Apulilo Valingiwa Lavakuakutanga

Anga hẽ oku landa yimue osapalalo peka liatavo esanda oco yi linge Onjango Yusoma ci lomboloka oku litenga vefendelo lietavo liaco?

Olombangi via Yehova ka via siatele oku ci linga. Pole, oku landa yimue osapalalo katavo esanda ka ci lomboloka oku litenga vefendelo liaco. Ci lomboloka ondando yimue yi lingiwa lika vonjanja yimosi. Ekongelo Liolombangi via Yehova vi kasi pocitumãlo caco ka va kasi oku kuatisa atavo koku tunga osapalalo yaco oco ovimunga viosi viatavo vi fendelelemo.

Oku litenga vefendelo lietavo liesanda ci lomboloka nye ku Yehova? Konomuisa onumbi ya eciwa lupostolo Paulu, una wa popia hati: “Ko ka kutiwili kokanga ka ya lisokele kumosi lava ka va tavele. Momo esunga leci hesungako ci kutiwila ndati pamosi? Utanya u livala ukamba we lowelema? Okulinala kue ku kala pokati ka Kristu la Beliale? Pamue ekuta lie li kasi pokati kukuetavo lu hokuetavoko? Onembele ya Suku yi tava ndati koviteka? . . . Oco tundi pokati kavo, litepi lavo. Oco ca popia Ñala. Leci ca vĩha ko ka ci lambi. Kuenje ndu tambuli.” (2 Va Korindo 6:​14-17) Nye Paulu a yonguile oku vangula lolondaka “pamosi” kuenda oku “livala ukamba”?

Vondaka yoku kala pamosi Paulu a tukula, mua kongela oku fendela kuenda oku lingila kumosi ovopange atiamẽla kespiritu la vakuakufendela oviteka kuenda vana okuti havakuetavoko. Eye wa lungula omanu vo kofeka yo Korindo oco va yuvule “oku lia . . . komesa yolondele.” (1 Va Korindo 10:​20, 21) Omo liaco, oku litenga vefendelo liesanda ci lomboloka oku fendela kumosi, ale oku livala ukamba lovisoko viatavo esanda. (Etundilo 20:5; 23:13; 34:12) Eci onjo ale osapalalo yimue yocisoko cetavo liesanda yi landiwa, ci sukiliwako lika onjo yaco okuti noke yi kala Onjango Yusoma. Pole, osimbu handi Akristão vocili ka va fetikile oku lingilamo olohongele viavo, va sukila okupamo ovina viosi viatiamẽla ketavo liesanda. Noke yoku linga cosi ci sukiliwa, onjo yaco yi tumbikiwa ku Yehova locimãho coku u fendela. Ka kuli oku livala ukamba ale oku likongela pamosi lefendelo liocili kuenda liesanda.

Poku vangula lavo eci catiamẽla kondando yaco, ombangulo yaco te yi teta onimbu okuti, yitiamẽla lika koku landa onjo yaco. Vamanji vana vatiamẽla kekongelo Liakristão va sukila oku patekela olondaka vielungulo liupostolo Paulu wa popia hati: “Ko ka kutiwili kokanga ka ya lisokele kumosi lava ka va tavele.” Ocili okuti, etu ka tua velelepo omanu vana vatiamẽla katavo akuavo, pole tu yuvula lika oku litenga lomanu vaco ale oku vetiyiwa oku fendela kumosi vetavo liavo liesanda. a

Onumbi yipi yi sangiwa Vembimbiliya yatiamẽla koku fetela osapalalo yimue yocisoko cetavo liesanda? Kueci catiamẽla koku lukala onjo yimue, mua kongela oku vangula olonjanja vialua lomanu vana vatiamẽla kocisoko caco cetavo liesanda. Omo liaco, Akristão va sukila oku yuvula oku linga ocina caco. Ndaño okuti ovo va yongola oku lukala osapalalo yaco oco va lingilemo ohongele yimue onjanja yimosi, ocisoko cakulu vekongelo va sukila oku kuama olonumbi viokuti: Anga hẽ vokati ale kosamua yosapalalo yaco muka kala oviñumañuma vimue omanu va siata oku fendela kuenda olondimbukiso vina viatiamẽla ketavo liesanda? Ndamupi omanu va kasi pocitumãlo vaka tenda oku kala kuetu volosapalalo viaco? Anga hẽ, tuka kokela ocilondokua ku vamanji vamue omo liolosapalalo viaco? (Mateo 18:6; 1 Va Korindo 8:​7-13) Akulu vekongelo, va sukila oku konomuisa ovina viosi via kongelamo oco va nõlepo onjila yina yi taviwa la vosi pokati kavo. Ovo va kuete oku kapako eci ca sunguluka kokuavo leci ca sunguluka komanu vosi va kasi vekongelo poku kũlĩhĩsa eci va yongola oku landa kuenda eci catiamẽla koku pongolola osapalalo yimue oco yi linge Onjango Yusoma.

[Etosi pombuelo yemẽla]

[Elitalatu kemẽla 30]

Osapalalo eyi okuti ya kala onembele, ya landiwa kuenje ya pongoluiwa Onjango Yusoma