1, 2. Ukanda wa Va Roma 5:12 u pondola oku tu kuatisa ndati?

UKANDA wa Va Roma 5:12 u lekisa okuti: “Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu.” Eci cimue pokati kovinimbu tua kũlĩha ciwa kuenda tua siata oku tukula ocinimbu caco olonjanja vialua poku longisa Embimbiliya komanu.

² Ocinimbu caco ca tukuiwa olonjanja vialua velivulu Embimbiliya li Longisa Nye? kuenda velivulu Embimbiliya li Pondola Oku tu Longisa Nye? Eci tu lilongisa ocipama 3,, 5, kuenda 6 lomãla vetu kuenda omanu vakuavo, tu sanjukila oku tanga ukanda wa Va Roma 5:12. Citava okuti tu tanga ocinimbu eci, oco tu kuatise omanu oku kuata elomboloko liesunga lieci ongongo ka yi kasilili ofeka yelau, esunga lieci tu sukilila ocisembi kuenda esunga lieci tu fila. Ocinimbu caco ci pondola oku tu kuatisa oku eca olopandu omo liukamba tu kuete la Yehova. Ci pondolavo oku tu kuatisa oku amamako oku u sanjuisa loku lavoka ovina a likuminya kokuetu.

3. Nye tu sukila oku ivaluka catiamẽla kekalo lietu?

 ³ Ocili okuti, vosi yetu tua piñala ekandu. Tua siata oku lueya oloneke viosi. Pole, Yehova ukuahenda. Eye wa kũlĩha okuti ka tua lipuile kuenda eye okuete onjongole yoku tu ecela. (Osamo 103:13, 14) Yesu wa popia hati, tu sukila oku pinga ongecelo yakandu etu ku Suku. (Luka 11:2-4) Eci Yehova a ecela akulueya etu tua linga kosimbu, ka tu sukila oku a sokolola vali. Tu konomuisi ndomo Yehova a pondola oku tu ecela.

4, 5. (a) Nye ci tu kuatisa oku kuata elomboloko liukanda wa Va Roma 5:12? (b) Nye ci lomboloka “ohenda ya piãla”?

⁴ Ukanda wa Va Roma kocipama 6, u tu kuatisa oku kuata elomboloko ndomo Yehova a pondola oku ecela akandu etu. Kocipama 3, tua lilongisa okuti: “Vosi va linga ekandu.” Noke Paulu wa lombolola okuti: “Locali va tendiwa ndavakuesunga omo liohenda ya piãla poku yovuiwa locisembi ca eciwa la Kristu Yesu.” (Va Roma 3:23, 24) Ondaka yo Helasi yokuti ‘ohenda ya piãla’ yi lomboloka oku linga ocina cimue ciwa komunu umue kuenda ka tu lavoka okuti omunu waco o tu lingilavo ovina vikuavo.

⁵ Onoño yimue ya lombolola okuti, ondaka yaco kelimi lio Helasi olonjanja vialua yi tiamisiwila kueci Suku la Kristu va linga, oco va yovole omanu kekandu kuenda kolofa. O Tradução do Novo Mundo kelimi Liongelesi, ya pongolola ondaka yaco yo Helasi okuti, “ohenda ya piãla.” Tu konomuisi ovina Suku a tu lingila kuenda ndomo ohenda yaye ya piãla yi pondola oku tu kuatisa cilo kuenda oku tu ĩha elavoko kovaso yoloneke.

6. Helie o pondola oku kuatisiwa lohenda ya piãla ya Suku, kuenda ci lingiwa ndati?

⁶ Omo okuti Adama wa linga ekandu, ekandu kuenda olofa via sambukila omanu vosi. Eli olio esunga lieci Embimbiliya li lekisa okuti, “omo liekandu liomunu umosi oku fa kua viala ndosoma.” Pole, Yehova wa lekisa ohenda yaye ya piãla kuenda wa linga eliangiliyo limue oco a yovole omanu lekuatiso “liomunu umosi, okuti Yesu Kristu.” (Va Roma 5:12, 15, 17) “Omo liepokolo liomunu umosi valua va tendiwa ndavakuesunga.” Kuenda va pondola oku kuata elavoko ‘liomuenyo ko pui mekonda lia Yesu Kristu.’—Va Roma 5:19, 21.

