“Kali Lovituwa Via Sunguluka Pokati Ka Vakualofeka”
“Kali Lovituwa Via Sunguluka Pokati Ka Vakualofeka”
“Sumbili omanu vosi. Soli vakuẽle.”—1 PETULU 2:17.
1, 2. (a) Nye ca popiwa la umue ukuavikanda viasapulo catiamẽla Kolombangi via Yehova? (b) Momo lie Olombangi via Yehova vi likolisililako oku lava olonumbi viatiamẽla kovituwa viwa?
VANYAMO amue a pita konyima, umue ukuavikanda viasapulo wo kolupale luo Amarillo kofeka yo Texas Estados Unidos yo Amerika, eci a konomuisa atavo a litepa a sangiwa vofeka yaye, wa lombolola eci a sanga vatavo aco. Eye wa komõha calua eci a sanga ocimunga cimue cetavo ci kuete ovituwa via litepa. Eye wa popia hati: “Vokuenda kuanyamo atatu, nda siata oku endaenda kolohongele viofeka Violombangi via Yehova via lingiwila Volupale Luo Amarillo. Osimbu nda kala oku ñuala ñuala kuenda oku vangula lavo, ndeya oku limbuka okuti, ka kua kaile omunu la yumue osipa, la yumue o yulula ongalafa yo servenja, ale pamue yu o vangula olondaka vimue vi lekisa etombo ku Suku. Ovo va liyelisile ciwa, va lekisa ovituwa viwa, va wala uwalo umue wa sunguluka, kuenda va lekisa ekalo limue liwa okuti lalimue eteke nda li muĩle.” Handi vali, olondaka evi vioku pandiya Olombangi via Yehova, via siata oku sandekiwa. Momo lie Olombangi via Yehova via siatela oku pandiyiwa lomanu vana okuti ka va lilongisa Embimbiliya?
2 Ocili okuti, omanu va Suku va siata oku pandiyiwa omo liovituwa viavo viwa. Ndaño okuti omanu cilo ka va kasi oku pokola vali kolonumbi via tumbikiwa, Olombangi via Yehova via velisapo calua olonumbi viatiamẽla kovituwa viwa okuti vi va lingila ndocina cimue ci kisikiwa kokuavo momo catiamẽla kefendelo liavo. Ovo va kũlĩha okuti ovilinga viavo viwa, vi eca esivayo ku Yehova kuenda ku vamanjavo Akristão. Handi vali, ovituwa viavo viwa ovio vi sukiliwa kondaka yocili va kasi oku kunda. (Yoano 15:8; Tito 2:7, 8) Omo liaco, tu tali ndomo tu pondola oku amamako loku lekisa ovituwa viwa oco Yehova a sivayiwe Lolombangi viaye kuenda ndomo tu pondola oku kuatisiwa poku ci linga.
Epata Liakristão
3. Kovina vipi epata Liakristão li sukila oku teyuiwa?
3 Konomuisa ovituwa viwa tu lekisa vepata lietu. Elivulu limue lia sonehiwa la Gerhard Besier kuenda Erwin K. Scheuch, li lombolola ndoco: “[Olombangi via Yehova] via kapako ocikele cavo coku lekisa utate umue u likasi kepata liavo.” Uvangi owu wocili muẽle. Omo liohele yi kasi koloneke vilo, epata li sukila oku li teyuila lutate wocili. Kuli omãla valua okuti, ka va siatele oku “pokola kolonjali viavo,” pole, kulivo akulu vamue okuti, “ka va kuete ocikembe,” okuti pamue “ka va tẽla oku likandangiya.” (2 Timoteo 3:2, 3) Apata a linga ocitumãlo covitangi ndeci, pokati kulume lukãi, olonjali vi lipenya, vi lekisa etombo lekambo liesumbilo koku lipekela, oku litipula, ale kowesi woku tekula omãla vavo, kuenda omãla va sinila olonjali viavo, oku limba vupuepue, oku sipa eliamba, ale oku tila konjo yolonjali. Ovina viosi via tukuiwa ndeti, vi tunda ‘kovituwa vĩvi violuali lulo.’ (Va Efeso 2:1, 2) Etu, tu sukila oku teyuila epata lietu kovituwa viaco violuali. Ndamupi tu pondola oku ci linga? Tu pondola oku ci linga poku kapako elungulo lia Yehova kuenda olonumbi vieciwa laye kuava va tunga epata lietu.
