OCIPAMA CELILONGISO 28
OCISUNGO 123 Tu Pokoli ku Yehova Kuenda Kocisoko Caye
Anga hẽ o Tẽla Oku Tepisa Pokati Kocili Luhembi?
“Talami ngõ, itiki ocili volombunda viene nduvia.”—VA EFE. 6:14.
OCIMÃHO CELILONGISO
Tu lilongisa ndomo tu limbuka etepiso li kasi pokati kocili tua lilongisa ku Yehova kuenda ovohembi a Satana lovanyãli vetu.
1. O liyevite ndati omo lioku kũlĩha ocili?
ETU tuafendeli va Yehova, tu sole calua ocili ci sangiwa Vembimbiliya. Ekolelo lietu lia kunamẽla kokualio. (Va Rom. 10:17) Tua kolela okuti, Yehova wa sokiya ekongelo Liakristão ‘ndongunji kuenda eteyuilo liocili.’ (1 Tim. 3:15) Tu sanjukila calua oku kuatisa vana “va songola” pokati ketu, momo va lombolola ocili Cembimbiliya kuenda va tu kuatisa oku linga ocipango ca Suku.—Va Hev. 13:17.
2. Ndomo ca tangiwa ku Tiago 5:19, nye pamue ci pondola oku pita letu noke lioku lilongisa ocili?
2 Noke lioku kũlĩha ocili kuenda oku tava okuti tu sukila oku kuama olonumbi viocisoko ca Yehova, pamue tu pondola oku kala kohele yoku yapuisiwa. (Tanga Tiago 5:19.) Satana o sanjuka calua nda tu liwekapo oku kolela Kembimbiliya kuenda kocisoko ca Yehova.—Va Efe. 4:14.
3. Momo lie tu sukilila oku kakatela kocili? (Va Efeso 6:13, 14)
3 Tanga Va Efeso 6:13, 14. Ndopo muẽle, Satana o ka sandeka ovohembi kuenda oku vetiya olofeka, oco va ñualilepo afendeli va Yehova. (Esit. 16:13, 14) Tua kũlĩhavo okuti Satana o ka linga alikolisilo alua oco a yapuise afendeli va Yehova. (Esit. 12:9) Omo liaco, ci kuete esilivilo lialua etu oku lipindisa cilo, oco tu tẽle oku tepisa pokati kocili luhembi kuenda oku amamako oku pokola kocili. (Va Rom. 6:17; 1 Pet. 1:22) Momo ovina viaco vi ka tu teyuila kohali ya piãla!
4. Nye tu konomuisa vocipama cilo?
4 Vocipama cilo, tu konomuisa ovituwa vivali tu sukila oku kuata, nda tu yongola oku kũlĩha ocili Cembimbiliya kuenda oku tava kolonumbi viocisoko ca Yehova. Noke tu konomuisa ovina vitatu tu sukila oku linga nda tu yongola oku amamako oku kakatela kocili.
OVITUWA TU SUKILA OKU KUATA NDA TU YONGOLA OKU KŨLĨHA OCILI
5. Oku sumbila Yehova ci ka tu kuatisa ndati oku kũlĩha ocili?
5 Oku sumbila Yehova. Oku sumbila Yehova ci lomboloka okuti, tu u sole calua kuenda ka tu yongola oku linga cimue cu sumuisa. Omo liaco, tu yongola oku kũlĩha ciwa etepiso li kasi pokati keci ciwa leci cĩvi, ocili, luhembi, oco tu taviwe la Yehova. (Olosap. 2:3-6; Va Hev. 5:14) Omo okuti ovina vi sanjuisa omanu olonjanja vimue ka vi sanjuisa Yehova, etu lalimue eteke ka tu ka eceleli okuti usumba tu kuetele omanu, u velapo ocisola tu kuetele Yehova.
