okuti va soliwe, poku kũlĩha okuti akulu vekongelo va likapelako oku eca ekuatiso kokuavo. Vamanji va ka kolelavo calua kakulu vekongelo, eci va limbuka okuti ovo va talavaya Lembimbiliya kuenda lalivulu etu poku va ĩha olonumbi okuti, ka va kuama ovisimĩlo viavo muẽle. Handi vali, vamanji va ka kolelavo kakulu vekongelo nda ovo ka va sandeka ovina manji umue a va sapuila kuenda va tẽlisa eci va likuminya.

16. Momo lie olonjanja viosi tu sukilila oku kuama olonumbi via Yehova?

¹⁶ Olonjanja viosi kuama olonumbi via Yehova. Nda okuti tu pokola ku Yehova kovina viosi kuenda tu nõla olonjila vina via kunamẽla Vembimbiliya, tu ka kala ongangu yiwa ku vamanji. Eci tu tanga Embimbiliya loku pamisa ekolelo lietu ku Yehova, tu ka kakatela kokuaye kuenda kolonumbi viaye. Ka tu yapuisiwa lalongiso esanda kuenda lovisimĩlo vina vi pisiwa la Yehova okuti, ka vi sangiwa Vembimbiliya. (Va Efe. 4:14; Tia. 1:6-8) Eci tu tambula esapulo limue lĩvi tu tula utima momo tua kolela kolohuminyo via Yehova. (Osa. 112:7, 8) Tu ka tẽlavo oku kuatisa vana va liyaka lovitangi kuenda loloseteko.—1 Va Tes. 3:2, 3.

17. Akulu vekongelo va kuatisa ndati vamanji oku amamako lekolelo lia pama?

¹⁷ Akulu vekongelo va sukila oku likandangiya kovituwa, oku kala vakualondunge, vakuotate kuenda vakuesunguluko. Ovo va kuatisa vakuavo vekongelo oku tula utima kuenda oku kuata ekolelo lia pama. Handi vali, va pamisavo ekongelo poku “kakatela kondaka yocili.” (Tito 1:9; 1 Tim. 3:1-3) Akulu vekongelo, omo liongangu yavo, kuenda pocakati capasu avo, va kuatisa akundi vekongelo oku kuata ombili yoku enda enda kolohongele, kupange woku kunda kuenda oku linga elilongiso lio pokolika. Eci vamanji va lipita lovitangi kuenda va kuata esakalalo, akulu vekongelo va va ivaluisa esilivilo lioku kolela ku Yehova kuenda oku tiamisila utima kolohuminyo viaye.

18. Momo lie tu yonguila oku amamako oku sivaya Yehova loku kuata ukamba wa pama laye? (Talavo okakasia losapi hati “ Ndomo tu Pamisa Ukamba Wetu la Yehova.”)

¹⁸ Noke lioku lilongisa ovituwa via Yehova, tu pondola oku popia ndeci soma Daviti a soneha hati: “Yehova Handa yange, a sivayiwe.” (Osa. 144:1) Otembo yosi, tu kamamako oku kolela ku Yehova komuenyo wetu. Ndaño ceci tu kuka, tua kolela okuti Yehova o kamamako oku tu kuatisa oku kuata ukamba laye. Omo liaco, tu pondola oku popia hati Yehova “eye Handa yange.”—Osa. 92:14, 15.