Momo Lie ca Tĩlila Oku Pinga Ongecelo?

KOSÃI Yevambi Linene yunyamo wo 2000, Asombisi vo kolupale luo Kalifornia kofeka yo Estados Unidos, va sinalele ukanda umue woku yovola omanu vosi vana va kala locitangi kombonge. Omo liaco, ovo va yonguile oku tala nda ovo va likolisilako oku lekisa ukamba kuenda oku pinga ongecelo komunu lomunu una ovo muẽle va kokelele ovitangi. Momo lie ca sukilile ocihandeleko caco? Momo, ovo va limbuka okuti eci ku pita ocitangi cimue, omanu ka va kuata utõi woku pinga ongecelo omo liusumba woku sima okuti, nda va ci linga ci lomboloka okuti va kuete ekandu kuenje ci pondola oku va tuala kesombiso. Handi vali, omanu vana va kala locisimĩlo cokuti va sesamẽlele oku va pinga ongecelo eci ku pita ocitangi caco, veya oku sumua calua kuenda ocitangi cina okuti ca kala citito ceya oku linga cinene.

Ocili okuti, ka ci sukila oku pinga ongecelo omo liocitangi cimue kua lingile. Ci tava okuti olonjanja vimue ci kuete esilivilo oku lunguka leci o vangula. Olusapo lumue luo kosimbu lua popia hati: “Pokati kolondaka via lua ka pa kambi ahuku, u puãi o pokuisa elimi liaye eye wa lunguka.” (Olosapo 10:19; 27:12) Handi vali, ove o pondola oku kala omunu umue uwa calua haeye oñuatisi.

Anga hẽ haciliko okuti omanu cilo va liwekapo oku pinga ongecelo, ndeci kovitangi vina  okuti ka vi sukila oku enda kombonge? Konjo ci tava okuti ukãi o liyeya hati: ‘Ulume wange lalimue eteke a pingele ongecelo.’ Kupange ci tava okuti umue cime o liyeya okuti: ‘Olonalavayi viange lalimue eteke via tavele okuti via lueya kuenda ca tĩla calua kokuavo oku pinga ongecelo.’ Kosikola ci tava okuti ulongisi o lombolola okuti: ‘Omãla ka va longisiwile oku pinga ongecelo.’

Limue esunga lieci omanu va siatela oku suma suma koku pinga ongecelo, usumba wokuti omanu vaco ka vaka tambulula ciwa. Omo lioku sima okuti nda omunu wa pinga ongecelo ka va ko tambulula ciwa, eye ci tava okuti pamue ka lekisa komunu waco eci ci kasi kutima waye. Omo liaco, ci tava okuti omunu una va kokela ocitangi caco o yuvula omunu wa linga ekandu liaco kuenje ka ci leluka oku liecela pokati.

Ci tavavo okuti ekambo lioku lekisa esakalalo lovisimĩlo via vakuetu olio esunga lieci omanu va siatela oku suma suma koku pinga ongecelo. Ovo va pondola oku sima ndoco: ‘Oku pinga ongecelo ka ku tiula konyima ekandu nda lingale.’ Omanu vakuavo ka va siatele oku pinga ongecelo omo liusumba woku kuata ovitangi vi pondola oku imilako. Ovo va yokoka calua loku sima okuti: ‘Nda hẽ nda ci linga ndi pondola oku kuata eko kuenda vaka ndi pinga oku potolola ocitangi caco?’ Handi vali, epela olio esunga lieci omanu ka va solele oku pinga ongecelo. Omunu umue o kuete epela okuti ka tẽla oku pinga ongecelo ale oku popia hati “ngecele,” o pondola oku sima okuti: ‘Si yongola oku pumba esumbilo liange omo lioku lekisa komanu okuti nda lueya. Kuenje, eci ci pondola oku lekisa komanu okuti ndahongua.’

Ndaño okuti kuli ovisimĩlo vialua, pole omanu valua va siata oku tenda olondaka vioku pinga ongecelo ndocina cimue ca tĩla calua. Anga hẽ oku pinga ongecelo ocina cimue ci sukiliwa muẽle? Oco hẽ, esumũlũho lipi li yilila koku pinga ongecelo?

[Elitalatu kemẽla 3]

“Omãla ka va pindisiwile oco va kuate ocituwa coku pinga ongecelo”

[Elitalatu kemẽla 3]

“Olonalavayi viange ka via siatele oku pinga ongecelo”

[Elitalatu kemẽla 3]

“Lalimue eteke ulume wange a pingile ongecelo”