6. Oku kuatela usumba omunu ca kokela ndati alume ekũi oku pengisa ocili?
6 Nda okuti usumba tu kuetele omunu wa velapo esumbilo tu kuetele Yehova, tu pondola oku yapuka vocili. Kũlĩhĩsa ulandu walume 12 va Isareli, vana va endele oku ka kũlĩhĩsa ofeka Yehova a likuminyile oku eca ku va Isareli. Ci soka ekũi pokati kavo, va ecelela okuti usumba va kuatela va Kanana u velapo okuti ocisola va kuatelele Yehova ci sule. Ovo va sapuila ku va Isareli vosi vati: “Ka tu tẽla oku liyaka lomanu vaco, momo ovo va pama calua okuti, etu tu sule.” (Ate. 13:27-31) Ocili okuti, kovisimĩlo viomanu, va Kanana va pamele calua okuti va Isareli ci sule. Pole, oku popia okuti va Isareli nda ka va tẽlele oku yula ovanyãli vavo, ca kala ndoku pembula Yehova. Alume vaco ekũi, va sukilile oku tiamisila utima kueci Yehova a yonguile okuti va Isareli va ci linga. Ovo va sukililevo oku sokolola kovina Yehova a va lingilile ale. Lonjila eyi, ovo nda va ivaluka okuti va Kanana ka va velelepo oku ci sokisa la Yehova ukuonene wosi. Pole, Yehosua la Kalembe, va yonguile oku taviwa la Yehova. Ovo va sapuila omanu vati: “Nda Yehova wa tu sanjukila, o ka tu tuala muẽle vofeka yaco.”—Ate. 14:6-9.
7. Tu pamisa ndati esumbilo tu kuetele Yehova? (Talavo ociluvialuvia.)
7 Oco tu pamise esumbilo tu kuetele Yehova, olonjanja viosi tu nõla onjila yimue, tu sukila oku sokolola kovina vi sanjuisa Yehova. (Osa. 16:8) Kuenje poku tanga ulandu umue Wembimbiliya lipula ndoco: ‘Nda ocina eci ca lipitile lame, nda onjila yipi nda nõla?’ Ndeci, sokolola okuti alume ekũi va va Isareli, va kasi oku pitiya ulandu ka wa sungulukile. Ove hẽ nda wa tava kokuavo loku kuatela usumba omunu, ale nda wa velisapo ocisola o kuetele Yehova? Va Isareli ka va tavele okuti Yehosua la Kalembe va kala oku vangula muẽle ocili. Omo liaco, va pumba epuluvi lioku iñila Vofeka Yohuminyo.—Ate. 14:10, 22, 23.
Kulie ove nda wa tava? (Tala ocinimbu 7)
8. Ocituwa cipi tu sukila oku likolisilako oku kuata kuenda momo lie?
8 Umbombe. Yehova o situluila lika ocili kambombe. (Mat. 11:25) Kuenje etu lumbombe, tu tava kekuatiso lioku lilongisa ocili. (Ovil. 8:30, 31) Pole, tu sukila oku kuata utate oco ka tu ka kale vakuepela. Momo nda tua linga vakuepela, tu fetika oku sima okuti ovisimĩlo vietu via velapo vali okuti, olonumbi Viembimbiliya kuenda Viocisoko ca Yehova vi sule.
9. Tu amamako ndati oku kala ambombe?
9 Nda tu yongola oku amamako oku kala ambombe, tu sukila oku ivaluka okuti etu tu sule, oku ci sokisa la Yehova. (Osa. 8:3, 4) Tu sukilavo oku likutilila ku Yehova oku pinga oco tu kale ambombe, loku tava oku longisiwa laye. Yehova o tu longisa ovisimĩlo viaye pocakati Cembimbiliya kuenda ocisoko caye. Eye o tu kuatisavo oku velisapo elongiso liaco okuti ovisimĩlo vietu muẽle ci sule. Omo liaco, poku tanga Embimbiliya seteka oku limbuka ndomo Yehova a sole ocituwa cumbombe kuenda ndomo a suvuka epela, loku litunula. Likolisilako oku amamako oku lekisa umbembe eci o tambula ocikele cimue ci pondola oku ku kokela oku kuata unene umue kuenda oluhimo.