4. Ovikele vipi Akristão vepata va li kuetele pokati?
4 Akristão olohueli, va pondola oku limbuka okuti va sukila oku likuatisa pokati kovina va sukila kespiritu kuenda ekuatiso lio ketimba. (1 Va Korindo 7:3-5; Va Efeso 5:21-23; 1 Petulu 3:7) Akristão vana okuti olonjali, va kuete ocikele cinene coku tata ciwa omãla vavo. (Olosapo 22:6; 2 Va Korindo 12:14; Va Efeso 6:4) Omo liaco, eci omãla vaco va linga akulu, va limbukavo okuti va sukila oku tẽlisa ovikele viaco. (Olosapo 1:8, 9; 23:22; Va Efeso 6:1; 1 Timoteo 5:3, 4, 8) Oco ovikele viaco vi tẽlisiwe, epata li sukila oku likolisilako calua loku lekisa ocisola kuenda oku liketisa kutima. Ocili okuti, nda vosi vakuepata va pokola kovikele viavo va tambula ku Suku, okuti va livetiya pokati kavo, ekongelo li pondolavo oku sumũlũha calua. Ca velapo vali enene ceci okuti nda va ci linga, ovo va sivaya Yehova Suku, Usovoli wepata.—Efetikilo 1:27, 28; Va Efeso 3:15.
Ukamba Wocili u Sangiwa Pokati Kakristão
5. Onima yipi tu pondola oku tambula kakamba vetu Akristão?
5 Omo okuti Tuakristão, tu kuetevo ovikele vioku kuatisa vakuetu vekongelo, kuenda ‘vakuetu va sangiwa kolonepa viosi violuali.’ (1 Petulu 5:9) Ukamba wetu la vamanji va sangiwa vekongelo u pondola oku tu kuatisa oco tu kuate uhayele kespiritu. Eci tu likongela la vakuetu Akristão, tu sanjuka calua lolondaka viavo vievetiyo kuenda okulia kuespiritu tu tambula ku tunda ‘kukuenje wa kolelua haeye wa lunguka.’ (Mateo 24:45-47) Nda tu kuete ovitangi, vamanjetu va sandiliya oku tu kuatisako lolonumbi vi sangiwa Vembimbiliya. (Olosapo 17:17; Ukundi 4:9; Tiago 5:13-18) Eci tu kambela cimue, vamanjetu ka va tu yanduluka. Omo liaco, hesumũlũhokuolio tu pondola oku tambula omo lioku panga onepa kocisoko ca Suku!
6. Ndamupi upostolo Paulu a lekisa okuti tu kuete ovikele vioku kuatisa vakuetu va sangiwa vekongelo?
6 Etu, ka tu kasilili lika vekongelo oco tu tambule, pole tu kasililimovo oco tu ece ku vakuetu. Omo liaco, Yesu wa popia hati: “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Upostolo Paulu wa vetiya ocituwa coku eca eci a soneha ndoco: “Tu sokololi ndomo tu tẽla oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo [tu] lete okuti eteke [liesulilo] li kasi ocipepi.”—Va Heveru 10:23-25.
7, 8. Ndamupi tu pondola oku lekisa ocituwa coku eca ku vakuetu vekongelo kuenda Kakristão va sangiwa kolofeka vikuavo?
7 Vekongelo, tu ‘kakatela kesapulo lielavoko lietu,’ eci tu likolisilako oku eca atambululo kapulilo a lingiwa vokuenda kuohongele, ale ceci tu kuata onepa kovipama via sokiyiwa. Oku likolisilako kuetu, ku pondola oku vetiya calua vamanjetu. Etu tu pondolavo oku kolisa vakuetu poku vangula lavo eci handi ohongele ka ya fetikile kuenda kesulilo liayo. Otembo eyi oyo tu sukila oku kuatisa layo vana va hongua, loku lembeleka ava va sumua kuenda oku kuatisa ava va vela. (1 Va Tesalonike 5:14) Ocili okuti, Akristão vakuacili oco va siata oku linga okuti va eca ekuatiso ku vakuavo. Omo liaco, eli olio esunga lieci vana va siata oku enda kolohongele vietu viekongelo onjanja yatete va siatela oku komõha calua omo liocisola ovo va siata oku muĩla pokati ketu.—Osamo 37:21; Yoano 15:12; 1 Va Korindo 14:25.