7. Momo lie ombanjaile ya Suku yocisembi yi lekisila ohenda ya piãla?

⁷ Ivaluka okuti, Yehova ka sukilile oku eca omõlaye ndocisembi. Pole, wa lekisa ohenda yalua poku sokiya onjila yoku tu yovola kekandu kuenda kolofa. Lomue pokati ketu o sesamẽla ovina Suku kuenda Yesu va tu lingila. Tu eca olopandu  kokuavo omo okuti, va tu lingila ovina vi tu ecelela oku tambula ongecelo yakulueya etu kuenda oku kuata elavoko lioku kala otembo ka yi pui! Omo okuti, Suku wa tu lingila ovina viaco, tu sukilavo oku ambata omuenyo wetu lonjila yimue yi lekisa olopandu kokuaye.

8. Ocituwa cipi tu sukila oku yuvula?

⁸ Tua kũlĩha okuti, Suku o yongola oku ecela akandu etu, ndaño akandu anene. Pole, tu sukila oku yuvula oku linga ekandu ocipango loku sima okuti, ‘Yehova o ka ndi ecela’ omo liohenda yaye ya piãla. Kocita catete, eci handi ovapostolo vamue va kala komuenyo, kua kala Akristão vamue va kuatele ocituwa caco. (Tanga Yuda 4.) Koloneke vilo, tu sukila oku kuata utate oco ka tu ka yapuisiwe lomanu vakuavo, poku kuata ovisimĩlo ndevi viavo.

9, 10. Paulu lomanu vakuavo va yovuiwa ndati kekandu kuenda kolofa?

⁹ Paulu wa sapuila Akristão okuti ka ca sungulukile oku kuata ovisimĩlo viokuti omanu va pondola oku amamako oku linga ekandu loku sima okuti Suku o ka va ecela. Paulu wa lekisa okuti va sukilile oku yuvula ovisimĩlo ka via sungulukile momo va “fila ale vekandu.” (Tanga Va Roma 6:1, 2.) Nye a yonguile oku popia?

¹⁰ Lekuatiso liocisembi, Suku wa ecela akandu a Paulu kuenda Akristão vakuavo vo kocita catete. Yehova wa va waveka lespiritu sandu oco va kale omãla vaye. Ovo va sukilile oku amamako lekolelo oco va viale la Kristu kilu. Omo okuti handi, va kala komuenyo palo posi, va ‘fila ndati vekandu’? Paulu wa linga esokiso liaco oco a lekise okuti, ekalo liomuenyo waye wa laikele oku pita vapongoloko. Eye wa popia hati, noke liolofa via Yesu, Yesu wa pinduiwa letimba liespiritu okuti ka fi vali. Eli olio esunga lieci okuti, “oku fa ka ku u viala vali.” Ovina viaco via kala ocindekaise cokuti, Akristão va fa vo. Omuenyo wavo wa pongoloka momo ka va ecelele okuti va yuliwa loloñeyi viavo vĩvi. Omo liaco, tunde kotembo yaco, ovo va siata oku likolisilako oku ambata omuenyo umue u sanjuisa Suku. Ovo va file ‘vekandu, puãi va kasi lomuenyo oco va linge ocipango ca Suku vu Kristu Yesu.’—Va Roma 6:9, 11.

11. Akristão koloneke vilo ‘va fila ndati vekandu’?

¹¹ Nye ci popiwa kokuetu? Tua fila ndati “vekandu”? Citava okuti, kosimbu tua lingale ovina vialua vĩvi momo ka tua kũlĩhĩle ndomo Yehova a tenda ovina viaco. Tua kala “ndapika vevĩho kuenda etombo,” okuti “apika vekandu.” (Va Roma 6:19, 20) Pole, eci tua lilongisa Embimbiliya tua limbuka ekalo liomuenyo Suku a tu yonguila, kuenje tua linga apongoloko komuenyo wetu, tua litumbika kokuaye kuenda tua papatisiwa. Tua kuata onjongole yoku pokola ku Yehova kuenda oku ambata omuenyo umue u pondola oku u sanjuisa. Tua ‘yovuiwa kekandu’ kuenda tua ‘linga apika vesunga.’—Va Roma 6:17, 18.