NDOMO TU KAKATELA KOCILI
10. Velie Yehova a nõlele oco va songuile loku eca olonumbi kafendeli vaye?
10 Kolela kocisoko ca Yehova. Kosimbu, Yehova wa nõlele Mose, noke Yehosua, oco va ece olonumbi ku va Isareli. (Yeh. 1:16, 17) Va Isareli va enda oku sumũlũisiwa eci ovo va tendaile alume vaco ndolonumiwa via Yehova. Noke lioku pita anyamo alua, eci ekongelo Liakristão lia sokiyiwa, ci soka 12 kovapastolo ovo va kala oku songuila afendeli va Suku. (Ovil. 8:14, 15) Ocimunga caco noke ca livokiya kuenda mua kongelele akulu vo ko Yerusalãi. Poku kapako olonumbi via enda oku eciwa lalume vaco vakuekolelo “akongelo vamamako oku pamisiwa vekolelo loku livokiya eteke leteke.” (Ovil. 16:4, 5) Koloneke vilo, eci tu kuamavo olonumbi viocisoko ca Yehova, tu sumũlũisiwa calua. Yehova o liyeva ndati nda okuti ka tu tava kolonumbi vi eciwa la vana eye a nõla oco va tu songuile? Tu pondola oku tambulula epulilo eli poku konomuisa eci ca pita la va Isareli, osimbu va kala oku enda Kofeka Yohuminyo.
11. Nye ca pita la va Isareli vana va sepula oku nõliwa kua Mose oco a va songuile? (Talavo ociluvialuvia.)
11 Onjanja yimue eci va Isareli va kala oku loña Kofeka Yohuminyo, alume vana va kuatele ovikele, va katukila Mose loku sepula ocikele Yehova a ecele kokuaye. Ovo va popia vati: “Ekongelo liosi [okuti Mose hayeko lika] li kola, vosi yavo muẽle kuenda Yehova o kasi pokati kavo.” (Ate. 16:1-3) Ndaño okuti ku Yehova ‘ekongelo liosi lia kolele,’ pole, eye wa nõlele Mose oco a va songuile. (Ate. 16:28) Omanu vaco poku pisa Mose, va kala oku pisa Yehova. Ovo ka va tiamisilile utima kovina Yehova a yonguile; pole, va tiamisilile utima kolonjongole viavo muẽle okuti, oku kuata unene kuenda oluhimo. Yehova wa kundula omanu vaco, kumue lowiñi wa likongela kesino liavo. (Ate. 16:30-35, 41, 49) Cimuamue haco koloneke vilo, tua kũlĩha okuti Yehova ka sanjukila omanu vana ka va pokola kolonumbi viocisoko caye.
Helie ove nda wa kuatisa? (Tala ocinimbu 11)
12. Momo lie tu sukilila oku kolela kocisoko ca Yehova?
12 Olonjanja viosi tu pondola oku kolela kocisoko ca Yehova. Eci ku limbukiwa okuti ci sukila oku linga epongoloko limue kocili cimue Cembimbiliya, ale konjila ndomo tu vumba Yehova, vana va songola, lonjanga yalua va linga apongoloko aco. (Olosap. 4:18) Ovo va ci linga, momo va yongola oku sanjuisa Yehova. Handi vali ovo va likolisilako oku kunamisila olonjila via nõliwa Kondaka ya Suku. Kuenje eci oco afendeli vosi va Yehova va sukila oku linga.
13. “Olondaka viocili” vi lomboloka nye kuenda nye tu sukila oku linga?
13 “Kakatela kongangu yolondaka viocili.” (2 Tim. 1:13) “Olondaka viocili” vi tiamisiwila kalongiso Akristão, a sangiwa Vembimbiliya. (Yoa. 17:17) Alongiso aco, o-o ono yovina viosi tu tava. Ocisoko ca Yehova ci tu longisa oku kakatela kalongiso aco. Nda tua ci linga tu ka sumũlũisiwa.