8 Pole, ocisola cetu ka tu ci lekisa lika ku vamanjetu tu kasi lavo vekongelo limuamue. Ocisola cetu tu ci lekisa ku vamanjetu va sangiwa voluali luosi. Omo liaco, eli olio esunga lieci Volonjango viosi Viusoma mu sangiwila olokasia vioku kapa olombanjaile. Ci tava okuti, Onjango yetu Yusoma ya fina calua, pole tua kũlĩha okuti, kuli Akristão valua va sangiwa kolofeka vikuavo, ka va kuete ocitumãlo cimue ciwa muna va pondola oku li sanga oco va fendele Yehova. Eci tu kapa Olombanjaile vietu volokasia vina vi sangiwa Vonjango Yusoma, tu lekisa ocisola cetu ku vamanjetu ka va kuete ocitumãlo ciwa coku fendela ndaño okuti ka tua va kũlĩhĩle kocipala.
9. Momo lie Olombangi via Yehova vi li kuetele ocisola pokati?
9 Momo lie Olombangi via Yehova vi li kuetele ocisola pokati? Momo okuti, Yesu wa va tuma oku lekisa ocisola. (Yoano 15:17) Omo liaco, ocisola ovo va li kuetele pokati kavo, owo uvangi u lekisa okuti espiritu sandu lia Suku li kasi lavo ci kale omunu lomunu ale vocimunga. Ocisola catiamẽla ‘kepako liespiritu.’ (Va Galatia 5:22, 23) Osimbu Olombangi via Yehova viamamako oku lilongisa Embimbiliya loku endaenda kolohongele kuenda oku likutilila olonjanja viosi ku Suku, ocisola cavo ci livokiya vali calua ndaño va kasi voluali lulo okuti ‘ocisola comanu valua ca tepuluka.’—Mateo 24:12.
Oku Kala Ciwa Lomanu Vosi va tu Ñuala
10. Ocikele cipi tu kuetele omanu vosi va tu ñuala?
10 ‘Esapulo lielavoko lietu’ upostolo Paulu a tukula, li tu ivaluisa ovikele vikuavo tu kuete. Esapulo lieciwa, li lomboloka upange woku kundila olondaka viwa viusoma komanu vana okuti handi ka va lingile vamanjetu Akristão. (Mateo 24:14; 28:19, 20; Va Roma 10:9, 10, 13-15) Upange waco woku kunda olondaka viwa, watiamẽlavo kocituwa coku eca. Oco tu pange onepa kupange waco, tu sukila oku sokiya otembo, ongusu, eliangiliyo, oku lipindisa etu muẽle, kuenda oku eca ovokuasi etu. Omo liaco, upostolo Paulu wa soneha ndoco: “Ñuete ofuka yocikundi ci kola coku kundila va Helasi lolongoya, kuenda vakualondunge lava ka va kuete olondunge. Oco ndi livelela oku u kundilivo ondaka yiwa ene vu kasi vo Roma.” (Va Roma 1:14, 15) Ndeci upostolo Paulu a linga, etu ka tu lohukuiko okuti ka tu pondola oku feta “ofuka” yaco.
11. Ovinimbu vipi vivali Viovisonehua vi tu kuatisa kueci catiamẽla kukamba loluali? Pole, nye tu sukila oku kũlĩhĩsa lutate wocili?
11 Anga hẽ, tu kuetevo ocikele coku kundila omanu vana okuti ka va tavela handi kolondaka viwa? Tu kuete. Tua kũlĩha okuti, ‘oluali luosi lu kasi povaka Eliapu. (1 Yoano 5:19) Tua kũlĩhavo olondaka Yesu a popia viatiamẽla kolondonge viaye hati: “Ovo havakualualiko ndeci ame siukualualiko.” (Yoano 17:11, 15, 16) Ocili okuti, etu handi tu kasi voluali, momo ovina viosi tu sukila komuenyo wetu omo vi tunda kuenda omo tua siata oku sanda upange weteku. Omo liaco, tu kuete ovikundi voluali. Vipi hẽ ovikundi viaco? Upostolo Petulu wa tambulula epulilo liaco. Eci kua kambele lika otembo yitito oco o Yesusalãi yi kunduiwe, upostolo Petulu wa sonehela ukanda Kakristão va kala kofeka yo Asia Menor. Kuenje, ukanda waco u pondolavo oku tu kuatisa oco tu lunguke lukamba wetu loluali.