12. Onjila yipi omunu lomunu pokati ketu a sukila oku nõla?

¹² Tu kuete elianjo lioku nõla ovina tu yongola. Paulu wa popia hati: “Ko ka eceleli okuti ekandu li amamako oku viala ndosoma vatimba  ene a fa fa, okuti vu pokola koloñeyi viao.” (Va Roma 6:12) Tu pondola oku nõla oku linga ovina ka via sungulukile ale oku vi yuvula. Omo liaco, li pula ndoco: ‘Nda siata hẽ oku ecelela okuti oloñeyi ka via sungulukile via amamako oku kula toke eci ndi linga ekandu? Ale nda siata oku vi yuvula lonjanga?’ Nda tua sanjukila ohenda ya piãla ya Suku, tu ka likolisilako oku linga ovina vi pondola oku u sanjuisa.

13. Momo lie tua kolelela okuti tu pondola oku linga eci ca sunguluka?

¹³ Kocita catete, omanu vamue kolupale luo Korindo va kala ovimunu, alume vakuakulala lalume, vakuakulinga ukahokolo, vakuaviteka kuenda oloholua, kuenje eci va lilongisa ocili catiamẽla ku Yehova loku kapako olonumbi viaye va linga apongoloko. Ovo va kuata osõi omo liovina va enda oku linga. (Va Roma 6:21; 1 Va Korindo 6:9-11) Akristão ko Roma va sukililevo oku linga apongoloko aco. Paulu wa va sapuila hati: “Ko ka eci atimba ene kekandu ndovimalẽho vievĩho, pole lieci ku Suku nda vana va file okuti cilo va kasi lomuenyo kuenda ecivo atimba ene ndovimalẽho viesunga.” (Va Roma 6:13) Paulu wa kũlĩhĩle okuti, ovo va ponduile oku linga ovina via sunguluka kuenda oku amamako oku kuatisiwa lohenda ya pĩala ya Suku.

14, 15. Nye tu sukila oku lipula etu muẽle?

¹⁴ Cimuamue haico koloneke vilo. Vamue pokati ka vamanjetu va ambatele ekalo liomuenyo ndowu womanu vana vo ko Korindo. Pole, noke lioku kũlĩha Yehova, va linga apongoloko. Ca kala ndu okuti ‘va sukuiwa.’ Oco tu sanjuise Yehova, vosi yetu tua linga apongoloko komuenyo. Omo liaco, tu sukila oku lekisa olopandu omo liohenda ya piãla ya Suku. Tua nõlapo oku yuvula oloñeyi ka via sungulukile kuenda oku fendela Yehova lutima wosi.

¹⁵ Ocili okuti, tu sukila oku yuvula oku linga akandu anene ndeci omanu vamue vo ko Korindo va linga. Ka tu pondola oku amamako oku linga ovina viaco loku lavoka okuti Suku o lekisa ohenda yaye ya piãla oco a tu ecele. Pole, nye ci popiwa catiamẽla kakandu ana okuti omanu va a tenda okuti a sule? Anga hẽ tua siata oku likolisila oco tu pokole ku Yehova kovina viosi tu linga?—Va Roma 6:14, 17.

16. Tua kũlĩha ndati okuti tu sukila oku yuvula akandu ana okuti ka a sangiwa vukanda wa 1 Va Korindo 6:9-11?

¹⁶ Ivaluka ulandu wupostolo Paulu. Eye wa soneha ndoco: “Nda tiamẽla ketimba lia landisiwa kekandu. Sia kũlĩhĩle eci ñasi oku linga. Momo eci njongola oku linga si ci lingi, pole, eci nda suvuka oco ndinga.” (Va Roma 7:14, 15) Ndaño okuti, eye ka lingaile ovina via tukuiwa kukanda wa 1 Va Korindo 6:9-11, pole, Paulu wa limbukile okuti wa enda oku lueya. Eye wa yonguile oku sanjuisa utima wa Yehova poku  likolisilako oku yuvula oku linga ovina ka via sungulukile. (Tanga Va Roma 7:21-23.) Tu sukila oku kuama ongangu yaye kuenda oku likolisilako oco tu pokole ku Yehova.