14. Akristão vamue kosimbu va siapo ndati oku kuama “olondaka viocili”?
14 Nye ci pondola oku pita letu nda tua siapo “olondaka viocili?” Kũlĩhĩsa ulandu umue. Kocita catete Akristão vamue va kala oku sandeka asapulo uhembi okuti, eteke lia Yehova lia pitĩlile ale. Ci tava okuti ovo va tambuile ukanda umue wa molehele ndu okuti, wa sonehiwile lupostolo Paulu okuti wa popele eci catiamẽla kondaka yaco. Pole, ovo ka va konomuisile vali ovovangi aco. Noke Akristão vamue ko Tesalonike va tava kesapulo liaco kuenda va fetika oku ci sandeka komanu vakuavo. Nda ovo va ivalukile ovina Paulu a va longisile, nda ka va yapuisiwile. (2 Va Tes. 2:1-5) Paulu wa sapulile vamanji vaco oco ka va ka tave kovina viosi va yeva okuti o va kuatisa kovina via laikele oku iya kovaso yoloneke. Paulu wa malusula ukanda waye wavali ku va Tesalonike poku popia hati: “Ame ndi Paulu ndi tuma ovilamo nda soneha leka liange muẽle okuti, ovio ondimbukiso kovikanda viosi; eyi oyo onjila ndomo ndi soneha.”—2 Va Tes. 3:17.
15. Tu li teyuila ndati kovohembi ana a molẽha ndu okuti ocili? Tukula ulandu umue. (Talavo oviluvialuvia.)
15 Nye tu lilongisila kolondaka Paulu a sapuila va Tesalonike? Eci tu yeva ocina cimue okuti ka ci likuata lovina tua lilongisa Vembimbiliya ale ceci tu yeva ulandu umue u sumuisa, tu sukila oku lekisa olondunge. Onjanja yimue ko União Suvietika yosimbu, ovanyãli vetu va eca ukanda umue ku vamanji. Ukanda waco wa molẽhele ndu okuti wa tunda Kombala Yolombangi Via Yehova. Owo wa vetiyile vamanji vamue oco va sokiye ocisoko cimue ci likasilili. Ukanda waco wa molẽhele ndu okuti wocili, pole, vamanji vana va kala vakuacili ka va yapuisiwile. Ovo va limbuka okuti esapulo li sangiwa vukanda waco, ka li li kuata lovina va lilongisa. Cimuamue haico okuti koloneke vilo, vana va suvuka ocili olonjanja vimue va talavaya lo Internet ale lovingungu viasapulo oco va seteke oku tu kokela atatahãi ale oku tu tepa. Oco ‘ovitima vietu ka vi ka tatamisue lonjanga,’ tu sukila oku sokolola lutate nda ovina tua yeva ale tua tanga, vi likuata locili tua lilongisa ale.—2 Va Tes. 2:2; 1 Yoa. 4:1.
Ku ka yapuisiwe lovohembi a molẽha ndu okuti ocili (Tala ocinimbu 15) a
16. Ndomo ca lekisiwa ku Va Roma 16:17, 18, nye tu sukila oku linga nda umue o yanduluka ocili?
16 Amamako oku likuata omunga la vana okuti vakuacili ku Yehova. Yehova o yongola okuti, tu u fendela kumosi la vamanji, pole, tu ka ci tẽlisa lika nda tua kakatela kocili. Omunu wosi o sandeka asapulo a pisiwa locili ci sangiwa Vembimbiliya, o koka olonepele vekongelo. Eli olio esunga lieci Yehova a tu lunguila oco tu ‘yuvule’ omanu vaco. Momo nda ka tua ci lingile tu fetika oku tava kovina viuhembi kuenje tu yanduluka Yehova.—Tanga Va Roma 16:17, 18.
17. Asumũlũho api tu kuete omo lioku kũlĩha ocili loku kakatela kokualio?
17 Eci tu kũlĩha ocili loku kakatela kokualio, tu ka tẽla oku kuata ukamba wocili la Yehova kuenda oku amamako lekolelo lia pama. (Va Efe. 4:15, 16) Handi vali, ka tu ka yapuisiwa lalongiso esanda a Satana kuenda tu kamamako oku kolapo poku tatiwa la Yehova vokuenda kuohali ya piãla. Omo liaco, kakatela kocili, ‘kuenje Suku yombembua o ka kala love.’—Va Fil. 4:8, 9.
OCISUNGO 122 Kali Vakuepandi, Loku Pama!
a OLONDAKA VIOCILUVIALUVIA: Ocindekaise cimue ca vamanji ko União Suvietika yosimbu, eci va tambula ukanda umue wa molehẽle ndu okuti wa tunda Kombala Yolombangi Via Yehova, pole, wa tunda kovanyãli vetu. Koloneke vilo, ovanyãli vetu va pondola oku talavaya lo Internet oco va sandeke uhembi watiamẽla kocisoko ca Yehova.