12. Ndamupi Akristão va linga “akombe, haivo ovingendeleyi,” kuenda ovina vipi ovo va sukila oku yuvula?
12 Upostolo Petulu, poku fetika lukanda waye wa popia hati: “A vakuacisola, ndu vetiyi ndakombe kuenda ndovingendeleyi, siti, Yuvuli oloñeyi vietimba, vina vi yaka lutima.” (1 Petulu 2:11) Akristão vocili, va linga “akombe, haivo ovingendeleyi,” konepa yespiritu, momo va kuete elavoko lioku kala otembo ka yi pui. Olombuavekua kespiritu vika kala oko kilu, kuenda “olomeme vikuavo,” vi kuete elavoko lioku kala otembo yenda hũ vofeka yelau palo posi. (Yoano 10:16; Va Filipoi 3:20, 21; Va Heveru 11:13; Esituluilo 7:9, 14-17) Pole, ci popiwa hẽ ndati kueci catiamẽla kolonjongole vietimba? Volonjongole viaco vietimba mua kongela ovina ndeci: Onjongole yoku kala ohuasi, oku kũlĩhĩwa calua lomanu, oloñeyi viukahonga, ‘onya,’ kuenda ‘ocipululu.’—Va Kolosai 3:5; 1 Timoteo 6:4, 9; 1 Yoano 2:15, 16.
13. Ndamupi olonjongole vietimba “vi yaka lutima [wetu]”?
13 Ocili okuti, olonjongole vietimba “vi yaka lutima [wetu].” Ovio vi pondola oku nyõla ukamba wetu la Suku kuenda vi kapa elavoko ‘liomuenyo’ wetu kohele. Nda tu kuete onjongole yoku linga cimue cavĩha, ndamupi tu pondola oku ‘eca atimba etu ndocilumba ci kasi lomuenyo, haico ci kola, okuti ci sanjuisa Suku’? Nda tua kuatiwa lonjongole yoku kuata ovokuasi alua, ndamupi tuka ‘sandiliya tete usoma’ wa Suku? (Va Roma 12:1, 2; Mateo 6:33; 1 Timoteo 6:17-19) Tu sukila oku kuama ongangu yiwa ya Mose, una wa tila olonjongole violuali lulo kuenje tuka pitisa kovaso upange wa Yehova komuenyo wetu. (Mateo 6:19, 20; Va Heveru 11:24-26) Eli olio esunga lieci tu sukilila oku lunguka lukamba woluali.
‘Oku Kala Lovituwa Viwa’
14. Momo lie etu Tuakristão tu sukilila oku likolisilako koku lekisa ovituwa viwa?
14 Onjila yikuavo yi kuete esilivilo liocili okuti oyo tu sukila oku kuama, yi sangiwa volondaka vikuavo viupostolo Petulu wa popia hati: “Kali lovituwa via sunguluka pokati ka vakualofeka, okuti, nda vo lundili ndolondingaĩvi, va mola ovilinga viene viwa, kuenje va sivaya Suku veteke liepasulo.” (1 Petulu 2:12) Etu Tuakristão, tu sukila oku likolisilako calua loku lekisa ovituwa viwa. Kosikola tu tangela, tu sukila oku lekisa ombili yocili koku lilongisa. Kupange wetu tu talavaya, tu sukila oku lekisa ongangu yiwa ndomo tu linga upange waco, okuti tu kala vakuacili, ndaño okuti cime cetu o molẽha ndomunu umue ka sungulukile. Volonjo vina okuti ulume ale ukãi ka lilongisa Embimbiliya, alume vana okuti Olombangi via Yehova ale akãi, va sukila oku likolisilako calua loku pokola kolonumbi Viakristão. Ka ca lelukile oku pokola kolonumbi viaco, pole tua kũlĩha okuti ovituwa vietu viwa vi sanjuisa Yehova, vi pondolavo oku koka omanu vana ka va lingile handi Olombangi via Yehova..—1 Petulu 2:18-20; 3:1.