17. Momo lie o sukilila oku kala ukuacili?

¹⁷ Tua kũlĩha okuti, oco tu fendele Yehova tu sukila oku kala vakuacili. (Tanga Olosapo 14:5; Va Efeso 4:25.) Ka tu yongola oku kala nda Satana, okuti “isia yuhembi.” Tua kũlĩha okuti, Ananiya kumue lukãi waye va fa omo lioku kemba. Eli olio esunga lieci tu yuvuila oku kemba. (Yoano 8:44; Ovilinga 5:1-11) Pole, voku kala ukuacili ka mua kongelele lika oku yuvula oku kemba. Nda tua lekisa olopandu kohenda ya piãla ya Suku tu ka kala vakuacili kovina viosi.

18, 19. Oku kala ukuacili ci lomboloka nye?

¹⁸ Omunu umue o pondola oku lekisa okuti ukuaciliko ndaño okuti ka kembele. Yehova wa sapuila va Isareli hati: “Ko ka ivi; ko ka liañi; ko ka likembi pokati kene.” Momo lie va sukilile oku ci linga? Momo Yehova wa popia hati: “Ene u koli momo ame ndi Yehova Suku yene ñola.” (Ovisila 19:2, 11) Ndaño okuti, ka tu popi ovina viuhembi, nda tu vetiya omanu oku tava  kovina vimue viokuti haviociliko ka tu kasi oku lekisa okuti tuakuacili.

¹⁹ Ulume umue wa pinga ku cime caye okuti, o sukila oku tunda selo kupange momo wa laikele oku li sanga la ndotolo. Pole, ka ca sukilile oku tunda selo ku pange. Eye wa yonguile oku puyuka. Momo ka tumãlele calua kosipitali yaco, pole wa sukilile lika oku feta ondando yimue ku ndotolo yaco. Anga hẽ eye wa lekisa okuti ukuacili ale wa kemba omanu vakuavo? Ulume waco wa vetiya omanu vakuavo oku tava kuhembi waco. Olonjanja vimue, omanu vamue va siata oku kemba vakuavo oco va kuate ovina va yongola ale oku yuvula oku kangisiwa. Pole, tu pokola ku Yehova wa popia hati: “Ko ka likembi.” Tu yongola oku linga ovina eye a popia okuti viwa kuenda vi kola.—Va Roma 6:19.

20, 21. Nda tua sanjukila ohenda ya piãla ya Suku nye vali tu sukila oku yuvula?

²⁰ Ocili okuti, tua siata oku yuvula ukahokolo, uholua, kuenda akandu akuavo anene. Handi vali, tu yongola oku yuvula oku linga ovina viosi vi sumuisa Yehova. Ka tu yongola oku yuvula lika evĩho liukahonga pole, tu sukilavo oku yuvula olomapalo ka via sungulukile. Tu sukilavo oku yuvula oku nyua calua ovina vi koluisa. Omo liaco, tu likolisilako oku yuvula ayonjo aco.

²¹ Tu sukila oku likolisilako oku kapako olondaka Paulu a popia viokuti: “Ko ka eceleli okuti ekandu li amamako oku viala ndosoma vatimba ene a fa fa, okuti vu pokola koloñeyi viao.” (Va Roma 6:12; 7:18-20) Ocili okuti, tu pondola oku yula akandu osi. Pole, eci tu tamalãla kovina viosi ka via sungulukile, tu lekisa okuti tua sanjukila ohenda ya piãla ya Suku kuenda ovina Kristu a tu lingila.

22. Onima yipi tu lavoka kovaso yoloneke nda tua sanjukila ohenda ya piãla ya Suku?

²² Yehova wa siata oku ecela akandu etu kuenda o pondola oku amamako oku tu ecela. Tu eca olopandu omo liohenda yaye ya piãla! Tu sukila oku likolisilako oku yuvula ovina viosi eye a popia okuti, ka via sungulukile ndaño okuti omanu vakuavo va tenda ovina viaco ndu okuti via sunguluka. Onima yipi tu lavoka nda tua ci linga? Paulu wa popia hati: “Omo okuti cilo wa yovuiwi kekandu kuenje wa lingi apika va Suku, vu kasi oku ima apako a kola, okuti onima yaco, omuenyo ko pui.”​—Va Roma 6:22.