Vosi Yetu tu Sukila Oku Pandiyiwa

ELI LIA kala eteke limue liwa komõla umue ufeko. Ndaño okuti olonjanja vimue eye wa endaenda oku tambula epindiso, pole veteke liaco eli, eye wa lekisa ovituwa vimue viwa calua. Vuteke noke yoku kapa vula omõla waco, inaye wa yeva oku litetela kuaye. Eci eye o pula esunga lieci a sumuila eye wa tambulua loku sukoka kumosi lasuẽlela hati: “Anga hẽ etaili lopo sa lekisile ovituwa viwa?”

Epulilo eli lia vala calua onjali kuenda lia kala soketi wa tetiwa lomoko. Eye wa kala onjali yimue okuti olonjanja vialua wa enda oku yayulako calua koku pisa omõla waye . Pole, cilo ndaño okuti eye wa limbuka elikolisilo liocili lia kafeko lioku seteka oku lekisa ovituwa viwa, inaye ka vanguile layimue ondaka yoku pandiya omo lielikolisilo liaco.

Kafeko u ndeti, hayeko lika wa sukila oku pandiyiwa kuenda oku lembelekiwa. Etu vosi tu sukila oku lunguiwa kuenda oku pindisiwa, tu sukilavo oku pandiyiwa kuenda oku lembelekiwa.

Tu liyeva hẽ ndati eci tu tambula komunu umue epandiyo lieciwa lutima wosi? Eci hẽ ka ci sanjuisa utima wetu? Ci tava okuti omo liepandiyo tu limbuka okuti omunu waco wa sola eci tua linga, ci lekaisa okuti ciwa kokuaye. Kuenje, eci tu limbuka okuti eci tua linga ci kuete esilivilo komunu waco, ci tu ĩha ombili yoku likolisilako calua oco tu amameko oku ci linga. Omo liaco, ka ci komohĩsa okuti epandiyo lieciwa lutima wosi, li tu vetiya oku livala ukamba lomunu una wa siata oku kuata epuluvi lioku popia olondaka vi vetiya.​—⁠Olosapo 15:⁠23.

Yesu Kristu wa kuata elomboloko liesukilo lieci catiamẽla koku kueca epandiyo. Yesu haeye Cime, volusapo luaye luatiamẽla kolokondu, wa pandiya lutima waye wosi apika vana vavali va kala vakuekolelo, poku popia hati: “Wa linga ciwa, vukuenje wocili, haive wa kolelua.” Eci ca nena esanju lialua! Ndaño okuti ovo va kala lepondolo kuenda oku fũla kua litepa, vosi yavo va tambula epandiyo lia lisoka.​—⁠Mateo 25:​19-23.

Omo liaco, tu konomuisi eci ca pita la ina ya kafeko. Etu ka tu sukila oku kevelela vakuetu toke eci va lila oco noke tu va pandiye. Pole, tu pondola oku likolisilako loku sandiliya apuluvi oku pandiya vakuetu, momo tu kuete esunga lialua lioku eca epandiyo lutima wetu wosi kapuluvi osi.