15. Ndamupi tua kũlĩha okuti ovituwa viwa Violombangi via Yehova vi kasi oku limbukiwa voluali luosi?
15 Oku litunda ciwa Kuolombangi vialua via Yehova koku lekisa kuavo ovituwa viwa, ku limbukiwila kovovangi a siata oku sandekiwa vokuenda kuanyamo. Ndeci, ukanda umue wasapulo wo kofeka yo Italia wa lombolola ndoco: “Omanu vana va siata oku talavaya Lolombangi via Yehova kupange umuamue, va lombolola hati, Olombangi via Yehova olonalavayi vimue via sunguluka calua. Ndaño okuti ovo va siata oku muĩwa ndomanu vamue va tekela calua ketavo liavo, pole ovo va sesamẽla esumbilo liocili omo lioku pandikisa kekolelo liavo loku lekisa ovituwa viwa.” Ukanda ukuavo wasapulo wo kolupale luo Buenos Aires kofeka yo Argentina wa popia ndoco: “Vokuenda kuanyamo kua limbukiwa okuti, Olombangi via Yehova vi kuetele ombili yocili kupange wavo, haloholuako, va kuete ovituwa viokuongotiya ovina viosi, kuenda omanu vamue okuti va sumbila Suku.” Ulume umue onoño wo kofeka yo Russia o tukuiwa hati, Sergei Ivanenko wa lombolola hati: “Olombangi via Yehova via kũlĩhĩwa ciwa voluali luosi, omo lioku pokola kuavo kovihandeleko kuenda koku sumbila kuavo ocihandeleko coku feta elisimu.” Ukãi umue mitavaso yocitumãlo cimue Olombangi via Yehova via lingilile ohongele yavo yofeka, wa popia hati: “Nda mõla Olombangi vimue via Yehova via kala oku nõla olopapelo posi kuenda oku yelisa volohondo viuhayele. Ocitumãlo caco ca yelisiwa ciwa okuti kosimbu ci sule. Omãla vavo va kuete ovituwa viwa. Cilo, ndi yongola okuti, oluali luosi lu yuka to Olombangi via Yehova.”
Epokolo Liakristão
16. Ukamba upi tu pondola oku kuata lolombiali, kuenda momo lie?
16 Upostolo Petulu wa lombololavo eci catiamẽla kekalo lietu liwa lolombiali. Eye wa popia hati: “Mekonda lia Ñala [Yehova], pokoli kovihandeleko viosi viomanu vakualomangu, ci kale kosoma yinene ndu wa piãla, ci kale kolonguluvulu via tumiwa losoma oku yambula olondingaĩvi loku sivaya olondingaiwa. Momo Suku wa panga okuti wimuli onumbi yaveke lovilinga viene viwa.” (1 Petulu 2:13-15) Tu eca olopandu vietu kolombiali omo liasokiyo ovo va siata oku linga. Kuenje, ndomo ca lekisiwa vonumbi yolondaka viupostolo Petulu, etu tu sukila oku pokola kovihandeleko violombiali kuenda oku feta elisimu. Ndaño okuti etu tu tava komoko Suku a eca kolombiali yoku yambula omanu vana va tomba ovihandeleko, esunga lia velapo lieci tu pokuila kolombiali “mekonda lia Ñala [Yehova].” Eci, oco ocipango ca Suku. Omo liaco, ka tu yongola okuti onduko ya Suku yetu yi sepuiwa eci tu pisiwa omo liocina cimue cĩvi tua linga.—Va Roma 13:1, 4-7; Tito 3:1; 1 Petulu 3:17.
17. Ekolelo lipi tu pondola oku kuata eci tu lambalaliwa ‘lomanu vana ka va sungulukile’?
17 Ci sumuisa calua ceci okuti, ‘omanu vana ka va sungulukile’ va kuete omoko yoku viala, va siata oku kuama olonjila viñi viñi vioku tu lambalala loku tu lundila eci ka tua lingile. Pole, votembo ya sokiyiwa la Suku, ‘ovohembi’ avo osi a siata oku kembuluiwa kuenda ‘olondaka viavo viesanda’ via siata oku imuha. Ovituwa vietu viwa vi li lekisa ovio muẽle. Eli olio esunga lieci olombiali olonjanja vialua via siatela oku tu pandiyila okuti etu tumanu vamue va siata oku lekisa ovituwa viwa.—Va Roma 13:3; Tito 2:7, 8.
Olondingupange Via Suku
18. Ndamupi etu Tuakristão tu pondola oku yuvula oku lavisa elisanjo lietu lioku linõlela eci tu yongola oku linga?
18 Upostolo Petulu o tu lungula hati: “Kali ndomãla vamãle, [kuenda] umãmãle wene ka u ko wihi omoko yoku linga akandu. Lingi ndakuenje va Suku.” (1 Petulu 2:16; Va Galatia 5:13) Koloneke vilo, ukũlĩhĩso wetu wocili Cembimbiliya wa tu yovola kolondotilina vietavo liesanda. (Yoano 8:32) Handi vali, tu kuete omoko yoku linõlela eci tu yongola oku linga kuenda tu kuete epondolo lioku ci linga. Pole, tu lunguki oco ka tuka lavisi elisanjo lietu lioku linõlela eci tu yongola oku linga. Kueci catiamẽla koku nõla akamba, ovowalo, ovitalukilo. Omo liaco, ndaño muẽle ceci catiamẽla kovikulia kuenda eci tu nyua, tu sukila oku ivaluka okuti, Akristão vocili olondingupange via Suku kuenda ka va sanjuisa lika olonjongole viavo muẽle. Omo okuti tua nõlapo oku vumba Yehova, ka tu yongola oku linga apika volonjongole vietimba lietu muẽle kuenda vieci catiamẽla kovina violuali.—Va Galatia 5:24; 2 Timoteo 2:22; Tito 2:11, 12.
19-21. (a) Ndamupi tu pondola oku tenda olombiali? (b) Ndamupi omanu vamue va siata oku lekisa ‘ocisola ku vamanjetu vosi’? (c) Ocikele cipi tu kuete okuti oco ci kuete vali esilivilo liocili?
19 Upostolo Petulu wamisako lolondaka viaye hati: “Sumbili omanu vosi. Soli vakuẽle. Sumbi Suku. Sumbili Soma.” (1 Petulu 2:17) Omo okuti Yehova Suku ecelela oco omanu va kale polomangu via velapo koku tumĩla, tu sukila oku lekisa kokuavo esumbilo limue lia sunguluka. Tu sukila oku likutilila catiamẽla kokuavo oco vi ecelele okuti tu amamako lombembua kupange wetu woku kunda lesumbilo liocili. (1 Timoteo 2:1-4) Pole, tu sukilavo oku lekisa ‘ocisola la vamanjetu voluali luosi.’ Olonjanja viosi tu likolisiliko loku yuvula ovina viosi vĩvi vina okuti, vi sumuisa vamanjetu Akristão.
20 Eci vofeka yimue yo vocifuka co Afrika mua kala uyaki wolonepele viapata, Olombangi via Yehova via lekisa ovituwa viavo viwa. Ukanda umue wasapulo wo kofeka yo Suíça wa lombolola ndoco: “Kunyamo wo 1995, Olo Direitos Humanos vo Afrika, via lekisa uvangi wokuti, atavo osi a panga onepa [kuyaki]. Pole, Olombangi via Yehova ovio lika ka via li tengelemo.” Eci kolofeka vimue kua pita ovisalu, Olombangi via Yehova vio kofeka yo Europa via tuma lonjanga yalua okulia lovihemba oco vi kuatise vamanjavo kuenda omanu vakuavo va sangiwa vofeka yaco okuti va pitavo lovitangi. (Va Galatia 6:10) Ovo va pokola kolondaka vielivulu Liolosapo 3:27, vi popia ndoco: “Ku ka likandangiye oku linga ohenda ava va yi sukila, nda o ci tẽla oku yi linga.”
21 Ndaño ndoco, etu tu kuete ofuka yovikele vikuavo vi kuete vali esilivilo liocili okuti ovikele tu kuetele olombiali ci sule kuenda via velapo ocisola cina tu lekisa ku vamanjetu. Ovikele viaco hẽ vipi? Upostolo Petulu wa popia hati: “Sumbi Suku.” Ofuka tu kuetele Yehova oyo ya velapo vali enene okuti eyi tu kuetele omanu yi sule. Anga hẽ eci ocili muẽle? Ndamupi tu pondola oku tepisa lutate wocili ovikele vietu ku Suku levi tu kuetele olombiali violuali lulo? Apulilo alo aka tambuluiwa vocipama ci kuãimo.
Handi Ocivaluka?
• Ovikele vipi Akristão va kuete vepata?
• Ndamupi tu pondola oku lekisa ocituwa coku eca vekongelo?
• Ovikele vipi tu kuetele omanu vosi va tu ñuala?
• Onima yipi yi pondola oku iyilila koku lekisa kuetu ovituwa viwa?
[Apulilo Elilongiso]
[Elitalatu kemẽla 19]
Ndamupi Akristão va pondola oku lekisa esanju liocili vepata?
[Elitalatu kemẽla 20]
Momo lie Olombangi via Yehova vi lekisila ocisola ku vakuavo?
[Elitalatu kemẽla 20]
Tu pondola hẽ oku lekisa ocisola ku vamanjetu ndaño ku vana okuti ka tua va kũlĩhĩle kocipala?